Folem Fasin Blong Jeova—God Blong Yumi We i Mekem i Sem Mak Nomo Long Olgeta Man
“God i stap mekem i sem mak nomo long olgeta man.”—ROM 2:11.
1, 2. (a) ?Wanem plan blong Jeova long saed blong nesen blong Kenan? (b) ?Wanem sam samting we Jeova i mekem, mo wanem kwestin i stanap from?
LONG yia 1473 B.K.T., ol man Isrel oli stap long bigfala levelples blong Moab. Narasaed long Jodan Reva, i gat bigfala wok yet i stap wet long olgeta. Moses i talemaot toktok blong Jeova se bambae hem i mekem Isrel i winim ol seven bigfala nesen blong ol man Kenan we oli stap long Promes Lan. Nao ol man Isrel oli stap lesingud long Moses we i leftemap tingting blong olgeta i se: ‘Jeova i putum olgeta ya long han blong yufala, mo bambae yufala i winim olgeta evriwan.’ Ol man Isrel oli no mas mekem promes blong stap gud wetem ol narafala nesen ya, mo oli no mas sore long olgeta.—Dutronome 1:1; 7:1, 2.
2 Be, taem Isrel i girap agensem faswan taon long Promes Lan ya, Jeova i sevem wan famle we i stap long taon ya. Mo long fo narafala taon bakegen, God i protektem sam man. ?From wanem God i sevem ol man ya? ?Ol stori ya we oli soem se Jeova i sevem sam man Kenan oli tijim yumi wanem long saed blong Jeova? ?Olsem wanem yumi save folem fasin blong hem?
Oli Harem Nius Blong Paoa Blong Jeova
3, 4. ?Wanem ol nius we oli mekem sam man long Kenan oli tingting, mo wanem gudfala samting i kamaot from?
3 Bifo we ol man Isrel oli go insaed long Promes Lan, oli wokbaot long draeples blong 40 yia. Long olgeta yia ya, Jeova i lukaotgud long olgeta mo i halpem olgeta blong faetem ol enemi blong olgeta. Long saot blong Promes Lan, ol man Isrel oli faet agensem ol ami blong king blong Arad we i wan laen blong Kenan. Jeova i halpem ol man Isrel nao oli winim king ya mo ol ami blong hem long Homa. (Namba 21:1-3) Biaen, ol man Isrel oli wokbaot folem boda blong kantri ya Edom, oli go not kasem not-is saed blong Ded Si. Bifo i gat ol man Moab oli stap long ples ya, be taem ol man Isrel oli kamtru, i gat ol man Amoro. King blong ples ya, we nem blong hem Sihon, i no wantem letem ol man Isrel oli pastru long kantri blong hem. Ale oli mekem faet long Jahaj, hemia long not blong Anon Reva, mo long faet ya nao, King Sihon i ded. (Namba 21:23, 24; Dutronome 2:30-33) Go moa long not, long kantri ya Basan, i gat wan narafala king blong ol man Amoro, we nem blong hem Og. King Og i wan bigbigfala man be hem i no naf blong faet agensem Jeova. King ya i ded long faet long Edrei. (Namba 21:33-35; Dutronome 3:1-3, 11) Nius blong ol faet ya wetem ol narafala stori blong taem we Isrel i aot long Ijip, oli mekem sam man long Kenan oli tingting.a
4 Taem ol man Isrel oli krosem Jodan Reva i kam long Kenan, oli putumap ol haos tapolen blong olgeta long Gilgal. (Josua 4:9-19) I no longwe long ples ya i gat taon blong Jeriko. Wan woman Kenan, we nem blong hem Rehab, i harem nius blong ol bigbigfala wok blong Jeova. Nao hem i bilif mo i mekem samting blong soemaot bilif ya. Taswe, taem Jeova i spolem taon blong Jeriko, hem i sevem Rehab mo olgeta we oli stap long haos blong hem.—Josua 2:1-13; 6:17, 18; Jemes 2:25.
5. ?From wanem ol man Gibeon oli mekem plan blong giaman long ol man Isrel?
