Sisi-hati

Uguñe weyu, wasagaruña buiti lídangiñe lani Hesusu sákürifisiu. Kei hénpulu, seremei lebegi esefuruni, feruduna lumuti Heowá wafigoun. Mama dǘgüdawarügüti luagu lun ladügüni, ladügünbalin ladüga busén lan (Sal. 86:5; 103:​3, 10-13). Añahein gürigia saminatiña madüna hamani lun feruduna lániña Heowá. Le linarün katei, ni aban wádangiñe madüna wamuti. Ariñagati apostolu Pábulu luougua: “Madünatina ni lun nanügǘn keisi apostolu”. Lárigiñe ábaya lariñagun: “Ítara nubéi guentó lugundun areidati Bungiu numa” (1 Ko. 15:​9, 10). Dan le wasakürihan lídangiñe figóu le wadügübei, feruduna lumutiwa Heowá. Ka uagu? Mama ladüga gadüna wamani lun feruduna lániwa, ladügünbalin ladüga wínsiñe lun. Ligíati, ánhawa asaminara madüna wamá lun feruduna lániwa Heowá, haritagua waméi mama lan houn gürigia mafigountiña líchigei lebegi esefuruni, ru lumuti houn gürigia gafigountiña ha asakürihabaña lídangiñe figóu (Luk. 5:32; 1 Tim. 1:15). w25.01 páh. 26, 27 pár. 3, 4

Mabafutiwa luagu le hariñagubei o le hadügübei amu, lau sun lira gayaraati wadügün lun maweiridagun lan katei. Ka katei buídutimabei lun wadügüni? Feruduna wamaniña ha achararubaña woun. Ka uagu? Ladüga línsiñe Heowá woun, ani busenti lun feruduna wamaniña amu. Ánhawa ígiraguagüda woungua lun igañi ua ligía feruduna wamaniña amu, wóuseruña kei ibidiougua tau ani ladügüña hamuga katei le lun lañawarihan wátuadi (Ari. 14:​17, 29, 30). Dan le mígiraguagüdün wamá woungua lun igarihabu, móuserun wamutiña amu lau luriban. Barüti giñe buiti woun, adügati lun wasigirun wabaruaguóun ani ábaya gunda lan wabagari. Kaba íderaguawa lun masandirun wamá igarihabu? Furumiñeti katei le gayaraabei wadügüni, wígirun lun lásügürün dan. Samina wamá luagu aban gürigia le súfurihalibei aban lanarime danaguaü. Lárigiñe lagaranihan surusia lun, mégeiti dan lun lareidagun. Ítarameme, mégeitiwa dan lun lagidarun igarihabu wawéi lúmati lun aranseñu wamá tídangiñe sun wanigi lun feruduna wamaniña ha achararubaña woun (Apur. 3:3; 1 Fe. 1:22). Wamuriaha luma Heowá lidan furíei lun líderaguniwa lun feruduna wamaniña ha achararubaña woun. w25.02 páh. 15-17 pár. 8-11

Laganagua arufudahani le, anihein “ligirún binadu igaburi le málati”, “afiñeni luagu Bungiu, arufudahani luagu badisei” luma luagu “hásaarun hilaaña lídangiñe óunweni” (Ebü. 6:​1, 2). Mosu hafurendeiruni kristiánugu inarünitiña sun arufudahani burí le. Ligía meha líridunbalin apostolu Féduru igaburi burí le houn saragu gürigia ha meha únbaña layanuha lidan fedu le Pentekosutesi (Adü. 2:​32-35, 38). Lun lani wamá Kristu disipulugu, mosu wafiñerun luagu arufudahani burí le. Le linarün katei, ariñagati meha Pábulu mala lan hafiñen ha máhabaña lun arufudahani luáguti águyuguni (1 Ko. 15:​12-14). Lau sun lira, moun lumuti wagufurumadun lau wafurendeiruni arufudahani ménrengunti burí le.Bóugudin luéi arufudahani ménrengunti le tídanbei Lererun Bungiu, anihein giñe ariñahani le dǘgüdati, le ídanbei wadarirei lilurudun Heowá luma adundehani le íderagubaliwa asubudirei ida liña lan ligaburi larihini katei. Lun wabuinchagüdüni wachügü lau ariñahani dǘgüdati le, mosu waturiahanu Bíbülia, wararamagun asaminara luagu le waliihabei tidan, winwan wameime le wafurendeirubei tídangiñe. Anhein wadüga sun lira, wafurendeiruba adügei katei kei línsiñe lun Heowá. w24.04 páh. 5 pár. 12, 13

