Akweze, Tangi Yenu Kanazange Hanga Nuwahilile

1, 2. Mumu liaka chili mana kupanjika Tangi ye muze unasakula yize mulinga ku mwono we? (Tala yizulie ha uputukilo.)

NYI uli mukweze, kota kakukwaha yiyulo yinji hakutwala ku yize mulinga kulutwe lia matangwa. Alongeshi, akwa-yiyulo, hanji atu akwo nawa mahasa kukulweza ngwo watamba kulilongesa shikola yinene hanga upwe ni mulimo uze mukukwasa kuzuka mbongo jinji. Alioze Yehova kakukwaha chiyulo chalisa. Chipwe chocho, iye kanazange use tachi ulilongese hanga upwe ni mulimo uze mukukwasa ku mwono. (A-Kolosu 3:23) Alioze kananyingika nawa ngwenyi muze uchili mukweze, watamba kukwata yiyulo yilemu yize muyikakwata ku mwono we wa kulutwe lia matangwa. Kashika akuhana shimbi hanga jikusongwele ni kukukwasa kupwa ni mwono uze mumuvwisa kuwaha ha matangwa wano akusula.—Mateu 24:14.

² Iwuluka ngwe Yehova kananyingika yuma yeswe. Iye kananyingika yuma yize muyikalingiwa kuluwe lia matangwa, nawa kananyingika pundu mashimbu waze makanongesa chifuchi chino. (Izaia 46:10; Mateu 24:3, 36) Nawa Yehova kanakunyingika kanawa. Iye kananyingika yize yakukuvwisa kuwaha ni yize kuyishi kukuvwisa kuwaha. Yiyulo ya atu muyihasa kusoloka ngwe yipema, alioze nyi kuyakatukile mu Liji lia Zambi, acho kuyishi mana amwenemwene.—Yishima 19:21.

3, 4. Kuchi kupanjika chiyulo chipi chakwachile ku mwono wa Alama ni Eva hamwe ni ana jo?

³ Yiyulo yipi yaputukile kulu. Satana mwe waliangile kuhana chiyulo chipi kuli atu. Aye yalweza Eva ni Alama ngwenyi te mawahilila nyi ene malikwachila chiyulo cha chize matwama ku mwono wo. (Uputukilo 3:1-6) Alioze Satana kapwile ni yitanga ya kuzo! Iye kazangile hanga Alama ni Eva, hamwe ni ana jo, amwononokene ni kumuwayila, chakuhona kuyilingila Yehova. Chipwe chocho, Satana kakalingilile atu chuma nichimwe. Yehova mwe waehele yuma yeswe yize te akwete. Iye yaambachisa, yaaha munda upema hanga atwamemo, ni mijimba yingunu hanga ahase kutwama ku miaka yeswe.

⁴ Chaluyinda, Alama ni Eva yehuka Zambi. Hachino, ayo yalihandununa kuli Yoze waehele mwono. Yize yalingiwileko yanehene lamba linji. Ngwe yitemo yize ateta ku mutondo, Alama ni Eva hakehe-hakehe yapwa tushinakaji nawa yafwa. Ana jo no yamona lamba, kuchingako yetweswe. (A-Roma 5:12) Atu anji musono, kakulengulula yize Zambi akwamba ni kulinga yize ene akuzanga. (A-Efwesu 2:1-3) Yika yakulingiwako? Mbimbiliya yinambe ngwo, kukushi “mana” muze atu malimika ni Yehova.—Yishima 21:30.

 5. Shindakenyo yika Zambi apwile nawo hali atu, nawa chino te muchilingiwa?

⁵ Yehova kapwile ni shindakenyo ngwenyi te mukupwa atu, kuchingako akweze anji, waze te mazanga kumunyingika ni kumuwayila. (Samu 103:17, 18; 110:3) Akweze wano kali alemu chinji kumeso ja Yehova! Shina uli umwe wa kuli ayo? Nyi uli umwe wa kuli ayo, wahilila ni yuma yinji yipema yize yinakatuka kuli Zambi, nawa chino muchikwaha uwahililo unji ku mwono we. (Tanga 1 Timoteu 6:17; Yishima 10:22) Ha yuma yacho, mutushimutwinaho yiwana. Yuma yacho yili, kulia cha ku spiritu, masepa apema, kutesa yuma ya spiritu ni utuswilo wamwenemwene.

