?God i Wantem Se Yumi Talemaot Ol Sin Blong Yumi Long Wan Man?

Fasin blong talemaot ol sin long pris no wan man blong jos, i wan haf blong wosip we plante jos oli stap mekem. Be tede, plante man oli agri long enikaen fasin mo oli ting se rabis fasin i oraet nomo. Taswe, ?i stret yet blong talemaot ol sin long pris, no maet i no moa stret blong mekem olsem?

SAM man oli ting se i stret yet blong talemaot sin long wan man blong jos. Mo sam narafala, oli ting se i no moa stret blong mekem olsem. Tingbaot niuspepa ya blong Kanada, National Post. Hem i storian long saed blong wan man we i talem se, i no isi blong talem long wan man se yu mekem i no stret, be afta, “yu yu harem gud taem narafala i lesin long yu, mo i prea wetem yu mo i talem samting we yu mas mekem.” Be buk ya Bless Me, Father, for I Have Sinned, i talem toktok blong wan man se: “Fasin blong talemaot sin long pris i wan fasin blong jos we i nogud olgeta, i mekem man i wari tumas.” ?Baebol i talem wanem long saed ya?

?Baebol i Talem Wanem?

Long Loa we God i givim long neson blong Isrel, yumi save faenem ol advaes we oli talem samting we man i mas mekem taem hem i sin. Sipos wan man Isrel i mekem i no stret long wan narafala man no i brekem wan long ol loa blong God, hem i mas go luk wan pris we i laen blong Livae mo i mas talemaot sin blong hem. Hem i mas tekem wan anamol tu mo givim long pris, nao pris ya bambae i mekem sakrefaes long anamol ya i go long God blong tekemaot sin blong hem.—Levitikas 5:1-6.

Plante handred yia biaen, profet Natan i kam tok long Deved from sin we hem i mekem. ?Deved i mekem wanem? Kwiktaem nomo, hem i talem se: “Mi mi bin mekem wan samting we i nogud olgeta, i agens long Hae God.” (2 Samuel 12:13) Deved i prea tu, mo i krae long God blong i sore long hem. ?Wanem i kamaot from? Samtaem biaen, Deved i raetem se: “Ale, mi talem se, ‘Bambae mi talemaot sin blong mi long Hae God.’ Nao mi talemaot ol sin blong mi long yu, mi no moa haedem ol samting nogud we mi mi mekem. Nao yu yu fogivim mi, yu tekemaot ol sin blong mi.”—Ol Sam 32:5; 51:1-4.

God i wantem se ol Kristin long faswan handred yia, oli talemaot sin blong olgeta. Jemes, we hem i haf brata blong Jisas mo wan long ol man we i stap lidim kongregesen long Jerusalem, i pulum ol Kristin olsem se: “I gud yufala i stap taltalemaot ol sin blong yufala long yufala, mo i gud yufala i stap prea long yufala, blong bambae God i mekem yufala i gud bakegen.” (Jemes 5:16) ?Olsem nao, ol Kristin oli mas talemaot wanem sin, mo oli mas talemaot sin ya long hu?

?Bambae Yumi Talemaot Wanem Sin?

Evri dei, yumi sinman, yumi save mekem samting we yumi no tingting gud long hem fastaem, no maet yumi talem sam tok we i no stret, nao narafala i harem nogud. (Rom 3:23) From we i olsem, ?hemia i min se yumi mas talemaot evri sin we yumi mekem long wan man we jos i putumap hem, no wan man we hem i gat spesel wok ya blong harem sin we man i mekem?

Nating se olgeta sin i nogud long ae blong God, be hem i kasem save se yumi mestem from we yumi kasem sin long Adam mo Iv, nao hem i sore long yumi. Yes, man we i raetem Ol Sam i talem se: “Hae God . . . ?Sipos yu yu stap raetemdaon ol sin blong mifala, hu bambae i save stanap long fes blong yu, we yu yu no save jajem hem? Be yu yu stap fogivim mifala, yu stap tekemaot ol sin blong mifala, nao mifala i stap bodaon long yu, mifala i stap ona long yu.” (Ol Sam 130:3, 4) Ale, ?yumi mas mekem wanem taem yumi mestem nao yumi sin agens long narafala, we maet yumi no minim blong mekem olsem? I gud yumi tingting bakegen long prea blong Jisas. Hem i tijim ol man blong hem blong oli prea olsem se: “Yu fogivim mifala from ol sin blong mifala, from we mifala i stap fogivim ol man we oli mekem i nogud long mifala.” (Luk 11:4) Yes, God bambae i fogivim yumi sipos yumi askem samting ya long hem, long nem blong Jisas.—Jon 14:13, 14.