Aritaguagüda lumuti Heowá lun Honasi lunti gudemehabu lan houn lílana Níniwe “óunwenbu uburugu le ñein habéi sügǘ hau san-wein-milu irahüñü ha machuugili hau” (Hon. 1:​1, 2; 3:10; 4:​9-11). Dan lárigiñe, yusu lumuti Hesusu hénpulu le hani gürigia ha níniwebaña ha asakürihabaña lun larufuduni richá lan Heowá ani gudemehabu ligía. Kaba ida aguseruni hásaara ha meha awinwandubaña Níniwe? Ayanuhati meha Hesusu luagu aban luwuyeri águyuguni, ariñagati: “Háguyuguba lun haguserawagüdün”, águyuguni le lasusereduba ámuñegü (Huan 5:​29, TNM). Layanuhaña meha luagu Larúeihan le lánina Milu Irumu, lídanme dan ligía, lásaaragüdübaña hilaaña, “dandu ha buídubaña kei ha wuribabaña” (Adü. 24:15). Ha wuribabaña “háguyuguba lun haguserawagüdün” ladüga dandu Heowá kei Hesusu híchuguba chansi houn gürigia ha lun harufuduni anhein gaganbadibaña lubéi luma anhein hafalarubei lubéi le hafurendeirubei. Ánhaña águyugua níniwena, ani maha hagíame lun háhuduragun lun Heowá, lasiadirubaña Heowá lun hounwen (Isa. 65:20). Gama lumoun, ánhaña áhuduragua lun Heowá, gayaraabei hawinwandun lun súnwandan (Dan. 12:2). w24.05 páh. 5 pár. 13, 14

Arihúati meha lidan ligaburi lóuserun Hesusu áyeiha lani lugudemehabu Lúguchi buidu buidu (Huan 14:9). Dandu meha lau le lariñagubei Hesusu kei lau le ladügübei, arufuda lumuti meha hínsiñe wamá lun Heowá, weiri lan lugudemehabu ani busén lan líderaguniwa lun wagañeiruni figóu. Adügati meha Hesusu lun busén hamá gafigountiña hasansirun luma lun hafalaruni (Luk. 5:​27, 28). Subudi lumuti meha Hesusu buidu buidu kaba lan meha asusereda lun. Ariñaga lumuti meha houn lani disipulugu saragu wéiyaasu lalugurúba lan ani ládarawaguba lan luagu aban wagabu (Mat. 17:22; 20:​18, 19). Subudi lumuti meha giñe lagidarubei lan lani sákürifisiu figóu ubouagugiñe. Arufudahati meha Hesusu lárigiñe lanme lounwen ñéinbaña lan ámuñegueinarügü gürigia ha adügagutiña houngua lánigume disipulu (Huan 12:32). Sun ha afiñerutiña luagu Hesusu ani áyeiha haméi ligaburi, gayaraabei hagundaaragüdüni Heowá luma hesefurún luéi “lugumadin figóu” (Rom. 6:​14, 18, 22; Huan 8:32). Arufudati ganigi lau aranseñu lan lun lounwen lidan aban luriban igaburi lun gayara lan lasuseredun lira (Huan 10:​17, 18). w24.08 páh. 5 pár. 11, 12

Samina humá ida liña lan hasandiragun hungua dan le haturiahanbarun Bíbülia. Furendeitün hínsiñe humá lun Heowá, ani busén lan lun hádangiñe humá liduheñu ha áhuduragubaña lun, furendeitün giñe füramase lan lagumuchuba lan lau igarigu luma lau asufuriruni sunsuinagubei, ani lídanme iseri ubóu, láguyuguagüdübaña lan hiduheñu lídangiñe óunweni (Mar. 10:​29, 30; Huan 5:​28, 29; Rom. 8:​38, 39; Aruf. 21:​3, 4). Sun burí inarüni le, chülüti tidoun hanigi (Luk. 24:32). Aba línsiñedun arufudahani tídangiñeti Bíbülia le hafurendeirubei hun ani busentün meha habahüdaguni houn sun gürigia (ariha huméi giñe Heremíasi 20:9). Anhein hínsiñe lubéi inarüni le tídanbei Bíbülia woun tau sun wanigi, chóuruti, busenbadiwa lan wabahüdahani houn amu (Luk. 6:45). Ítara liña wasandiragun woungua kei disipulugu ha lánina furumiñeti sígulu, ha ariñagubaña: “Wagía, siñati wámanichun lau katei le ariha wamaalibei luma le aganba wamaalibei” (Adü. 4:20). Hínsiñeti inarüni woun saragu darí lun busén wamá wabahüdahani houn sun gürigia ha wayara w24.05 páh. 15 pár. 5; páh. 16 pár. 7.

Wagía le lubúeingu Heowá, apurichihatiwa ladüga hínsiñe lan Wáguchi le siélubei woun ani busentiwa lun hasubudiruni ha híbiri gürigia. Lau sun lira añahein ha masandiraguntiña houngua buidu lidan apurichihani. Ka uagu? Ladüga añahein hádangiñe haburitiña ani mafiñentiña hawougua. Añahein amu, mínsiñeti houn houdin hábiñe gürigia magunbirahóunga. Añahein giñe hanufudetiña luéi maha hamá gürigia heresibiruniña. Háfuga añahein giñe amu arufudahóuaali houn hábiñe lun masigenehan hamá. Hénrenguti houn lun hanügüni uganu buiti houn gürigia ha ibidiñetiña houn. Hénrenguti san hun hasandiragun hungua buidu lidan apurichihani? Anhein ítara liña lubéi, mábürühala harüna. Másiñati ladüga lan ǘnabugu humá hasandiragunbei hungua ítara ani mabusenrúntün hawachahani arihini huouguoun ni hasigenehan. Lanwoun lira, úati gürigia unti línsiñeda ladügün lun hasandiragun amu houngua wuriba, dántima le láluguña lan líderaguniña. Gunfuranda lumuti Húguchi le siélubei buidu buidu ka lan turobuli úmabei hagagibudagua ani busenti líderagunün (Isa. 41:13). w24.04 páh. 14 pár. 1, 2

