Rere Blong Lego Sam Samting Blong Yu Wan

Bill i gat waef mo ol pikinini, mo hem i gat raonabaot 50 yia, hem i wan nambawan man we i stap tijim ol man blong wokem ol bilding. Sikis manis evri yia, hem i pem prapa rod blong hem mo i spenem plante wik blong mekem plan blong bildim ol Haos Kingdom blong ol kongregesen blong ol Witnes blong Jeova. Emma we i gat 22 yia, hem i no mared mo hem i bin skulgud mo i nafgud blong mekem wan wok. Be hem i no ronem ol samting we hem nomo i wantem haremgud long hem, nogat. Defren olgeta, hem i spenem bitim 70 aoa evri manis blong givhan long ol man blong oli kasem save long Baebol. Maurice mo Betty, tufala i ritae. Be tufala i no tekem taem ya blong spel nomo, nogat. Tufala i muf i go long wan narafala kantri blong halpem ol man long kantri ya blong save stamba tingting blong God long saed blong wol ya.

OLGETA man ya oli no ting se oli spesel, no oli moa gud bitim ol narafala. Oli man olsem yumi nomo, we oli stap mekem samting we oli ting se i stret blong mekem. ?From wanem oli yusum taem, paoa, save, mo mane blong olgeta, blong givhan long ol narafala? Samting we i pusum olgeta, hemia bigfala lav we oli gat long God mo long ol man we i stap raonabaot long olgeta. Lav ya i pusum wanwan long olgeta blong lego sam samting we olgeta nomo i wantem.

?Be fasin ya blong lego sam samting we yumi nomo i wantem i minim wanem? Hem i no min se yumi mas gat wan laef we yumi mekem i strong tumas long yumi wan. I no minim tu se yumi mas lego evri samting we yumi wantem, mekem se yumi no moa haremgud mo yumi no moa glad long wan samting. The Shorter Oxford English Dictionary i talem se fasin blong lego sam samting we yumi nomo i wantem i min se “yumi livim ol samting we yumi nomo i intres long hem, fasin glad, mo ol samting we yumi nomo i wantem, nao yumi mekem narafala i haremgud.”

Jisas Kraes—Nambawan Eksampol

Jisas Kraes, we i stret Pikinini blong God, hem i nambawan eksampol long fasin blong lego sam samting we hem i gat. Bifo we hem i kam long wol ya, i sua se hem i gat wan laef we hem i haremgud tumas. Hem i gat wan gudfala fasin fren wetem Papa blong hem mo ol enjel. Mo tu, Pikinini blong God i yusum save we hem i gat taem hem i wok olsem “man we i mekem ol plan,” mo i mekem ol bigfala wok we i mekem hem i haremgud tumas. (Ol Proveb 8:30, 31) Tru ya, hem i bin gat wan laef we i gud tumas. Nomata sipos wan man long wol ya i rij olsem wanem, hem i no save kasem mak blong laef we Jisas i bin gat. Yes, Jisas i gat wan posisen we i hae mo i nambawan. Long heven, Jeova nomo i hae moa long Jisas.

Nating se i olsem, Pikinini blong God “i lego olgeta fasin ya, nao i kam olsem man blong wok nomo. Hem i bon long wol ya, i kam man. Hem i karem fasin blong man.” (Filipae 2:7) Hem i rere blong lego ol samting we hem i save harem gud long hem, nao i kam olsem man mo i givim laef blong hem olsem ransom sakrefaes blong tekemaot ol trabol we Setan i bin mekem. (Jenesis 3:1-7; Mak 10:45) Hemia i min se hem i mas laef long medel blong ol sin man, long wol ya we i stap long paoa blong Devel Setan. (1 Jon 5:19) I minim tu se hem i mas harem nogud mo kasem trabol. Be nomata wanem samting i hapen, Jisas i gat strong tingting blong mekem samting we Papa blong hem i wantem. (Matiu 26:39; Jon 5:30; 6:38) Samting ya i traem fulwan lav mo fasin blong stap tru we Jisas i gat long God. ?Olsem wanem? ?Hem i rere blong lego plante samting long laef blong hem? Aposol Pol i talem se hem “i mekem tingting blong hem i stap daon blong i obei long God gogo i ded. Mo hem i ded long fasin ya we ol man oli nilim hem long [“pos,” NW].”—Filipae 2:8.

