Yu No Mas Luklukbak Long “Ol Samting Biaen”

“Man we i stap holem stik blong brebrekem graon long garen mo i stap luklukbak long ol samting biaen long hem, hem i no stret long kingdom blong God.”—LUK 9:62, NW.

?BAMBAE YU YU ANSA OLSEM WANEM?

․․․․․

?From wanem yumi mas “tingbaot woman blong Lot”?

․․․․․

?Wanem tri samting we yumi no mas tingbaot oltaem?

․․․․․

?Yumi mas mekem wanem blong muv i go fored wetem ogenaesesen blong Jehova?

 1. ?Jisas i talem wanem tok blong givhan long yumi blong lukaot gud? ?Tok blong hem i mekem yumi tingbaot wanem kwestin?

“YUFALA i mas tingbaot woman blong Lot.” (Luk 17:32) Klosap 2,000 yia bifo, Jisas Kraes i talem tok ya blong givhan long yumi blong lukaot gud. Tede tok ya i impoten moa blong folem i bitim ol narafala taem bifo. ?Jisas i talem tok ya blong wanem? Jisas i stap toktok long ol man Jiu we oli save gud samting we i hapen long woman blong Lot. Taem woman blong Lot i stap ronwe wetem famle blong hem, oli aot long taon ya Sodom, hem i no obei long Jehova. Hem i lukluk biaen. From samting ya, sol i kavremap hem, mo bodi blong hem i kam strong, i stanap olsem ston.—Ridim Jenesis 19:17, 26.

 2. ?Maet woman blong Lot i lukluk biaen from wanem? ?Mo wanem i hapen long hem taem hem i no obei long God?

² ?From wanem woman blong Lot i lukluk biaen? Maet hem i wantem luk wanem i stap hapen. Maet bilif blong hem i no strong, nao hem i ting se God i no save spolem taon ya. Maet hem i wantem gobak blong karem sam samting we hem i lego i stap long Sodom. (Luk 17:31) Nomata wanem samting i pulum hem blong lukluk biaen, hem i ded from we hem i no obei long God. !Yu traem tingbaot! Hem i ded long sem dei nomo wetem ol rabis man ya blong Sodom mo Gomora. Hemia nao from wanem Jisas i talem tok ya se: “Yufala i mas tingbaot woman blong Lot.”

 3. ?Jisas i talem wanem we i mekem i klia long yumi se yumi no mas lukluk biaen?

³ I no stret we woman blong Lot i luklukbak long ol samting biaen long hem. Long sem fasin, yumi no mas luklukbak long ol samting biaen long yumi. Hemia i min se yumi no mas tingbaot ol samting we yumi lego finis. Jisas i mekem poen ya i klia taem hem i toktok wetem wan man we i wantem biaen long hem. Man ya i wantem gobak fastaem long ples blong hem, blong talem tata long ol famle blong hem. Jisas i talem long hem se: “Man we i stap holem stik blong brebrekem graon long garen mo i stap luklukbak long ol samting biaen long hem, hem i no stret long kingdom blong God.” (Luk 9:62, NW) ?Olsem wanem? ?Ol tok blong Jisas i strong tumas, i no kaen? Nogat. Jisas i save se man ya i stap mekem eskius nomo, blong hem i no mekem ol wok we hem i mas mekem blong biaen long Jisas. Jisas i talem se man we i no mekem ol wok we God i wantem hem blong mekem, hem i stap luklukbak long “ol samting biaen long hem.” Taem man blong wokem garen i holem stik blong brebrekem graon, maet hem i luklukbak long ol samting biaen long hem smoltaem, no maet hem i lego stik blong hem blong i lukluk biaen. Sipos hem i mekem olsem, i min se wan samting i pulum tingting blong hem i gowe long wok we hem i mas mekem, mo hem i no moa mekem gud wok blong hem.

 4. ?Yumi mas putum tingting blong yumi i stap long wanem?

