Tukumbenu Manyonga Eswe waze Akulimika ni Chinyingi cha Zambi!

 1. Utowezo uka postolo Paulu asonekenene akwa-Kristu akuwayisa?

POSTOLO Paulu katowezele ngwenyi: “Kanda nuliendela ni ndako ja mwakono.” (Roma 12:2) Paulu kasonekenene maliji wano kuli akwa-Kristu ku sekulu yitangu. Mba mumu liaka atowezele malunga ni mapwo waze te hanalihane kulu kuli Zambi nawa akuwayisa ni spiritu yisandu?—Roma 1:7.

2-3. Kuchi Satana akufupa kutulingisa tulimike ni Yehova, alioze kuchi mutuhasa kutukula yuma yize hiyinatande miji mu mbunge yetu?

² Paulu kalihulumbile mumu akwa-Kristu amwe kapwile ni kukaula yitanga ni malongeso a hano hashi ha Satana. (Efwe. 4:17-19) Chino muchihasa kulingiwa kuli hita umwe wa kuli yetu. Mba atuhandunune kuli Yehova, Satana, zambi wa yuma ya mwakono, kakuzachisa miheto yeka ni yeka. Umwe wa ku miheto yacho, uli kufupa kunyingika ndako ya musunya yize tukwete ngwe chipululu ni kuzo hanga atupiangule kuli Yehova. Iye mahasa chipwe kuzachisa jimwe ndako ja chize twakolele, chako chetu, hanji shikola yize twalilongesele hanga apihise manyonga jetu tunyonge ngwe iye.

³ Shina mutuhasa “kupupa” hanji kutukula yuma yize hiyinatande miji mu mbunge yetu? (2 Kori. 10:4) Tala chize Paulu akumbulwile: “Twakupupa malinjekela ni yuma yeswe ya kulizata nayo, yize yakulinangamisa kulimika ni chinyingi cha Zambi, twakutwala manyonga eswe ku ufunge akononoke kuli Kristu.” (2 Kori. 10:5) Ewa, ni ukwaso wa Yehova mutuhasa kuchiza ndako jipi mu mbunge yetu. Chizechene ngwe yitumbo yize muyihasa kuchiza ulembe upi mu mujimba wa mutu, Liji lia Zambi nelio mulihasa kutukwasa kuchiza ulembe, chekwamba yitanga yipi ya hano hashi ha Satana yize yili mu mbunge yetu.

 4. Yika anji akuli yetu twalingile muze twatayijile umwenemwene?

⁴ Achinyonga ha yitanga yize wafupiwile kwalumuna ku mwono we, muze watayijile umwenemwene wa Liji lia Zambi ni kukwata chiyulo cha kuwayila Yehova. Anji a kuli yetu, mba tupwe Yela ja Yehova, twechele ndako jinji jipi. (1 Kori. 6:9-11) Tunasakwilila chinji ha chize Yehova atukwashile hanga tweche kulinga yuma yipi!

 5. Yuma yika yaali yize anatongola ha A-Roma 12:2?

⁵ Alioze kanda tunyonga ngwetu, kutwafupiwile nawa kwalumuna niyimwe ku mwono wetu. Chipwe ngwe, hituneche kulinga shili yinene ngwe chize twapwile shimbu te kanda tulilongesa umwenemwene, nihindu tunafupiwa kusa tachi hanga twehuke yuma yize muyihasa kututwala nawa ku shili yacho. Kuchi mutuhasa kuchilinga? Paulu kanakumbulula ngwenyi: “Kanda nulitesa ni ndako ja mwakono, alioze alumukenu ku kupwisa chaha cha kunyonga chenu.” (Roma 12:2) Kashika, twatamba kulinga yuma yaali. Chitangu, twatamba kwecha ‘kulitesa ni ndako ja mwakono,’ hanji manyonga a hano hashi. Chamuchiali, twatamba “kupwisa chaha” mutapu uze twakunyonga hanji yitanga yetu.

