Ulo—Chawana cha Zango lia Zambi

1, 2. (a) Hakutwala ku umbachiso, yika ha shimbu limwe mutuhasa kulihula, nawa mumu liaka? (b) Yihula yika mutushimutwina mu kapitulu yono?

SHINA wakuzanga kuya ha umbachiso? Atu anji kakuzanga, mumu kali mashimbu a chiseke. Mumona sandungi ni nandungi kanazala kanawa. Nawa ato ni chiseke. Ha tangwa liacho, chiseke ha chiseke wika, nawa kakusoloka ngwe yuma yeswe ku mwono muyenda kanawa kulutwe lia matangwa.

² Chipwe chocho mutuhasa kwamba ngwetu musono, ulo unji kuuso kwenda kanawa. Chipwe ngwe twakushimbwila waze analimbata hanga atwame kanawa, nihindu twakulihula ngwetu: ‘Shina ulo wo muupwa ni uwahililo nyi? Shina muununga nyi?’ Kumbululo lia yihula yino linatale ha chize lunga ni pwo makajikijila muli Zambi ni kukaula usongwelo wenyi. (Tanga Yishima 3:5, 6.) Ayo katamba kuchilinga hanga anunge mu zango lia Zambi. Tulihulikilenu ha kumbululo lia Mbimbiliya lia yihula yino: Mumu liaka ngunazange kumbata? Nyi munguzanga kumbata, iya mungusakula? Kuchi munguhasa kulilulieka hakutwala ku ulo? Nawa yika muyihasa kukwasa waze hanalimbata hanga awahilile mu ulo wo?

 3. Mumu liaka hi umbachiso wika ko wakuneha uwahililo?

³ Amwe kakunyonga ngwo ulo che chuma chilemu hanga mutu awahilile ku mwono—ngwo mutu mba apwe ni chiseke katamba kumbata. Chino hi chamwenemwene ko! Yesu te twamishi. Iye kambile ngwenyi, utwamishi uli chawana, nawa yakolweza waze te mahasa kupwa twamishi. (Mateu 19:11, 12) Postolo Paulu neye kahanjikile hakutwala ku upeme wa utwamishi. (1 A-Korindu 7:32-38) Alioze Yesu chipwe Paulu, kakashinjilile akwo hanga ahone kumbata, mumu kukanjisa kuya ulo chili “longeso lia andemoniu.” (1 Timoteu 4:1-3) Chipwe chocho, utwamishi uli upema chinji kuli waze anazange kulingila Yehova chakuhona upinjiso. Kashika hi chipema ko kumbata-chamumbachila hanji kuya ulo ha mukunda wa ushinjilo wa atu.

 4. Ulo upema yika muuhasa kunehena kuli ana ha kwalela?

⁴ Shina kuli ulemu wa kumbata? Ewa kuuli. Ulo newo uli chawana cha zango lia Zambi. (Tanga Uputukilo 2:18.) Mu ulo muli chimwe kuyuka chinene, chize chakuneha uwahililo. Chakutalilaho, ulo uli jila yipema ya kupwa ni usoko. Ana kanafupu kupwa ni yisemi waze malela kanawa ni kwasolwela zango, kwafumba ni kwasongwela. (Samu 127:3; A-Efwesu 6:1-4) Alioze kulela ana hi wika ko chuma chilemu mu ulo.

5, 6. (a) Kulita ni Chilumbununyi 4:9-12, kuyuka chika chiliho ha kupwa ni usendo ukolo? (b) Kuchi ulo muhasa kupwa ngwe muhipu wa mbanda jitatu?

⁵ Tunyongenu ha maliji a Mbimbiliya a mutwe wa kapitulu yono: “Shinaho aali, hi umuwika ko mumu kakutambula kwononona chipema ha kuhondangana cho. Mumu nyi umwe malimbuka, mukwo mamuzundula. Alioze welo hali yoze mapwa ukawenyi muze malimbuka, keshi ni mukwo yoze mamuzundula. Chikwo nawa nyi aali mapomba hamuwika, mawana chivukuminya; alioze mutu kulihi mawana chivukuminya ukawenyi? Mutu wa ukawenyi chashi kumukumba, hindu nyi aali ali hamwe mahasa kulikwasa. Muhipu wa mbanda mutatu kuuchi kupatuka nikawashi.”​—Chilumbununyi 4:9-12.