⁴ Yumi mas putum tingting blong yumi i stap long ol samting we bambae i kamtru long fiuja, i no long ol samting we i hapen finis. Baebol i talem klia long Ol Proveb 4:25 (NW) se: “Ae blong yu, i mas lukluk i go stret nomo. Yes, ae blong yu we i kliagud, i mas lukluk i go stret long fored.”

 5. ?From wanem yumi no mas luklukbak long ol samting biaen long yumi?

⁵ Risen from wanem yumi no mas luklukbak long ol samting biaen long yumi i impoten. ?Wanem risen ya? Yumi stap long “ol las dei.” (2 Tim. 3:1, NW) I no longtaem bambae God i spolem rabis wol ya fulwan, i no tu taon nomo. ?Yumi mas mekem wanem blong ol samting oli no pulum tingting blong yumi, olsem woman blong Lot? Yumi mas save wanem ya ol samting we oli stap biaen long yumi. (2 Kor. 2:11) Ale i gud yumi tokbaot ol samting ya we oli save pulum yumi blong lukluk biaen, mo wanem samting yumi save mekem blong no putum tingting blong yumi i stap long olgeta.

BIFO, LAEF I GUD

 6. ?From wanem yumi no mas tingbaot oltaem se laef blong bifo i moa gud?

⁶ Maet yumi ting se bifo laef i moa gud. Be ating yumi no tingbaot gud se bifo laef i olsem wanem. Maet yumi no luksave, be yumi stap ting se ol trabol we yumi kasem bifo oli no strong olsem tede, mo bifo yumi glad moa. Tru ya, maet yumi stap ting se bifo, laef i gud tumas. Be blong talem stret, laef blong bifo i no rili gud olsem we yumi stap tingbaot. Sipos yumi stap tingting olsem, ating bambae yumi wantem se laef blong yumi i olsem bifo. Be Baebol i talem se: ‘I nogud yu stap talem se, “?From wanem bifo ol samting i gud we i gud, i winim tede?” Hemia i no tok blong man we i gat hed ya.’ (Pri. 7:10) ?From wanem yumi save kasem trabol sipos yumi tingting olsem?

7-9. (a) ?Wanem i hapen long ol man Isrel taem oli stap long Ijip? (b) ?Ol man Isrel oli glad from wanem? (c) ?Ol man Isrel oli komplen from wanem?

⁷ Yu traem tingbaot samting we i hapen long ol man Isrel long taem blong Moses. Taem ol man Isrel oli go stap long Ijip, oli strenja long kantri ya. Afta we Josef i ded, ol man Ijip oli putum sam man oli bos long ol man Isrel, “blong fosem olgeta blong oli wok slef blong olgeta. Oli mekem olsem blong mekem tingting blong olgeta i foldaon.” (Eks. 1:11) Biaen, king blong Ijip i talem long ol man blong hem, blong oli kilim i ded olgeta pikinini boe blong ol man Isrel from we hem i no wantem se ol man Isrel oli kam plante tumas. (Eks. 1:15, 16, 22) Taswe Jehova i talem long Moses se: “Yufala ol laen blong Isrel, yufala i man blong mi, mo mi mi luk finis ol rabis fasin ya we ol man Ijip oli stap mekem long yufala. Mi harem krae blong olgeta ya we oli stap long Ijip, we oli wantem mi mi tekemaot olgeta long han blong ol man ya we oli stap fosem olgeta blong oli wok slef blong olgeta. Mi mi save finis we oli harem nogud tumas, mo oltaem mi stap tingting long olgeta.”—Eks. 3:7.

⁸ Yu traem tingbaot glad blong ol man Isrel taem oli aot long kantri ya Ijip, oli fri. Oli luk we Jehova i yusum paoa blong hem long nambawan fasin, taem hem i mekem ol Ten Panis oli kasem flas king ya Fero wetem ol man blong hem. (Ridim Eksodas 6:1, 6, 7.) Ale ol man Ijip oli letem ol man Isrel oli go fri. Be i no hemia nomo. Ol man Ijip oli wantem se ol man Isrel oli aot kwik long ples blong olgeta, mo oli givim plante gol mo silva long olgeta. Baebol i talem se ol man blong God oli “karem ol gudgudfala samting” blong ol man Ijip, oli go. (Eks. 12:33-36) Biaen, ol man Isrel oli glad taem oli luk Jehova i spolem Fero mo ami blong hem long Red Si. (Eks. 14:30, 31) !Ating afta we oli luk ol samting ya we Jehova i mekem, oli gat strong bilif!

