Pagpabili sa “mga Gasa nga mga Tawo”

“Pagatamdon silang kinsa nagahago taliwala kaninyo ug . . . hatagan sila ug labi pa kay sa labaw-ordinaryo nga pagtagad diha sa gugma tungod sa ilang buhat.”​—1 TESALONICA 5:12, 13.

 1. Sumala sa Buhat 20:35, unsang gahom ang anaa sa paghatag? Iilustrar.

“ADUNAY labaw nga kalipay sa paghatag kay sa pagdawat.” (Buhat 20:35) Imo bang mahinumdoman ang kataposang higayon nga imong nasinati ang katinuoran nianang mga pulonga ni Jesus? Tingali kadto maoy usa ka gasa nga imong gihatag ngadto sa usa nga imong gimahal pag-ayo. Imo kadtong gipilig maayo, kay buot nimong kini mahimong butang nga pabilhan sa imong hinigugma. Ang malipayong panagway diha sa nawong sa imong hinigugma​—nakapadasig gayod kadto sa imong kasingkasing! Kon gipalihok sa hustong paagi, ang paghatag maoy usa ka pahayag sa gugma, ug ang pagpahayag sa gugma adunay gahom nga maghatag kanatog kalipay.

2, 3. (a) Nganong ikaingon nga wala nay mas malipayon pa kay kang Jehova, ug sa unsang paagi ang pagtagana sa “mga gasa nga mga tawo” makapangaya sa iyang kasingkasing? (b) Unsay dili nato gustong buhaton sa gasa nga gikan sa Diyos?

² Nan, kinsa ang mas malipayon pa kay kang Jehova, ang Maghahatag sa “matag maayong gasa”? (Santiago 1:17; 1 Timoteo 1:11) Ang matag gasa nga iyang ihatag gipalihok sa gugma. (1 Juan 4:8) Tinuod gayod kana kon bahin sa gasa nga gihatag sa Diyos pinaagi ni Kristo ngadto sa kongregasyon​—ang “mga gasa nga mga tawo.” (Efeso 4:8) Ang pagtagana ug mga ansiyano aron sa pagbantay sa panon maoy pagpahayag sa tim-os nga gugma sa Diyos alang sa iyang katawhan. Kini nga mga lalaki gipili sa maampingong paagi​—sila kinahanglang makakab-ot sa Kasulatanhong mga kuwalipikasyon. (1 Timoteo 3:1-7; Tito 1:5-9) Sila nasayod nga kinahanglang ilang ‘trataron ang panon uban ang kalumo,’ aron ang mga karnero makabaton ug rason nga mobating mapasalamaton sa maong mahigugmaong mga magbalantay. (Buhat 20:29; Salmo 100:3) Sa dihang makita ni Jehova nga ang iyang mga karnero adunay mga kasingkasing nga napuno sa maong pasalamat, tataw nga ang iyang kasingkasing magmaya gayod!​—Proverbio 27:11.

³ Dili gayod nato gustong makunhoran ang bili sa gasa nga gikan sa Diyos; ni kita buot nga dili pabilhan ang iyang mga gasa. Busa duha ka pangutana ang motungha: Sa unsang paagi angayng lantawon sa mga ansiyano ang ilang papel diha sa kongregasyon? Ug sa unsang paagi ang uban diha sa panon makapakita nga ilang gipabilhan ang “mga gasa nga mga tawo”?

‘Kami Inyong mga Isigkamagbubuhat’

4, 5. (a) Ngadto sa unsa nga gipakasama ni Pablo ang kongregasyon, ug nganong kini maoy haom nga ilustrasyon? (b) Unsay gipakita sa ilustrasyon ni Pablo kon bahin sa paagi nga angay natong lantawon ug tagdon ang usag usa?

