Mapasalamaton sa Taas nga Kinabuhi Diha sa Pag-alagad Kang Jehova

SUMALA SA GIASOY NI OTTILIE MYDLAND

Sa ulahing bahin sa ika-19ng siglo, ang naglawig nga mga barko midunggo nga tupad sa usag usa sa dunggoanan sa Kopervik sa kasadpang Norway. Niadtong mga adlawa ang mga lalaki ug mga kabayo nagguyod ug mga kareton latas sa kadalanan. Ang mga tawo migamit ug kingki nga suga, ug ang pinintalag puti nga mga balayng tabla gipainitan pinaagig kahoy ug uling. Natawo ako didto niadtong Hunyo 1898, ang ikaduha sa lima ka anak.

NIADTONG 1905, si Papa walay trabaho, busa miadto siya sa Tinipong Bansa. Mibalik siya tulo ka tuig sa ulahi dala ang usa ka maleta nga puno sa makapahinam nga mga regalo alang sa mga kabataan ug seda nga mga panapton ug ubang mga butang para kang Mama. Apan ang labing bililhong napanag-iya niya mao ang mga tomo ni Charles Taze Russell nga nag-ulohang Studies in the Scriptures.

Si Papa nagsugod sa pagsugilon sa mga higala ug mga paryente sa mga butang nga iyang nakat-onan gikan niining mga libroha. Sa lokal nga mga miting sa kapilya, gigamit niya ang Bibliya sa pagpakita nga walay nagdilaab nga impiyerno. (Ecclesiastes 9:​5, 10) Sa 1909, ang tuig human mobalik si Papa gikan sa Tinipong Bansa, si Brader Russell miduaw sa Norway ug mipakigpulong sa Bergen ug Kristiania, karon Oslo. Si Papa miadto sa Bergen aron sa pagpamati kaniya.

Kadaghanan sa mga tawo nag-akusar kang Papa nga nagpasiugda ug bakak nga mga pagtulon-an. Naluoy ko niya ug mitabang kaniya sa paghatod ug mga tract sa Bibliya ngadto sa mga silingan. Niadtong 1912, gihatod nako ang usa ka tract bahin sa impiyerno ngadto sa anak babaye sa usa ka klerigo. Gibiaybiay niya ako ug si Papa. Nahingangha ako nga ang usa ka anak babaye sa klerigo nakagamit niadtong bastos nga pinulongan!

Ang ubang Estudyante sa Bibliya, ingon sa pagtawag kaniadto sa mga Saksi ni Jehova, matag karon ug unya mobisita kanamo sa Kopervik, lakip kang Theodor Simonsen, usa ka may katakos nga mamumulong. Dapiton nako ang mga tawo sa mga pakigpulong nga iyang gipahayag diha sa among balay. Una pa sa iyang pakigpulong motugtog siya sa zither ug moawit, ug human sa iyang pakigpulong moawit siya ug pangataposang kanta. Gitahod namo siya pag-ayo.

Ang laing bisita sa among balay mao si Anna Andersen, usa ka colporteur, o bug-os-panahong ministro. Mibiyahe siya gikan sa usa ka lungsod ngadto sa lain sa tibuok Norway, kasagaran magbisikleta, nga nagpahimutang ug literatura sa Bibliya sa mga tawo. Usa siya ka ministro kanhi sa Salvation Army ug nakaila sa pipila ka ministro sa Salvation Army sa Kopervik. Gitugotan nila siya nga mohatag ug pakigpulong sa Bibliya diha sa ilang balay tigomanan, ug akong dapiton ang mga tawo sa pag-adto ug pagpamati kaniya.

Ang laing colporteur nga miduaw kanamo sa Kopervik mao si Karl Gunberg. Kining makasaranganon, hilomon, apan komedyante, nga tawo matag karon ug unya nag-alagad usab ingong tighubad sa sangang buhatan sa Oslo. Daghang tuig sa ulahi nagkauban kami sa pagtrabaho didto.