“Tingting Blong Yufala i Mas Kam Stret Gud Wetem Tingting Blong Jisas Kraes”

Baebol i leftemap tingting blong yumi blong folem eksampol blong Jisas. Pol i talem long yumi i se: “Tingting blong yufala i mas kam stret gud wetem tingting blong Jisas Kraes.” (Filipae 2:5) ?Olsem wanem blong mekem samting ya? Wan rod, hemia blong ‘givgivhan long yumi long laef blong yumi. I nogud wan man i stap lukaot long laef blong hem nomo.’ (Filipae 2:4) Man we i gat trufala lav hem “i no save tingbaot hem nomo.”—1 Korin 13:5.

Plante taem, ol man we oli kea long ol narafala, oli soem se oli no tingbaot olgeta nomo. Oli bin mekem plante samting blong givhan long ol narafala. Be tede, i gat plante man we oli tingbaot olgeta nomo. Long wol ya, ol man oli gat tingting ya se, ‘mi fastaem.’ Yumi mas blokem tingting blong wol ya, from sipos hem i lidim ol fasin mo tingting blong yumi, bambae ol intres blong yumi wan oli kam impoten samting long laef blong yumi. Nao biaen, bambae fasin blong tingbaot yumi wan i lidim evri samting we yumi mekem—taem we yumi spenem, paoa, mo mane. From samting ya, yumi mas faet strong agensem tingting ya.

Samtaem, maet wan gudfala advaes i save slakem tingting ya blong lego sam samting we yumi nomo i wantem. Aposol Pita i luksave wanem we bambae i hapen long Jisas from fasin ya blong lego sam samting we hem nomo i wantem. Taswe hem i talem se: “Masta, God i mas blokem samting ya. Samting ya i no save kamtru long yu olsem.” (Matiu 16:22) Pita i faenem se i hadwok blong agri long tingting blong Jisas we i rere blong ded from hae rul blong Papa blong hem mo blong sevem ol man. Taswe hem i traem blong blokem Jisas blong i no folem rod ya.

‘Blokem Ol Samting We Yu Nomo Yu Wantem’

?Jisas i mekem wanem? Stori ya i talem se: “Be Jisas i tanemraon, i luk ol man blong hem, nao hem i tok strong long Pita, i talem se, ‘Setan. Yu gowe long mi. Tingting blong yu i no tingting blong God, i tingting blong man nomo.’” Biaen Jisas i singaot olgeta man wetem ol disaepol blong hem oli kam long hem, mo i talem se: “Man we i wantem kam biaen long mi, hem i mas blokem ol samting we hem nomo i wantem, nao i mas karem [“pos,” NW] blong hem, i mas biaen long mi.”—Mak 8:33, 34.

Samwe long 30 yia afta we Pita i givim advaes long Jisas, Pita i soemaot se hem i kasem save finis mining blong fasin ya blong lego sam samting we wan nomo i wantem. Hem i no stap leftemap tingting blong ol brata sista blong tekem isi rod mo mekem i gud long olgeta wan, nogat. Defren olgeta, Pita i talem strong long olgeta blong mekem tingting blong olgeta i rere blong mekem wok, mo blong oli lego ol fasin blong wol we oli bin gat bifo. Nating se oli kasem traem, oli mas putum wok blong God i stap fastaem long laef blong olgeta.—1 Pita 1:6, 13, 14; 4:1, 2.

Beswan rod we yumi save folem, hemia blong letem Jeova i bos long yumi, folem Jisas Kraes oltaem, mo letem God i lidim yumi long ol samting we yumi mekem. Pol i soem wan nambawan eksampol long saed ya. Tingting we hem i gat blong wok strong mo fasin tangkiu we hem i gat long Jeova, i pusum hem blong lego ol samting we hem nomo i wantem kasem long wol ya. Hem i lego ol rij samting we oli save pulum hem i gowe long ol samting we God i wantem hem blong mekem. Hem i talem se: “Mi mi glad blong lusum olgeta samting blong mi, mo laef blong mi tu,” blong mi givhan long narafala. (2 Korin 12:15) Pol i yusum save blong hem blong mekem moa man i kasem save long God, be i no blong ronem ol prapa intres blong hem wan.—Ol Wok 20:24; Filipae 3:8.

?Yumi save mekem wanem blong skelem gud yumi wan blong luk sipos yumi gat sem tingting olsem aposol Pol? Maet yumi wanwan i save askem ol kwestin ya se: ?Olsem wanem mi stap yusum taem blong mi, paoa blong mi, save blong mi, mo mane blong mi? ?Mi stap yusum ol samting ya mo ol narafala sas samting we mi kasem blong mekem ol samting we mi wan mi haremgud long hem, no mi stap yusum olgeta blong halpem ol narafala? ?Mi mi stap tingbaot blong joen fulwan long wok blong sevem laef, hemia blong talemaot gud nius, maet blong wok fultaem blong talemaot Kingdom? ?Mi save joen fulwan long ol wok olsem bildim no fiksimap ol Haos Kingdom? ?Mi mi stap tekem janis blong givhan long olgeta we oli nidim help? ?Mi stap givim beswan blong mi i go long Jeova?—Ol Proveb 3:9.