 6. Yika twalilongesa ha maliji a Yesu waze ali ha Mateu 12:43-45?

⁶ Kwalumuka chize Paulu ambile, chinalumbunuka yuma yinji hi wika ko kwalumuka cha haze chize atu mahasa kumona. Chino chinakwate ku mwono wetu weswe. (Tala mushete “Shina Kalumuka nyi Kanaliongo?”) Twatamba kwalumuna utu wetu weswe, chekwamba manyonga, chize twakwivwa ni usolo wetu. Kashika tulieswe twatamba kulihula ngwetu, ‘Yuma yize ngunalumuna ku mwono wami ha kwimbulula Kristu, shina yili wika ya haze nyi ngunalumuna lume utu wami wa muchima?’ Ha maliji a Yesu waze ali ha Mateu 12:43-45, iye kasolwele yize twatamba kulinga. (Tanga.) Nyonga lize lili ha maliji jacho linashindakenya umwenemwene uno ulemu ngwo: Kuchakumbanyine wika kuchiza manyonga api mu mbunge yetu; alioze twatamba nawa kusalakanyisamo manyonga a Zambi.

 7. Kuchi mutuhasa kwalumuna utu wetu wa muchima?

⁷ Shina muchihasa kupwa chashi kwalumuna manyonga hanji utu wetu wa muchima? Liji lia Zambi linakumbulula ngwo: “Nukapwe nuli atu aha mu spiritu ya kunyonga chenu, nukazale mutu mwaha, yoze hanamutange mu ululi ni usandu wamwenemwene nikulita ni Zambi.” (Efwe. 4:23, 24) Kashika, mutuhasa kwalumuna utu wetu wa muchima, alioze hi chashi ko kuchilinga. Tunafupiwa kulinga chimwe, hi wika ko kwehuka manyonga api ni kwecha kulinga yuma yipi. Tunafupiwa kwalumuna “spiritu ya kunyonga” chetu. Chino chinalumbunuka kwalumuna manyonga, yitanga ni yize yakututwala ku yuma yacho. Chino chakwita kununga ni kusa tachi.

8-9. Kuchi chilweza cha umwe ndumbu chinasolola ulemu wa kwalumuna utu wetu wa muchima?

⁸ Tutalenu chilweza cha umwe ndumbu yoze wapwile chingalwe. Muze echele kunwa walwa ni kulilamba ni akwo, yajama ni kumupapachisa, chocho yahana uchela upema mu chihunda chize te atwama. Alioze, ha chingoloshi chimwe, muze te hikwapalika amwe matangwa chize haze amupapachishile, yapalika mu chimwe cheseko chize kakapwile ni kushimbwila. Umwe chizengi yeza ku zuwo lienyi ni kumusosomba hanga alilambe nenyi. Ku uputukilo ndumbwetu yalihumikiza. Alioze muze chizengi wacho achokele jina lia Yehova, hi ndumbu kahashile nawa kulihumikiza. Chocho, yatuhuka haze yakwata lunga wacho yaputuka kumulamba. Mumu liaka alingile chocho? Chipwe ngwe, longeso lia Mbimbiliya liamukwashile kupwa ni kulihumikiza muze mamusosomba, nihindu iye te kanda achalumuna spiritu ya kunyonga chenyi, chekwamba utu wenyi wa muchima.

⁹ Chipwe chocho, ndumbwetu kakahongele kununga ni kwalumuna utu wenyi. (Yishi. 24:16) Ni ukwaso wa makulwana, iye yanunga ni kukola ku ufulielo. Kulutwe, neye yapwa mukulwana wa mu chikungulwila. Ha chingoloshi chimwe, muze te ali haze lia Zuwo lia Wanangana, yapalika mu cheseko chochene chimuwika. Umwe chizengi te kanazange kulamba mukulwana mukwo wa mu chikungulwila. Yika ndumbwetu alingile? Ni uhumikizo weswe hamwe ni kulikehesa, iye yalweza chizengi wacho hanga alihumikize, ni kumukwasa aye ku zuwo lienyi. Mumu liaka ha mashimbu wano ndumbwetu alihumikijile? Mumu, iye te halumuna spiritu ya kunyonga chenyi. Iye te hapwa mutu wa kulikehesa nawa yoze wakufupa sambukila. Yize alingile yahalishile Yehova!