Naimpluwensiyahan sa Relihiyosong mga Panglantaw

Niadtong panahona kadaghanang tawo ang may lig-ong pagtuo dili lamang sa Diyos ug sa Bibliya kondili usab sa nakagamot nga mga pagtulon-an, sama sa kalayonhong impiyerno ug Trinidad. Busa nagpahinabo kadtog kasamok sa dihang ang mga Estudyante sa Bibliya nagtudlo nga kining maong mga doktrina dili kaharmonya sa Bibliya. Naimpluwensiyahan ako sa kusganong mga akusasyon sa among mga silingan nga si Papa usa ka erehes. Kas-a giingnan ko pa gani siya: “Dili tinuod ang imong gitudlo. Supak kana sa pagtuo!”

“Dali ngari, Ottilie,” gidasig niya ako, “ug tan-awa kon unsay giingon sa Bibliya.” Unya gibasahan niya ako gikan sa Kasulatan. Ingong resulta, ang akong pagsalig kaniya ug sa iyang gitudlo mitubo. Gidasig niya ako sa pagbasa sa Studies in the Scriptures, busa panahon sa ting-init sa 1914, subsob akong maglingkod nga magbasa didto sa usa ka bungtod nga nag-umbaw sa lungsod.

Sa Agosto 1914 ang mga tawo nagpunsisok sa gawas sa usa ka tinukod sa lokal nga mantalaan nga nagbasa mahitungod sa pagbuto sa Gubat sa Kalibotan I. Si Papa miabot ug nakakita kon unsay nahitabo. “Salamat sa Diyos!” siya mipatugbaw. Nailhan niya diha sa pagbuto sa gubat ang katumanan sa mga tagna sa Bibliya nga maoy iyang gisangyaw. (Mateo 24:7) Daghang Estudyante sa Bibliya ang nagtuo niadto nga sa dili madugay sila dad-on sa langit. Sa dihang wala kini mahitabo, ang pipila nahigawad pag-ayo.

Akong Pagbarog Dapig sa Kamatuoran

Niadtong 1915, sa edad nga 17, natapos nako ang hayskul ug nagsugod sa sekular nga trabaho diha sa usa ka opisina. Niadtong tungora gisugdan nako pagbasa nga regular ang The Watch Tower. Apan pagka-1918 lamang nga gihimo ang regular nga mga tigom sa Kopervik. Sa sinugdan, lima kami nga mitambong. Gibasa namo ang mga publikasyon sa Watch Tower Society, sama sa Studies in the Scriptures, ug gihisgotan ang materyal pinaagi sa mga pangutanag tubag. Bisan tuod midayeg si Mama sa mga Estudyante sa Bibliya ngadto sa uban, wala gayod siya mahimong usa kanamo.

Sa opisina nga akong gitrabahoan, sugod sa 1918, nakaila nako si Anton Saltnes, nga natabangan nako nga mahimong Estudyante sa Bibliya. Niining panahona nahimo akong regular nga magmamantala ug nabawtismohan sa usa ka asembliya sa Bergen niadtong 1921.

Niadtong Mayo 1925 dihay asembliya alang sa tibuok Scandinavia sa Örebro, Sweden. Kapin sa 500 ang mitambong, lakip si Joseph F. Rutherford, ang presidente sa Watch Tower Society. Mga 30 kanamo ang mibiyahe gikan sa Oslo pinaagig tren diha sa gireserbang bagon.

Gipahibalo niining maong asembliya nga ang usa ka Sangang Buhatan sa Amihanang Uropa tukoron sa Copenhagen, Denmark, aron sa pag-atiman sa buluhatong pagsangyaw sa tibuok Scandinavia ug sa mga nasod sa Baltic. Si William Dey nga taga-Scotland giasayn sa pagdumala sa buluhatong pagsangyaw. Nagustoan siya pag-ayo, ug sa wala madugay nailhan siya nga Dakong Scotsman. Sa sinugdan si Brader Dey walay kahibalo sa bisan unsang Scandinavianong pinulongan, busa molingkod siya sa likod panahon sa mga tigom ug mga asembliya ug mag-atiman sa mga bata aron nga ang ilang mga ginikanan makapaminaw pag-ayo sa ginasulti diha sa plataporma.

