Ang Bibliya​—Kini ba Inspirado Gayod sa Diyos?

NAGTUO ka ba nga ang Bibliya gikan sa Diyos? O nagtuo ka ba nga usa kini ka basahon nga naundan lag mga ideya sa tawo?

Kini gidebatehan gihapon bisan sa mga Kristiyano. Pananglitan, sa 2014, usa ka surbi nga gihimo didto sa United States nagpakita nga kadaghanan sa gitawag ug mga Kristiyano miuyon nga “sa usa ka paagi ang Bibliya dunay kalabotan sa Diyos.” Sa laing bahin, mga 1 sa 5 sa gisurbi ang nag-isip sa Bibliya ingong basahon sa “karaang mga estorya, sugilanon, kasaysayan, ug mga balaod nga gisulat sa tawo.” Kini nga isyu nakahatag ug kalibog kon unsa gayoy kahulogan sa giingon nga ang Bibliya “inspirado” sa Diyos.—2 Timoteo 3:16.

Ang Bibliya gilangkoban ug 66 ka gagmayng basahon, nga gisulat sa mga 40 ka tawo sulod sa mga 1,600 ka tuig. Pero kon ang Bibliya gisulat sa tawo, nganong ikaingon nga kini “inspirado sa Diyos”? Sa simpleng pagkasulti, ang ekspresyong “inspirado sa Diyos” nagpasabot nga ang Tinubdan sa impormasyon niini nga mga sinulat mao ang Diyos. Ang Bibliya nag-ingon: “Ang mga tawo nagsulti gikan sa Diyos samtang sila giagak sa balaang espiritu.” (2 Pedro 1:21) Sa ato pa, gigamit sa Diyos ang iyang dili makitang puwersa, ang balaang espiritu, sa pagpasa sa iyang mensahe ngadto sa mga magsusulat sa mga basahon sa Bibliya. Pareho kini sa usa ka negosyante nga nagdiktar ug sulat ngadto sa iyang sekretaryo. Ang awtor sa sulat mao ang nagdiktar, dili ang nagsulat.

Ang ubang magsusulat sa Bibliya aktuwal nga nakadungog sa mensahe sa Diyos nga gisulti sa usa ka anghel. Ang uban nakakitag mga panan-awon nga gikan sa Diyos. Sa ubang kahimtang, ang Diyos nagpadayag sa iyang mensahe pinaagig mga damgo. Bisag may panahon nga gitugotan sa Diyos ang mga magsusulat sa paggamit sa ilang kaugalingong mga pulong sa pagrekord sa iyang mensahe, sa ubang higayon, iyang gidiktaran sila ug espesipikong mga pulong nga isulat. Bisan pa niana, ang mga magsusulat sa Bibliya nagsulat sa mga hunahuna sa Diyos ug dili sa ilang hunahuna.

Sa unsang paagi kita makaseguro nga inspirado sa Diyos ang mga magsusulat sa Bibliya? Tagda ang tulo ka ebidensiya nga nagpamatuod nga ang Bibliya gikan gayod sa Diyos.