⁶ Chisoneko chino chinatale chitangu ha ulemu wa usepa. Ulo uli umwe usendo ukolo chinji. Ngwe chize chisoneko chino chinasolola, usendo wacho wakuneha ukwaso, ulembejeko ni ufungilo. Ulo muukola chinji nyi usendo kuwapwile wika wa atu aali. Ngwe chize chisoneko chinambe, muhipu wa mbanda jaali muuhasa kupatuka. Alioze muchihasa kupwa chikalu kupatula muhipu wa mbanda jitatu. Muze lunga ni pwo mazanga kuvwisa Yehova kuwaha, ulo wo muuhasa kupwa ngwe muhipu wa mbanda jitatu. Waze alimbata nyi masa Yehova mu ulo wo, ulo muupwa ni unungino.

7, 8. (a) Chiyulo chika Paulu ahanyine kuli akwa-Kristu twamishi waze akupinda ni usolo wakulisumbakenya? (b) Utowezo uka Mbimbiliya yakutwaha hakutwala ku ulo?

⁷ Chikwo nawa, mu ulo wika atu atamba kulisumbakenya. Mu usendo wacho, kulisumbakenya chili chuma chize chakuneha chiseke. (Yishima 5:18) Chipwe ngwe mutu hapalika kulu ha shimbu lize Mbimbiliya yakuvuluka ngwo ‘kusasaminya cha mbunge,’ mashimbu waze usolo wakwoka chinji, nihindu mutu wacho mahasa kupinda ni usolo wa kulinga utanji. Nyi kutwalihumikijine, usolo wacho muuhasa kututwala ku kulinga yuma yaluchisa. Paulu kasonekene kuli twamishi ngwenyi: “Nyi kahashile kusuula, akambate, mumu hapwa kumbata, hi kusasaminyako.”​—1 A-Korindu 7:9, 36; Tiangu 1:15.

⁸ Chipwe ngwe kuli chuma cheswacho chize chinatulingisa kumbata, nihindu twatamba kupwa ni shindakenyo ya yize tunalingi. Paulu kambile ngwenyi waze alimbata, “kumakapwa ni luyinda.” (1 A-Korindu 7:28) Waze alimbata kali ni yipikalo yize twamishi keshi nayo. Mba nyi wanyonga kumbata hanji kuya ulo, yika muyikukwasa kupwa ni uwahililo mu ulo ni kwehuka yimwe yipikalo? Jila yimwe yili kusakula kanawa mutu yoze mulimbata nenyi.

9, 10. (a) Kuchi Paulu atesele upi wa kulinga usendo ni waze keshi kufuliela Yehova? (b) Upi uka wakwiza muze mutu mehuka shimbi ja Zambi muze malimbata ni yoze keshi kufuliela Yehova?

⁹ Paulu kasonekene yimwe shimbi yilemu yize mutu atamba kukaula ha kusakula mutu yoze anazange kulimbata nenyi ha kwamba ngwenyi: “Kanda nulilema kanga yimuwika ni waze kafulielele.” (2 A-Korindu 6:14) Chilweza chenyi chinakatuka ha chinyingi chize apwile nacho ku mwono wenyi. Nyi makasa tushitu aali alisa kanga limuwika, umwe mamona lamba. Chizechene nawa, mukwa-Kristu nyi malimbata ni mutu yoze hi Chela cha Yehova ko, ayo pundu mapwa ni kapinda munji. Umwe wa kuli ayo mazanga kununga mu zango lia Yehova, alioze mukwo ka. Mapwa ni kalisa ha yize o akulemesa ku mwono wo, ha chino mamona lamba linji. Kashika Paulu akolwezele akwa-Kristu hanga ambate hanji aye ulo “muli mwe Mwene wika.”​—1 A-Korindu 7:39.

¹⁰ Amwe akwa-Kristu kakunyonga ngwo chili chipema kulimbata ni waze hi Yela ja Yehova ko kuhiana kupwa ukaawo. Kashika o akusakula kwehuka shimbi ja mu Mbimbiliya ni kulimbata ni waze keshi kufuliela Yehova. Kanji-kanji chino chakuneha yinyengo yinji. O kakulimbata ni atu waze kechi kuhasa kuhanjika no yuma yilemu ya ku mwono. Ha chino o kakwivwa ngwe kali ukawo kuhiana muze apwile twamishi. Chipwe chocho, akwa-Kristu anji twamishi kakufuliela mu shimbi jino ni kujikaula. (Tanga Samu 32:8.) Chipwe ngwe limwe tangwa meza kambata, nihindu kakutwama twamishi ndo muze mukusoloka umwe ndumbu wa shindakenyo mukachi ka waze akufuliela Yehova Zambi.