Ang The Watch Tower sa Marso 1, 1925, naghisgot sa Pinadayag kapitulo 12 ug nagsaysay nga kining kapituloha may kalabotan sa pagkatukod sa Gingharian sa Diyos ug nga kini nga pagkatukod nahitabo sa langit niadtong 1914. Nalisdan ako sa pagsabot niini, busa gibalikbalik nako pagbasa ang artikulo. Sa dihang sa kataposan nasabtan nako kini, ako nalipay pag-ayo.

Sa dihang ang mga kausaban gihimo sa among pagsabot sa mga ulohan sa Bibliya, ang uban nangapandol ug mingbiya sa katawhan sa Diyos. Apan sa dihang ang maong kausaban lisod sabton, kanunay nakong balikbalikon pagbasa ang materyal ug maningkamot sa pagsabot sa pangatarongan. Kon wala pa gani nako masabti ang bag-ong pagsaysay, maghulat ako ug katin-awan. Sa makadaghan ako gigantihan sa maong pagpailob.

Pag-alagad sa Bethel

Sulod sa daghang tuig nagtrabaho ako ingong tighupot sa kuwenta, sekretarya, ug awditor sa lungsod. Sa 1928 ang tawo nga nag-atiman sa kuwenta sa Sosyedad nasakit ug kinahanglang mobiya sa Bethel. Sanglit may kasinatian ako sa maong trabaho, gihangyo ako nga mopuli. Nagsugod ako sa pag-alagad sa Bethel niadtong Hunyo 1928. Matag karon ug unya, si Brader Dey moduaw kanamo ug mag-awdit sa kuwenta sa Sosyedad. Ang among pamilyang Bethel nanguna usab sa publikong buluhatong pagsangyaw sa Oslo, diin niadtong panahona usa lang ang kongregasyon namo.

Ang pipila kanamo mitabang sa nagdumala sa shipping sa Bethel, si Brader Sakshammer, sa pag-empake ug pagpadala sa The Golden Age (karon Pagmata!). Si Brader Simonsen ug Gunberg lakip niadtong mitabang kanamo. Malipayon kami, nga sagad mag-awit ug mga alawiton samtang kami nagtrabaho.

Masaligon sa Paglaom sa Gingharian

Niadtong 1935 nasabtan namo nga ang “dakong panon” dili segundaryong langitnong matang. Among nakat-onan nga kana hinunoa naghawas sa usa ka matang nga makalabang-buhi sa dakong kasakitan ug may kahigayonan nga mabuhing walay kataposan sa Paraiso sa yuta. (Pinadayag 7:​9-14) Tungod niining bag-ong pagsabot, ang pipila nga nakig-ambit sa mga emblema sa Memoryal nakaamgo nga ang ilaha maoy yutan-ong paglaom, ug sila mihunong sa pagpakig-ambit.

Bisan tuod wala ako magduhaduha sa akong langitnong paglaom, subsob maghunahuna ako, ‘Nganong napili ako sa Diyos?’ Ako mibating dili takos sa maong dakong pribilehiyo. Ingong gamay, maulawong babaye, morag talagsaon ang paghunahuna sa akong kaugalingon ingong hari nga magmando kauban ni Kristo sa langit. (2 Timoteo 2:​11, 12; Pinadayag 5:10) Bisan pa niana, gipalandong nako ang mga pulong ni apostol Pablo nga “dili daghan ang gamhanan” nga gitawag, apan “gipili sa Diyos ang huyang nga mga butang sa kalibotan, aron iyang mapakaulawan ang kusganong mga butang.”​—1 Corinto 1:​26, 27.

Kalihokan Panahon sa Gubat sa Kalibotan II

Niadtong Abril 9, 1940, ang Norway gisulong sa kasundalohang Aleman, ug wala madugay ang nasod giokupar. Ingong sangpotanan sa gubat, daghan ang misanong sa mensahe sa Gingharian. Gikan sa Oktubre 1940 hangtod sa Hunyo 1941, nakapahimutang kami ug kapin sa 272,000 ka libro ug mga pulyeto. Kana nagkahulogan nga matag usa sa kapin sa 470 ka Saksi niadto sa Norway nakapahimutang, sa aberids, ug kapin sa 570 ka libro ug mga pulyeto sulod niadtong siyam ka bulan!

