LONGESO 22
Kuchi Muhasa Kwambujola Sango Lipema?
Muze unalilongesa umwenemwene wa mu Mbimbiliya hanji muhasa kunyonga ngwe: ‘Atu eswe katamba kupanjika sango jino!’ Chochene lume, atu eswe katamba kupanjika sango jacho! Alioze, muhasa kwivwa woma wa kwambulwila akwenu yuma yize unalilongesa. Kashika mutushimutwina chize muhasa kukumba woma wacho ni kuputuka kwambujola sango lipema lia mu Mbimbiliya.
1. Kuchi muhasa kwambulwila akwenu yuma yize unalilongesa?
Tumbaji twa Yesu kambile ngwo: “Kutwahashile kulitwamina kwambujola yuma yize twamwene, ni twevwile.” (Yilinga 4:20) O kazangile chinji yuma yize alilongesele kuli Yesu, kashika no azangile kulweza yuma yacho kuli atu akwo. Shina ni yena che wakwivwa? Nyi chenacho, fupa uhashi hanga uhanjike ni asoko ni masepa je yuma yize unalilongesa.—Tanga A-Kolosu 4:6.
Chize muhasa kuputuka
Muze muhanjika ni asoko, muhasa kwamba ngwe: “Ha poso yino nalilongesa chimwe chuma chipema chinji.”
Solola chimwe chisoneko kuli umwe sepa lie yoze unayiji hanji unasakalala.
Hanjika ha yuma yize walilongesa ha longeso lie lia Mbimbiliya hanji ha kukunguluka, kuli akwa-milimo-ni-akwenu waze makuhula chize songo lie lia poso liapalika.
Solwela masepa je site yetu jw.org
Muze unalilongesa Mbimbiliya, sanyika akwenu hanga apwe hamwe ni yena hanji kwalweza chize mahasa kwita longeso lia Mbimbiliya kupalikila ha site jw.org.
2. Mumu liaka chili chipema kwambujola hamuwika ni chikungulwila?
Tumbaji twa Yesu kakambujolwele wika sango lipema kuli atu waze te ananyingika. Yesu “waatumine aali ni aali aliangile kuya ku membo eswe” hanga ambujole. (Luka 10:1) Mulimo uno wakululieka kanawa wahanyine uhashi kuli atu anji hanga apanjike sango lipema. Kwambujola hamuwika chanehene chiseke chinji kuli tumbaji. (Luka 10:17) Ni yena muhasa kusa tachi hanga wambujole hamwe ni chikungulwila.
NYINGIKA NAWA
Tala chize muhasa kukumba woma ni chize muhasa kuyuka ha kwambujola sango lipema.
3. Yehova mapwa hamwe ni yena
Atu waze anazange kwambujola mahasa kwivwa woma wa chize mambujola ni chize atu maatambula.
Shina unevu woma wa kwambulwila akwenu yuma yize unalilongesa? Mumu liaka wakumbulula chocho?
Tala CHINEMA, mba nushimutwine chihula chinahateho.
Kuchi akweze Yela ja Yehova akukumba woma?
Tanga Izaia 41:10, mba nushimutwine chihula chino:
Kuchi kulemba muchihasa kukukwasa muze muwivwa woma wa kwambujola?
Unachinyingika nyi?
Yela ja Yehova anji kanyongene ngwe kechi keza kahasa kwambujola sango lipema kuli akwo. Chakutalilaho, Sergey kapwile ni kulimona ngwe keshi ulemu. Kashika, chapwile chikalu kuli iye kuhanjika ni atu. Alioze muze alilongesele Mbimbiliya, yamba ngwenyi: “Chipwe ngwe napwile ni kwivwa woma, nihindu yinguputuka kuhanjika ni akwetu yuma yize te ngunalilongesa. Kuhanjika ni akwetu yuma yize napwile ni kulilongesa changukwashile kupwa ni hamu ni kukolesa ufulielo wami.”
4. Pwako ni vumbi
Shimbu kanda uputuka kuhanjika ni umwe mutu, chitangu watamba kunyonga ha yize muwamba. Alioze chili nawa chilemu kunyonga ha chize muhanjika ni vumbi. Tanga 2 Timoteu 2:24 ni 1 Petulu 3:15, mba nushimutwine yihula yino:
Kuchi muhasa kuzachisa versu jino muze muhanjika ni akwenu hakutwala ku Mbimbiliya?
Asoko hanji masepa je mahasa kulituna yuma yize unalilongesa. Yika watamba kulinga? Yika kuwatambile kulinga?
Mumu liaka twatamba kuhanjika ni vumbi chakuhona kushinjila akwetu atayize yuma yize twakufuliela?
5. Kwambujola sango lipema chakuneha uwahililo
Yehova kahanyine kuli Yesu mulimo wa kwambujola sango lipema. Kuchi Yesu apwile ni kumona mulimo wacho? Tanga Yoano 4:34, mba nushimutwine yihula yino:
Kulia kulia chipema chakutukwasa ku mwono ni kutuvwisa kuwaha. Mumu liaka Yesu atesele kulinga mulimo wa Zambi ni kulia?
Ku nyonga lie, uwahililo uka mutu mahasa kupwa nawo ha kwambujola sango lipema?
Yize muhasa kulinga
Lilongese chize muhasa kuputuka kuhanjika ni atu ha kukunguluka cha hakachi ka poso.
Hanjika ni longeshi ye hanga uputuke kulinga yihanda ha kukunguluka cha hakachi ka poso. Kulinga yihanda yacho muchikukwasa kulilulieka hanga uputuke kuhanjika ni akwenu yuma yize unalilongesa.
Zachisa chikuma “Atu Amwe Kakwamba Ngwo” hanji “Amwe Mahasa Kukuhula Ngwo” ha mukanda uno hanga ulilongese chize muhasa kukumbulula yihula yize atu akuhula chinji.
AMWE MAHASA KUKUHULA NGWO: “Yuma yika walilongesa?”
Kuchi muhasa kuzachisa uhashi au hanga uhanjike ha yuma yize walilongesa ha longeso lie lia Mbimbiliya?
YIZE WALILONGESA
Kwambujola sango lipema chakuneha uwahililo. Chikwo nawa, kuputuka mulimo wacho hi chikalu ko.
Kuhitulula
Mumu liaka chili chilemu kwambulwila akwenu sango lipema?
Kuchi muhasa kuchilinga ni vumbi?
Kuchi muhasa kukumba woma wa kwambujola?
HENGWOLA NAWA
Nyingika majila awana a chize muhasa kwambujola ha kuzachisa cartão wa kunjila nenyi ha site jw.org.
Maliji Akwambujola No: Hana Cartão wa Kunjila Nenyi ha JW.ORG (1:43)
Lilongese yitanga yiwana yize muyihasa kukukwasa kwambujola sango lipema.
“Shina Hiwalilulieka Hanga Upwe Mukwa-Kutela Atu?” (Kaposhi wa Kutalila wa Setembro 2020)
Tala chize chimwe chilweza cha mu Mbimbiliya muchihasa kutukwasa kupwa ni hamu lia kwambujola chipwe ngwe tuli akweze.
Nyingika chize muhasa kwambujola kuli asoko je waze keshi kulilongesa hakutwala kuli Yehova.
“Kukwasa Asoko Waze hi Yela ja Yehova ko” (Kaposhi wa Kutalila 15 wa Março, 2014)