5 Biaen, ol man Isrel oli aot long ol ples raon long Jodan Reva oli go antap long ol bigbigfala hil blong kantri ya. Josua i folem ol tok blong Jeova, hem i putum sam soldia blong hem oli haed long narasaed blong taon ya, nao oli winim taon ya Eae. (Josua, japta 8) Nius blong ol samting ya i pulum plante king blong Kenan blong hivap wanples blong faet. (Josua 9:1, 2) Be ol man blong laen blong Hivi, long taon ya Gibeon, oli mekem i defren. Josua 9:4 i talem se “oli mekem plan blong kam giaman” long ol man Isrel. Olsem Rehab, ol man ya tu oli bin harem nius long saed blong Jeova se hem i karemaot ol man blong hem long Ijip mo i winim King Sihon mo King Og. (Josua 9:6-10) Ol man Gibeon oli luksave se sipos oli faet agensem Isrel bambae oli lus nomo. Ale oli sanem wan grup blong man i go long Josua we i stap long Gilgal. Ol man ya oli wokbaot long nem blong Gibeon mo tri narafala taon klosap long olgeta—hemia ol taon blong Kefira, Beherot mo Kiriatsearim. Oli giaman se ples blong olgeta i longwe. Trik blong olgeta i wok. Ale, Josua i mekem promes long olgeta se bambae oli no kilim olgeta. Be, tri dei biaen, Josua mo ol man Isrel oli faenemaot se ol man ya oli bin trikim olgeta. Nating se i olsem, oli mekem promes finis fored long Jeova se bambae oli no kilim olgeta ale oli holem promes ya. (Josua 9:16-19) ?Jeova i agri long samting ya?
6. ?Jeova i mekem wanem folem promes we Josua i mekem long ol man Gibeon?
6 Ol man Isrel oli yusum ol man Gibeon olsem ol man blong wok blong olgeta. Oli stap katem faeawud mo karem wota blong ol man Isrel mo blong “Olta blong Hae God tu” long haos tapolen. (Josua 9:21-27) Antap long hemia, taem faef king blong ol man Amoro oli kam wetem ol ami blong olgeta blong faet agensem ol man Gibeon, Jeova i mekem wan merikel. Hem i mekem ol bigfala ston blong aes oli folfoldaon oli kilim i ded plante man moa, i winim ol man we Josua olgeta oli kilim. Mo long taem ya tu Jeova i ansa long prea blong Josua, i mekem we san mo mun tufala i no muv gogo kasem we oli winim ol enemi blong olgeta. Biaen, Josua i talem se: “Neva bifo we oli luk wan samting olsem, we Hae God i harem tok blong man olsem. Mo i kam kasem tede, neva yumi luk wan samting olsem bakegen. I tru tumas se long taem ya, Hae God i stap faet long saed blong ol man [Isrel].”—Josua 10:1-14.
7. ?Wanem trutok we Pita i luksave long saed blong Jeova we i bin kamtru long sam man Kenan?
7 Woman Kenan ya, Rehab, mo famle blong hem, wetem ol man Gibeon tu, oli ona gud long Jeova mo oli mekem samting we i soem se oli ona long hem. Samting we Jeova i mekem long olgeta i soemaot se tok ya blong Kristin aposol Pita i tru nomo taem hem i se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.”—Ol Wok 10:34, 35.
Fasin We God i Mekem Long Ebraham Mo Isrel
8, 9. ?Olsem wanem fasin we Jeova i mekem long Ebraham mo nesen blong Isrel tu, i soem se Jeova i mekem i sem mak nomo long olgeta man?
8 Disaepol Jemes i tokbaot kaengud fasin blong God we long gladhat blong hem, hem i soemaot long Ebraham mo laen blong hem. Ebraham i kam “Fren blong God” from we hem i bilif, i no from laen, kantri no kala blong hem. (Jemes 2:23) Bilif mo lav we Ebraham i gat long Jeova i karem blesing i kam long olgeta pikinini biaen long hem. (2 Kronikel 20:7) Jeova i promes long Ebraham se: “Mi mi promes long yu se olgeta we bambae oli kamaot biaen long yu, bambae oli plante we plante. Bambae oli plante olsem ol sta long skae, mo olsem sanbij daon long solwota.” Be makemgud promes blong hem long nekis vas: “From laen blong yu, olgeta nesen long wol bambae oli blesem olgeta nomo. Hemia from wan samting nomo, from we yu yu obei long voes blong mi.”—Jenesis 22:17, 18, NW; Rom 4:1-8.