Éibume haliinu Bíbülia lunti hadügüni asansiruni le hemegeirubei aban lárigiñe aban, mama lun hadügüni súngubei lidan aban. Aningira aban adundehani: adüga humá aban lísüta lau burí katei le habusenrunbei habuiduragüdün lidan higaburi, anúadira humá aban o biama le lunbei hetenirun lun furumiñe ani ígira huméi le líbiri lubá amu dan. Halíagiñeba san hagumesera? Furumiñe, teni humá lun le ménrenguntimabei o le mégeitima hubéi habuiduragüdün. Danme le subudi humaali halíagiñeba lan hagumesera, áluaha humá ariñahani tidan wani agumeiraguagüdüni. Furíei humá lun Heowá ani amuriaha humá luma lun líchugun “lubuidun aritaguni hun” luma lun líderagunün lun hadügüni katei kei labusenruni (Fili. 2:13). Lárigiñe, winwan huméi le furendei humaalibei. Chóuruti danme lan harihini lubuidun lidin hun, línchahabadün katei le lun hubaruaguóun humá lidan amu asansiruni le lunbei hadügüni según lísüta to adüga humaaruboun. w24.09 páh. 6, 7 pár. 13, 14

Másiñati wuriba lan basandiragun bungua luagu katei wuribati le meha badügübei le adügübei damichi houn amu gürigia. Ka gayaraabei badügün? Amuriahabá ferudun tídangiñe sun banigi ani adügabéi sun biyaraati lun baranseruni damichi le meha badügübei. Amuriahabá luma Heowá lun líderaguniña ha asufurirubaña ladüga le badügübei. Líderagubadibu Heowá íderagua láañame ha asufurirubaña lun habaruaguóun hamá luma lun ñein lan darangilaü haganagua. Furendeibá lídangiñe bichara ani ígiraba lun layusurunibu Heowá kei aubei labusenra. Haritaguabei le ladügübei profeta Honasi. Lubaragiñe lidin Níniwe, kei lariñaguni Heowá lun, aba lanurahan lidoun amu fulasu. Arihagüda lumuti Heowá lichara lun ani furendeiti lídangiñe katei le (Hon. 1:​1-4, 15-17; 2:​7-10). Yúsumeme lumuti Heowá Honasi, ábaya líchugun aban chansi lun lun lidin Níniwe, ani gaganbaditi lun Heowá ani aba lidin. Íbini wuriba lan lasandiragun Honasi lungua luagu le meha ladügübei, mígirunti lun ladügün katei le lun magunfulirun lan lau dasi le líchugubei Heowá lun (Hon. 3:​1-3). w24.10 páh. 8, 9 pár. 10, 11

Mama ferudunarügü lumuti Heowá dúeiti lánina figóu, gumuguagüda lumuti giñe. Adügati le lun wasaminarun luagun aban gürigia le áfiuragubalin dúeiti le bürüwañubei tuagu aban gárada. Lau sun fiúwaguaali lan dúeiti ligía, arihúamemegili atirimémeñein lan. Ligíati, mama layanuhóuña luagu láfiurawagun aban dúeiti, layanuhóuña luagu lagidarún sunsuinagubei. Lun gunfuranda wamani katei le, haritagua waméi lidan lan meha tidaani Bíbülia, yúsuati aban luwuyeri meha tinta le adügǘbei lau lamigisirun garubun, aban katei badibaditi, luma duna. Ligíati, ménrengunti meha laboraadúniwa le abürüdǘbei láurügü tásügürawagüdün aban mudusi dǘdübeletu luéigiñe. Ligía dan le lubéi meha laboraadúniwa aban dúeiti, gumuguati sunsuinagubei. Kei meha merede lubéi nírügü lárigirugu, úaali meha gayaraati larihini le meha bürüwañubei ñein. Ítara liña meha kamá hamuga úagubeiti dúeiti ligía. Ma inarüni weiri lan eteingiruni le wasandirubei lau wasubudiruni dan le lan feruduna lani Heowá wafigoun, merede lan nírügü lárigirugu? (Sal. 51:9). w25.02 páh. 10 pár. 11

Anhein chará lubéi lisaminan aban gürigia wawagu o lóuseruniwa wuriba, chouru wamuti subudi lani Heowá ka lan inarünibei. Íderagua lumutiwa ichouruni le awandei marichaü, lugundun subudi wamuti laransehabei lan Heowá turobuli burí le lidan lidaani. Dan le wígirun lun Heowá lan aransehei katei mígiraguagüdüntiwa woungua lun igañi ni lun igarihabu. Gayaraati ladügün igarihabu lun wóuserun wuriba, gidaléime wagundan ani gádeileime wamadagua luma Heowá. Inarüni siñá lan wáyeihani ligaburi Hesusu sunsuinagubei. Lugundun anihein dan ariñagatiwa o adügatiwa katei le adügübei lun wasakürihan lárigiñe (Sant. 3:2). Anihein marichaü le ígiruti lárigirugu wawagu, ani sun anihagua lanme ubóu le ñeinbei wama. Anhein ligía lubéi asuseredubei hun, subudi huméi aríagu liña lan Heowá lun sun le hásügürübei. Kei giñe sügǘ lubéi Hesusu lídangiñe saragu marichaü, gunfuranda lumuti le wasandirubei (Ebü. 4:​15, 16). Wéiriti ugundani wawagu ladüga ruti giñe adundehani tídangiñeti Lererun le huuti ani le lunbei líderaguniwa agagibudagua luma marichaü. w24.11 páh. 6 pár. 12, 13

