Kuli A-Hepreu

11 Ufulielo uli kupwa ni shindakenyo ngwo, yuma yize tunashimbwila muyikamanunuka, ni kutayiza* pundu ngwo yuma yize kuyishi kumoneka yili yamwenemwene. 2 Mumu lia ufulielo wacho, Zambi yawahilila ni atu a ku mashimbu a kunyima.

3 Mumu lia ufulielo, tunanyingika ngwetu yuma yeswe yili mu malilu ni hashi, kayiluliekele kupalikila ku liji lia Zambi, kashika yuma yize twakumona kayitangile kupalikila mu yuma yize kuyishi kumoneka.

4 Mumu lia ufulielo, Abele yalambula kuli Zambi chitapo chilemu kuhiana cha Kene, kupalikila mu ufulielo wacho, yamutayiza ngwo kali mukwa-ululi, mumu Zambi katayijile yawana yenyi. Chipwe ngwe hanafu, nihindu machihanjika kupalikila mu ufulielo wenyi.

5 Mumu lia ufulielo, Enoke yamutwala ku chihela cheka kuli Zambi. Kashika kakafwile ngwe chize atu eswe akufwa. Kakamuwanyine kuma nikumwe, mumu Zambi kamuchijile ni kumutwala kweka. Shimbu te kanda achimuchiza, yamutayiza ngwo kanapemena kuli Zambi. 6 Chikwo nawa, nyi mutu keshi ufulielo, kechi kuhasa kulinga yuma yize muyivwisa Zambi kuwaha, mumu yoze makundama kuli Zambi, katamba kufuliela ngwenyi iye kwali, chikwo nawa ngwo iye kakuwahisa waze akumufupa ni mbunge yeswe.

7 Mumu lia ufulielo, Noa muze amutowezele kuli Zambi hakutwala ku yuma yize te kanda yichimoneka, yevwila Zambi woma ni kutunga ulungu hanga alamwine usoko wenyi. Kupalikila mu ufulielo wacho, yahisa akwa-hashi, yapwa swana ya ululi uze wakwiza mumu lia ufulielo.

8 Mumu lia ufulielo, Apalahama muze amusanyikine, yononoka ha kuya ku chihela chize te matambula ngwe chihinga, yaya, chipwe ngwe kakanyingikine kuze te anayi. 9 Mumu lia ufulielo, yatwama ngwe chilambala mu chifuchi cha chilakenyo, ngwe mu chifuchi cha mbala, yatwama mu mbalaka hamwe ni Izake ni Yakomba, maswana ni akwo a chilakenyo chimuwika. 10 Mumu te kakushimbwila mbonge yize yili ni fundamentu yamwenemwene, yize aluliekele ni kutunga kuli Zambi.

11 Chikwo nawa, mumu lia ufulielo, Sara, chipwe ngwe miaka ya kusema te hiyapalika, yatambula tachi ja kusema mwana, mumu kamwene ngwenyi, Yoze wamulakenya kashishika. 12 Kashika, kuli mutu umuwika yoze te hapwa ngwe mufu, yikusemuka ana anji ngwe tutongonoshi a mwilu, ngwe masekeseke a ku sesa lia kalunga-lwiji waze keshi kuhasa kwalula.

13 Wano eswe yafwa ni ufulielo, chipwe ngwe kakamwene yuma yize aalakenyene, alioze yayimwena kusuku, ni uwahililo weswe yayitayiza, ni kuhanjika kumeso ja atu eswe ngwo kali yilambala, ni kupwa ngeji mu chifuchi chacho. 14 Atu waze akuhanjika yuma yino kakusolola ngwo, kakufupa ni mbunge yeswe chihela cha ayo ene. 15 Alioze, nyi ayo kanungine ni kunyonga ku chifuchi kuze akatukile, kachi kapwile ni uhashi wa kuhilukako. 16 Kwamba pundu, atu jacho kafupile kupwa ni chihela chipema, che kwamba, chimwe chihela cha mwilu. Kashika Zambi keshi kwevwila sonyi muze akumuvuluka ngwo Zambi yo, mumu hanaaluliekela yimwe mbonge.