⁹ Yumi sapraes se smoltaem afta we Jehova i mekem merikel, blong ol man Isrel oli go fri, ol man Isrel oli komplen. ?From wanem? !From kakae! Oli no glad long kakae we Jehova i givim long olgeta, nao oli talem se: ‘!Long Ijip, yes! Yumi stap kakae fis olsem we yumi wantem, we yumi no pem nating. Oltaem yumi stap kakae kukamba mo melen, mo salad, mo anian, mo lae we yumi no sot. !Yu luk! !Naoia yumi no moa strong nao! I no gat narafala kakae nating. !Evri dei nomo yumi stap kakae mana ya! !Yumi les long hem finis!’ (Nam. 11:5, 6) Oli stap ting se bifo laef i gud, be i no rili gud olsem we oli stap tingbaot. !From rong tingting blong olgeta, oli wantem gobak long kantri ya we oli wok slef long hem bifo! (Nam. 14:2-4) Ol man Isrel oli luklukbak long ol samting biaen long olgeta, mo Jehova i kros long olgeta.—Nam. 11:10.

10. ?Yumi lanem wanem long samting we i hapen long ol man Isrel?

¹⁰ ?Yumi lanem wanem long ol man Isrel? Taem yumi kasem trabol mo laef i had, yumi no mas ting se bifo laef i moa gud. Maet samfala oli stap tingbaot laef blong olgeta bifo we oli kam long trutok. I oraet blong tingbaot ol samting we oli hapen bifo we oli save tijim yumi, mo blong tingbaot sam gudfala taem. Be yumi no mas bitim mak, mo yumi mas tingbaot se laef blong bifo i olsem wanem stret. Sipos yumi bitim mak, bambae yumi harem nogud long laef blong yumi naoia, mo bambae yumi wantem gobak long laef blong yumi bifo.—Ridim 2 Pita 2:20-22.

OL SAMTING WE YUMI LEGO FINIS

11. ?Samfala we oli stap tingbaot ol samting we oli lego finis, oli harem olsem wanem?

¹¹ Sore tumas, samfala oli stap tingbaot ol samting we oli lego finis, mo oli sore we oli lego ol samting ya. Maet yu yu gat janis blong kasem hae edukesen, blong kasem haenem, mo plante mane. Be yu mekem desisen se bambae yu no traem kasem ol samting ya. Plante Kristin brata mo sista oli bin kasem bigfala mane from we oli man blong mekem bisnes, oli singsing, plei miusik no wan narafala samting olsem. Maet oli bin wok long edukesen, no oli man blong plei spot. Be biaen, oli lego ol gudfala wok ya. Naoia ol yia oli pas, mo en i no kamtru yet. ?Olsem wanem? ?Yu stap tingbaot se sipos yu no bin lego ol samting ya, bambae laef blong yu i olsem wanem?

12. ?Wanem tingting blong Pol long ol samting we hem i lego?

¹² Aposol Pol i lego plante samting blong i biaen long Kraes. (Fil. 3:4-6) ?Wanem tingting blong hem long ol samting we hem i lego? Hem i talem se: “Ol samting we Kraes i mekem from mi, ol fasin ya we bifo mi luk olgeta olsem we oli blong mekem mi mi win, naoia mi luk olgeta olsem we oli blong mekem mi mi lus nomo.” ?From wanem Pol i talem olsem? Hem i talem se: “Naoia mi luk olgeta samting blong laef blong mi bifo olsem samting blong mekem mi mi lus, nao mi lego olgeta blong mi save kasem samting we i moa gud olgeta, we mi mi save Jisas Kraes, Masta blong mi. Be from Kraes, mi mi sakemaot olgeta samting ya blong laef blong mi bifo. Mi luk olgeta olsem rabis nomo, blong mi save kasem Kraes.”a (Fil. 3:7, 8) Taem man i sakem ol doti, biaen hem i no harem nogud from ol doti ya we hem i sakem. Long sem fasin, Pol i no sore from we hem i lego gudfala wok we hem i save kasem long wol ya. Hem i luk olgeta olsem se oli nating nomo.