 6. Mumu liaka watamba kulia ku spiritu, nawa yika Yehova akutwaha hanga yitukwase?

⁶ Tushitu keshi kwivwa zala ya ku spiritu, chekwamba, keshi ni usona wa kunyingika Tangi yo. Alioze yetu tukwete usona wacho. (Mateu 4:4) Muze twakupanjika Zambi, twakupwa ni chinyingi, mana ni uwahililo. Yesu yamba ngwenyi: “Kawaha yiswale mu spiritu.” (Mateu 5:3) Zambi kakutwaha Mbimbiliya ni kuzachisa “ndungo wamwenemwene wa kanyama” hanga atuhwise mikanda yize yakutukwasa kukolesa ufulielo wetu. (Mateu 24:45) Mikanda yacho twakuyivuluka ngwo kulia cha ku spiritu, mumu yakukuchisa ufulielo wetu ni kukolesa usepa wetu ni Yehova. Tuli pichi ku spiritu, mumu tukwete kulia chinji!—Izaia 65:13, 14.

 7. Ha yika kulia cha ku spiritu chize akutwaha kuli Zambi muchikukwasa?

⁷ Kulia cha ku spiritu muchihasa kukwaha mana ni uhashi wa kunyonga kanawa, yino muyikukwasa mu milali yinji. (Tanga Yishima 2:10-14.) Chakutalilaho, yitanga yino muyikukwasa kunyingika mahuza waze akwamba ngwo, kukushi Sakatanga, nawa ngwo mbongo ni yikumba muyikunehena uwahililo ku mwono. Muyikukwasa nawa hanga wehuke usolo ni ndako jize mujihasa ku kutwala ku upi. Hachino, sako tachi hanga upwe ni mana ni kuputuka kunyonga kanawa. Nyi wachilinga, mukalimwena ngwo, Yehova kakukuzanga nawa kanazange upwe ni mwono upema.—Samu 34:8; Izaia 48:17, 18.

 8. Mumu liaka watamba kukundama kuli Zambi haliapwila, nawa kuchi chino muchikuyukisa kulutwe lia matangwa?

⁸ Kwasala hakehe, hanga yuma yeswe ya hano hashi ha Satana ayinongese. Yehova wika mwe makatufunga ni kutwaha yuma yize mutukafupiwa ku mwono, yize yinachingi kulia cha hita tangwa. (Habakuke 3:2, 12-19) Kashika wano kali mashimbu akukundama kuli Zambi ni kukolesa ufulielo we kuli iye. (2 Petulu 2:9) Nyi wachilinga, chipwe ngwe mukulingiwa chuma cheswacho ku mwono we, mukalivwa ngwe Ndawichi, yoze wambile ngwenyi: “Hingunasela Yehova kumeso jami matangwa eswe. Chichi kakokoloka mumu iye kanamana ku chindume chami.”—Samu 16:8.

 9. (a) Ngwe chize twatanga ha Yoano 6:44, yika Yehova akulinga? (b) Yika yakulingiwa kuli Yela ja Yehova nyi malitakana?

⁹ Nyi waliwana ni mutu yoze keshi mu umwenemwene, shina munyingika yuma yinji hakutwala kuli iye? Muhasa kunyingika jina lienyi ni yize akuzanga, alioze kota kuuchi kunyingika yuma yinji hakutwala kuli iye. Chino chinalise chinji, nyi waliwana ni mutu yoze uli mu umwenemwene. Mumu unanyingika ngwo iye kakuzanga Yehova. Nawa ngwo Yehova kamwene chuma chipema muli iye, chocho yamukoka hanga alinge chihanda mu usoko wa waze akumuwayila. (Tanga Yoano 6:44.) Chipwe ngwe iye kanakatuka kweswako hanji kamulelele mu usoko weswawo, nihindu yena munyingika yuma yinji hali iye, ni iye nawa manyingika yuma yinji hali yena!

10, 11. Yuma yika yalifwa yize Yela ja Yehova akwete, nawa kuchi chino chinakwate ku mwono we?

¹⁰ Nyi walitakana ni Chela-ni-mukwenu, munyingika ngwe nulieswe nwakukaula yuma yimuwika. Munyingika nawa ngwe, chipwe ngwe nwakuhanjika malimi alisa, nihindu yenweswe nwakuhanjika “limi lipema” lia umwenemwene. (Zefania 3:9; NM.) Chino chinalumbunuka ngwo yenweswe aali nwakufuliela Zambi, nwakutwama kulita ni shimbi jimuwika, nawa nukwete kutalatala chimuwika cha kulutwe lia matangwa. Yuma yino muyikukwasa hanga nulijikijile umwe ni mukwo nawa munupwa ni usepa uze muunununga ku miaka yeswe.

¹¹ Kashika muze unawayila Yehova, muhasa kupwa ni shindakenyo ngwe uli ni masepa apema. Yena uli ni masepa hashi heswe, chipwe ngwe kanda uchaamona kama! Shina unanyingika atu waze hi Yela ja Yehova ko akuwahilila ni chawana chino chilemu?