⁴ Gipiyal ni Jehova sa “mga gasa nga mga tawo” ang usa ka sukod sa awtoridad diha sa kongregasyon. Siyempre, dili gustong gamiton sa mga ansiyano sa di-hustong paagi ang ilang awtoridad, apan sila nasayod nga dali lamang kaayo ang pagbuhat niana isip di-hingpit nga mga tawo. Nan, sa unsang paagi ilang lantawon ang ilang kaugalingon maylabot sa uban pa diha sa panon? Tagda ang ilustrasyon nga gigamit ni apostol Pablo. Human hisgoti kon nganong gitagana ang “mga gasa nga mga tawo,” si Pablo misulat: “Managtubo kita sa tanang butang pinaagi sa gugma ngadto kaniya nga mao ang ulo, si Kristo. Gikan kaniya ang tibuok nga lawas, kay takdo nga pagkadugtong ug gipanagtambayayongay pinaagi sa matag lutahan nga nagahatag sa kon unsa ang gikinahanglan, sumala sa paglihok sa matag usa ka sangkap sa angay nga sukod, nagapatubo sa lawas alang sa pagpalig-on sa kaugalingon niini diha sa gugma.” (Efeso 4:15, 16) Busa gipakasama ni Pablo ang kongregasyon, lakip ang mga ansiyano ug ubang mga membro, sa lawas sa tawo. Nganong usa kini ka haom nga ilustrasyon?

⁵ Ang lawas sa tawo gilangkoban sa daghang nagkalainlaing sangkap apan may usa lamang ka ulo. Bisan pa niana, walay bisan unsang bahin sa lawas​—walay kaunoran, ni usa ka nerbiyos, ni usa ka ugat—​nga walay gamit. Ang matag sangkap bililhon ug dunay ikatampo sa maayong panglawas ug katahom sa kinatibuk-an. Sa susama, ang kongregasyon gilangkoban sa daghang nagkalainlaing membro, apan ang matag membro​—batan-on man o tigulang, kusgan o luya—​dunay ikatampo alang sa kinatibuk-ang espirituwal nga kahimsog ug katahom sa kongregasyon. (1 Corinto 12:14-26) Walay usa ang angayng mobating walay kapuslanan nga dili na pabilhan. Sa laing bahin, walay angayng mobating labaw, kay kitang tanan​—mga magbalantay ug ingon man mga karnero—​maoy bahin sa lawas, ug dunay usa lamang ka ulo, si Kristo. Busa gilarawan ni Pablo ang makapadasig nga hulagway sa gugma, pagtagad, ug pagtahod nga angay natong batonan alang sa usag usa. Ang pag-ila niini magtabang sa mga ansiyano sa pagbaton ug mapaubsanon, timbang nga panglantaw sa ilang papel diha sa kongregasyon.

 6. Bisag nakabaton ug apostolikanhong awtoridad, sa unsang paagi gipakita ni Pablo ang usa ka mapaubsanong espiritu?

⁶ Kining “mga gasa nga mga tawo” dili magtinguha sa pagkontrolar sa kinabuhi o pagtuo sa ilang mga isigkamagsisimba. Si Pablo, bisag nakabaton ug apostolikanhong awtoridad, mapaubsanong miingon sa mga taga-Corinto: “Dili nga kami mao ang mga agalon sa inyong pagtuo, kundili kami mga isigkamagbubuhat alang sa inyong kangaya, kay maoy pinaagi sa inyong pagtuo nga kamo nagabarog.” (2 Corinto 1:24) Dili buot ni Pablo nga kontrolahon ang pagtuo ug paagi sa kinabuhi sa iyang mga igsoon. Sa pagkatinuod, wala siyay nakitang panginahanglan sa pagbuhat sa ingon, kay iyang gipahayag ang pagsalig nga sila maoy matinumanon nang mga lalaki ug babaye nga sakop sa organisasyon ni Jehova tungod kay buot nilang buhaton ang husto. Busa, sa naghisgot sa iyang kaugalingon ug sa iyang kauban sa panaw nga si Timoteo, si Pablo, sa pagkatinuod, nag-ingon: ‘Maoy among trabaho ang pagbuhat uban kaninyo aron sa pag-alagad sa Diyos uban ang kangaya.’ (2 Corinto 1:1) Pagkamapaubsanong espiritu!

