Kuli A-Roma
6 Mba yika mutwamba? Shina twatamba kunyongonona mu shili hanga chawana cha keke chikalumbame nyi? 2 Kwamba pundu ka! Nyi hitunatusuka ku shili, kuchi mba mutununga ni kutwama mu shili? 3 Shina kunwanyingikine ngwenu yetu eswe hanatupapachisa muli Kristu Yesu, hanatupapachisa mu kufwa chenyi? 4 Kashika, hanatufundu hamwe nenyi kupalikila mu upapachiso wetu mu kufwa chenyi, hanga ngwe chize Tata ni ndundo jenyi ja uhenya wahindwishile Kristu ku kufwa, chenacho ni yetu nawa tupwenu ni mwono waha. 5 Mumu nyi hitunalinungu ni Kristu ha kufwa ngwe chize afwile iye, chizechene mutulinunga nenyi nawa, muze makatuhindwisa ngwe chize amuhindwishile. 6 Se tunanyingika ngwetu hanahachila utu wetu ukulu ha mutondo wa lamba hamwe nenyi, kuchina mujimba wetu wa shili uhone kutuyula nawa hanga kutuchi kapwa nawa mu undungo wa shili. 7 Mumu mutu yoze hanafu kulu hanatusuka* ku undungo wa shili.
8 Chikwo nawa, nyi mutufwa hamwe ni Kristu, tunafuliela ngwetu, mutukatwama ni mwono hamwe nenyi. 9 Mumu tunanyingika ngwetu Kristu hanamuhindwisa hakachi ka afu, iye kechi kafwa nawa. Kufwa kuchishi nawa ni chiyulo hali iye. 10 Mumu kufwa chize afwile, wafwile ku shili kamuwika kunahu, alioze mwono uze ali nawo, kali nawo hanga alinge upale wa Zambi. 11 Chizechene nawa, ni yenu chatamba kulinyonga ngwenu nuli afu hakutwala ku shili, alioze nuli a mwono hakutwala kuli Zambi kupalikila muli Kristu Yesu.
12 Kashika, kanda nutayiza hanga shili yinunge ni kuyula mijimba yenu yize yakufwa, hakunukoka hanga nwononokene usolo wayo.* 13 Kanda nuhana mijimba* yenu ku shili ngwe yuma yakulinga nayo uhenge, alioze lihanenu kuli Zambi ngwe atu waze hanahindwisa hakachi ka afu, ni kuhana mijimba* yenu kuli Zambi ngwe yuma yakulinga nayo ululi. 14 Shili kuyatambile kunuyula, mumu kunushi mushi lia shimbi alioze mushi lia chawana cha keke.
15 Mba kuchi mutwamba? Shina twatamba kuvulumuna mumu ngwo kutushi mushi lia shimbi alioze mushi lia chawana cha keke? Kwamba pundu ka! 16 Kunwanyingikine ngwenu nyi nwalihana kuli umwe ngwe ndungo hanga numwononokene, munulipwisa ndungo kuli iye nyi? Kashika nyi nwapwa ndungo ja shili kumunukafwa, alioze nyi nwapwa ndungo ya kwononoka munukapwa akwa-ululi. 17 Alioze tusakwilenu Zambi, mumu chipwe ngwe kunyima nwapwile ndungo ja shili, haliapwila nwakwononokena ni mbunge yeswe longeso lize anulongesele. 18 Ewa, amu hananutusula ku shili, hinunapu ndungo ja ululi. 19 Mumu lia ulelu wa mujimba wenu ngunahanjika yuma yize atu ananyingika; nwahanyine mijimba yenu ngwe ndungo ku yuma ya luchisa hanga nukalinge yuma yipi, alioze haliapwila kunjikenu mijimba yenu ku yuma ya ululi hanga nukalinge yuma yisandu. 20 Muze te nuchili ndungo ja shili, te kunushi kufupiwa kulinga yuma yalita.
21 Mba mihuko yika nwapwile nayo ha mashimbu jacho? Yuma yize haliapwila nwakuvwila sonyi. Mumu songo lia yuma yacho kufwa. 22 Alioze, amu haliapwila hanutusula ku shili, lingenu yuma yisandu ngwe ndungo ja Zambi, songo lia yuma yacho mulikapwa mwono wa mutolo. 23 Mumu fweto ya shili kufwa, alioze chawana chize Zambi akuhana mwono wa mutolo muli Kristu Yesu Mwene wetu.