17 Mumu lia ufulielo, Apalahama muze amwesekele, yafupa kulambula Izake, mutu yoze wevwile kuwaha muze atambwile yilakenyo, yeseka kulambula mwanenyi umuwika, 18 chipwe ngwe kamulwezele ngwo: “Yoze makavuluka ngwo munyachi we, makeza kupalikila muli Izake.” 19 Alioze yapwa ni shindakenyo ngwenyi, Zambi kali ni ndundo ja kuhindwisa Izake chipwe lume hakachi ka afu; mba yamutambula ku kufwa ngwe chilweza cha yize muyilingiwa kulutwe.

20 Chikwo nawa, mumu lia ufulielo, Izake yawahisa Yakomba ni Esau hakutwala ku yuma ya kulutwe.

21 Mumu lia ufulielo, Yakomba muze te himafwa, yawahisa ana eswe a Yosefwe, yawayila Zambi aku kanashachila ku pango* yenyi.

22 Mumu lia ufulielo, Yosefwe muze te himafwa, yahanjika hakutwala ku kutuhuka cha ana a Izalele, ni kwalweza yize te malinga ni yifwaha yenyi.

23 Mumu lia ufulielo, Mose yamusweka ha tukweji atatu kuli yisemi jenyi muze asemukine, mumu yamona ngwo kali mwana mupema, ayo kakevwilile woma shimbi ya mwanangana. 24 Mumu lia ufulielo, muze Mose akolele, kakatayijile hanga amuvuluke ngwo mwana wa mwana wa pwo wa Falau, 25 yasakula kumona lamba hamuwika ni atu ja Zambi, shimbu aliyukise ni uwahililo wa yuma ya shili ya mashimbu akepe, 26 mumu kapwile ni kumona luchoko wa Kristu ngwe upite ulemu kuhiana upite wa mu Engitu, mumu kapwile ni kuhulikila meso jenyi ha fweto yize te matambula. 27 Mumu lia ufulielo, yahichika Engitu chakuhona kwivwa woma wa ufwatulo wa mwanangana, mumu kanungine ni kumana nguu ngwe kanamono Yoze keshi kumoneka. 28 Mumu lia ufulielo, yalinga Chizomboka ni kusapwila manyinga ku yikolo, hanga mukwa-kunongesa ahone kunongesa ana jo atangu.*

29 Mumu lia ufulielo, A-Izalele yazauka Kalunga-Lwiji Muchila ngwe hashi homu, alioze muze A-Engitu esekele kuchilinga, yatoka mu kalunga-lwiji.

30 Mumu lia ufulielo, yipanga ya Yeriku yapuzukile muze atu te hayijinga ha matangwa shimbiali. 31 Mumu lia ufulielo, Rahape, mwe chikoi, kakafwile hamuwika ni yihulia, mumu katambwile ngendeshi ni sambukila.

32 Mba yika mungwamba nawa? Mumu, chichi kupwa ni mashimbu nyi munguhanjika nawa hakutwala kuli Ngideone, Mbarake, Samasone, Jefeta, Ndawichi, Samuele ni aprofeta akwo. 33 Mumu lia ufulielo, ayo yanongesa mianangana, yaneha ululi, yazuka yilakenyo, yayika makanwa ja ndumba, 34 yajima tachi ja kahia, yachina muze afupile kwashiha ni mikwale, waze ahongele yapwa ni tachi, yahamuka mu jita, yakumba tujita waze ejile ni kwasa no jita. 35 Mapwo yatambula afu jo ku uhindukilo, alioze atu akwo yaamwesa lamba mumu lia kulituna utuswilo, hanga ahase kuzuka uhindukilo upema. 36 Ewa, eka kaesekele ha kwakekuna ni kwalamba, kuhiana yino, ha kwakasa ni kwasa mu mazuwo a ususu. 37 Yaasa mawe, yaeseka, yaapatwola mu yipinji-yipinji, yaashiha ni mikwale, kapwile ni kuzala malambu ja mapanga ni malambu ja pembe, kapwile ni kuhona yuma ya kulikwasa nayo, kamwene lamba ni kwahungumiona; 38 akwa-hashi kakaatelele, ayo kapwile ni kuchamangina* mu puya, ha milundu, mu yivwenge ni mu mena a hashi.

39 Alioze, chipwe ngwe ayo eswe kapwile ni utayizo wa Zambi mumu lia ufulielo wo, kakazukile umanunuko wa yilakenyo, 40 mumu Zambi te hanaliange kutululiekela chuma chipema, hanga ayo ahone kupwa angunu ukawo.