10. Yika twatamba kulinga mba twalumune utu wetu wa muchima?

¹⁰ Kwalumuka chino, kuchishi kulingiwa chamulingiwila hanji ngwetu cha susumuku. Chakufupiwa kusa tachi chipwe ha miaka yinji. (2 Petu. 1:5) Chino kuchishi kulingiwa mumu ngwo twakuwayila Yehova ha miaka yinji. Twatamba kusa tachi hanga twalumune utu wetu wa muchima. Kuli yikuma yilemu yize muyitukwasa kuchilinga. Tuhengwolenu yimwe.

11. Kuchi kulemba chakutukwasa kwalumuna spiritu ya kunyonga chetu?

¹¹ Chuma chitangu chilemu chize twatamba kulinga chili kulemba. Tunafupiwa kulemba ngwe chize alembele mukwa-kwimba-masamu ngwenyi: “Zambi, tenga muli yami mbunge yipema. Lulika spiritu ya kululama muli yami.” (Samu 51:10) Twatamba kutayiza ngwetu tunafupiwa kwalumuna spiritu ya kunyonga chetu ni kwita Yehova hanga atukwase. Mba kuchi mutuhasa kupwa ni shindakenyo ngwetu, Yehova matukwasa hanga twalumune utu wetu? Mutuhasa kuwana utakamiso ha chilakenyo chize Yehova alingile kuli A-Izalele waze apwile ni mbunge jikalu ha matangwa ja Ezekiele ngwenyi: “Mungukaaha mbunge yaha; mungukasa spiritu muli ayo . . . mungukachiza ku musunya wo mbunge jo ja mawe, mungukaaha mbunge ja musunya, [jize japwa jashi kukaula usongwelo wa Zambi].” (Eze. 11:19) Yehova kazangile chinji kukwasa A-Izalele hanga alumune yitanga yo, ni yetu kanazange kutukwasa.

12-13. (a) Kulita ni Samu 119:59, ha yika twatamba kupukuna? (b) Yihula yika watamba kulihula?

¹² Chuma chamuchiali chilemu chize twatamba kulinga chili kupukuna. Muze tunatange Liji lia Zambi hita tangwa, twatamba kusa amwe mashimbu hanga tupukune hanji kunyonga chinji ha yize tunafupiwa kwalumuna ku mwono wetu. (Tanga Samu 119:59; Hepre. 4:12; Tia. 1:25) Tunafupiwa nawa kunyingika manyonga eswe waze mahasa kututwala ku mana a hano hashi. Twatamba kutayiza ni mbunge yeswe ngwetu, tukwete umwe ulelu ni kusa tachi hanga tuukumbe.

¹³ Chakutalilaho, lihule ngwe: ‘Shina nguli ni amwe manyonga a chipululu mu mbunge yami?’ (1 Petu. 2:1) ‘Kutala nakulizata mumu lia kuze nakolelele, shikola yize nalilongesele hanji upite uze ngukwete?’ (Yishi. 16:5) ‘Shina nakulelesa atu waze keshi ni yuma ngwe yize ngukwete hanji aku munyachi ukwo?’ (Tia. 2:2-4) ‘Kutala nakuzanga chinji kupwa ni yuma ya hano hashi ha Satana? (1 Yoa. 2:15-17) ‘Shina nakuwahilila ni yitanga ya upangala hanji yiheho yipi?’ (Samu 97:10; 101:3; Amo. 5:15) Makumbululo a yihula yino masolola haze watamba kwalumuna. Nyi twasa tachi hanga tutukule yuma yize hiyinatande miji mu mbunge yetu, mutuvwisa kuwaha Tata yetu wa mu malilu.—Samu 19:14.