13, 14. ?Yumi save folem fasin blong Pol olsem wanem?

¹³ ?Olsem wanem sipos yumi stap tingting oltaem long ol samting we yumi gat janis blong mekem bifo? Yumi mas folem fasin blong Pol. ?Yumi mekem olsem wanem? Yumi mas tingbaot se ol samting we yumi gat naoia oli moa gud. Yumi fren gud wetem Jehova, mo hem i save yumi olsem man we i stap tru long hem. (Hib. 6:10) I no gat wan samting long wol ya we i moa gud bitim ol samting we Jehova i givim long yumi naoia, mo ol samting we bambae hem i givim long yumi long fiuja.—Ridim Mak 10:28-30.

¹⁴ Biaen Pol i tokbaot samting we i save givhan long yumi blong stap tru long God. Hem i talem se: “Mi mi fogetem olgeta samting we oli stap long bak blong mi, nao mi stap traehad oltaem blong kasem ol samting we oli stap long fes blong mi.” (Fil. 3:13) Yumi luk se Pol i tokbaot tu samting we yumi mas mekem. Faswan se yumi mas fogetem ol samting we yumi lego finis. Yumi no tingting tumas long ol samting ya, blong yumi no westem paoa mo taem blong yumi. Seken samting se yumi mas mekem olsem man we i resis blong win. Yumi mas traehad oltaem blong kasem mak we i stap long fored blong yumi. Yumi putum tingting blong yumi i stap long ol samting we bambae oli kamtru.

15. ?From wanem i gud we yu tingting dip long eksampol blong ol gudfala man blong God?

¹⁵ I gud yu tingting dip long eksampol blong ol gudfala man blong God long taem bifo mo tede. Eksampol blong olgeta bambae i givhan long yu blong go fored, i bitim we yu luklukbak long ol samting biaen. Sipos Ebraham mo Sera tufala i stap tingtingbak oltaem long taon ya Uru, “bambae oli gat janis blong gobak.” (Hib. 11:13-15) Be tufala i no gobak long Uru. Fastaem we Moses i lego Ijip, hem i lego plante samting, i bitim ol samting we ol man Isrel oli lego taem oli aot long Ijip. Baebol i no talem se Moses i wantem gobak from ol samting we hem i lego, be i talem se: “Hem i stap ting se sipos ol man oli laf long hem from Mesaea ya we God bambae i sanem hem i kam, be hem bambae i no save sem. Hem i harem gud moa long samting ya, i winim we i harem gud long ol gudfala samting blong laef long Ijip. Hem i mekem olsem from we oltaem hem i stap luk long pei we God bambae i givim long hem.”—Hib. 11:26.

OL NOGUD SAMTING WE OLI HAPEN LONG YUMI BIFO

16. ?Sam nogud samting we oli hapen, oli mekem yumi harem olsem wanem?

¹⁶ Maet sam nogud samting oli hapen long yumi long ol yia we oli pas. Maet yumi stap tingting tumas long ol sin mo mastik we yumi mekem bifo. (Sam 51:3) Maet yumi kros no yumi harem nogud yet from advaes we narafala i givim, we i stikim yumi. (Hib. 12:11) Maet yumi stap tingbaot wan taem we narafala i mekem i no stret long yumi, no yumi ting se hem i mekem olsem. (Sam 55:2) ?Wanem i save givhan long yumi blong no tingbaot ol samting ya oltaem? Bambae yumi tokbaot tri man we fasin blong trifala i save givhan long yumi.

17. (a) ?From wanem Pol i harem se hem i daon moa long ol narafala tabu Kristin? (b) ?Wanem i givhan long Pol blong i no harem nogud tumas, nao i lego wok blong God?