11. Yika muyihasa kukukwasa kusakula lunga hanji pwo mupema? (Tala kasha ha lifwo 114.)

¹¹ Chino kuchishi kulumbunuka ngwo tuvumbi eswe a Yehova mahasa kupwa malunga ni mapwo ashindakenyo. Nyi unanyonga kumbata, fupa mutu yoze uli ni yitanga yize yinalita ni yitanga ye, yoze uli ni nyonga ngwe lia yena, nawa yoze wakuzanga chinji Zambi. Ndungo wakanyama kakutuhwisa mikanda yinji yize yinahanjika hakutwala ku chikuma cha ulo, nawa chili chipema kulemba ni kulilongesa hakutwala ku chikuma chacho, nawa twatamba kufupa usongwelo muze tunakwata yiyulo yilemu.a​—Tanga Samu 119:105.

12. Ndako yika hakutwala ku ulo yichili mu yifuchi yinji, nawa chilweza chika cha mu Mbimbiliya chili ni usongwelo hakutwala ku chikuma chino?

¹² Ku yifuchi yinji, yisemi e akusakula waze malimbata ni ana jo. Mu yifuchi yacho maliji a yisemi e ali ni mana nawa ni ulemu unji ha kukwata yiyulo. Ulo wacho kanji-kanji wakulingiwa ngwe chize chapwile ku mashimbu akunyima. Chilweza cha Apalahama muze atumine kavumbi kenyi hanga afupile mwanenyi Izake pwo chili utowezo kuli yisemi waze mahasa kupalika mu yuma ngwe yino. Apalahama te keshi kulipikala ni upite hanji lufuma yoze atu jacho apwile nenyi. Alioze aye kasele tachi ja kufupila mwanenyi pwo mukachi ka waze te akuwayila Yehova.b​—Uputukilo 24:3, 67.

13-15. (a) Kuchi shimbi yize yili mu Yishima 24:27 muyikwasa lunga yoze unazange kumbata? (b) Kuchi pwo yoze unazange kuya ulo mahasa kulilulieka?

¹³ Nyi unanyongo kumbata, watamba kulihula chihula chino: ‘Shina hinalilulieka?’ Kumbululo lia chihula chino kulishi kutala wika ha chize wakunyonga hakutwala ku zango, kulisumbakenya, usepa ni kulela ana. Kuli nawa yiteli yimwe yize mutu yoze unazange kumbata atamba kunyonga.

¹⁴ Mukweze wa lunga unafupu pwo katamba kunyonga ha shimbi yino: “Lulika milimo ye ya haze; lilulikile munda we mba kulutwe mutunga zuwo lie.” (Yishima 24:27) Yika chisoneko chino chinambe kwamba? Ku mashimbu a shakulu, nyi umwe lunga te manyonga kumbata, iye te katamba kulihula ngwenyi: ‘Shina hinalilulieka hanga ngufunge kanawa usoko wami?’ Iye chitangu te katamba kukalakala, hanji kupwa ni munda wenyi. Shimbi yino yili ni ulemu ndo musono. Lunga yoze unazange kumbata katamba kulilulieka hanga ahase kufunga yiteli ya ulo. Iye katamba kupwa ni tachi ja kukalakala. Liji lia Zambi linasolola ngwo lunga yoze keshi kufunga usoko wenyi ku musunya ni ku spiritu kali mupi chinji kuhiana lunga yoze keshi kufuliela!​—Tanga 1 Timoteu 5:8.

¹⁵ Pwo yoze mazanga kuya ulo neye kakupwa ni yiteli yinji. Mbimbiliya yakuchichimieka chinji ukete ni yitanga yize pwo atamba kupwa nayo ha kukwasa lunga lienyi ni kufunga zuwo lienyi. (Yishima 31:10-31) Atu waze akulipupula kumbata chakuhona kulilulieka hanga afunge yiteli ya ulo, kali akwa kuzo mumu kakuhona kunyonga yuma yize malingila mutu yoze malimbata nenyi. Alioze kuhiana yeswe ai, atu waze anazange kulimbata katamba kulilulieka kanawa mu ufulielo.