9 Jeova i neva mekem i gud moa long wan man i bitim narafala man. Fasin we hem i mekem long Isrel i soemaot wanem we hem i save mekem long ol man we oli obei long hem. Fasin ya i soem tu, olsem wanem Jeova i soemaot lav we i tru long ol man we oli bilif long hem. I tru, ol man Isrel oli olsem “nambawan man” blong Jeova. Be, hemia i no min se God i no save soem kaen fasin long ol narafala man long wol. (Eksodas 19:5; Dutronome 7:6-8) Yes, Jeova i karemaot Isrel long wok slef long Ijip mo from samting ya hem i talem se: “Long olgeta man long wol, be yufala ya nomo we mi mi jusumaot yufala blong yufala i man blong mi.” Be Jeova i yusum profet Amos mo sam narafala man bakegen, blong talemaot se hem i wantem givim wan gudfala fiuja long “ol narafala kantri ya tu.”—Amos 3:2; 9:11, 12; Aesea 2:2-4.
Jisas—Wan Tija We i Mekem i Sem Mak Nomo Long Olgeta Man
10. ?Olsem wanem Jisas i folem fasin blong Papa blong hem we i mekem i sem mak nomo long olgeta man?
10 Jisas i stret pija blong Papa blong hem. Mo taem hem i stap long wol hem i folemgud fasin blong Jeova we i mekem i sem mak nomo long olgeta man. (Hibrus 1:3) Long taem ya, wok blong Jisas i blong faenem “ol sipsip we oli lus” long ol laen blong Isrel fastaem. Be, hem i glad tu blong prij long wan woman Sameria klosap long wan wel. (Matiu 15:24; Jon 4:7-30) Mo tu, taem wan kapten blong ol soldia we i no man Isrel, i askem Jisas blong mekem wokman blong hem i kamgud bakegen, Jisas i mekem merikel long hem. (Luk 7:1-10) Hem i mekem ol samting ya antap long ol wok we hem i mekem blong soemaot lav long ol man blong God. Mo tu, ol disaepol blong Jisas oli prij long ol ples farawe. Yes, hemia i soemaot klia se Jeova i no blesem man folem kantri, kala no laen blong hem, be folem tingting we man ya i soem. Ol man we oli gat tingting daon, oli no gat tu fes, mo oli hanggri from trutok, hemia nao ol man we oli lesin long gud nius blong Kingdom. Defren olgeta, ol man we oli flas mo tingting blong olgeta i antap tumas, oli no laekem Jisas mo mesej we hem i talemaot. Jisas i talem se: “Papa, yu yu Hae God yu Masta blong olgeta samting long heven mo long wol. Mi mi talem tangkiu long yu, from we yu yu haedem ol samting ya long fes blong ol man we oli waes, mo ol man we oli skul gud, be yu soemaot olgeta long ol man we oli olsem smol pikinini nomo, blong oli savegud. Yes, Papa, hemia i wan samting we yu yu wantem.” (Luk 10:21) Taem lav mo bilif i gat paoa long ol fasin we yumi mekem long ol narafala, bambae yumi mekem i sem mak long olgeta man, from we yumi save se hemia nao fasin we Jeova i agri long hem.
11. ?Olsem wanem faswan Kristin kongregesen i soemaot fasin ya blong mekem i sem mak nomo long olgeta man?