¹⁷ Ol mastik. Aposol Pol i harem se hem i daon moa long ol narafala tabu Kristin. (Efes. 3:8) ?From wanem hem i harem olsem? From we fastaem, hem i stap spolem kongregesen blong God. (1 Kor. 15:9) Ating tingting blong Pol i stikim hem bigwan taem hem i luk ol brata mo sista we bifo hem i mekem i nogud long olgeta. Be hem i no harem nogud tumas, nao i lego wok blong God. Nogat. Oltaem Pol i tingbaot se God i soemaot sore long hem mo i kaen long hem. (1 Tim. 1:12-16) From samting ya, Pol i glad long fasin blong God, nao hem i gohed blong mekem wok blong prij. Taem Pol i tokbaot ol samting we hem i wantem fogetem, hem i minim ol mastik blong hem tu. Yumi no save jenisim ol mastik we yumi mekem finis. Sipos yumi tingting tumas long olgeta, bambae yumi save kam taed. I moa gud yumi stap tingbaot we Jehova i sore long yumi, nao yumi yusum paoa blong yumi blong mekem wok blong Jehova naoia.

18. (a) ?Sipos oltaem yumi stap tingbaot ol advaes we yumi kasem long ol yia we oli pas, bambae yumi harem olsem wanem? (b) ?Yumi save mekem olsem wanem blong folem ol tok blong Solomon long Ol Proveb 4:13 (NW)?

¹⁸ Advaes we i stikim yumi. Maet yumi stap tingbaot ol advaes we ol narafala oli givim long yumi long ol yia we oli pas. Hemia i save mekem tingting blong yumi i foldaon, yumi kros, mo yumi harem se bambae yumi no moa traehad. (Hib. 12:5) Nating se yumi sakemaot advaes ya wantaem nomo, no yumi traem folem smoltaem ale yumi lego, hemia i sem mak nomo. Yumi no letem advaes ya i givhan long yumi. I moa gud yumi mekem wanem we Solomon i talem, i se: “Yu holemtaet fasin stretem. Yu no lego. Yu mas lukaotgud long fasin ya, from we hemia nao laef blong yu.” (Prov. 4:13, NW) Olsem man we i draevem trak i obei long ol saen we oli stap long rod, yu mas glad long ol advaes we narafala i givim long yu, yu mas folem, mo yu mas go fored.—Prov. 4:26, 27; ridim Hibrus 12:12, 13.

19. ?Yumi save mekem wanem blong soemaot bilif olsem Habakuk mo Jeremaea?

¹⁹ Man i mekem i no stret long yumi, no yumi ting se hem i mekem olsem. Maet yumi harem olsem profet Habakuk we i krae long Jehova from we hem i luk se i no gat stret fasin. Hem i no kasem save from wanem Jehova i letem sam samting i hapen we oli no stret. (Hab. 1:2, 3) Yumi mas soemaot bilif olsem profet ya. Hem i talem se: “Be nating we ol trabol ya i kasem yumi olsem, mi bambae mi stap harem gud yet from we Hae God i God blong mi, mo hem i stap sevem mi.” (Hab. 3:18) Wan narafala man we i bilif long God, hemia Jeremaea. Hem i talem se hem i “stap wet.” Yumi save mekem olsem taem yumi bilif fulwan long Jehova, se bambae hem i stretem olgeta samting, long taem we i stret. Hem i God blong stret fasin.—Krae 3:19-24, NW.

20. ?Yumi mas mekem wanem blong soemaot se yumi “tingbaot woman blong Lot”?

²⁰ Long taem blong yumi i gat plante samting oli stap hapen. Plante gudfala samting oli stap kamtru naoia, mo bambae i gat plante moa gudfala samting oli kamtru i no longtaem. Ogenaesesen blong Jehova i stap muv i go fored, mo yumi mas muv i go fored wetem ogenaesesen ya. Yumi mas folem advaes blong Baebol blong lukluk i go fored, yumi no luklukbak long ol samting biaen. !Olsem nao, bambae yumi soemaot se yumi “tingbaot woman blong Lot”!

[Futnot]