‘Man We i Stap Givim Presen i Go, Hem i Save Harem Gud Moa’

?Be, i rili waes blong lego sam samting we yumi nomo i wantem? !Yes, fasin ya i waes! From ol samting we oli hapen long laef blong hem, Pol i save se wan tingting olsem i save karem gudfala frut. Tingting ya i mekem we hem i harem gud tumas mo i givim bigfala glad long hem. Hem i eksplenem samting ya long ol elda long Efesas taem hem i mitim olgeta long Maelitas. Pol i talem se: “Mi mi soemaot long yufala long olgeta rod, we yumi mas hadwok olsem, blong givhan long olgeta we oli no strong. Mo yumi mas stap tingbaot tok ya we Jisas, Masta blong yumi, hem i talem long yumi. Hem i talem se, ‘Man we i stap givim presen i go, hem i save harem gud moa, i winim man we i stap kasem presen blong hem.’” (Ol Wok 20:35) Plante milian man oli faenem se taem oli folem tingting we vas ya i soem, samting ya i givim bigfala glad long olgeta naoia. Mo tu, long fiuja bambae oli glad tumas taem Jeova i givim pei long olgeta we oli putum ol intres blong hem mo intres blong ol narafala i stap fastaem long ol prapa intres blong olgeta wan.—1 Timoti 4:8-10.

Bill i stap wok strong blong givhan long ol narafala blong bildim ol Haos Kingdom. Taem oli askem long hem from wanem hem i traehad olsem, hem i talemaot se: “Mi glad tumas blong yusum waes mo save blong mi blong givhan long ol kongregesen we plante taem yumi ting se i smol nomo. Hem i wan blesing blong yusum save we mi gat blong givhan long ol narafala.” ?From wanem Emma i jusum blong yusum ful paoa mo save blong hem blong halpem ol narafala blong lanem ol trutok long Baebol? Hem i talem se: “Mi no tingbaot wan narafala samting bakegen we i moa gud. Taem mi mi yangfala mo mi gat janis yet, mi wantem mekem wanem we mi naf blong mekem blong Jeova i glad mo blong halpem ol narafala. Olgeta samting long saed blong bodi we mi lego, oli smol nomo. From we Jeova i mekem i gud tumas long mi olsem, mi traem bes blong mi blong mekem wanem we mi naf blong mekem.”

Maurice mo Betty, tufala i spenem plante yia blong lukaot long ol pikinini blong tufala mo ol samting we famle i nidim. Nating se i olsem, tufala i no sore se tufala i no bin gat wan laef we isi. Naoia we tufala i ritae finis, tufala i wantem mekem wan samting we i save givhan long ol narafala mo i gat moa mining long laef blong tufala. Tufala i talem se: “Mifala i no wantem gat wan laef we mitufala i sidaon nomo, we mitufala i no mekem wan samting. Mitufala i go long narafala kantri mo mitufala i givhan long ol man blong kasem save long Jeova. Samting ya i givim janis long mitufala blong gohed long wok we i givim mining long laef blong mitufala.”

?Yu yu gat strong tingting blong lego sam samting blong yu wan? Bambae i no isi blong mekem olsem. Oltaem yumi gat wan faet blong mekem. Long faet ya, yumi mas strong blong blokem ol samting we sin i stap pulum yumi blong mekem, mo yumi mas faet strong blong wantem mekem God i glad. (Rom 7:21-23) Be yumi save winim faet ya sipos yumi letem Jeova i lidim laef blong yumi. (Galesia 5:16, 17) I sua se bambae hem i tingbaot se yumi bin lego sam samting blong mekem wok blong hem mo bambae hem i blesem yumi bigwan. Yes, Jeova God bambae i ‘openem doa blong heven blong bambae ol blesing oli kamdaon long yumi mo bambae hem i givim olgeta samting ya long yumi gogo yumi no moa nidim.’—Malakae 3:10, NW; Hibrus 6:10.

[Tok blong pija long pej 23]

Jisas i gat tingting blong lego sam samting we hem nomo i wantem. ?Olsem wanem long yu?

[Tok blong pija long pej 24]

Pol i yusum olgeta paoa blong hem blong mekem wok blong talemaot Kingdom