16, 17. Ha Shimbi jika waze analilulieka hanga ambate atamba kunyonga?

¹⁶ Chili chipema kunyonga ha yiteli yize Zambi ahanyine kuli lunga ni pwo mba mutu ahase kulilulieka hanga ambate hanji aye ulo. Lunga katamba kunyingika yika chinalumbunuka kupwa mutwe wa usoko. Chiteli chino, kuchisolo kulumbunuka ngwo lunga katamba kupwa chitenu, ka. Alioze iye katamba kwimbulula yitanga ya Yesu ha chize iye te akuzachisa wata wenyi. (A-Efwesu 5:23) Chizechene nawa, pwo mukwa-Kristu katamba kunyingika kanawa yiteli ya pwo mu ulo. Shina aye makononokena “ku shimbi ya mukwo-lunga”? (A-Roma 7:2) Pwo hanapu kulu mushi lia chiyulo cha Yehova ni cha Kristu. (A-Ngalashia 6:2) Chiyulo cha mukwo lunga chili chiyulo chikwo nawa mu usoko. Shina iye mahasa kulipalumwisa ni kukwasa chiyulo cha lunga yoze uli chihenge? Nyi pwo keshi kuwahilila nyi nyonga liacho, kanda aya ulo.

¹⁷ Nawa kuli chiteli chikwo chize mutu ni mutu atamba kululieka hanga alinge mu ulo. (Tanga A-Fwilipu 2:4.) Paulu kasonekene ngwenyi: ‘Mutu ni mutu, akazange mukwo-pwo, chizechene ngwe analizange iye mwene, ni pwo mweswe ase mukwo lunga vumbi.’ Ni ukwaso wa Zambi, Paulu yamona ngwenyi, lunga kakufupiwa chinji vumbi lia mukwo-pwo. Ni pwo neye kakufupiwa zango lia mukwo-lunga.​—A-Efwesu 5:21-33.

18. Mumu liaka tusendo katamba kupwa ni uhumikizo ha mashimbu a usendo?

¹⁸ Ha chino, usendo uze lunga ni pwo akupwanawo shimbu kanda achilinga umbachiso hi chuma cha ngwaza ko. Alioze, kali mashimbu apema waze lunga ni pwo atamba kulinyingika kanawa ni kukwata chiyulo ya mana nyi malimbata nyi ka. Kali nawa mashimbu akulifunga! Mumu usolo wa ku musunya wakupwa unji chinji, chino chakulingiwa mumu Yehova hanatutange ni usolo wacho. Alioze waze akulizanga kakwehuka chuma cheswacho chize muchihasa kupihisa ufulielo wo. (1 A-Tesalonika 4:6) Ha chino, nyi yena unalinge usendo, watamba kulihumikiza; chino muchikukwasa ku mwono we weswe, chipwe muze muumbata hanji ka.

19, 20. Kuchi nyonga lia akwa-Kristu liatamba kulisa ni nyonga lia atu anji musono? Lumbununa.

¹⁹ Nyi waze alimbata kanazage hanga ulo wo ukole, o katamba kupwa ni nyonga linalita hakutwala ku ulo. Kwamba umwenemwene, umbachiso hi songo ko, uli uputukilo wa unungiso uze Yehova azangile hanga te ununge ndo ku miaka yeswe. (Uputukilo 2:24) Alioze atu anji keshi kunyonga chenacho musono. Ku minyachi yimwe, atu kakwamba ngwo kumbata hanji kuya ulo chili ngwe, “kukasa hunda.” Ayo kota keshi kumona ulemu wa maliji wano hakutwala ku ulo. Kuchi chenacho? Hunda liakukasa kanawa liakukola kanawa, alioze sali likwo liakupwa liashi kulikasulula.