Lun gayara lan libihín “ibagari magumuchaditi”, súdiniti lun lafiñerúniwa luagu Hesusu (Huan 3:​16-18, 36; Huan 17:3). Mafiñentiña meha saragu huríu lunti lan hafiñerun luagu Hesusu. Ligía hálügüdünbalin: “Kábagia seini gayara barufudun woun lun wafiñerun buagu?” (Huan 6:30). Ábati hariñagun lun Hesusu lidan lan meha lidaani Moisesi hou hamá meha hagüchagu maná to ítaraboun kei fein (Neem. 9:15; Sal. 78:​24, 25). Furanguti larihíniwa añahagua lan meha asaminara luagu éigini. Mamuriahangubeitiña luma Hesusu lun lafuranguagüdüni houn ka lan mini tubéi “fein siélugiñetu to tímatimaatu”, to ítaraboun kei maná to íchuguboun ibagari (Huan 6:32). Wéiriti hetenirun lun habuinchagüdüni haragei darí lun meberesen hamá lau inarüni lúmagiñeti Bungiu le lálugubei Hesusu larufudahan houn. w24.12 páh. 5, 6 pár. 10, 11

Tidan leskuela tidan külase lánina siensia, hafurendeiruba hisaanigu anihein lan lúrudu luagu ligaburi lesetirun katei. Arihúati katei le, lidan burí tídibu wewe lugundun gagudinatu, galimutu, ani lidan limu anihein ámuñegueinarügü liseisin limu subudiwati katei burí kei fractales. Arihúati giñe igaburi burí le lidan burí amu katei le geyegubei wau. Gama lumoun, ka adügübalin katei buíduburiti le? Anhein hadüga hisaanigu álügüdahani kei burí le houngua, ladügüba lun chóurutima lan houn Bungiu lan adügübalin sun katei (Ebü. 3:4). Ani danme le aweirideina hamá hisaanigu, lachülürüba dan lun hálügüdüniña: “Anhein Bungiu lubéi adügübaliwa, ma gayaraati wafiñerun rúhali lan adundehani luma burí lúrudu woun lun gunda wamá?”. Lárigiñe gayaraati hafuranguagüdüni houn darí wamuti lan adundehani gebegiti le tidan Bíbülia. w24.12 páh. 16 pár. 8

Adügati meha Bungiu lun labürüdün apostolu Pábulu aban gárada houn kristiánugu ha Korintubaña luagu mosu lan buga lasagarún afigouhati le masakürihanbei haganaguagiñe (1 Ko. 5:13). Ida luba méhati hóuseruni kristiánugu ha úaraguabaña gürigia ligía? Ariñagati meha Pábulu houn “lun hebé lan hóundarun” luma gürigia ligía, “nírügü lun heigin luma” (1 Ko. 5:11). Dan le weigin luma aban gürigia, liibe-agei dan ayanuhatiwa luma gürigia ligía ani adügati lira lúntima gibe lan dan wásügürün úara. Ligíati, le meha labusenrubei Pábulu lariñagun, moun lumuti lan hásügürün lílana damuriguaü dan luma wügüri ligía. Lídehaba meha lira lun máyeihan hamani ligaburi lóuserun (1 Ko. 5:​5-7). Ani gayaraabei meha ladügün lira lun líchugun wügüri ligía fe gárigüda laaru lan meha lanigi Heowá, ábameti lasandirun busiganu luagu le adüga láalibei ani línchahabei méhati lira lun lasakürihan. w24.08 páh. 15, 16 pár. 4, 5

Lidan meha Luéyuri Ferudun le adügǘbei aban wéiyaasu lidan irumu, aba meha ladagaragüdün Fádiri Íñutimati animaalu kei sákürifisiu luagu hafulesein ísüraelina. Inarüni siñá lan ferudunawa lan hafigoun ísüraelina sunsuinagubei lau hadagaragüdün animaalugu ladüiga gebegitima hamá gürigia sügǘ hau animaalugu. Lau sun lira, aranseñu liña meha Heowá lun feruduna lani hafigoun ísüraelina dan le hasakürihan ani dagagüda hagía animaalu ha lamuriahabaña kei sákürifisiu (Ebü. 10:​1-4). Seriwiti meha lun laritaguagüdüniña luagu gafigoun hamá. Lau sun lira, ka aransehani ladügübei Heowá lun ferudunawa lan figóu sunsuinagubei? Adügati lun “líchaagun Kristu lungua ábanrügü wéiyaasu lun lagidaruni hafigoun gürigia” (Ebü. 9:28). Ru lumuti Hesusu libagari “lebegime hasalbarun saragu” (Mat. 20:28). w25.02 páh. 4 pár. 9, 10