 7. Unsay nasabtan sa mapaubsanong mga ansiyano bahin sa ilang papel diha sa kongregasyon, ug unsang pagsalig ang ilang nabatonan diha sa ilang mga isigkamagbubuhat?

⁷ Ang “mga gasa nga mga tawo” karon adunay samang trabaho. Sila maoy ‘mga isigkamagbubuhat alang sa atong kangaya.’ Ang mapaubsanong mga ansiyano nakasabot nga dili sila ang magdesisyon kon unsa ka dako ang mahimo sa uban diha sa pag-alagad sa Diyos. Sila nasayod nga bisan tuod sila tingali modasig sa uban sa pagpadako o pagpauswag sa ilang ministeryo, ang pag-alagad sa Diyos kinahanglang magsumikad sa usa ka mainandamong kasingkasing. (Itandi ang 2 Corinto 9:7.) Sila masaligon nga kon ang ilang mga isigkamagbubuhat malipayon, ilang himoon ang ilang tanang mahimo. Busa maoy ilang kinasingkasing nga tinguha ang pagtabang sa ilang mga igsoon sa “pag-alagad kang Jehova uban ang pagmaya.”​—Salmo 100:2.

Pagtabang sa Tanan sa Pag-alagad Uban ang Kangaya

 8. Unsa ang pipila ka paagi nga niana ang mga ansiyano makatabang sa ilang mga igsoon sa pag-alagad kang Jehova uban ang kangaya?

⁸ Mga ansiyano, unsaon ninyo pagtabang ang inyong mga igsoon sa pag-alagad uban ang kangaya? Kamo makadasig pinaagi sa panig-ingnan. (1 Pedro 5:3) Ipakita ang inyong kasibot ug kangaya diha sa ministeryo, ug ang uban hayan madasig sa pagsundog sa inyong panig-ingnan. Dayega ang uban tungod sa ilang bug-os-kalag nga mga paningkamot. (Efeso 4:29) Ang mainiton ug tiunay nga pagdayeg motabang sa uban sa pagbating mapuslanon ug gikinahanglan. Magdasig kini sa mga karnero nga buot mobuhat sa ilang labing maayo sa pag-alagad sa Diyos. Likayi ang di-maayong mga pagtanditandi. (Galacia 6:4) Ang maong mga pagtanditandi makapaluya inay makapalihok sa uban nga mouswag. Gawas pa, ang mga karnero ni Jehova maoy mga indibiduwal​—nga may nagkalainlaing mga kahimtang ug mga katakos. Sama kang Pablo, ipahayag ang pagsalig sa inyong mga igsoon. Ang gugma “nagatuo sa tanang butang,” busa maayong kita motuo nga ang atong mga igsoon nahigugma sa Diyos ug buot nga pahimut-an siya. (1 Corinto 13:7) Sa dihang inyong ‘ipakita ang pasidungog sa uban,’ inyong gipagula ang maayo diha kanila. (Roma 12:10) Magmasaligon nga kon ang mga karnero madasig ug mapalagsik, ang kadaghanan mobuhat sa ilang maarangan sa pag-alagad sa Diyos, ug sila makakaplag ug kangaya nianang maong pag-alagad.​—Mateo 11:28-30.