12. Yuma yika ya ku spiritu yize muhasa kutesa ku mwono we?

¹² Tanga Chilumbununyi 11:9–12:1. Shina hiunatese kulinga yimwe yuma ya ku spiritu? Kota hiunatese kutanga Mbimbiliya hita tangwa, kululieka makumbululo hanji kulinga chihanda ku kukunguluka. Hanji wakusa tachi hanga uzachise kanawa Mbimbiliya mu munda. Kuchi muwivwa nyi munyingika ngwe yuma yize watesele unahase kuyilinga hanji akwenu no makulwezacho? Yena kota muwahilila chinji, mumu che watamba kulivwa! Mumu liaka? Mumu wakulinga yize Yehova akuzanga, ngwe chize Yesu alingile.—Samu 40:8; Yishima 27:11.

13. Kuchi kulingila Zambi chinahiane kulihulikila ku yuma ya hano hashi?

¹³ Nyi walihulikila mu mulimo wa Yehova, acho yena unalingi mulimo uze mukakuvwisa kuwaha ni kukwaha kutalatala ku mwono. Paulu yamba ngwenyi: “Jikizenu, kanda nukokoloka, nukahiane matangwa eswe mu milimo ya Mwene, mumu nunanyingika, kukilikita chenu hi chamokomoko ko muli Mwene.” (1 A-Korindu 15:58) Alioze muze atu akulihulikila ku yuma ya hano hashi, ngwe kufupa chinji mbongo hanji lufuma, ayo keshi kupwa ni uwahililo wamwenemwene. Chipwe ngwe mafumbuka ku mwono wo, nihindu kanji-kanji kakulivwa ngwe kanahono chimwe. (Luka 9:25) Tunachinyingika ha chilweza cha Mwanangana Solomone.—A-Roma 15:4.

14. Yika muhasa kulilongesa ha yuma yize Solomone apalikile ku mwono?

¹⁴ Solomone yoze wapwile pichi nawa lunga wa ndundo kuhiana kapalikile mu yuma yacho. Yamba ngwenyi: “Tuye tweseke chiseke. Wahilila ni chiseke.” (Chilumbununyi 2:1-10) Kashika, Solomone atungile mazuwo angunda, akujingilika mitondo ni yitemo yipema hamwe ni yihela ya yiheho, chocho yalinga yeswayo azangile. Shina chino chamunehenene uwahililo? Muze Solomone atalile kunyima ha yuma yeswe yize alingile, yamba ngwenyi: “Kumanyi cheswe chapwile chamokomoko ngwe kuhanga ye fuji.” Yawezela nawa ngwenyi: “Nichimwe chuma chakufumbuka kuchishiko kushi lia tangwa.” (Chilumbununyi 2:11) Shina muhasa kuwana longeso ha yuma yize Solomone apalikile ku mwono?

15. Mumu liaka unafupiwa ufulielo, nawa kuchi chino muchikukwasa, ngwe chize twatanga ha Samu 32:8?

¹⁵ Atu amwe kakuwana malongeso ku mwono wo muze mapihisa ni kumona lamba ha upi wo. Yehova kazangile hanga yino yilingiwe ku mwono we. Kanazange hanga umupanjike ni kumwononokena. Chino chakufupiwa ufulielo, alioze kuuchi kaliseha hamukunda wa ufulielo we. Nawa Yehova kechi kavulama “zango lize nwalwezele ku jina lienyi.” (A-Hepreu 6:10) Kashika sako tachi hanga ukolese ufulielo we. Nyi wachilinga, mukwata yiyulo yipema ku mwono nawa mulimwena ngwe, Tatenu wa mu malilu kanazange upwe ni mwono upema.—Tanga Samu 32:8.

16. Mumu liaka twatamba kulemesa utuswilo wetu ni kuuzachisa ni mana?

¹⁶ Paulu kasonekene ngwenyi: “Kuze kuli spiritu ya Yehova, kwekuze kuli utuswilo.” (2 A-Korindu 3:17, NM.) Yehova kakuzanga utuswilo, nawa kakutangile hanga ni yena uzange utuswilo. Alioze kanazange hanga uzachise utuswilo wacho ni mana mu jila yize muyikufunga. Hanji amwe waze walikata no kakutala yizulie ya sonyi, kulinga upangala, kusa mwono wo mu ponde ha kulinga yiheho yize kuyalitele, kushipa makanya hanji kunwa walwa unji. Chitangu, yuma yacho muyihasa kusoloka ngwe yipema, alioze kanji-kanji yakuneha lamba, ngwe misongo, kulinga yuma yipi hanji kufwa. (A-Ngalashia 6:7, 8) Akweze waze akulinga yuma yacho mahasa kunyonga ngwe kali kanawa, kuma ka.—Titu 3:3.

