Annou loue Non Zeova ansanm

“O glorifye Zeova avek mwan, e annou loue son non ansanm.”—PSONM 34:3.

 1. Ki sa bon legzanp Zezi ti kite pandan son minister lo later?

SA ZOUR swar le 14 Nizan, lannen 33 N.L., Zezi ek son bann zapot ti sant bann louanz pour Zeova dan en lasanm anler lo letaz dan en lakaz Zerizalenm. (Matye 26:30) Sa ti dernyen fwa ki Zezi ti pou fer sa avek son bann zapot. Sepandan, ti lozik ki i ti pou termin sa renyon avek son bann disip dan sa fason. Depi okonmansman son minister lo later ziska lafen, Zezi ti loue son Papa avek devouman e fer dimoun konn Son non. (Matye 4:10; 6:9; 22:37, 38; Zan 12:28; 17:6) Anfet, i ti repet sa lenvitasyon ranpli avek lafeksyon ki sa psalmis ti fer: “O glorifye Zeova avek mwan, zot lepep, e annou loue son non ansanm.” (Psonm 34:3) Pa sa i en bon legzanp pour nou tou swiv!

2, 3. (a) Ki mannyer nou konnen ki Psonm 34 i annan en sinifikasyon profetik? (b) Kwa ki pou ganny egzaminen dan sa lartik ek lartik swivan?

² Detrwa er-d-tan apre ki zot ti’n sant bann louanz ansanm avek Zezi, zapot Zan ti vwar en lot levennman tre diferan. I ti vwar son Met ek de kriminel ganny met amor lo poto. I ti vwar bann solda Romen kas lipye sa de kriminel pour fer zot mor pli vit. Sepandan, Zan ti dir ki zot pa ti kas lipye Zezi. Kan bann solda ti vin kot Zezi i ti’n fini mor. Dan son Levanzil, Zan ti eksplike ki sa ki i ti vwar, ti pe akonpli en lot bout sa profesi dan Psonm 34 ki dir: “Okenn son lezo pa pou ganny kraze.”—Zan 19:32-36; Psonm 34:20, Septant.

³ Psonm 34 i kontyen lezot pwen enteresan pour bann Kretyen. Alor, dan sa lartik ek lartik swivan, nou pou revwar dan ki bann sirkonstans David ti ekrir sa psonm e apre nou pou egzamin konteni ankourazan sa psonm li menm.

David ti sove akoz Sail

 4. (a) Akoz David ti ganny apwente konman fitir lerwa Izrael? (b) Akoz Sail ti arive “devlop en gran lanmour” pour David?

⁴ Kan David ti zenn, Sail ti lerwa dan Izrael. Sepandan, Sail akoz son dezobeisans ti perdi faver Zeova. Pour sa rezon, profet Samyel ti dir li: “Ozordi Zeova in aras ou sa drwa konman lerwa pour diriz Izrael, e sertennman i pou donn li avek enn ou konpanyon ki pli meyer ki ou.” (1 Samyel 15:28) Plitar, Zeova ti demann Samyel pour apwent David, sa pli zenn garson Zese, pour vin sa lot lerwa Izrael. Vi ki i ti nepli pe resevwar lespri Bondye, Lerwa Sail ti dan en move limer. David en bon mizisyen, ti ganny anmennen Gibea pour vin serviter lerwa. Lanmizik ki David ti zwe ti soulaz Sail, ki ti “devlop en gran lanmour pour li.”—1 Samyel 16:11, 13, 21, 23.

 5. Akoz latitid Sail anver David ti sanze e ki sa ti obliz David pour fer?

⁵ Avek letan, Zeova ti montre ki i ti avek David. I ti ed li pour konkerir sa zean Filisten Golyat e siport li kan i ti retourn Izrael pour ganny onore pour son talan ki i ti annan konman en bon gerye. Sepandan, bann benediksyon ki David ti gannyen sorti kot Zeova ti fer Sail zalou e i ti devlop en laenn pour David. De fwa pandan ki David ti pe zwe larp devan Sail, sa lerwa ti anvoy son lans lo li avek tou son lafors. Tou le de fwa David ti kapab say sa lans. Kan Sail ti fer son trwazyenm lesey pour touy li, David ti realize ki i ti bezwen taye pour kapab sov son lavi. Avek letan akoz zefor Sail pour atrap li e touy li, David ti determinen pour al rod refiz an deor teritwar Izrael.—1 Samyel 18:11; 19:9, 10.