Sipos yumi wantem se God i fogivim yumi, i gud blong tingbaot wan narafala samting we Jisas i talem. Hem i se, yumi mas fogivim olgeta we ‘oli mekem i nogud long yumi.’ Aposol Pol i talem bakegen long ol man we oli bilif se: “Yufala i mas mekem i gud long ol Kristin brata mo sista blong yufala, mo yufala i mas kaen gud long olgeta. Mo yufala i mas fofogivim yufala, olsem we long Kraes, God i fogivim yufala finis.” (Efesas 4:32) Sipos yumi fogivim narafala from mastik blong olgeta, be yumi tu, yumi save se God bambae i fogivim yumi.

?Be olsem wanem long ol bigfala sin, olsem fasin blong stil, fasin we man i minim nomo blong giaman, fasin blong slip olbaot, fasin we man i dring blong lusum hed, mo ol narafala nogud fasin bakegen? Wan man we i mekem wan long ol nogud fasin ya, i stap brekem loa blong God mo hem i sin agensem God. ?Olsem wanem? ?Hem i mas talemaot sin blong hem?

?Yumi Mas Talemaot Sin Long Hu?

God i no givim raet long ol man blong oli fogivim sin we wan man i mekem agensem Hem. Hem nomo i gat raet blong fogivim sin. ?Be bambae yumi talemaot ol sin ya long hu? Baebol i talem klia long yumi se: “Sipos yumi talemaot ol sin blong yumi long God, yumi save bilif long hem, from we fasin blong hem i stret oltaem. Hem bambae i fogivim yumi from ol sin blong yumi, mo i tekemaot ol fasin blong yumi we i no stret, i mekem yumi klin.”—1 Jon 1:9.

From we God nomo i save fogivim ol sin, yumi mas talemaot ol sin ya long hem. Yumi luk se Deved i mekem olsem. ?Be yumi mas mekem wanem blong God i fogivim sin blong yumi? Baebol i talem long yumi se: “Yufala i mas tanem tingting blong yufala from ol sin blong yufala, mo yufala i mas luk long God blong hem bambae i tekemaot ol sin blong yufala.” (Ol Wok 3:19) Yes, God bambae i save fogivim sin, sipos man i luksave se hem i mekem sin mo i talemaot sin ya. Be i no hemia nomo, man i mas lego nogud fasin ya tu we hem i stap mekem. Plante taem i had moa blong lego nogud fasin. Be i gat rod blong winim samting ya.

Tingbaot ol tok we disaepol Jemes i talem bifo se: “I gud yufala i stap taltalemaot ol sin blong yufala long yufala, mo i gud yufala i stap prea long yufala, blong bambae God i mekem yufala i gud bakegen.” Afta we Jemes i talem ol tok ya, hem i gohed i talem se: “Taem we stret man i prea, prea blong hem i gat paoa, mo i save karem plante frut.” (Jemes 5:16) Long vas 14, Jemes i talem se “stret man” ya i minim “ol elda blong jos.” Long Kristin kongregesen, i gat olgeta we oli bigman long saed blong spirit, hemia “ol elda.” Wan long ol wok we ol elda i mas mekem, hemia blong givhan long ol man we oli wantem se God i fogivim olgeta. Ol elda ya oli no save tekemaot sin blong ol man. I no gat wan man long wol ya we God i givim raet long hem, blong i fogivim sin blong wan man we i sin agensem God.a Be from we ol elda oli strong long saed blong spirit, oli save givim advaes mo stretem man we i mekem wan bigfala sin. Olsem nao, man ya i save luksave se sin ya i nogud tumas mo i mas tanem tingting blong hem from.—Galesia 6:1.

