Shina kuli Chimwe Chize Muchihasa Kukutalingisa ha Kukaula Yesu?

 1. Yika kota yalingiwileko muze wazangile kulweza akwenu sango ja mu Mbimbiliya ha chisuho chitangu?

SHINA unewuluka chisuho chitangu chize wanyingikine ngwo wawana umwenemwene? Chasolokele ngwe chapwile chashi kunyingika yeswe yize te unalilongesa mu Mbimbiliya! Wamwene ngwe atu eswe te mazanga kunyingika yize unafuliela. Nawa wapwile ni shindakenyo ngwe sango ja mu Mbimbiliya mujikwasa atu kupwa ni uwahililo ni kutalatala chipema. (Samu 119:105) Hachino, yiuzanga kulweza masepa ni asoko je, umwenemwene uze te unalilongesa. Mba yika yalingiwileko? Kota wakomokene ha kumona anji a kuli ayo malituna kutayiza yize unalweze.

2-3. Yika atu anji ha matangwa ja Yesu te akunyonga hakutwala kuli iye?

² Niumwe wa kuli yetu katambile kukomoka muze atu malituna kupanjika sango jize tunambujola. Ha matangwa ja Yesu, atu anji kalitunyineyo, chipwe muze apwile ni kulinga yikomokeso hanga asolole ngwo kali ni ukwaso wa Zambi. Chakutalilaho, Yesu kahindwishile Lazaru. Chikomokeso chino, chipwe akwa-kole jenyi kakahashile kuchihamika. Chipwe chocho, A-Yunda kakazangile kutayiza ngwo Yesu kali Mesaya. Hachino, ayo yafupa kumushiha hamwe ni Lazaru!—Yoa. 11:47, 48, 53; 12:9-11.

³ Yesu kanyingikine ngwenyi, atu anji te kechi kumutayiza ngwe Mesaya. (Yoa. 5:39-44) Iye yalweza tumbaji a Yoano Chipapachisa ngwenyi: “Kawaha mweswawo keshi kuwana chitalingiso muli yami.” (Mateu 11:2, 3, 6) Mba mumu liaka atu anji alitunyine Yesu?

 4. Yika mutulilongesa ha mutwe uno?

⁴ Ha mutwe uno ni uze muusulaho, mutumona yikuma yimwe yize yatwalile atu anji ha matangwa ja Yesu hanga ahone kumufuliela. Nawa mutumona mumu liaka atu anji musono akutalinga hanji ngwetu, akulituna sango jize twakwambulwila. Chahiana ulemu, mutumona mumu liaka twatamba kufuliela chinji muli Yesu hanga tuhone kutalinga.

 5. Yika kota yatwalile atu anji kunyonga ngwo Yesu hi Mesaya ko yoze alakenyene?

⁵ Atu anji katalingile hamukunda wa kuze Yesu asemukinyine. Ayo kanyingikine ngwo, Yesu kali longeshi wakukomwesa nawa kakulinga yikomokeso. Alioze kuli atu jacho, Yesu kapwile wika mwana wa mukwa-kusonga mapaya. Iye kapwile wa ku Nazare chihunda chize atu anji kota te keshi kulemesa. Chipwe Natanele yoze kulutwe wapwile kambaji ka Yesu, neye kambile ngwenyi: “Chuma chipema muchihasa kukatuka mu Nazare, nyi?” (Yoa. 1:46) Natanele kota kakapwile ni nyonga lipema hakutwala ku chihunda kuze Yesu asemukinyine. Hanji muchihasa kupwa ngwe, kapwile ni kunyonga ha uprofeto wa Mika 5:2, unambe ngwo, Mesaya te masemukina ku Mbeteleme hi ku Nazare ko.

 6. Yika te muyikwasa atu ha matangwa ja Yesu amunyingike ngwo Mesaya?

⁶ Yika Yisoneko yinambe? Profeta Izaia kambile ngwenyi, akwa-kole ja Yesu te kechi kulihulumba hakutwala ku “sango ja chisemuko cha Mesaya.” (Iza. 53:8) Sango jacho jinji kajiprofetezele. Nyi atu kasele mashimbu hanga ahengwole sango jamwenemwene, kachi kanyingikine ngwo Yesu kasemukine mu Mbeteleme nawa kali wa ku chisemuko cha Mwanangana Ndawichi. (Luka 2:4-7) Chihela kuze Yesu asemukinyine, te chinalite ni uprofeto uli ha Mika 5:2. Mba mulonga kulihi wakatukile? Atu kalipupwile kumupatwila. Ayo te kanyingikine umwenemwene weswe. Hamukunda wa chino, yatalinga.