Kei meha le gabaroun lubalin Hesusu chará hamá gürigia ladüga gafigoun hamá, ligía leweridirunbadiwa luéi weiri lan wafiñerun wawougua. Ligía lariñagunbalin dimurei le: “Inarüni luagu anha tan hanigi lun katei le buídubei; ánheinti húgubu, débiliti” (Mat. 26:41b, TNM). Samina wamá luagun le: lau sun meha ariñagaaña lan lani disipulugu maweiyasunbaña lan ígirei lábugua, ligía meha furumiñe hadüga fiu oura lárigiñe líchuguni Hesusu eweridihani le houn (Mat. 26:35). Íbini yebe buidu lan haritagun, ligía lariñagunbalin Hesusu bérusu le uguñebei houn. Ka hadügübei disipulugu dan meha le larügüdǘnwabei Hesusu? Kei meha merede hamá agagudúañu, aba hábürühan lidoun óuchawaguni. Aba hígiruni Hesusu lau sun meha ariñagaaña lan mígirun habéi lan (Mat. 26:56). w24.07 páh. 14 pár. 1, 2

Féridi hamuti giñe lubuidun hamadagua luma Heowá. Lubaragiñe meha hafigounhan, hádangiñetiña meha liduheñu Heowá (Luk. 3:38). Dan le maganbadi habéi, aba habugún hádangiñe liduheñu Heowá. Susereti katei le lubaragiñe meha gasaanigu hamá (Agu. 3:​23, 24; 4:1). Ligía megei habéi ladügawagun Adán lun harandarun luma Heowá (Rom. 5:​10, 11). Lidan amu dimurei, mégeitiwa lunya gamadagua wamá luma Heowá. Según aban líburu, dimurei arandaruni lidan güriegu le áfuachubei lidan bérusu le, mini lan, “gamadagua lan gürigia luma lágani”. Le aweiridagüdübarun wanigi Heowá lan adügübei aransehani lánina arandaruni lun warandarun luma. Ida liñati ladügüni? Lafayeirún wafigoun ligía aransehani le ladügübei Heowá lun gayara lan gamadagua hamá gürigia luma. Mini lan, lasansirún aban katei luagu amu le ábanbei lebegi. Lidan amu dimurei, libihinya aban katei le yebe féridihalibei. w25.02 páh. 3, 4 pár. 7, 8

Ariñagati Pábulu: “Buídurügüti ebechúni le meha híchugubei luagu gürigia ligía” (2 Ko. 2:​5-8). Lidan amu dimurei, adügaali meha ebechúni ligía lun lasakürihan wügüri le meha agamaridubarun lúmari lúguchi (1 Ko. 5:1; Ebü. 12:11). Lárigiñe, ariñaga lumuti Pábulu houn ka lan lunbei hadügüni lau íbiri le asakürihaalibei: “Lunti feruduna humani, ru huguyame gurasu lun”. Ani ariñagati giñe: “Ligía nayumuragunbei hun lunya harufuduni hínsiñehabu lun”. Kei warihini, mama meha busenrügüti Pábulu lunya hígiruni lílana damuriguaü íbiri ligía lun lagiribudun, mósuya meha giñe harufuduni lun, dandu lau le hariñagubei kei lau le hadügübei, le lan lúgubu feruduna hamaali lan ani hínsiñe lan houn. Ítarati, lasandirubei meha wügüri asakürihaali ligía gunda hamá íbirigu lau lagiribudun lidoun damuriguaü. w24.08 páh. 15 pár. 4; páh. 16, 17 pár. 6-8

Subudi lumuti meha apostolu Pábulu buidu ka lan emegeirúbei lun lawandun éibaahouni. Ligíati laritaguagüdünbaliña kristiánugu hagía luagu moun lumuti lan meha hafiñerun hawougua, lunti lan hafiñerun luagu Heowá. Ligía guánarügü ariñagubei lau ganigi: “Nabureme Bungiu íderagubalina; manufudebadina” (Ebü. 13:6).Uguñe weyu, hawanduña fiu hádangiñe wábirigu éibaahouni. Gayaraati warufuduni hínsiñe hamá woun lau wafurieidun hawagu, ani anihein dan, gayaraati giñe wíderaguniña lau wíchuguni le hemegeirubei houn. Furanguti tariñaguni Bíbülia “luagu héibaahouba lan sun ha busenbaña habagaridun deregeguañu houngua lun Hesukrístu” (2 Tim. 3:12). Mini lan le sun lan wagía mosu waranserun lubá liabin dan hénrenguti. Mosu wafiñerun sunsuinagubei luagu Heowá ani chouru wameime líderagubadiwa lan awandei le lunbei liabin. Líchuguba awalidaguni houn lubúeingu ha úaraguabaña lidan dan le lunbei hemegeiruni (2 Tesa. 1:​7, 8). w24.09 páh. 13 pár. 17, 18