 9. Unsang panglantaw alang sa mga isigkaansiyano ang makatabang sa matag ansiyano sa pag-alagad uban ang kangaya?

⁹ Ang mapaubsanong panglantaw sa imong kaugalingon isip usa ka “isigkamagbubuhat” motabang kanimo sa pag-alagad uban ang kangaya ug sa pagpabili sa talagsaong mga gasa sa imong mga isigkaansiyano. Ang matag ansiyano adunay kaugalingong mga kahanas ug mga katakos nga iyang magamit alang sa kaayohan sa kongregasyon. (1 Pedro 4:10) Ang usa tingali batid sa pagpanudlo. Ang lain lagmit epektibong tig-organisar. Apan ang lain tingali dali kaayong maduolan tungod sa iyang kamainiton ug kamabination. Ang kamatuoran mao, walay ansiyano ang nakabaton sa tanang gasa diha sa samang gidak-on. Ang pagbaton ba ug partikular nga gasa​—ingnon ta, ang gasa sa pagpanudlo—makapahimong labaw sa usa ka ansiyano kay sa lain? Dili gayod! (1 Corinto 4:7) Sa laing bahin, dili kinahanglang masina sa gasa nga nabatonan sa uban o mobating di-takos sa dihang ang laing ansiyano dayegon sa uban gumikan sa iyang katakos. Hinumdomi, ikaw mismo adunay mga gasa nga nakita ni Jehova diha kanimo. Ug siya makatabang nimo sa pag-ugmad nianang mga gasaha ug paggamit niana alang sa kaayohan sa imong mga igsoon.​—Filipos 4:13.

‘Magmasinugtanon ug Magmapinasakopon’

10. Nganong angayan lamang nga atong ipahayag ang pagpabili alang sa “mga gasa nga mga tawo”?

¹⁰ Inigkadawat natog gasa, angayan lamang ang pagpahayag ug pagpabili. “Ipakita ang inyong kaugalingon nga mapasalamaton,” matod sa Colosas 3:15. Nan, unsa na man ang bahin sa “mga gasa nga mga tawo,” ang bililhong gasa nga gihatag ni Jehova kanato? Siyempre, labaw sa tanan mapasalamaton kita kang Jehova, ang mahinatagong Tighatag-ug-Gasa. Apan komosta na man ang “mga gasa nga mga tawo” mismo? Sa unsang paagi atong ipakita nga ato silang gipabilhan?

11. (a) Sa unsang paagi atong ikapakita ang atong pagpabili alang sa “mga gasa nga mga tawo”? (b) Unsay kahulogan sa mga ekspresyong “magmasinugtanon” ug “magmapinasakopon”?

¹¹ Atong ikapakita ang atong pagpabili alang sa “mga gasa nga mga tawo” pinaagi sa pagsunod dayon sa ilang gipasukad-sa-Bibliyang tambag ug mga desisyon. Ang Bibliya nagtambag kanato: “Magmasinugtanon kamo kanilang nagapanguna taliwala kaninyo ug magmapinasakopon, kay sila padayong nagabantay sa inyong mga kalag ingon nga sila maoy maghatag ug husay; aron buhaton nila kini uban ang kangaya ug dili uban ang pagpanghupaw, kay kini makadaot kaninyo.” (Hebreohanon 13:17) Matikdi nga kita kinahanglang dili lamang “magmasinugtanon” kondili “magmapinasakopon” usab kanilang nagapanguna. Ang Gregong pulong alang sa “magmapinasakopon” sa literal nagkahulogang “magpasignunot ka ilalom sa.” Nagkomento bahin sa mga ekspresyong “magmasinugtanon” ug “magmapinasakopon,” ang eskolar sa Bibliya nga si R. C. H. Lenski nag-ingon: “Ang usa mosugot sa dihang ang usa mouyon kon unsay giingon kaniya nga buhaton, nga nakombinsir sa kahusto ug kamabungahon niini; ang usa mopasignunot . . . kon siya adunay sukwahing opinyon.” Kon atong masabtan ug mauyonan ang pagtultol niadtong nagapanguna, dali ra ang pagsugot. Apan unsa na man kon kita wala makasabot sa rason luyo sa usa ka partikular nga desisyon?

12. Nganong kinahanglan nga kita magpasakop, o magpasignunot, bisag kita sa bug-os wala makasabot sa rason luyo sa usa ka partikular nga desisyon?