 7. Mumu liaka atu anji musono akulituna Yela ja Yehova?

⁷ Shina twakumona kapinda wacho musono? Ewa. Anji a kuli tuvumbi twa Yehova hi atu alemu ko, kashika atu anji akwamona ngwo kali angwaza, “kalongolokele.” (Yili. 4:13) Amwe kakunyonga ngwo, atu ja Yehova katambile kulongesa Mbimbiliya kuli akwo, mumu keshi ni mikanda ya ku mashikola anene-anene waze akulongesa yuma ya Zambi. Akwo kakwamba ngwo, uwayilo wa Yela ja Yehova uli wa “akwa-America.” Alioze kwamba umwenemwene, Yela ja Yehova anji katwamine mu Estados Unidos. Amwe kevwile wika ngwo, Yela ja Yehova keshi kufuliela muli Yesu. Ha kupalika cha miaka, atu kakwamba ngwo, Yela ja Yehova “kali chizavu chize chakufupa hanga atu apwe ni mwono wa mutapu umuwika, Ngendeshi akwa-America, nawa ngwo twakulimika ni shimbi ja nguvulu.” Waze akupanjika sango jacho nawa kanyingikine umwenemwene hakutwala kuli yetu, kakutalinga hanji ngwetu kulituna atu ja Yehova.

 8. Kulita ni Yilinga 17:11, yika atu atamba kulinga mba anyingike tuvumbi twa Zambi musono?

⁸ Yika atu atamba kulinga hanga achine kutalinga? Katamba kuhengwola sango jamwenemwene. Yino ye alingile Luka, umwe mukwa-kusoneka Evanjelu. Iye kahengwile “yuma yeswe pundu chize ku uputukilo.” Kazangile hanga atu waze matanga mukanda wa Luka “anyingike pundu umwenemwene” wa yuma yize evwile hakutwala kuli Yesu. (Luka 1:1-4) A-Yunda a mu limbo lia Mberia no kapwile ngwe Luka. Muze te akwivwa sango lipema hakutwala kuli Yesu, ayo te kakuhengwola mu Yisoneko ya Hepreu hanga ase shindakenyo nyi yize anevu yili lume yamwenemwene. (Tanga Yilinga 17:11.) Ni musono nawa, atu katamba kuhengwola sango jamwenemwene. Ayo katamba kutesa malongeso a Yela ja Yehova ni yize Yisoneko yakwamba. Katamba nawa kulilongesa sango ja tuvumbi twa Yehova a ha matangwa jetu. Nyi manyingika kanawa Yela ja Yehova, katonde ni yuma yikwo yize atu akwamba hakutwala kuli ayo kuyichi kwapwisa tupuputa.

 9. Yika yalingiwileko muze Yesu alitunyine kulinga chilayi cha mwilu?

⁹ Malongeso a Yesu kapwile ni kukomwesa. Alioze kuli atu amwe ha matangwa jenyi, yino te kuyishi kukumbana. Ayo kazangile yuma yinji. Chocho yamushinjila kulinga “chilayi cha mwilu” hanga asolole ngwo kali Mesaya. (Mateu 16:1) Ayo kota kanakashinjila Yesu mumu kakanyingikine kanawa ulumbunwiso wa maliji waze ali ha Daniele 7:13, 14. Alioze, mashimbu waze te Yehova mamanununa uprofeto wacho te kanda achiheta. Atu jacho kachi kanyingikine ngwo, Yesu mwe Mesaya kupalikila mu malongeso jenyi. Alioze, muze Yesu alitunyine kulinga chilayi chize ayo azangile, chocho yatalinga.—Mateu 16:4.

10. Kuchi Yesu amanunwine yize Izaia asonekene hakutwala kuli Mesaya?

¹⁰ Yika Yisoneko yinambe? Profeta Izaia kasonekene hakutwala kuli Mesaya ngwenyi: “Kechi kakololoka, hanji kukalumioka, kechi kavwisa liji lienyi mu tapalo.” (Iza. 42:1, 2) Yesu kalingile mulimo wenyi wa kwambujola cha kuhona kulinangamisa. Iye kakatungile matembele anene-anene, kakazalile mazalo alemu a mayingeleja, chipwe kushinjila atu hanga amusanyike ha yisanyiko ya lufuma. Chipwe muze mwono wenyi wapwile mu ponde, Yesu kalitunyine kulinga chikomokeso chize te muchivwisa Mwanangana Heronde kuwaha. (Luka 23:8-11) Tunanyingika ngwetu, Yesu kalingile yimwe yikomokeso, alioze chuma chilemu kuli iye chapwile kwambujola sango lipema. Yalweza tumbaji twenyi ngwenyi: “Hingunejila ha chuma chino chene.”—Marku 1:38.