Ka íderagubaliña korintuna lun habadiseirun? (2 Ko. 10:​4, 5). Yusu lumutu Bungiu Lererun luma lani sífiri sandu le gabafubei lun líderaguniña korintuna asansirei ligaburi hanügüni habagari sunsuinagubei (Ebü. 4:12). Ibiha hamuti meha korintuna ha ánharubaña lun uganu buiti hígiruni luriban habagari kei burí bacharuaü, íweruhani, larounrun wügüri luma wügüri líledi o würi tuma würi tíledi (1 Ko. 6:​9-11). Inarüni mosu lan meha hadügün hádangiñe korintuna asansiruni wéinamuti lun gayara lan habadiseirun, lau sun lira masaminaruntiña hásiñarubei lan ibiha. Aba háfaagun saragu lun gayara lan héibugun lídangiñe üma le bürüraübei le anügübaliña gürigia lidoun ibagari magumuchaditi (Mat. 7:​13, 14). Anti huguya? Háfaaguña san lun hígirun somu bisiu o somu luriban échuni? Mábürühala harüna! Amuriaha humá luma Heowá lun líderagunün lau lani sífiri sandu lun gayaraabei lan hawanduni óuchawaguni. w25.03 páh. 6 pár. 15-17

Anhein hadüga ítara, ábame líchugun lichú aau hun, ladüga mánginti ani ruti lau areini houn súngubei Líderagubadiwa lichú aau lun gunfuranda wamani anhein gunda lubéi Heowá lau le wanúadirubei o magundan lan. Lárigiñe hafurieidun lun Heowá áluaha ídemuei luma, mosu hetenirun lun óunabagülei le lunbei líchuguni hun. Ru wamá aban hénpulu. Anhein haweiyasuhaña lubéi ani aba heferidirun, másiñati hamuriaha ídemuei luma somu gürigia le awinwandubei lidan fulasu le ñein lubéi heferidira. Lau sun lira, ma heteniruña hamuga lun adundehani le lunbei líchuguni hun, adián? Ítarameme, lárigiñe hamuriaha lichú aau luma Heowá, teni humá lun “óunabagülei” le líchugubei hun, lau hafalaruni adundehani le tídanbei Bíbülia le úarabei luma le gádanbadun. Samina humá luagu aban agunbirahani le heresibirubei lun aban isebáhari. Lubaragiñe hanúadirun anhein hudiba lubéi, mosu gabaroun humani le tariñagubei Bíbülia luagu isebáhari le ñein lubéi chagaguaü, hawagu hagübüri umadagu lúmati lisudinin lichugúniwa Larúeihan Bungiu lidan furumiñeti lúgaaru, lubaragiñe hugundan guánarügü (Mat. 6:33; Rom. 13:13; 1 Ko. 15:33). w25.01 páh. 16, 17 pár. 6, 7

Buiti wasandiragun woungua ani sanditiwa ua lan wemegeirun lidan wamadagua luma Heowá. Arufuda lumuti lani Isaíasi profesía wéiritima lan lubuidun le gádanbaliña ha tídanbaña lóundarun Heowá hawéi ha bóugudibaña tuéi. Ru lumuti Heowá sun le hemegeirubei lubúeingu houn lun buidu lan hamadagua luma. Lani sífiri sandu, Lererun luma saragu ariñahani le asagarúbei tídangiñe. Ítara liña lira kéigubeirügü hamuga geigin hamá, ganiñe hagía ani adügati sun lira lun gunda hamá (ariha huméi giñe Arufudúni 22:17). Ánhañati gürigia ha bóugudibaña tuéi lóundarun Heowá, háfaguña “ilamaü”, “mágürabu” luma “busiganu”, ibidiñetiga Bungiu houn (Amos. 8:11). Líchugubei lan meha Heowá sun le hemegeirubei lumutuniña houn, íbini le hemegeirubei lun buidu lan hamadagua luma (Hoe. 2:​21-24). Ida liña líchuguni Heowá le hemegeirubei lumutuniña houn uguñe weyu? Yusu lumutu Bíbülia, agumeiraguagüdüni tídangiñetu Bíbülia, wani páhina lidan Internet, wadamuridagun luma burí adamurini. Ítara liña wibihini le wemegeiruni sagü weyu lun buidu lan wamadagua luma, ani adügati lira lun buidu lan wasandiragun woungua luma lun wibihin erei. w24.04 páh. 21 pár. 5, 6

Anhein busén bubéi gadaradun ban tuma aban würi, gayaraati bayanuhan tuma lidan fulasu le ñein habéi gürigia o bariñaguni tun luéigiñe gágamuru. Ariñagabéi tun furangu hínsiñe tan bun ani busén ban basubudirunu buidu (1 Ko. 14:9). Anhoun ariñaga bun megei tan dan lun tasaminaruni, ruba dan tun (Ari. 15:28). Ánhounti ariñaga bun mínsiñe ban tun, inebelá le tasandirubei bun. Würi, ka gayaraabei badügüni anhein ariñaga aban íbiri bun hínsiñe ban lun? Subudibei ragürügü lan ganigi lun lariñaguni le lasandirubei bun, ligíati, buidulá bóuseruni ani laulá inebesei. Anhein megei bubéi dan lun basaminaruni, ariñagabéi lun. Anhein ítara liña lubéi, áfaaguaba lun bóunabuni lau lóufudagun (Ari. 13:12). Ánheinti mínsiñe lubéi bun lun badarime, ariñagabéi lun lau aban lubuidun igaburi ani furangu. Anhein ánhara hun, ayanuha humá luagu le hasandirubei tidan hanigi luma luagu ida luba lan habusenrun lun léibugun hidaradun. Gayaraati ámuñegueinarügü lan le hagurabubei húmagiñegua. w24.05 páh. 23, 24 pár. 12, 13

