Mukanda Utangu wa Petulu
3 Chizechene nawa, yenu mapwo, zeyelenu akwenu-malunga, hanga nyi ayo keshi kwononokena liji lia Zambi, afuliele ha kumona yitanga yipema ya yenu mapwo jo, 2 mumu lia kumona ene yitanga yenu yipema ni vumbi linji. 3 Upeme we kanda upwa wika wa yuma ya haze, ngwe kuyinda cha kambu, kuzala tuzeya a oru hanji kuzala mahina apema, 4 alioze pwako mutu mupema mu mbunge ni kulilulieka chize kuchishi kupiha, cha spiritu ya uhumikizo ni kulikehesa chinji, chize chikwete ndando yinji kumeso ja Zambi. 5 Mumu chenacho apwile ni kulilulieka mapwo asandu waze apwile ni kushimbwila muli Zambi ni kuzeyela kuli malunga jo, 6 ngwe chizechene alingile Sara, yoze wapwile ni kwononokena Apalahama ni kumuvuluka ngwenyi, mwene. Yena muupwa mwanenyi wa pwo nyi muununga ni kulinga yuma yipema chakuhona kwivwa woma.
7 Chizechene nawa, yenu malunga, nungenu ni kutwama ni akwenu-mapwo kulita ni chinyingi. Alemesenu ngwe chikwachilo chilelu, mumu munukahinga no chawana cha keke cha mwono, nyi kunwachilingile, Zambi kechi kwivwa yilemba yenu.
8 Kusulaho, pwenu eswe ni nyonga limuwika, lisenu ha yihela ya akwenu nwivwe chize ayo akwivwa, pwenu ni zango lia undumbu, livwilenu keke ni kulikehesa. 9 Kanda nufwetesa upi ni upi, chipwe matuka ni matuka, alioze, shimbu nulinge chino, etelenu chiwape, mumu hananutambika mu jila yino hanga nukahinge chiwape.
10 Mumu “yoze wakuzanga mwono ni kuzanga kumona matangwa apema, katamba kufunga limi lienyi ku yuma yipi ni kufunga mivumbo yenyi yichine kuhanjika yuma ya mahuza. 11 Iye ehuke yuma yipi, alinge yuma yipema, afupe sambukila, anunge ni kuyifupa. 12 Mumu meso ja Yehova* kali hali akwa-ululi, ni matwi jenyi kakupanjika kuliumba cho, alioze Yehova kakulimika ni waze akulinga yuma yipi.”
13 Kwamba pundu, iya manulinga upi nyi munulihana chinji hanga nulinge yuma yipema? 14 Alioze chipwe munumona lamba mumu lia ululi, munukawahilila. Kashika, kanda nuvwila woma yize ayo akuvwila woma, chipwe kulipikala. 15 Alioze lemesenu Kristu ngwe Mwene mu mbunge jenu, ni kulilulieka hanga nuhase kukumbulula mutu yoze manuhula hakutwala ku kutalatala chenu, alioze nuchilinge ni kulihumikiza cheswe ni vumbi linji.
16 Pwenu ni mbunge yitoma, hanga ha shimbu lieswe mahanjika yuma yipi hali yenu, ayo ene evwe sonyi mumu lia yitanga yenu yipema ha kupwa tumbaji a Kristu. 17 Mumu chili chipema kumona lamba ha kulinga yuma yipema, nyi Zambi mecha chilingiwe kulita ni upale wenyi, hi ha kulinga yipi ko. 18 Mumu Kristu kafwile ha shili kamuwika kunahu, mukwa-ululi hali yihenge, hanga anutwale kuli Zambi. Iye kafwile mu musunya, alioze yatambula mwono mu spiritu. 19 Mba iye yaya ni kwambujola kuli maspiritu mu zuwo lia ususu, 20 waze kakononokene muze Zambi te anashimbwila ni uhomboloji weswe ha matangwa ja Noa, shimbu te anatungu ulungu, uze atu akehe, che kwamba, atu nake, aalamwinyine ku meya.
21 Upapachiso, uze uli ngwe chizulie cha yuma yino, newo unanulamwina haliapwila (kuchapwile ngwe wakuchiza majilo* a musunya, alioze hanga nwite kuli Zambi mbunge yitoma), kupalikila mu uhindukilo wa Yesu Kristu. 22 Iye kali ku chindume cha Zambi, mumu hanayi mwilu, angelo, akwa-kuyula ni akwa-ndundo hanaazeyesa kuli iye.