11 Long faswan Kristin kongregesen, ol man Jiu wetem ol man we oli no man Jiu, oli sem mak nomo. Pol i eksplenem se: “Long olgeta ya we oli stap mekem ol fasin we i stret, God bambae i tekem olgeta oli go joen long gudfala laef blong hem long heven, i leftemap nem blong olgeta, mo i putum pis i stap wetem olgeta. Hemia tu bambae i kasem ol laen blong Isrel fastaem, mo biaen bambae i kasem ol narafala man ya tu, from we God i stap mekem i sem mak nomo long olgeta man.” (Rom 2:10, 11) Jeova i kaengud long olgeta ya from tingting mo aksin we oli mekem taem oli kasem save long Jeova mo hop we ransom blong Pikinini blong hem, Jisas, i givim, be i no from kantri no kala blong olgeta. (Jon 3:16, 36) Pol i raetem se: “I no bodi, mo sakomsaes long bodi we i makem wan man se hem i prapa man Jiu. Be samting we i stap insaed long man, hemia nao i makem se hem i prapa man Jiu. Mo hemia wan samting we loa i no save mekem, be tabu spirit nomo i save mekem long hat blong man.” Biaen, Pol i yusum sam tok we oli karem sem mining blong tok ya “Jiu” (we i minim “blong Juda” mo Juda i minim se ‘oli presem no leftemap nem blong hem’) blong talem se: “Man olsem, i no ol man we oli presem hem, be God nomo i presem hem.” (Rom 2:28, 29, NW ) Yes, Jeova i presem ol man, nomata wanem laen blong olgeta. ?Olsem wanem long yumi? ?Yumi stap mekem i sem mak?
12. ?Revelesen 7:9 i givim wanem hop, mo hop ya i blong hu?
12 Biaen, long wan vison, aposol Jon i luk ol tabu Kristin olsem wan nesen long saed blong spirit we namba blong hem i kasem 144,000. Hem i se, olgeta ya oli “kamaot long olgeta laen blong Isrel.” Afta long hemia, Jon i luk wan bigfala kampani blong man tu. Olgeta ya “oli kamaot long olgeta kala, mo long olgeta kantri, mo long olgeta laen, mo long olgeta lanwis. Olgeta oli werem waet klos, mo oli stap holem lif blong pamtri long han blong olgeta. Nao oli stap stanap long fran blong bigfala jea blong king, mo long fes blong smol Sipsip ya.” (Revelesen 7:4, 9) Taswe, ol Kristin kongregesen tede oli welkamem ol man blong enikaen kantri, kala, no lanwis. Ol man we oli gruap long olkaen laef oli save gat hop blong laef tru long “bigfala trabol” mo dring long “springwota ya we i save givim laef” long niufala wol.—Revelesen 7:14, 17.
Sam Gudfala Frut
13-15. (a) ?Wanem i save halpem yumi blong no tingting tumas long kala mo kalja we i defdefren? (b) Talem sam eksampol we oli soem gudfala frut we i kamaot taem yumi soem fasin blong fren gud wetem narafala.
13 Jeova i save gud yumi, olsem we wan gudfala papa i save gud ol pikinini blong hem. Long sem fasin, taem yumi soem intres long laef no kantri blong narafala, yumi kasem save long olgeta mo, plante taem, ol smosmol samting we i mekem se oli defren long yumi oli no moa impoten long tingting blong yumi. Yumi no moa tingbaot se oli blong wanem kantri no kala blong skin, ale, yumi frengud moa mo yumi lavem olgeta moa. Long rod ya nao yumi leftemap fasin joengud. (1 Korin 9:19-23) Ol misinari we oli go mekem wok long narafala kantri, oli soemaot gud fasin ya. Oli soem trufala intres long ol man blong kantri ya we oli go long hem. From samting ya, kwiktaem nomo ol misinari ya oli glad mo oli joengud wetem lokol kongregesen.—Filipae 2:4.