²⁰ Atu anji musono kakumona ulo ngwe chuma chize kuchishi kukola. O kanazange kulimbata mumu kakunyonga ngwe mahwisa usolo wo weswe, ni kushiha ulo muze mukupwa yipikalo. Alioze yiwuluka chilweza cha Mbimbiliya cha hunda, chize mahasa kuzachisa ha kutesa ni usendo watwama ha ulo. Mihipu yize akuzachisa ku ulungu keshi kuyilinga hanga yisule chipwe kuyipatula, alioze hanga yikole, chipwe muze mukwiza funji yinji. Chizechene nawa, ulo kaulingile hanga ukole. Yesu kambile ngwenyi: “Kashika chize Zambi hanunga, niumwe mutu kanda achihandununa.” (Mateu 19:6) Nyi yena wambata, kufupa kupwa ni nyonga liacho hakutwala ku ulo. Shina chilakenyo chino chakupwisa ulo chimwe chiteli chilemu? Ka.

21. Nyonga lika lunga ni pwo atamba kupwa nalio hali umwe ni mukwo, nawa yika muyaakwasa kulinga chino?

²¹ Lunga ni pwo mashimbu eswe katamba kupwa ni nyonga lialita hakutwala kuli umwe ni mukwo. Nyi mutu ni mutu malemesa yitanga yipema ya mukwo ni ha tachi jize mukwo akulinga, ulo wo muupwa ni uwahililo ni chiseke. Shina chili chilota kupwa ni nyonga lipema hali mutu chihenge yoze mutulimbata nenyi? Kuli Yehova hi chilota ko, mumu chipwe yetu twakufuliela ngwetu iye mapwa ni nyonga lipema hali yetu. Mukwa-Samu yahula ngwenyi: “Nyi kachi yena Zambi mufunjika uhenge, Mwene! iya majikiza?” (Samu 130:3) Malunga ni mapwo katamba kupwa ni nyonga lino hali umwe ni mukwo ni kulikonekena ni mbunge yeswe.​—Tanga A-Kolosu 3:13.

22, 23. Kuchi chilweza cha Apalahama ni Sara chili chipema kuli waze alimbata musono?

²² Hakupalika cha mashimbu, ulo muuhasa kuneha uwahililo unji. Mbimbiliya yinasolola ulo wa Apalahama ni Sara muze te hapwa tushinakaji. Ayo no kapwile ni yipikalo ni kapinda mu ulo. Achinyonga ha chize chapwile chikalu kuli Sara, umwe pwo yoze wapwile ni miaka kuhiana 60, yoze wahichikile mwono upema mu mbonge ya Ure hanga aye ni kutwama mu mbalaka ku mwono wenyi weswe. Nihindu, aye, katayijile chiyulo cha mukwo-lunga. Amu te ali chikwashi wamwenemwene wa Apalahama, aye ni vumbi lieswe yakwasa ku chiyulo cha mukwo-lunga. Kulipalumwisa chenyi te cha ku mbunge. Chipwe mu mbunge yenyi kasanyikine mukwo-lunga ngwenyi mwene. (Uputukilo 18:12; 1 Petulu 3:6) Vumbi lize te akusa Apalahama te liakwiza mu mbunge.

²³ Chino kuchalumbunukine ngwo ayo te kakulivwashana ha yuma yeswe. Limwe tangwa, Sara kahanyine chimwe chiyulo kuli Apalahama chize chapwile ngwe “chuma chikalu” kuli iye. Nihindu, ni usongwelo wa Yehova, Apalahama ni kulikehesa cheswe yapanjika mukwo-pwo, chiyulo chacho chanehene chiwape mu usoko. (Uputukilo 21:9-13) Malunga ni mapwo musono, chipwe waze alimbachile kulu, mahasa kulilongesa chinji ha chilweza cha Apalahama ni Sara waze te akuvwila Zambi woma.

24. Ulo uka wakuhalisa Yehova Zambi, nawa mumu liaka?

²⁴ Mu chikungulwila cha akwa-Kristu, atu anji waze alimbata kanawahilila mu ulo wo, mapwo kakuvumbika chinji malunga jo, nawa malunga kakuzanga ni kulemesa mapwo jo, o kakukalakala hamuwika ni kusa Yehova kulutwe ku mwono wo. Nyi wanyonga kumbata, watamba kupwa ni mana hanga usakule mutu yoze mulimbata nenyi. Kashika, lilulieke kanawa, nawa sako tachi hanga mu ulo we mupwe sambukila ni zango lize liakuhalisa Yehova Zambi. Nyi walinga chocho, muhasa pundu kupwa ni shindakenyo ngwo, ulo we muukukwasa kununga mu zango lia Zambi.