 6. Akoz Sail ti donn lord pour touy tou zabitan lavil Nob?

⁶ Lo son semen ler i ti pe al ver frontyer teritwar Izrael, David ti aret dan lavil Nob sa landrwa kot tabernak Zeova ti sitye. Aparaman kan David ti sove i ti ganny akonpannyen par en group zennonm e David ti rod keksoz pour bwar e manze pour zot e osi pour li. Sail ti aprann ki gran pret ti’n donn David ek son bann zonm en pe manze ek sa sab ki David ti pran avek Golyat apre ki i ti’n mor. Dan son lakoler Sail ti fer touy tou zabitan sa lavil enkli sa 85 pret.—1 Samyel 21:1, 2; 22:12, 13, 18, 19; Matye 12:3, 4.

Mank Lanmor ankor enn Fwa

 7. Akoz lavil Gat pa ti en landrwa an sekirite pour David al kasyet?

⁷ Depi lavil Nob, David ti sov en distans 40 kilomet was dan teritwar Filisten. I ti rod refiz avek Lerwa Akis dan lavil Gat, lavil kot Golyat ti ne. Petet David ti mazinen ki lavil Gat ti sa dernyen landrwa kot Sail ti pou mazinen vin rod li. Pa bokou letan apre, bann serviter lerwa Gat ti rekonnet David. Kan David ti’n tande ki zot in remark li, “i ti vreman per akoz Akis lerwa Gat.”—1 Samyel 21:10-12.

 8. (a) Ki Psonm 56 i dir nou konsernan leksperyans David dan lavil Gat? (b) Ki mannyer David ti ganny en pti sans pour sov son lavi?

⁸ Apre bann Filisten ti kaptir David. I probab ki ti sa moman ki David ti konpoz sa psonm tousan kot i ti sipliy Zeova: “ Met mon larm dan ou boutey lapo.” (Psonm 56:8 ek pti lentrodiksyon) I ti eksprim son konfyans ki Zeova pa pou oubliy son soufrans me avek lanmour i pou pran swen avek li e protez li. David ti osi mazin en plan pour tronp Lerwa Filisten. I ti zwe fou. Kan Lerwa Akis ti vwar sa, i ti reprimann son bann serviter akoz zot in anmenn en zonm “fou” devan li. I kler ki Zeova ti beni plan David. David ti ganny anmennen an deor lavil, e pour ankor enn fwa i ti ganny en lot pti sans pour sov son lavi.—1 Samyel 21:13-15.

9, 10. Pour ki rezon David ti ekrir Psonm 34, e ki David ti kapab pe mazinen ler i ti pe konpoz sa psonm?

⁹ Labib pa dir nou si bann ki ti pe protez David ti sov ansanm avek li dan lavil Gat oubyen si zot ti protez li dan bann Lavil pros avek Izrael. Antouleka kan David ti rakont zot ki mannyer Zeova ti sov son lavi ankor enn fwa, zot ti bezwen dan lazwa pour retrouv kanmarad. Psonm 34 i baze lo sa levennman parey sa pti lentrodiksyon i montre. Dan set premye verse sa psonm, David i loue Bondye ki’n delivre li e envit bann ki pe protez li pour zwenn avek li pour loue Zeova konman Gran Sover son pep.—Psonm 34:3, 4, 7.

¹⁰ David avek son bann zonm ti trouv proteksyon dan en kavern Adoulam dan rezyon montanny an Izrael apepre 15 kilomet les avek lavil Gat. Bann Izraelit ki pa ti satisfe avek bann kondisyon anba renny Lerwa Sail ti konmans vin zwenn ansanm avek zot dan sa landrwa. (1 Samyel 22:1, 2) Kan David ti konpoz bann parol sa Psonm 34:8-22, i kapab i ti pe mazin sa bann Izraelit. Bann rapel dan sa bann verse i osi enportan pour nou ozordi, e nou pou sertennman retir byenfe par en diskisyon detaye sa zoli psonm.

Eski Ou pli gran Dezir i parey avek sa ki pour David?

11, 12. Ki rezon nou annan pour loue Zeova konstaman?