14 Fasin blong mekem i sem mak nomo long olgeta man i karem gudfala frut, mo yumi save luk samting ya long plante kantri. Aklilu i wan man Itiopia we i muv i go stap long bigfala taon blong Inglan, hemia London. Hem i no gat fren mo i harem nogud. Antap long hemia, ol man long taon ya oli no gat fasin blong welkamem olgeta we oli blong defren kantri. Hemia wan filing we yumi faenem long plante bigfala taon blong Yurop tede. !Be taem Aklilu i kam long wan Kristin miting long Haos Kingdom blong ol Witnes blong Jeova, hem i luk se ol man oli defren! Oli welkamem gud hem, mo kwiktaem nomo hem i harem gud. Hem i wokhad blong bildimap fasin tangkiu long God we i wokem yumi. I no longtaem biaen, hem i lukaot rod blong talemaot gud nius blong Kingdom long ol man long eria we hem i stap long hem. Yes, wan dei, taem brata we i prij wetem Aklilu i askem hem se wanem ol mak we hem i wantem kasem long laef, Aklilu i talem se hem i wantem tumas se wan dei i gat wan kongregesen blong ol man we oli toktok lanwis blong hem, hemia Amharik. Taem ol elda long Inglis kongregesen oli harem samting ya, oli glad blong mekem plan blong i gat wan pablik tok long lanwis blong Aklilu. Nius blong samting ya i pulum plante man oli kam blong joen long faswan miting long lanwis Amharik long Inglan. Tede, ol man Itiopia mo sam narafala man long eria ya oli gat wan kongregesen blong olgeta we i joengud mo i gohed blong gru. Plante long olgeta ya oli no letem wan samting i blokem olgeta blong stanap long saed blong Jeova mo tekem baptaes.—Ol Wok 8:26-36.
15 Fasin mo wei blong laef we ol man oli gruap long hem oli defdefren. Be i no ol samting ya we oli makemaot sipos wan man i hae moa no i daon moa. Nogat. Hemia i jes mekem nomo se ol man oli defdefren. Taem ol Witnes long aelan blong Malta oli wajem baptaes blong olgeta we oli givim laef blong olgeta i go long Jeova, oli glad we oli glad. Mo ol Witnes blong Inglan we oli stap long taem ya tu, oli krae from glad. Grup blong ol brata blong Malta mo grup blong ol brata blong Inglan, tufala tugeta i soem glad blong olgeta be long tu defren fasin. Nating se i olsem, tufala grup ya tugeta oli gat bigfala lav long Jeova mo samting ya nao i mekem se oli joengud olsem ol Kristin brata.—Ol Sam 133:1; Kolosi 3:14.
Sakemaot Ol Tingting We Oli Pulum Yumi Blong Jajem Narafala
16-18. Talem wan stori we i soemaot se man i save winim strong filing we hem i gat agensem narafala man taem hem i joen long Kristin kongregesen.
16 Taem lav blong yumi long Jeova mo ol Kristin brata i kam bigwan moa, bambae yumi naf moa blong tingbaot ol narafala long fasin we Jeova i tingbaot olgeta. Ale yumi save sakemaot sam rong tingting we maet fastaem yumi gat long ol man blong wan kantri, kala, no kalja. Tingbaot eksampol blong Albert. Hem i joen long ami blong Inglan we oli faet long Wol Wo Tu, mo long taem ya hem i kam presina blong ol man Japan taem olgeta ya oli winim Singapore long 1942. Biaen, hem i spenem samting olsem tri yia haf blong wokem rod blong ol tren, klosap long wanem we naoia plante man oli kolem brij blong Reva Kwai. Taem wo i finis mo hem i gofri, hevi blong hem i kasem 32 kilo nomo, bun blong maot mo nus blong hem i brok, hem i sik we i sik nogud from sitsit wota wetem blad, hem i gat ol ringwom, mo malaria. Plante taosen narafala presina olsem hem oli sik nogud moa, mo fulap oli ded. Ol rabis samting ya we Albert i luk mo i gotru long hem, oli mekem we taem hem i gohom long 1945, hem i wan man we hat blong hem i strong mo i konkon. Hem i no moa gat intres long God no skul.
17 Woman blong Albert, nem blong hem Irene, i kam wan Witnes blong Jeova. Ale, Albert i wantem mekem i gud long woman blong hem taswe i agri blong kam long wanwan miting blong kongregesen blong ol Witnes blong Jeova we woman blong hem i stap go long hem. Wan yangfala Kristin we i wan fultaem paenia, nem blong hem Paul, i visitim Albert blong stadi Baebol wetem hem. Sloslo, Albert i luksave se Jeova i jajem man folem samting we hem i luk long hat blong hem. Hem i givim laef blong hem i go long Jeova mo i baptaes.