¹² Mao kining higayona nga kita kinahanglang magmapinasakopon, o magmapasignunoton. Ngano? Una, kinahanglan kitang mosalig nga kining kuwalipikado sa espirituwal nga mga lalaki nagtinguha sa atong kaayohan. Total, nasayod sila pag-ayo nga sila kinahanglang manubag kang Jehova alang sa mga karnero nga gipaatiman kanila. (Santiago 3:1) Dugang pa, maayong atong hinumdoman nga kita lagmit walay kasayoran sa tanang kompidensiyal nga mga kamatuoran nga nagtultol kanila sa usa ka desisyon nga gipasikad sa kahibalo.​—Proverbio 18:13.

13. Unsay makatabang kanato sa pagpasakop kon bahin sa hudisyal nga mga desisyon sa mga ansiyano?

¹³ Unsa na man ang pagkamapinasakopon kon bahin sa hudisyal nga mga desisyon? Tinuod, kini tingali dili sayon, ilabina kon ang desisyon mao ang pagpalagpot sa usa nga atong minahal​—usa ka paryente o suod nga higala. Dinhi usab, labing maayong mopasignunot sa paghukom sa “mga gasa nga mga tawo.” Anaa sila sa kahimtang nga mas timbang sa pagdesisyon kay kanato, ug lagmit mas nahibalo sila sa mga hitabo. Kining mga igsoona sagad nga masakitan sa maong mga desisyon; usa ka seryosong responsabilidad ang ‘paghukom alang kang Jehova.’ (2 Cronicas 19:6) Maningkamot sila pag-ayo nga magmaluluy-on, kay sila mahunahunaon nga ang Diyos “andam sa pagpasaylo.” (Salmo 86:5) Apan kinahanglang huptan usab nilang hinlo ang kongregasyon, ug ang Bibliya nagsugo nga ilang ipalagpot ang di-mahinulsolong mga mamumuhat ug daotan. (1 Corinto 5:11-13) Sa daghang kahimtang ang mamumuhat ug daotan mismo modawat sa desisyon. Ang disiplina lagmit mao gayoy iyang gikinahanglan aron siya makaamgo. Kon kita, nga iyang mga minahal, mapinasakopon sa desisyon, kita sa ingon nagatabang kaniya nga makabenepisyo sa disiplina.​—Hebreohanon 12:11.

‘Hatagi Sila ug Labi pa kay sa Labaw-Ordinaryo nga Pagtagad’

14, 15. (a) Sumala sa 1 Tesalonica 5:12, 13, nganong ang mga ansiyano takos sa atong pagtagad? (b) Nganong ikaingon nga ang mga ansiyano ‘nagahago taliwala kanato’?

¹⁴ Atong ikapakita usab ang atong pagpabili sa “mga gasa nga mga tawo” pinaagi sa pagpakita kanilag pagtagad. Sa pagsulat ngadto sa kongregasyon sa Tesalonica, si Pablo nagtambag sa mga membro niini: “Pagatamdon silang kinsa nagahago taliwala kaninyo ug nagadumala kaninyo diha sa Ginoo ug nagapahimangno kaninyo; ug . . . hatagan sila ug labi pa kay sa labaw-ordinaryo nga pagtagad diha sa gugma tungod sa ilang buhat.” (1 Tesalonica 5:12, 13) “Nagahago”​—wala ba kana maghubit sa debotadong mga ansiyano nga sa pagkadi-mahakogon naghatag sa ilang kaugalingon alang kanato? Hunahunaa, sa makadiyot, ang bug-at nga luwan nga gipas-an niining minahal nga mga igsoon.