11. Manyonga aka api waze amwe alino musono?

¹¹ Shina twakumona kapinda wacho musono? Ewa. Yuma yinji yize yakukomwesa atu anji musono, yili mayingeleja anene-anene waze akwete yuma ya ndando, mangana a mayingeleja waze akwete yisanyiko yilemu ni yiwanyino yize anji kanyingikine chize yaputukile. Shina yino yakukwasa atu waze akuya mu mayingeleja jacho kunyingika Zambi ni upale wenyi? Waze akulikungulula ni Yela ja Yehova, kakulilongesa yize Yehova anazange hanga alinge. Mazuwo jetu a Wanangana kapwa apema, kumushi yuma yize ya kukomwesa. Waze apwa tusongo, keshi kuzala mazalo alemu, chipwe kwavuluka ha yisanyiko yilemu. Malongeso ni ufulielo wetu, yakukatuka mu Liji lia Zambi. Chipwe chocho, atu anji musono kakutalinga ni kunyonga ngwo, mutapu uze twakuwayilamo Zambi wapwa chinji wangwaza. Mumu yize twakulongesa hi yize ko ayo akuzanga kwivwa.

12. Kulita ni A-Hepreu 11:1, 6, ufulielo wetu kulihi watamba kukatuka?

¹² Yika twatamba kulinga hanga tuchine kutalinga? Postolo Paulu kalwezele akwa-Kristu mu Roma ngwenyi: “Ufulielo kuuneza ha kwivwa sango, ni sango kulineza ku liji lia Kristu.” (Roma 10:17) Yiwanyino ya mayingeleja yize kuyishi kukatuka mu Mbimbiliya, chipwe ngwe muyipema hanji muyikomwesa, nihindu kuyichi kukolesa ufulielo wetu. Chuma chize chakukolesa ufulielo wetu, chili kulilongesa Liji lia Zambi. Ufulielo wetu watamba kukatuka ha chinyingi cha Zambi, mumu “mutu keshi kuhasa kupemena kuli Zambi shina ni ufulielo.” (Tanga A-Hepreu 11:1, 6.) Kashika, mba tupwe ni shindakenyo ngwetu twawana umwenemwene, kutwafupiwile chimwe chilayi cha kukomwesa cha mwilu. Kulilongesa kanawa Mbimbiliya, muchikolesa ufulielo wetu ni kutukwasa hanga tuchine kuyambashana.

13. Mumu liaka atu anji alitunyine Yesu?

¹³ Ha matangwa ja Yesu, tumbaji a Yoano Chipapachisa kakomokene chinji, mumu tumbaji twa Yesu kakapwile ni chako cha kulitwamina kulia. Yesu yalumbununa ngwenyi, ayo te katambile kuchilinga shimbu iye uchili ni mwono. (Mateu 9:14-17) Chipwe chocho, A-Fwariseu ni akwa-kole akwo, kalitunyineyo mumu te keshi kukaula mianda ni ndako jo. Malunga wano, kanakevwila Yesu uli unji muze awukile mieji ha Sambata. (Marku 3:1-6; Yoa. 9:16) Ayo te kakwamba ngwo kakufunga shimbi ya Sambata, chipwe chocho te keshi kumona ngwo chili chipi kulinga mingoso mu tembele. Ayo kevwile uli muze Yesu anakaapatwila ha chikuma chacho. (Mateu 21:12, 13, 15) Chikwo nawa, atu waze evwile Yesu kanambujola mu sunangonga ku Nazare, kevwile uli muze iye azachishile chilweza cha A-Izalele hanga asolole ngwo, ayo kapwile akwa-kuzo nawa te keshi ni ufulielo. (Luka 4:16, 25-30) Atu anji katalingile, mumu Yesu kakalingile yize ayo apwile ni kushimbwila.—Mateu 11:16-19.

14. Mumu liaka Yesu ahishile mianda ya atu yize te kuyishi kulita ni Yisoneko?

¹⁴ Yika Yisoneko yinambe? Kupalikila muli profeta Izaia, Yehova yamba ngwenyi: “Wano atu kanakundama kuli yami ni makanwa jo ni kungulemesa ni mivumbo yo, alioze mbunge jo kusuku jili ni yami, ni woma akunguvwila wapwa shimbi yimwe ya atu hanalilongesa kupachikila.” (Iza. 29:13) Yesu kalingile kanawa ha kuhisa mianda ya atu yize te kuyishi kulita ni Liji lia Zambi. Waze te akulemesa shimbi ni mianda ya atu kuhiana Yisoneko, kapwile ni kulituna Yehova hamwe ni Mesaya yoze iye atumine.

