Yishima
24 Kanda wivila atu api chipululu.
Chipwe kuzanga kulikata no.
2 Mumu mu mbunge jo, kakunyonga kulinga yuma ya upupilo.
Mivumbo yo yakuhanjika yuma yipi.
3 Zuwo kakulitunga ni mana,
kakulikolesa ni malinjekela.
4 Chinyingi chakuzalisa yipatwilo yamo,
ni yuma ya ndando ya mulali weka ni weka ni yuma yipema.
5 Mukwa-mana kakwete tachi.
Chinyingi chakwokesa tachi jenyi.
6 Usongwelo wa mana, we muukukwasa kwasa jita,
akwa-kuhana yiyulo nyi mapwa anji, mukumba.
7 Chihepuke kechi kuhasa kupwa ni mana amwenemwene,
iye keshi ni yize mamba ku chikolo cha mbonge.
8 Yoze wakunyonga yuma yipi,
makamuvuluka ngwo, mukwa-mbwanja.
9 Yuma yize chihepuke akunyonga kulinga, yakutwala ku shili.
Atu keshi kuzanga mukwa-kulenya.
10 Nyi wanenganyana ha tangwa lia lamba,
tachi je mujikapwa jikehe.
11 Pulwila waze anatwala hanga aashihe.
Lamwina waze ali mu ponde ya kwashiha.
12 Nyi wamba ngwe: “Alioze te kutwachinyingikine,”
shina yoze wakuhengwola mbunge, kechi kachinyingika?
Ewa, yoze wakukuhengwola makachinyingika.
Makafweta mutu ni mutu kulita ni yitanga yenyi.
13 Mwanami, liako uchi, mumu wapwa upema.
Uchi wa ku chishila* wakuyema.
14 Chizechene nawa, nyingika ngwe mana kapwa apema kuli yena, nyi
wawana mukapwa ni mwono upema kulutwe lia matangwa. Ni yuma yize
unashimbwila, kechi kakuchizayo.
15 Kanda ujikinyina zuwo lia mukwa-ululi ngwe chize mutu mupi
akulinga. Kanda unongesa chihela chenyi cha uhwimino.
16 Mumu chipwe mukwa-ululi malimbuka yisuho shimbiali, makakatuka
cheka. Alioze atu api makatalinga mumu lia lamba.
17 Muze mukwa-kole we malimbuka, kanda wiva chiseke.
Muze iye matalinga, mbunge ye kanda yiwahilila.
18 Mumu nyi wachilinga, Yehova machimona keshi kuwahilila. Mecha
kwivila uli mukwa-kole we.
19 Kanda wiva kupiha mumu lia atu api.
Kanda wivila atu api chipululu.
20 Mumu atu api keshi keshi kushimbwila yuma yipema.
Ndeya ya atu api makayijima.
21 Mwanami, vumbika Yehova ni mwanangana.
Kanda ulichinga ni yilianyi.
22 Mumu lamba lio, mulikaawana susumuku.
Iya unanyingika lamba lize mulikawana ayo ene?
23 Maliji wano no, kali a akwa-mana:
Hi chipema ko kusolola katonde ha kusopa umwe mulonga.
24 Mweswawo yoze malweza mutu mupi ngwenyi:
“Yena uli mukwa-ululi,” makamushinga kuli atu ni kumuhisa kuli mavungu.
25 Alioze waze akwakumika, makayuka.
Makaawahisa ni yuma yipema.
26 Atu makahana mbeju kuli yoze wakuhana kumbululo liamwenemwene.
27 Chitangu, linga mulimo we, lima munda we,
mba mutunga zuwo lie.
28 Kanda uhana uchela hakutwala kuli mukwenu nyi kuushi ni shindakenyo
wa yize unahanjika. Kanda wonga akwenu ni mivumbo ye.
29 Kanda wamba ngwe: “Mungumulinga yuma yizeyene angulinganga.
Mungumuhilwishila yize angulinga.”
30 Napalikanga mu munda wa chileya,
mu munda wa uva wa mutu yoze keshi mana.
31 Yingumona ngwami, te unajika,
Munda wacho te unazala too ni yambu yamokomoko.
Chipanga cha mawe chize atungile te hichauzuka.
32 Muze nachimwene, yinguputuka kunyonga.
Yinguchimona, mba yingulilongesa ngwami:
33 Nyi wapomba ndambu, wanongwoka ndambu,
wavunga moko hanga uhwime,
34 uswale we mukaheta ngwe mwiji,
kuhona che ngwe mutu yoze uli ni uta.