¹⁵ Sa daghang kaso sila mga de-pamilya nga kinahanglang manarbaho sa sekular nga paagi aron makatagana sa ilang mga pamilya. (1 Timoteo 5:8) Kon ang ansiyano may mga anak, kining mga bataa nagkinahanglag panahon ug pagtagad gikan sa ilang amahan. Siya tingali kinahanglang motabang kanila sa ilang mga buluhaton sa tunghaan, ingon man mag-eskedyul ug pipila ka panahon aron gamiton ang ilang kusog sa pagkabatan-on diha sa maayong lulinghayaw. (Ecclesiastes 3:1, 4) Labing hinungdanon, siya mag-atiman sa espirituwal nga mga panginahanglan sa iyang pamilya, nga makanunayong magdumalag pagtuon sa Bibliya sa pamilya, moduyog kanila diha sa pag-alagad sa kanataran, ug magdala kanila ngadto sa Kristohanong mga tigom. (Deuteronomio 6:4-7; Efeso 6:4) Dili nato hikalimtan nga dugang pa niining mga responsabilidad nga komon sa daghan kanato, ang mga ansiyano adunay dugang mga buluhaton: pagpangandam sa mga bahin sa tigom, pagduaw sa mga igsoon isip magbalantay, pag-atiman sa espirituwal nga kaayohan sa kongregasyon ug, kon kinahanglanon, pagdumala sa hudisyal nga mga kaso. Ang pipila nag-abaga ug ekstrang responsabilidad maylabot sa sirkitong mga asembliya, distritong mga kombensiyon, pagtukod ug Kingdom Hall, ug mga Hospital Liaison Committee. Sa pagkatinuod, kining mga igsoona “nagahago”!

16. Hubita ang mga paaging atong ikapakita ang pagtagad alang sa mga ansiyano.

¹⁶ Unsaon man nato pagpakita kanila ug pagtagad? Ang usa ka proverbio sa Bibliya nag-ingon: “Ang pulong sa hustong panahon Oh pagkamaayo!” (Proverbio 15:23; 25:11) Busa ang mga pulong sa sinserong pagpabili ug pagdasig makapakita kanila nga wala nato ibalewala ang ilang paghago. Usab, magmakataronganon kita sa kon unsay atong idahom kanila. Sa usa ka bahin, kinahanglang dili kita magpanuko sa pagduol kanila alang sa tabang. May mga panahon tingaling ang ‘atong kasingkasing anaa sa tumang kasakit’ ug nagkinahanglan kitag Kasulatanhong pagdasig, paggiya, o tambag gikan kanilang “kuwalipikado sa pagpanudlo” sa Pulong sa Diyos. (Salmo 55:4; 1 Timoteo 3:2) Sa samang panahon, angay natong hinumdoman nga dili daghang panahon ang ikahatag sa usa ka ansiyano kanato, kay dili niya katalikdan ang mga panginahanglan sa iyang pamilya o sa uban pa diha sa kongregasyon. Kay adunay “pagbati nga alang sa isigkaingon” alang niining kugihang mga igsoon, dili kita buot maghimog di-makataronganong mga hangyo diha kanila. (1 Pedro 3:8) Hinunoa, atong pabilhan ang bisan unsang panahon ug pagtagad nga ilang ikahatag kanato sa makataronganong paagi.​—Filipos 4:5.

17, 18. Unsang mga sakripisyo ang gihimo sa daghang asawa kansang mga bana maoy mga ansiyano, ug sa unsang paagi atong ikapakita nga kining matinumanong mga babaye wala nato gibalewala?

¹⁷ Komosta na man ang mga asawa sa mga ansiyano? Dili ba takos usab sila sa atong konsiderasyon? Kon buot hunahunaon, ilang gipakigbahin ang ilang mga bana sa kongregasyon. Sagad kining nanginahanglag mga sakripisyo sa ilang bahin. Usahay, ang mga ansiyano kinahanglang mogugol sa mga oras sa gabii aron atimanon ang mga butang sa kongregasyon sa dihang ila unta kanang gugolon uban sa ilang mga pamilya. Sa daghang kongregasyon ang matinumanong Kristohanong mga babaye kinabubut-ong nagasakripisyo aron ang ilang mga bana makaatiman sa mga karnero ni Jehova.​—Itandi ang 2 Corinto 12:15.