18 Biaen, Paul i muv i go long London, i lanem lanwis Japan, mo i joen long wan kongregesen blong ol man Japan. Nao hem i mekem plan blong karem wan grup blong ol Witnes blong Japan oli wokbaot i go blong visitim kongregesen blong hem fastaem. Be ol brata blong kongregesen ya oli mekem Paul i tingbaot se Albert i no laekem nating ol man we oli kamaot long Japan from we hem i bin safa long kantri ya. I tru se afta we Albert i kambak long Inglan hem i stap longwe long eniman we i man Japan, taswe ol brata ya oli wari se bambae hem i harem olsem wanem sipos hem i luk grup ya blong ol brata blong Japan. Be oli wari blong nating nomo from we Albert i welkamemgud ol brata ya wetem Kristin lav, hemia trufala lav ya we i no gat mak blong hem.—1 Pita 3:8, 9.
“Go Moa”
19. ?Wanem advaes blong aposol Pol we i save givhan long yumi sipos yumi stap mekem i gud moa long samfala i bitim narafala?
19 Waes King Solomon i raetem se: “I nogud blong mekem i gud moa long sam man i bitim narafala man.” (Ol Proveb 28:21, NW ) I isi blong harem gud wetem ol man we yumi savegud olgeta. Be samtaem yumi no soem intres long olgeta we yumi no savegud olgeta. Fasin ya blong mekem i gud moa long wan man i bitim narafala, i no fasin blong wan man we i man blong Jeova. I gud we yumi evriwan i folem advaes ya blong Pol we i klia nomo se yumi mas “go moa” blong mekem fren wetem ol narafala. Yes, yumi mas go moa blong soemaot lav long ol Kristin brata sista blong yumi we oli blong ol defdefren ples.—2 Korin 6:13, NW.
20. ?Long wanem haf long laef blong yumi, yumi mas folem fasin blong Jeova, God blong yumi we i mekem i sem mak nomo long olgeta man?
20 Nating se yumi man we bambae yumi go long heven no yumi gat hop blong laef olwe long wol, fasin blong mekem i sem mak long evri man i save givhan long yumi blong stap glad mo joengud tugeta aninit long Man blong lukaot long sipsip. (Efesas 4:4, 5, 16) Sipos yumi traehad blong folem fasin blong Jeova, God blong yumi we i mekem i sem mak nomo long olgeta man, fasin ya i save halpem yumi long Kristin minista wok blong yumi, long famle blong yumi, mo long kongregesen blong yumi. Yes, gudfala fasin ya i save givhan long yumi long evri samting we yumi mekem long laef blong yumi. ?Olsem wanem fasin ya i givhan? Nekis stadi bambae i tokbaot samting ya.
[Futnot]
a I gat sam singsing long Baebol we oli tokbaot ol faet ya we Jeova i winim.—Ol Sam 135:8-11; 136:11-20.
?Bambae Yu Yu Ansa Olsem Wanem?
• ?Olsem wanem fasin we Jeova i mekem long Rehab mo ol man Gibeon i soem se hem i mekem i sem mak nomo long olgeta man?
• ?Olsem wanem Jisas i soem se hem i mekem i sem mak long olgeta man taem hem i tijim olgeta?
• ?Wanem i save halpem yumi blong winim enikaen nogud filing we maet yumi gat agensem ol man blong wan kantri no kala?
[Tok blong pija long pej 13]
Ol man Isrel oli stat blong tekova long kantri ya Kenan
[Tok blong pija long pej 15]
Jisas i no tingting se i tabu blong hem i prij long wan woman Sameria
[Tok blong pija long pej 16]
Wan pablik tok long lanwis Amharik long Inglan
[Tok blong pija long pej 16]
Lav we Albert i gat long Jeova i halpem hem blong fogetem strong filing we hem i gat agensem narafala man