¹¹ “Mon pou beni Zeova toultan; son louanz pou dan mon labous konstaman.” (Psonm 34:1) Par viv parey en dimoun rezete, David ti bezwen annan bokou lenkyetid lo son bezwen sak zour, me parey sa bann parol i montre son bann lenkyetid sak zour pa ti anpes li reste determinen pour loue Zeova. Pa sa i en bon legzanp pour nou kan nou fer fas avek bann leprev! Ki swa nou kot lekol, dan travay, avek bann zanmi Kretyen oubyen dan predikasyon, nou pli gran dezir i devret pour loue Zeova. Zis mazin sa kantite rezon nou annan pour fer sa! Par egzanp, nou pa pou zanmen fini dekouver e apresye bann travay merveye dan kreasyon Zeova. Be zis analiz sa ki i’n akonpli par mwayen son lorganizasyon ki lo later! Menm si zot enparfe, Zeova in souvannfwa servi bann imen fidel dan nou letan. Ki mannyer travay Zeova an rapor avek son kreasyon ek son lorganizasyon lo later i diferan avek travay bann zonm ki ganny admire en kantite par sa lemonn? Eski ou pa dakor avek David ki ti osi ekrir: “Napa personn parey ou parmi bann bondye, O Zeova, ni okenn travay parey sa ki pour ou”?—Psonm 86:8.

¹² Parey David sa i pous nou pour loue Zeova konstaman akoz son bann travay enpresyonan. Deplis nou eksite pour konnen ki Rwayonm Bondye i aprezan dan lanmen zeritye permanan David, Zezi kri. (Revelasyon 11:15) Sa i vedir lafen sa sistenm pe aprose e lavi eternel sa sis bilyon imen i an danze. Zanmen oparavan i annan en sitan gran bezwen pour koz konsernan Rwayonm Bondye e ki i pou fer byento pour limanite e ed zot pour loue Zeova ansanm avek nou. Sirman nou priyorite dan lavi i devret pour servi tou loportinite pour ankouraz lezot pour aksepte sa “Bonn Nouvel” avan ki i tro tar.—Matye 24:14.

13. (a) Dan lekel ki David ti glorifye son lekor e ki kalite dimoun ki ti reazir akoz son latitid? (b) Ki mannyer bann ki annan limilite pe ganny atire ver kongregasyon Kretyen ozordi?

¹³ “Mon pou vant mon lekor dan Zeova; bann dimoun ki annan limilite pou tande e zot pou zwaye.” (Psonm 34:2) David pa ti glorifye son lekor akoz okenn keksoz ki i ti’n akonpli. Par egzanp i pa ti fer vantar lo fason ki i ti tronp lerwa Gat. I ti realize ki se Zeova ki ti protez li kan i ti dan lavil Gat e ki i ti kapab sove gras a led Zeova. (Proverb 21:1) Alor David pa ti glorifye son lekor, me plito Zeova. Akoz David ti fer sa, bann dimoun ki ti annan limilite ti anvi vin pros avek Zeova. Zezi osi ti glorifye non Zeova, e sa ti fer bann dimoun ki annan limilite ek bann ki ti oule ganny ansennyen vin pros avek li. Ozordi bann ki annan limilite dan tou nasyon zot anvi zwenn avek kongregasyon bann Kretyen swazir, ki pe ganny dirize par Zezi. (Kolosyen 1:18) Kan bann dimoun ki annan limilite i tann non Bondye pe ganny glorifye par son bann serviter ki annan limilite e tann sa mesaz Labib ki lespri sen i permet zot pour konpran, zot leker i ganny touse.—Zan 6:44; Akt 16:14.

Bann Renyon Kretyen i ranforsi nou Lafwa

14. (a) Eski David ti kontant li pour loue Zeova zis an prive? (b) Ki legzanp Zezi ti kite konsernan renyon pour ador Zeova?

¹⁴ “O glorifye Zeova avek mwan, zot lepep, e annou loue son non ansanm.” (Psonm 34:3) David pa ti kontant li pour loue Zeova zis an prive. Avek lanmour i ti envit son bann konpanyon pour zwenn ansanm avek li pour loue non Bondye. Pareyman, Zezi Kri sa pli Gran David ti kontan pour loue Zeova an piblik—kot sinagog, pandan bann lafet kot tanp Bondye dan Zerizalenm avek son bann disip. (Lik 2:49; 4:16-19; 10:21; Zan 18:20) Pa i en privilez pour swiv legzanp Zezi par loue Zeova dan sak pti lokazyon ki nou gannyen ansanm avek bann konpanyon Kretyen, sirtou la ki sa ‘zour Senyer pe aprose!’—Ebre 10:24, 25.