Másiñati nibureingili lan meha Dawidi, dan le lidinbei lidan fulasu le ñein habéi súdaragu ísüraelina. Aba larihin buin haña lan súdaragu lau lanarime anufudei ladüga anihán lan aban hígandei filistéana gíriti Goliadi adüga bula hau lau lariñagun: “Ru humá aban wügüri lun lageindagun numa!” (1 Sam. 17:​10, 11). Hanufudetiña súdara ísüraelina ladüga harihini gágubu lan Goliadi ani weiri ligía luma giñe luagu le lariñagubei houn (1 Sam. 17:​24, 25). Ánheinti Dawidi marihin lumuti katei kei harihini súdaragu. Aba lanügüni Dawidi le lariñagubei Goliadi keisi aban anabawaguni houn lisudaranigu Bungiu le wínwanbei, mámarügü hawagu lisudaranigu Ísüraeli (1 Sam. 17:26). Luágutima Heowá lasaminara Dawidi. Afiñeti meha luagu kei lan líderaguni Bungiu lun lesefuruniña mudún, líderagubei lan giñe lidan sügǘ le. Lau lídehan Heowá, aba lagagibudagun luma Goliadi, ani kei wasubudiruni, gañei lumuti Dawidi filistéana ligía (1 Sam. 17:​45-51). w24.06 páh. 21 pár. 7

Samina wamá ida liña lan hamuga wabagari lun hamuga meseriwidun wamá lun Heowá. Líderagubadiwa wadügüni katei le lun busén wamá úaragua wamá lun Heowá ani lun wariñaguni dimurei le lariñagubei abürühati Sálumu: “Ánheinti au, nayarafahóuba lun Bungiu, ladüga anihán lubuidun-ágeibei katei nun” (Sal. 73:28). Gayaraati wararamun lun furumiñeguarügü turobuli le ñǘbuinti woun lidan lagumuhóun dan le, lugundun weseriwiduña lun aban “Bungiu wínwanti ani inarüniti” (1 Tesa. 1:9). Aban Bungiu wínwanti Heowá, nidiheriti wawagu ani ñeinbei súnwandan lun líderaguniwa. Íderagua lumutiña lubúeingu lidan dan le sügühalibei ani líderagubadiwa giñe uguñe weyu. Yarafa madise laduuruba aban óunwenbu asufuriruni le hanarimeti, lau sun lira, mámabadiwa wábugua. “Gayaraati lubeiti wariñagun lau afiñeni: ‘Nabureme Bungiu íderagubalina; manufudebadina’” (Ebü. 13:​5, 6). w24.06 páh. 25 pár. 17, 18

Ayanuhatu Bíbülia hawagu hóugiñe 40 wügüriña ha meha arúeihabaña Ísüraeli. Ariñagatu íbini lan meha urúeigu buítiña adügatiña meha katei wuribati. Ayanuha wamá luagu Dawidi. Subudi wamuti aban lan meha urúei buiti, ladüga ariñagati Heowá luagu: Éibugati “numa tau sun lanigi, ani úaraguati ligaburi nigibugiñe” (1 Uru. 14:8). Lau sun lira, aba larounrun Dawidi tuma aban würi maríeitu ani aba ladügün aransehani lun láfarun tani weiriei hilagubei lidan aban wuribu (2 Sam. 11:​4, 14, 15). Luéigiñe aban oubaü, añahein meha giñe urúeigu wuribatiña ha adügübaña katei buiti. Ariha waméi likesin Roboamü. Ariha lumuti Heowá kei aban urúei múaranti, ariñagati luagu: “Mabuidunti bugaha lóuserun Roboamü” (2 Kro. 12:14). Lau sun lira, dan le lariñagubei Heowá lun lun mageindagun lan hama 10 türibu lani Ísüraeli luma lun lígiruniña lun hagíaba lan anúadirei kaba lan harúeite. Ka ladügübei urúei le? Adüga lumuti le lariñagubei Heowá lun. Lanwoun lira, derebugudati saragu uburugu lun lóunigiruni ageiraü hawéi áganigu (1 Uru. 12:​21-24; 2 Kro. 11:​5-12). Kati uagu lariñaga meha Heowá úaragua hamá fiu urúeigu ani múaragun hamá ha híbiri? Furanguti, teni lan meha Heowá lun le tídanbei hanigi, hasakürihan luma lun harabachun luagu áhuduraguni inarüniti. w24.07 páh. 20 pár. 1-3