Niadtong Hulyo 8, 1941, ang Gestapo miduaw sa tanang nagadumalang magtatan-aw ug giingnan sila nga kon dili mohunong ang buluhatong pagsangyaw, ipadala sila ngadto sa mga kampong konsentrasyon. Lima ka Aleman nga mga polis ang miabot sa Bethel ug nag-embargo sa kadaghanan sa propiedad sa Watch Tower Society. Ang pamilyang Bethel gidala ug gisukitsukit, apan walay gipriso kanamo. Sa kataposan, sa Hulyo 21, 1941, ang tinukod sa Sosyedad, ang Inkognitogaten 28 B, giembargo, ug ang among buluhatong pagsangyaw gidili. Mibalik ako sa Kopervik ug mikuha ug sekular nga buluhaton sa pagsuportar sa akong kaugalingon.

Niadtong panahona, si Papa nag-alagad ingong payunir. Usa ka adlaw ang mga Nazi miabot ug mirikisa sa balay ni Papa. Gikuha nila ang tanan niyang literatura, lakip ang iyang mga Bibliya ug mga konkordansiya sa Bibliya. Diyutay na lamang nga suplay sa espirituwal nga pagkaon ang among nadawat sulod niadtong maong yugto. Aron magpabiling lig-on sa espirituwal, balikbalik namong gitun-an ang daang mga libro, sama sa librong Government, ug kami nagpadayon sa pagsangyaw.

Ikasubo, sa daghang dapit ang mga igsoon nagkabahinbahin. Ang pipila naghunahuna nga kinahanglang mosangyaw kami nga dayag ug mamalaybalay samtang ang uban mibati nga kinahanglang magsangyaw kami nga tinagotago, nga makigsulti sa mga tawo sa ubang mga paagi. Busa ang prominenteng mga igsoon, nga kanhi nakigkooperar pag-ayo ug kinsa among gimahal pag-ayo, nagbungolay. Ang pagkabahinbahin tali kanila mas nakapasubo sa akong kasingkasing kay sa bisan unsang kahimtang sa akong kinabuhi ingong usa ka Saksi.

Napasig-uling Kalihokan Human sa Gubat

Human sa gubat, sa ting-init sa 1945, si Brader Dey miduaw sa Norway ug naghikay ug mga tigom sa Oslo, Skien, ug Bergen. Mihangyo siya sa mga igsoon nga husayon ang kabingkilan ug mihangyo sa tanang nagtinguha niana nga motindog. Ang tanan nanindog! Ang kasungian tinong nahusay niadtong Disyembre 1945, human sa duaw ni Nathan H. Knorr, kanhing presidente sa Watch Tower Society.

Kasamtangan, niadtong Hulyo 17, 1945, nakadawat ako ug telegrama gikan sa nagdumala sa sangang buhatan, si Brader Enok Öman, nga nag-ingon: ‘Kanus-a ka makabalik sa Bethel?’ Ang pipila nag-ingon nga kinahanglang magpabilin ako sa balay ug atimanon ang akong amahan, kinsa kapin na sa 70 anyos niadtong panahona. Apan gidasig ako ni Papa nga moalagad pag-usab sa Bethel, nga akong gihimo. Niadtong 1946, si Marvin F. Anderson, usa ka igsoon nga gikan sa Tinipong Bansa, nahimong among magtatan-aw sa sanga, ug ang buluhatong pagsangyaw giorganisar pag-usab.

Panahon sa mga bakasyon sa ting-init mobalik ako sa Kopervik aron makigkita sa akong pamilya. Ang akong duha ka igsoong lalaki ug duha ka igsoong babaye wala manga-Saksi, apan sila mahigalaon kanunay kang Papa ug kanako. Usa sa akong mga igsoong lalaki nahimong tagdumala sa dunggoanan ug pangulong piloto, ug ang usa maoy usa ka magtutudlo. Bisan tuod kabos ako sa materyal, moingon si Papa kanila: “Mas adunahan si Ottilie kay kaninyo.” Ug tinuod kadto! Ang ilang nabatonan dili ikatandi sa espirituwal nga mga bahandi nga akong napahimuslan! Si Papa namatay sa panuigong 78 niadtong 1951. Si Mama namatay sa 1928.