17, 18. (a) Kuchi kwononokena Zambi muchitwaha utuswilo wamwenemwene? (b) Mu mulali uka Alama ni Eva apwile ni utuswilo unji kuhiana atu musono?

¹⁷ Chikwo nawa, kwononokena Yehova chili chipema kuli yetu. Chili chipema ku mwono wetu nawa chakutwaha utuswilo wamwenemwene. (Samu 19:7-11) Nawa nyi wazachisa utuswilo we ni mana, chekwamba, muze musakula kwononokena shimbi ni yiyulo yingunu ya Zambi, unasolola kuli Zambi ni kuli yisemi je ngwo hiwakola. Yisemi je mahasa kukujikijila chinji ni kukwaha utuswilo. Nawa Yehova kanalakenya ngwenyi kwasala hakehe ahane utuswilo ungunu kuli tuvumbi twenyi eswe waze ashishika, uze Mbimbiliya yakuvuluka ngwo “kutusuka cha uhenya wa ana a Zambi.”—A-Roma 8:21.

¹⁸ Uno we utuswilo uze Alama ni Eva apwile nawo. Mu munda wa Endene, Zambi kakanjishile Alama ni Eva chuma chimuwika. O te katambile kulia muhuko wa mutondo umwe. (Uputukilo 2:9, 17) Kutala Zambi te chihenge nawa mukalu ha kwaaha shimbi yacho? Ka! Achinyonga ha shimbi jinji jize atu anase ni kushinjila akwo hanga ajikaule. Alioze, Yehova kahanyine wika shimbi yimuwika kuli Alama ni Eva.

19. Yika Yehova ni Yesu akutulongesa yize muyikatukwasa kupwa ni utuswilo?

¹⁹ Mutapu uze Yehova akutufungilamo wakusolola mana jenyi. Shimbu atwehe shimbi jinji, ni uhumikizo weswe iye kakutulongesa hanga twononokene shimbi ya zango. Kakutulongesa hanga tutwame kulita ni yiyulo yenyi ni kuvwila lwaji yuma yipi. (A-Roma 12:9) Ha Longeso lia ha Mulundu, Mwanenyi Yesu, katukwashile kunyingika mumu liaka atu akulinga yuma yipi. (Mateu 5:27, 28) Nawa hashi haha, mu Wanangana wa Zambi, nihindu Yesu makanunga ni kutulongesa hakutwala ku upi ni upeme. (A-Hepreu 1:9) Yesu nawa makatupwisa angunu mu manyonga ni ku mujimba. Mutukevwa kuwaha chinji ha kunyingika ngwetu kukuchi kapwa nawa nichimwe chize muchikatutwala ku upi, nawa kutuchi kamona lamba mumu lia uhenge. Kwamba pundu mutukawahilila ni “kutusuka cha uhenya” chize Yehova analakenya.

20. (a) Kuchi Yehova akuzachisa utuswilo wenyi? (b) Kuchi muhasa kumwimbulula?

²⁰ Mu chifuchi chaha, utuswilo wetu nihindu mukapwa ni haze unasulila. Mu mulali uka? Nihindu mutukafupiwa kusolola zango kuli Zambi ni kuli akwetu. Muze zango mulitusongwela, acho tunembulula Yehova. Chipwe ngwe utuswilo wa Yehova kuushi ni haze unasulila, nihindu iye kakwecha zango lisongwele yeswe yize akulinga, kuchingako chize iye akutufunga. (1 Yoano 4:7, 8) Kashika chinalite kwamba ngwo, mutuhasa kupwa ni utuswilo wamwenemwene nyi mutwimbulula Zambi.

21. (a) Kuchi Ndawichi evwile hakutwala kuli Yehova? (b) Yika mutukashimutwina ha mutwe uze muusulaho?

²¹ Shina wakusakwilila ha yuma yeswe yipema yize Yehova akukwaha? Iye kakukwaha kulia cha ku spiritu, masepa apema, kutesa yuma ya ku spiritu, kutalatala cha utuswilo ungunu kulutwe lia matangwa, ni yawana yikwo yinji yipema. (Samu 103:5) Kota wakulivwa ngwe Ndawichi yoze walembele hakuzachisa maliji hali ha Samu 16:11 ngwenyi: “Mukangulweza ye jila ya mwono. Kumeso je kwatwama chiseke cheswe. Ku chindume che kwatwama yiwape ya mutolo.” Ha mutwe uze muusulaho, mutukashimutwina umwenemwene ukwo ulemu uze uli ha Samu 16. Chino muchikukwasa umone chize muhasa kupwa ni mwono upema!