?From Wanem Yumi Mas Talemaot Ol Sin Blong Yumi?

Nomata se sin we man i mekem i bigwan no i smol nomo, be i spolem fasin fren we hem i gat wetem ol man mo wetem God. Taem God i mekem yumi, hem i putum ol samting we Loa blong hem i talem, i stap finis long tingting blong yumi. From samting ya, taem yumi mekem sin, bambae yumi harem nogud mo wari from. (Rom 2:14, 15) ?Long taem olsem, yumi save mekem wanem?

Bakegen long buk blong Jemes, yumi save faenem ol toktok ya we i leftemap tingting blong yumi se: “?I gat wan long yufala we i sik? I gud hem i singaot ol elda blong jos blong oli kam luk hem. Nao olgeta oli save prea long hem, mo oli save kafsaedem oel i go long hem long nem blong Masta blong yumi. Mo prea blong man we i bilif bambae i hilim sikman ya. Masta blong yumi bambae i mekem bodi blong hem i strong bakegen, mo sipos hem i bin mekem sam sin, Masta blong yumi bambae i fogivim hem from.”—Jemes 5:14, 15.

Long ples ya bakegen, God i singaotem ol elda, blong oli givim ol samting we sipsip i nidim. ?Bambae oli mekem samting ya olsem wanem? Ol elda oli no lesin nomo long sin we man i talemaot long olgeta. From we man ya i sik long saed blong spirit, oli mas mekem wan samting blong mekem sikman ya “i strong bakegen.” I gat tu samting we Jemes i talem se ol elda ya oli save mekem.

Faswan se, oli “kafsaedem oel.” Hemia i minim Tok blong God we i gat paoa blong mekem man i kam gud bakegen. Aposol Pol i eksplenem se: “Tok blong God i wan samting we i laef, mo i stap wok. . . . Tok blong God i save jajem olgeta tingting blong man, mo ol samting we man i wantem long tingting blong hem.” Yes, Tok blong God i save kasem tingting mo hat blong man. (Hibrus 4:12) Taem ol elda oli yusum gud Baebol, oli save givhan long man we i sik long saed blong spirit blong i luksave stamba blong problem blong hem. Mo oli givhan long man ya blong luksave samting we hem i mas mekem tu, blong stretem ol samting ya long fored blong God.

Afta, i gat “prea blong man we i bilif.” I tru se prea blong ol elda bambae i no jenisim rul we God i gat long saed blong stret fasin. Nating se i olsem, ol prea ya oli impoten long ae blong God. From sakrefaes blong Kraes, God i wantem tumas blong fogivim sin. (1 Jon 2:2) God i rere oltaem blong givhan long man we i tanem tingting blong hem tru, mo we ‘i mekem ol fasin we i soemaot we hem i tanem tingting blong hem finis.’—Ol Wok 26:20.

Maet yumi mekem i no stret long narafala, no maet yumi sin agensem God. Be bigfala risen from wanem yumi talemaot ol sin blong yumi, hemia blong yumi gat wan gudnem long fes blong God. Jisas Kraes i soemaot se i gud we fastaem yumi go stretem wanem problem we yumi gat wetem narafala blong yumi fren gud bakegen, nao biaen yumi save wosipim God we tingting blong yumi i no trabol nating. (Matiu 5:23, 24) Ol Proveb 28:13 i talem se: “Sipos yu stap traem haedem ol sin blong yu, bambae yu no save win long laef blong yu. Be sipos yu tanem tingting blong yu, nao yu talemaot ol sin ya blong yu long Hae God, mo yu gowe long olgeta, hem bambae i gat sore long yu.” Taem yumi stap daon, aninit long han blong Jeova God, mo yumi askem hem blong i fogivim yumi, bambae hem i glad long yumi mo long taem we i stret, hem bambae i leftemap yumi.—1 Pita 5:6.

[Futnot]

[Tok blong makem poen long pej 12]

Sipos yumi askem God blong i fogivim yumi long nem blong Jisas, bambae hem i tekemaot sin blong yumi

[Tok blong pija long pej 13]

Bigfala risen from wanem yumi talemaot ol sin blong yumi, hemia blong yumi gat wan gudnem long fes blong God