¹⁸ Sa unsang paagi atong ikapakita nga wala nato ibalewala kining matinumanong Kristohanong mga babaye? Sa walay duhaduha pinaagi sa dili paghangyo sa di-makataronganong paagi sa ilang mga bana. Apan dili usab nato kalimtan ang gahom sa yanong mga pulong sa pagpabili. Ang Proverbio 16:24 nag-ingon: “Ang makalipay nga mga pulong maoy ingon sa udlan sa usa ka putyukan, matam-is alang sa kalag ug makaayo sa mga bukog.” Tagda ang usa ka kasinatian. Human sa Kristohanong tigom, usa ka magtiayon miduol sa usa ka ansiyano ug gihangyo nga makigsulti kaniya bahin sa ilang tin-edyer nga anak lalaki. Samtang ang ansiyano nakigsulti sa magtiayon, ang iyang asawa naghulat nga mapailobon. Human niana, ang inahan miduol sa asawa sa ansiyano ug miingon: “Gusto kong pasalamatan ka sa panahong gigamit sa imong bana sa pagtabang sa akong pamilya.” Kadtong yano, makapahimuot nga mga pulong sa pagpabili nakatandog gayod sa kasingkasing sa asawa niadtong ansiyanoha.

19. (a) Ang mga ansiyano, isip usa ka grupo, matinumanong nagatuman sa unsang mga tumong? (b) Kinahanglang magmadeterminado kitang tanan sa pagbuhat sa unsa?

¹⁹ Ang pagtagana ug mga ansiyano aron atimanon ang mga karnero maoy usa sa ‘maayong mga gasa’ ni Jehova. (Santiago 1:17) Dili, kining mga tawhana dili hingpit; sama kanatong tanan, sila masayop. (1 Hari 8:46) Apan, isip usa ka grupo, ang mga ansiyano sa mga kongregasyon sa tibuok kalibotan matinumanong nagatuman sa mga tumong nga diha sa hunahuna ni Jehova alang kanila​—nga mao, sa pagpasibo pag-usab, pagpalig-on, paghiusa, ug pagpanalipod sa panon. Hinaot ang matag ansiyano magmadeterminado nga padayong mag-atiman sa mga karnero ni Jehova sa malulotong paagi, sa ingon magpamatuod sa iyang kaugalingon nga usa ka gasa, o panalangin, ngadto sa iyang mga igsoon. Ug hinaot nga kitang tanan magmadeterminado sa pagpakita sa atong pagpabili alang sa “mga gasa nga mga tawo” pinaagi sa pagkamasinugtanon ug pagkamapinasakopon kanila ug pinaagi sa pagpakita kanilag pagtagad tungod sa ilang paghago. Pagkamapasalamaton nato nga si Jehova sa kamahigugmaon nagtaganag mga lalaki kinsa, sa baylo, moingon sa iyang mga karnero: ‘Maoy among trabaho nga tabangan kamo sa pag-alagad sa Diyos uban ang kangaya’!

Unsaon Nimo Pagtubag?

◻ Nganong ang kongregasyon haom nga ikatandi sa usa ka lawas?

◻ Sa unsang paagi ang mga ansiyano makatabang sa ilang mga igsoon sa pag-alagad kang Jehova uban ang kangaya?

◻ Nganong kita kinahanglang dili lamang masinugtanon kondili mapinasakopon usab niadtong nagapanguna?

◻ Sa unsang mga paagi atong ikapakita ang pagtagad alang sa mga ansiyano?

[Hulagway sa panid 16]

Mga ansiyano, dayega ang uban tungod sa ilang bug-os-kalag nga mga paningkamot

[Hulagway sa panid 17]

Pinaagi sa ilang masibotong panig-ingnan diha sa ministeryo, ang mga ansiyano makatabang sa mga membro sa pamilya ug sa uban pa sa pag-alagad uban ang kangaya

[Mga hulagway sa panid 18]

Atong gipabilhan ang atong kugihang mga ansiyano!