14. Mumu liaka chili chilemu kusakula kanawa masepa jetu?

¹⁴ Chuma chamuchitatu chilemu chize twatamba kulinga chili kusakula masepa apema. Chipwe ngwe mutuchinyingika hanji ka, atu waze twalikata no mahasa kututwala kulinga yimwe. (Yishi. 13:20) Ku shikola hanji ku mulimo, kota twakupwa hamwe ni waze keshi kutukwasa hanga tupwe ni manyonga a Zambi. Chipwe chocho, mutuhasa kuwana masepa apema ku kukunguluka chetu cha akwa-Kristu. Ayo mahasa kutukwasa ni kutukolweza hanga tupwe ni “zango ni yitanga yipema.”—Hepre. 10:24, 25.

15-16. Kuchi Satana akufupa kwalumuna manyonga jetu?

¹⁵ Nyingika ngwe, Satana kanazange kwalumuna mutapu wa kunyonga chetu. Iye kakuzachisa malongeso eka ni eka hanga akwike tachi jize Liji lia Zambi likwete mu manyonga jetu.

¹⁶ Satana nihindu kananungu ni kuhula chihula chizechene ahulile kuli Eva mu munda wa Endene ngwenyi: “Kuma, Zambi hanambe ngwenyi . . . ?” (Uputu. 3:1) Mu chifuchi chino anasongwela kuli Satana, kanji-kanji twakwivwa yihula ngwe yino: ‘Kuma Zambi keshi kutayiza ulo wa utumwa? Kuma Zambi keshi kuzanga yena ulinge yiwanyino ya matangwa a kusemuka ni natale? Kuma Zambi yenu keshi kuzanga hanga akuse manyinga muze unayiji? Kuma Zambi keshi kuzanga hanga uliendele ni atu wazanga waze hanaasosolola mu chikungulwila?’

17. Yika twatamba kulinga nyi umwe matuhula hakutwala ku ufulielo wetu hanga atuyambanganyise, nawa kulita ni A-Kolosu 2:6, 7 yika muyihasa kulingiwako?

¹⁷ Twatamba kupwa ni shindakenyo ha yize twakufuliela. Nyi kutwawanyine makumbululo hakutwala ku yihula yilemu ya ufulielo wetu, mutuhasa kuputuka kuyambashana ha yize twakufuliela. Kuyambashana muchihasa kupihisa manyonga ni ufulielo wetu. Mba yika twatamba kulinga? Liji lia Zambi liakutukolweza hanga twalumune manyonga jetu, mba tuhase kusa “chinyingi chize wapwa upale upema ni ungunu wa Zambi ni uze wamupemena.” (Roma 12:2) Kulilongesa hita tangwa, muchitukwasa hanga tunyingike umwenemwene uze twakulilongesa mu Mbimbiliya. Nyi mutulilongesa hita tangwa, mutupwa ni shindakenyo ngwetu, yize twakulilongesa mu Mbimbiliya yili yamwenemwene. Hachino, ngwe mutondo uze hiwatanda miji, ni yetu mututanda miji ni ‘kujikiza mu ufulielo.’—Tanga A-Kolosu 2:6, 7.

18. Yika muyikukwasa mba wehuke ndako jipi ja hano hashi ha Satana?

¹⁸ Hita umwe wa kuli yetu katamba kulikolweza hanga ajikijise ufulielo wenyi. Kashika, sako tachi hanga ununge ni kupwisa chaha kunyonga che. Lemba chinji, nawa eta spiritu ya Yehova hanga yikukwase. Pukuna chinji, nawa nunga ni kuhengwola kanawa manyonga ni yitanga ye. Likate ni masepa apema, nawa pwako hamwe ni atu waze makukwasa kwalumuna kunyonga che. Kulinga chino, mwehuka ndako jipi ja hano hashi ha Satana nawa muhasa kupupa ‘malinjekela ni yuma yeswe, yize yakulinangamisa kulimika ni chinyingi cha Zambi.’—2 Kori. 10:5.