Yishima
23 Muze mutwama hanga ulie hamuwika ni mwanangana,
watamba kutala kanawa yize muulia.
2 Sako poko ha muliu* we
nyi ukwete lwahu wa kulia chinji.
3 Kanda uzanga kulia chenyi chiyema,
mumu kulia chacho muchihasa kukwonga.
4 Kanda ulikatalisa ni kufupa upite.
Kanda uchilinga, solola chinyingi.
6 Kanda ulia kulia cha mutu yoze wakumina,
chipwe kuzanga kulia chenyi chiyema,
7 mumu iye kali ngwe mutu yoze wakwalwila mukwo kulia cheswacho mamwaha.
Ni kumulweza ngwenyi: “Liako, nwako,” alioze hi cha ku mbunge ko.
8 Yena musaza ndambu ya kulia yize walianga,
uchichimieko we muulitokela.
9 Kanda uhanjika ku matwi ja chihepuke,
mumu iye makalelesa maliji je a mana.
10 Kanda ututulula njiza jikulu haze ajisele,
chipwe kunjila mu munda wa ana-shiwa.
11 Mumu yoze wakwakalila kali mukwa-ndundo.
Iye maakalila ha yuma yeswe yize yena mwalinga.
12 Sako mbunge ku fumbo,
matwi je apanjike maliji a chinyingi.
13 Kanda wecha kufumba mwana.
Nyi wamulamba ni mbwechi kechi kufwa.
14 Watamba kumulamba ni mbwechi,
hanga umulamwine ku kufwa.
15 Mwanami, nyi mbunge ye muyipwa ni mana,
mbunge yami muyikawahilila.
16 Mbunge yami muyikawahilila
muze mivumbo ye muyihanjika yuma yalita.
17 Mbunge ye kanda yivila yivulumunyi chipululu,
alioze vumbika Yehova tangwa lieswe,
18 mumu mukapwa ni mwono upema kulutwe lia matangwa,
yuma yize wakushimbwila kechi kakuchizayo.
19 Mwanami, panjika, pwako ni mana,
songwela mbunge ye mu jila yipema.
20 Kanda upwa hakachi ka atu waze akunwa vinyu yinji,
chipwe hakachi ka atu waze akulia yifwo yinji,
21 mumu waze akunwa chinji ni kulia chinji makapwa yiswale,
makazala yipuzu mumu lia tulo.
22 Panjika tatenu yoze wakusemene,
kanda ulengulula noko mumu lia kupwa kashinakaji.
23 Landa umwenemwene kanda ukeza kaulanjisa,
landa nawa mana, fumbo ni chinyingi.
24 Tata yoze uli ni mwana mukwa-ululi, makawahilila.
Tata yoze uli ni mwana mukwa-mana, makeva chiseke mumu lia iye.
25 Tato ni naye makeva chiseke,
yoze wamusemene makawahilila.
26 Mwanami, ngwehe kama mbunge ye,
meso je awahilile kama ni majila jami.
27 Pwo chikoi kali ngwe umwe wina usuku,
pwo chitanji kali ngwe umbu lialipola.
28 Chizechene ngwe mwiji, iye kakuta muheto,
malunga keshi kushishika waze akufwa mu muheto wenyi kali anji.
29 Iya yoze unamono lamba? Iya yoze unalihulumba?
Iya yoze unazwela? Iya yoze unalinyenyeta?
Iya yoze uli ni yilonda chakuhona chitela? Iya yoze uli ni meso achila?
30 Waze akupalikisa mashimbu anji ni kunwa vinyu,
waze akufupa vinyu ya kuchinga.
31 Kanda utala ku kuchila cha vinyu,
muze yinalejima mu musenge ni kupalumuka kanawa ha muliu,
32 mumu ku songo yakusumana ngwe lunoka,
ni kutuhwisa ulembe ngwe wa yenge.
33 Meso jenyi makamona yuma yamokomoko,
mbunge yenyi muyikahanjika yuma yipi.
34 Yena mukeva ngwe mutu yoze unapombo mukachi ka kalunga-lwiji,
ngwe yoze unapomba ha kasonga ka ulungu.
35 Yena muukamba ngwe: “Kangulamba, alioze chevile nichimwe.
Kangufufula, alioze chevile nichimwe.
Ola yika mungukahinduka?
Ngunafupu nawa walwa ukwo.”