15. Mumu liaka atu anji musono keshi kuzanga Yela ja Yehova?

¹⁵ Shina twakumona kapinda wacho musono? Ewa. Atu anji kakuvwila Yela ja Yehova uli, mumu ayo keshi kulinga yiwanyino ni ndako jize kujalitele ni Mbimbiliya, ngwe yiwanyino ya matangwa akusemuka ni ya natale. Akwo kakwivwa uli muze Yela ja Yehova keshi kulinga yiwanyino yize yakuhalisa chifuchi ni mianda ya malilo yize yakulimika ni shimbi ja Zambi. Atu wano kakunyonga ngwo, ayo kanawayila Zambi mujila yalita. Alioze, waze akuzanga kukaula mianda ya hano hashi chakuhona kukaula malongeso a mu Mbimbiliya, keshi kuvwisa Yehova kuwaha.—Marku 7:7-9.

16. Kulita ni Samu 119:97, 113, 163-165, yika twatamba kulinga nawa yika twatamba kulituna?

¹⁶ Yika twatamba kulinga hanga tuchine kutalinga? Twatamba kuzanga chinji shimbi ja Yehova. (Tanga Samu 119:97, 113, 163-165.) Nyi mutuzanga Yehova, mutulituna mianda yeswe yize iye keshi kuzanga. Nawa kutuchi kwecha nichimwe chipwe chilemu kuhiana zango lize tukwete kuli Yehova.

17. Atu anji ha matangwa ja Yesu te kakushimbwila hanga Mesaya alinge yika?

¹⁷ Atu amwe ha matangwa ja Yesu, kazangile hanga unguvulu walumuke ha mashimbu jacho. Ayo te kakwamwesa lamba kuli nguvulu wa Roma, nawa kazangile hanga Mesaya aatusule mu chiyulo chacho. Alioze, muze azangile kupwisa Yesu mwanangana, iye yalituna. (Yoa. 6:14, 15) Atu akwo, kuchingako asasendote te kakwaha umwe wata kuli A-Roma, kashika apwile ni kwivwa woma ngwo, Yesu maneha unguvulu uze muulimika ni wa A-Roma. Kulihulumba chino hakutwala ku yuma ya mafwefwe, chinakatalingisa A-Yunda anji.

18. Uprofeto uka hakutwala kuli Mesaya uze anji te akulengulula?

¹⁸ Yika Yisoneko yinambe? Uprofeto unji wahanjikile hakutwala kuli Mesaya ngwo, iye te mapwa Kajita yoze hakumba, ukwo ngwo, chitangu iye te mafwa hamukunda wa shili yetu. (Iza. 53:9, 12) Mba mumu liaka A-Yunda apwile ni manyonga api hakutwala kuli Mesaya? Mumu anji a kuli ayo, te kanazange hanga aahwishile milonga yo ha mashimbu aze ene. Kashika te akulengulula uprofeto uze kuushi kulakenya yuma yacho.—Yoa. 6:26, 27.

19. Manyonga aka api waze akutalingisa atu anji musono?

¹⁹ Shina twakumona kapinda wacho musono? Ewa. Atu anji musono kakutalinga mumu yetu kutushi kulinga yuma ya mafwefwe. Ayo kakwamba ngwo, muze analingi voto mu chifuchi twatamba kusakula umwe nguvulu. Alioze yetu tunanyingika ngwetu, nyi twasakula umwe mutu hanga apwe kasongo ketu, acho tunalituna Yehova. (1 Samue. 8:4-7) Atu mahasa kunyonga nawa ngwo, twatamba kutunga mashikola, mashipitali ni kulinga milimo ya kuhana-hana ukwaso kuli atu. Ayo kakwivwa kupiha muze akutumona mutulihana mu mulimo wa kwambujola, chakuhona kulinga yize muyihwisa lamba lia atu ha mashimbu wano.

20. Kulita ni yize Yesu ambile ha Mateu 7:21-23, yika twatamba kulemesa chinji?

²⁰ Yika twatamba kulinga hanga tuchine kutalinga? (Tanga Mateu 7:21-23.) Chuma chilemu kuli yetu, chili kulinga mulimo uze Yesu atuhele. (Mateu 28:19, 20) Kutwatambile kulaluka ni yuma ya mafwefwe hanji ni yuma yikwo ya hano hashi. Twakuzanga atu, nawa twakulipikala ha milonga yo, alioze tunanyingika ngwetu jila yipema yakukwashilamo enyembo jetu, yili kwalongesa hakutwala ku Wanangana wa Zambi ni kwakwasa hanga apwe masepa ja Yehova.

21. Twatamba kununga ni kulinga yika?

²¹ Ha mutwe uno, twamonaho yuma yiwana yize yatwalile atu anji kutalinga ni kulituna Yesu, ni yize yinatwale atu anji musono kulituna tumbaji twa Yesu. Alioze, shina twatamba kwehuka wika yuma yino? Ka. Ha mutwe uze muusulaho, mutumonaho yuma yikwo yiwana yize yakutalingisa atu. Kashika, twatamba kwehuka kutalinga ni kununga ni kukolesa ufulielo wetu!