Ánheinti aban lubéi kristiánu badiseihali le magunfulirungili 18 irumu afigouhabei? Ida luba hahandilihani wéiyaaña lidan afiñeni kesi le? Hóundaraguba bián hádangiñe dandu luma irahü le afigouhabei kei hama lagübürigu ha gefentiña luagu Heowá. Hakutihabei ka lan adüga hamaalibei lagübürigu irahü lun híderaguni adügei asansiruni le mégeiwabei luma lun lasakürihan. Anhein arufuda isaani ligía aban lubuidun igaburi, gayaraabei hígirun wéiyaaña lidan afiñeni lun agübürigu lan asigira íderaguei hasaani. Lugundun houn agübürigu líchigei Heowá dasi lun hererehan houn hasaanigu lau ínsiñehabuni (2 Lur. 6:​6, 7; Ari. 6:20; 22:6; Efe. 6:​2-4). Lau lásügürün dan, hayanuhaba wéiyaaña ha hama agübürigu kada átiri dan lun harihini ida liña lan léibugun katei lau hasaani, anhein leresibiruñein lubéi ídemuei le lemegeirubei. Ánheinti maha irahü ligía lun lasakürihan ni lun lasansirun? Hóundaraguba wéiyaaña dandu luma kei hama lagübürigu ha gefentiña luagu Heowá lun harihin lau likesin. w24.08 páh. 24 pár. 18

Lau sun buidu lan wasandiragun woungua dan le lichugún aban idewesei woun, gúndaatimatiwa dan le wagía lan íchigei idewesei ligía. Ítara liña ladügüniwa Heowá lau líchuguni ubafu wáhaburugun lun wagía guánarügü lan adüga lun gúndaatima wamá. Ánhawa áluaha chansi lun wíderaguniña amu, wéiritimabei ugundani wasandirun. Ma wéirigüda lumutu katei le wanigi? (Sal. 139:14). Ariñagatu Bíbülia gunda hamá ha gíchigadibaña, ligía gayara lubéi gunfuranda wamani ka lan uagu tariñaga Bíbülia, aban lan “Bungiu gúndaati” Heowá (1 Tim. 1:​11, TNM). Úati amu gíchigaditi luéi Heowá. Ítara kei meha lariñaguni apostolu Pábulu: “Ladüga lídangiñeti Bungiu awanhein lubéi, gabagari wagía” (Adü. 17:28). Le linarün aban katei, “sun buiti le ichugúbei woun” lúmagiñe Bungiu liabin (Sant. 1:17). Ka gayaraabei wadügüni anhein busén wabéi gúndaatima wamá dan le gíchigadi wamá? Adüga wamuti lira lau wáyeihani líchigadi Heowá. w24.09 páh. 26 pár. 1-4

Lárigiñe lasubudirúniwa kaba lan au hagunfulira íbirigu lun heseriwidun kei wéiyaaña lidan afiñeni, gayaraati ladügün katei le lun hasaminarun fiu ídehatiña lidan damuriguaü siñabei lan hagunfulirun lau le mégeiwabei lun heseriwidun kei wéiyaaña lidan afiñeni. Lau sun lira, lunti haritaguni magurabun lan Heowá ni lóundarun machararunbaña lan (1 Fe. 2:21). Lanwoun lira, líderagubaña lani Heowá sífiri lun hagunfulirun lau le amuriahóubei hámagiñe (Fili. 2:13). Agia huguya? Hínsiñeti hamuga san hun habuiduragüdün aban lídangiñe igaburi burí le? Anhein ítara liña lubéi, furíei humá lun Heowá, akutiha hugíame libügürü igaburi le habusenrunbei habuiduragüdün ani amuriaha humá adundehani hama wéiyaaña lidan afiñeni, falá humeime adundehani le lunbei híchuguni hun. Sigí humá áfaagua lun aban humá wéiyaali lidan afiñeni. Amuriaha humá luma Heowá lun ladundehanün luma lun larufudahan hun, buídutima láamuga heseriwidun lun luma lun damuriguaü (Isa. 64:8). Labinirubei Heowá háfaagun lun aban humá wéiyaali lidan afiñeni. w24.11 páh. 24, 25 pár. 17, 18

Meberesenga átirihali lan irumu wau eseriwida lun Heowá, maweiyasun wamá asaminara gadüna wamani lun feruduna lániwa. Inarüni gebegi lan lun sun le adüga wamaalibei luagu. Gama lumoun, mama líchuguñein Lisaani lun lafayeirúniwa luagu le wadügübei lidan weseriwidun. Ru lumuti keisi aban idewesei. Ánhawa hamuga ariñaga gañei wamaali lan lareini o wagurabaha lóuseruniwa lidan aban igaburi espechaliti, kéigubeirügü wariñaguña lan hamuga memegeirun wamani lounwen Kristu wawagu (ariha huméi giñe Galasiana 2:21). Subudi lumuti meha apostolu Pábulu meberesenga lan átirihali lan lawadigimaridun luagu lufulesein Heowá, siñati meha feruduna lani Heowá ítaraguarügü. Ka san uagu láfaagua Pábulu saragu lidan leseriwidun lun Heowá? Busenti meha leteingiruni Bungiu luagu areini le líchugubei lun (Efe. 3:7). Ítarameme, busentiwa wasigirun eseriwida lun Heowá lau ubebeni, mama ladüga busén wamá wagañeiruni lugudemehabu, wadügünbalin ladüga busén wamá warufuduni weteingiradi lun luagu lugudemehabu. w25.01 páh. 27 pár. 5, 6