Kuli A-Roma
4 Mba kuchi kevwe mutwamba hali Apalahama kalamba ketu, chuma chika chize azukile kulita ni musunya? 2 Nyi Apalahama kamupwishile mukwa-ululi mumu ha yitanga yize alingile, kachi te mapwa ni chuma cha kulisamba nacho, alioze hi kumeso ja Zambi ko. 3 Yika chisoneko chimwe chinambe? Ngwo “Apalahama wafulielele muli Yehova* mba achalwile kuli iye ngwe ululi.” 4 Mutu yoze wakulinga milimo kakutambula fweto, keshi kwalula fweto yize ngwe chawana cha keke, alioze ngwe chuma chize atamba kutambula mumu ha milimo yenyi. 5 Alioze mutu yoze keshi kulinga milimo, hindu kakufuliela yoze wakupwisa akwa-shili kupwa akwa-ululi. Ufulielo wenyi kakumwalwilawo ngwe ululi. 6 Chizechene nawa, Ndawichi neye kahanjikile hakutwala ku uwahililo wa mutu yoze Zambi akupwisa mukwa-ululi hi mumu lia yitanga yenyi ko ngwenyi: Kawaha. 7 “Iye yamba ngwenyi, kawaha waze ungulungulu wo hanaakonekenawo, waze milonga yo hiyinafukiwa;* 8 kawaha mutu yoze Yehova* kechi kamwalwila milonga yenyi.”
9 Shina uwahililo uno uli wa ngalami wika nyi, hi wa yilima nawa ko nyi? Mumu twakwamba ngwetu: “Ufulielo uze Apalahama apwile nawo awalwile ngwe ululi.” 10 Ha mashimbu aka ufulielo wenyi awalwile ngwe ululi? Muze te hapwa ngalami nyi muze te uchili chilima? Iye te kanda achipwa ngalami, te uchili chilima. 11 Iye watambwile chinyingi cha ungalami, chijikilo cha ululi wa ku ufulielo uze apwile nawo shimbu te uchili chilima hanga akapwe tato ya waze eswe akufuliela chipwe yilima, hanga akalule ululi kuli ayo nawa; 12 hanga akapwe tato ya ngalami. Alioze, hi tato ya ngalami wika ko, alioze ni ya waze akwenda mu ngano ja ufulielo wa kalamba ketu Apalahama uze apwile nawo shimbu te uchili chilima.
13 Hi mumu lia shimbi ko Zambi alakenyene Apalahama ni munyachi* wenyi ngwo kumakahinga chifuchi, alioze chalingiwile mumu Zambi kamwalwile ngwe mukwa-ululi mumu lia ufulielo wenyi. 14 Chikwo nawa, nyi waze akufuliela mu shimbi mapwa swana, ufulielo muupwa wamokomoko, chipwe chilakenyo cha Zambi kuchishi kupwa ni ulemu. 15 Mumu Shimbi kuyakukoka utenu, alioze kuze kukushi shimbi ako utanguko nawa kuushiko.
16 Kashika, chilakenyo cha kwiza kupalikila mu ufulielo, hanga chikapwe chawana cha keke kuli munyachi* weswe wa Apalahama, hi wika ko kuli waze ali mushi lia Shimbi alioze ni kuli waze eswe akusolola ufulielo uze Apalahama asolwele, se iye tata wa yetu eswe. 17 (Ngwe chize chinasonewa ngwo: “Hingunakupwisa tato ya mavungu anji.”) Chino chalingiwile kumeso ja Zambi yoze iye te akufuliela, yoze wakuhana mwono kuli afu ni kuhanjika ha yuma yize kuyatwamineko ngwe yatwama ko.* 18 Apalahama mu kutalatala wafulielele chize kechi kuhasa kuchitalatala hanga akapwe tato ya mavungu anji ni kulita ni chize amwambile ngwo: “Chocho munyachi* we muukapwa.” 19 Iye kakakokolokele ku ufulielo ha kunyonga ngwenyi te kechi kuhasa nawa kupwa ni ana, (se te hapwa ni 100 wa miaka), chipwe ha kunyonga ha umba wa mukwo-pwo Sara. 20 Kashika, mumu lia chilakenyo cha Zambi, iye kayambashanyine chipwe kuhona ufulielo, alioze ufulielo wenyi wamutakamishine ni kuhalisa Zambi, 21 ni kupwa ni shindakenyo ngwenyi, cheswacho Zambi hanalakenya mahasa kuchilinga. 22 Kashika “chino amwalwilecho ngwe ululi.”
23 Chipwe chocho maliji anambe ngwo, “amwalwilecho” kasonewenene wika mumu hali iye. 24 Alioze asonewenene nawa mumu hali yetu, waze twakufuliela muli Yoze wahindwishile Mwene wetu Yesu hakachi ka afu. 25 Iye amukunjikile mumu ha milonga yetu, amuhindwishile hanga akatupwise akwa-ululi.