Ang hinungdanong hitabo sa akong kinabuhi mao ang pagtambong sa internasyonal nga kombensiyon sa katawhan ni Jehova sa New York City niadtong 1953. Nianang tuiga ang natad sa kalibotan misaylo sa 500,000 nga gidaghanon sa magmamantala, ug kapin sa 165,000 ang mitambong sa kombensiyon! Una pa sa 1953 nga kombensiyon, mitrabaho ako ug usa ka semana sa Brooklyn Bethel, ang hedkuwarter sa organisasyon ni Jehova sa yuta.

Pagbuhat sa Akong Maarangan

Sa di pa dugayng katuigan nahalap na ang akong mata tungod sa mga katarata. Ginamit ang taas ug grado nga antiyohos ug usa ka lente, medyo makabasa gihapon ko sa dagkong letra. Ug ang Kristohanong mga igsoong babaye moduaw kanako ug basahan ako kaduha sa usa ka semana, tungod niana ako mapasalamaton kaayo.

Limitado usab ang akong kalihokang pagsangyaw. Panahon sa ting-init, ang Kristohanong mga igsoong babaye matag karon ug unya magdala kanako nga nag-wheelchair ngadto sa usa ka dapit diin ako makasangyaw. Regular usab akong magpadala pinaagi sa koreyo ug mga magasin ug mga brosyur ngadto sa mga tunghaan sa Kopervik, sama sa eskuylahang elementarya diin ako nahimong estudyante duolan sa 100 ka tuig kanhi. Nalipay ako nga posible gihapon nga mahimo akong regular nga magmamantala.

Maayo na lang nga ang lawak-kan-anan ug ang Kingdom Hall anaa sa samang andana sa akong lawak sa Bethel, nga sukad niadtong 1983 nahimutang na sa Ytre Enebakk gawas sa Oslo. Busa makahimo ako sa pagtambong sa pagsimba sa buntag, sa pagpangaon, ug sa among mga tigom pinaagi sa usa ka abag-sa-paglakaw. Ug ako malipayon nga makatambong gihapon ako sa mga kombensiyon ug mga asembliya. Malingaw ako sa pagpakighimamat sa mga higala nga akong nailhan sulod sa daghang tuig, maingon man sa bag-ong mga igsoong lalaki ug babaye ug daghang buotang mga bata.

Paghupot sa Pagtuo Hangtod sa Kataposan

Usa ka panalangin nga mapalibotan sa aktibo, malipayon, ug espirituwal nga mga tawo diri sa Bethel. Sa dihang nagsugod ako sa akong pag-alagad sa Bethel, ang tibuok pamilya nalangkoban niadtong may langitnong paglaom. (Filipos 3:14) Karon ang tanan sa Bethel gawas kanako nagalaom nga mopuyo sa walay kataposan sa yuta.

Tinuod, kami nagdahom nga si Jehova misalga na unta sa una pa. Apan, ako nagmaya sa pagkakita sa dakong panon nga nagakadaghan ug nagakadaghan. Pagkadakong pag-uswag ang akong nakita! Sa dihang nakig-ambit ako sa ministeryo sa unang higayon, diha lamay mga 5,000 ka magmamantala sa tibuok kalibotan. Karon adunay kapin sa 5,400,000! Sa pagkatinuod, nakita nako “ang usa nga diyutay . . . nahimo nga usa ka libo, ug ang usa nga gamay nahimo nga usa ka kusganon nga nasod.” (Isaias 60:22) Kinahanglang padayon kitang maghulat kang Jehova, sama sa gisulat sa propetang si Habacuc: “Bisan pag kini malangan, padayon sa pagpaabot niini; kay kini matuman sa walay pakyas.”​—Habacuc 2:3.