LONGESO 33
Yize Wanangana wa Zambi Muukalinga
Wanangana wa Zambi unayulu. Kwasala hakehe Wanangana wacho muwalumuna yuma hano hashi. Tushimutwinenu yuma yimwe yipema yize muyikalingiwa mu Wanangana wa Zambi.
1. Kuchi Wanangana wa Zambi muukaneha sambukila ni ululi hashi?
Yesu, Mwanangana wa mu Wanangana wa Zambi makanongesa atu eswe api ni manguvulu a hashi mu jita ya Armagedone. (Usolwelo 16:14, 16) Muze yino muyikalingiwa, chilakenyo chakwamba ngwo: “Kwasala hakehe mba yingulungulu hi akuhi” muchikamanunuka. (Samu 37:10) Kupalikila mu Wanangana, Yesu makalingisa hanga hashi hakazale too ni sambukila ni ululi.—Tanga Izaia 11:4.
2. Kuchi mwono muukapwa muze upale wa Zambi muukalingiwa hano hashi?
Kupalikila mu chiyulo cha Wanangana wa Zambi, “akwa ululi kumakazuka chifuchi; kumakatwamamo ku miaka ya mutolo.” (Samu 37:29) Achinyonga kutwama mu chifuchi muze atu eswe ali akwa-ululi, akuzanga Zambi ni kulizanga umwe ni mukwo! Niumwe kechi kayiza, eswe makapwa ni mwono wa mutolo.
3. Yika Wanangana wa Zambi muukalinga muze atu api makaanongesa?
Muze atu api makaanongesa, Yesu makayula ngwe Mwanangana ha 1,000 ka miaka. Ha shimbu liacho, iye ni atu 144,000 waze makayula hamwe nenyi, makakwasa atu hano hashi hanga akapwe angunu. Ku songo lia 1,000 ka miaka, hashi muhakapwa paraisu ni atu eswe no makawahilila ha kwononokena shimbi ja Yehova. Hachino, Yesu makahilwisa Wanangana kuli Tato, Yehova. Muze chino muchikalingiwa, jina lia Yehova ‘mulikapwa lisandu.’ (Mateu 6:9, 10) Kashika, muchikasoloka zwalala ngwo, kumana Yehova kali Mwanangana mupema yoze wakulihulumba hali atu jenyi. Yesu makanongesa Satana, andemoniu ni mutu mweswawo makazanga kulimika ni wata Wenyi. (Usolwelo 20:7-10) Yuma yeswe yipema yize Wanangana wa Zambi muukaneha muyikanunga ya mutolo.
NYINGIKA NAWA
Tala mumu liaka twatamba kufuliela ngwetu, Zambi makazachisa Wanangana wenyi hanga akamanunune yilakenyo yeswe yize twakuwana mu Mbimbiliya.
4. Wanangana wa Zambi muukenyeka mawanangana eswe a hashi
“Mutu mapwa ni chiyulo helu lia mukwo ni kumupinjisa.” (Chilumbununyi 8:9) Kupalikila mu Wanangana wenyi, Yehova makahwisa upi weswe au wakulingiwa hano hashi.
Tanga Daniele 2:44 ni 2 A-Tesalonika 1:6-8, mba nushimutwine yihula yino:
Yika Yehova ni Mwanenyi Yesu makalinga kuli mianangana a hano hashi ni kuli atu waze akukwasa mianangana jacho?
Kuchi yuma yize walilongesa hakutwala kuli Yehova ni Yesu, yinakwehe shindakenyo ngwe, yitanga yo muyikapwa ya ululi?
5. Yesu kali Mwanangana mupema
Ngwe Mwanangana wa Wanangana wa Zambi, Yesu makalinga yuma yinji yipema hali atu jenyi. Tala CHINEMA hanga umone chize Yesu asolwele ngwenyi kakuzanga atu. Chikwo nawa, mumona ngwe Yehova kamuhele ndundo ja kuchilinga.
Yuma yize Yesu alingile muze apwile hano hashi, yinasolola yize Wanangana wa Zambi muukalinga. Yiwape yika yinasonewa hano yize wakushimbwila chinji kulutwe lia matangwa? Tanga yisoneko yize muyikukwasa kunyingika yiwape yacho.
MUZE YESU APWILE HANO HASHI . . . |
KUKATUKA MU MALILU, YESU . . . |
|---|---|
|
|
|
|
|
|
|
|
6. Wanangana wa Zambi muukaneha yiwape yinji
Wanangana wa Zambi muukamanununa upale wa Yehova hali atu. O makapwa ni mwono wa mutulo mu paraisu hano hashi. Tala CHINEMA umone chize Yehova anakalakala kupalikila muli Mwanenyi Yesu, hanga amununune upale wenyi.
Tanga Samu 145:16, mba nushimutwine chihula chino:
Kuchi wakwivwa ha kunyingika ngwe, Yehova makahwisa “usona wa waze eswe atwama ni mwono”?
ATU AMWE KAKWAMBA NGWO: “Nyi tulieswe mutusa tachi ni kukalakalila hamuwika, mutuhasa kuhwisa lamba lia hashi.”
Kapinda muka Wanangana wa Zambi muukahwisa yoze mawanangana a hashi kechi kuhasa?
YIZE WALILONGESA
Wanangana wa Zambi muukamanununa upale wenyi weswe. Muukalumuna hashi heswe paraisu haze muhakazala too ni atu apema waze makawayila Yehova ku miaka ya mutolo.
Kuhitulula
Kuchi Wanangana wa Zambi muukapwisa jina lia Zambi lisandu?
Mumu liaka twatamba kupwa ni shindakenyo ngwetu, Wanangana wa Zambi muukamanununa yilakenyo yeswe twakutanga mu Mbimbiliya?
Ha yuma yeswe yipema yize Wanangana wa Zambi muukaneha, chuma chika chize wakushimbwila chinji?
HENGWOLA NAWA
Nyingika yize Armagedone yinalumbunuka.
Tanga yuma yize muyikalingiwa ha 1.000 ka miaka ni ha kusula cha kuyula cha Yesu.
“Yika Muyikalingiwa ha Tangwa lia Usopeso?” (Kaposhi wa Kutalila 1 wa Setembro, 2012)
Tala chize asoko mahasa kupukuna hakutwala ku yiwape yize Wanangana wa Zambi muukaneha.
Ha lusango wakwamba ngwo, “Napwile ni Yihula Yinji Yize te Yakungupinjisa,” nyingika chize umwe lunga mukwa-mafwefwe awanyine yuma yize te akufupa.
“Mbimbiliya Yakwalumuna Mwono wa Atu” (Kaposhi wa Kutalila 1 wa Janeiro, 2012)