15. (a) Ki lefe leksperyans David ti annan lo son bann zonm? (b) Ki mannyer nou benefisye ler nou asiste bann renyon?

¹⁵ “Mon’n priy Zeova e i’n reponn mwan, i’n delivre mwan avek tou mon bann lafreyer.” (Psonm 34:4) Sa leksperyans ti enportan pour David. Alors i ti dir: “Sa enn ki aflize in kriye e Zeova li menm in tann li. I’n sov li dan tou son bann soufrans.” (Psonm 34:6) Kan nou zwenn ansanm avek bann frer ek ser Kretyen nou annan en kantite loportinite pour rakont bann leksperyans ankourazan lo ki mannyer Zeova in ed nou pour andir bann sirkonstans difisil. Sa i ranforsi lafwa nou bann frer ek ser Kretyen, zis parey parol ki David ti eksprimen ti ranforsi lafwa son bann konpanyon. Dan ka David son bann konpanyon “in tourn ver [Zeova], avek lazwa lo zot figir e zot pa kapab annan laont lo zot figir.” (Psonm 34:5) Menm si zot ti pe toultan tay Lerwa Sail zot pa ti santi zot onte. Zot ti asire ki Bondye ti pe donn son sipor David e lo zot figir ou ti kapab vwar ki zot ti vreman dan en gran lazwa. Pareyman bann nouvo ek bann vre Kretyen ki lontan dan laverite i tourn ver Zeova pour ganny sipor. Akoz zot in eksperyans son led personnelman, zot lazwa ki evidan lo zot figir i demontre zot determinasyon pour reste fidel.

Montre Rekonnesans pour Led bann Lanz

16. Ki mannyer Zeova in servi son bann lanz pour donn nou sekour?

¹⁶ “Lanz Zeova pe kanpe toultour bann ki annan lakrent pour li, e i sov zot.” (Psonm 34:7) Lefet ki David ti’n ganny sove par Zeova i pa ti krwar sa i en keksoz ki kapab ariv zis avek li. I vre ki David ti’n ganny apwente par Zeova konman fitir lerwa Izrael, me i ti konnen ki Zeova i servi son bann lanz pour vey lo son bann adorater fidel ki swa zot gran oubyen pti. Menm dan nou letan bann vre Kretyen in osi eksperyans proteksyon ki Zeova i fourni. Dan letan Nazi Lalmanny osi byen ki an Angola, Malawi, Mozanbik ek lezot pei, bann lotorite ti organiz bann kanpanny pour elimin tou bann Temwen Zeova. Zot zefor ti anven. Okontrer pep Zeova dan tou pei pe kontinyen ogmante anmezir ki zot glorifye non Bondye ansanm. Akoz? Akoz Zeova i servi son bann lanz pour protez e gid son pep.—Ebre 1:14.

17. Dan ki fason bann lanz Zeova i ed nou?

¹⁷ Anplis, si okenn dimoun i fer tonbe lezot, bann lanz Zeova i kapab aranz sitiasyon pour ki sa dimoun i ganny retire parmi pep Zeova. (Matye 13:41; 18:6, 10) Menm si defwa nou kapab pa apersevwar nanryen, bann lanz i retir bann lobstak ki kapab en baryer pour nou servis pour Bondye. Zot protez nou kont bann keksoz ki kapab vin en danze pour nou relasyon avek Zeova. Sa ki pli enportan ankor, zot gid nou dan sa travay pour anons “levanzil eternel” avek tou imen, enkli bann landrwa kot sa travay predikasyon pe ganny fer dan bann sirkonstans danzere. (Revelasyon 14:6) Laprev ki bann lanz i donn zot led i souvan ganny rakonte dan bann piblikasyon baze lo Labib pibliye par Temwen Zeova.a I telman annan en kantite sa bann leksperyans ki nou pa kapab dir zot in arive par kwensidans.

18. (a) Kwa ki neseser pour nou benefisye avek led bann lanz? (b) Ki nou pou egzaminen dan lartik swivan?

¹⁸ Pour kontinyen benefisye avek gidans ek proteksyon bann lanz, nou devret kontinyen glorifye non Bondye malgre lopozisyon. Rapel byen, lanz Bondye pe kanpe zis “toultour bann ki annan lakrent pour [Zeova].” Ki sa i enplike? Kwa sa lakrent pour Bondye e konman nou kapab devlop li? Akoz en Bondye lanmour i oule nou annan lakrent pour li? Nou pou diskit lo sa bann kestyon dan lartik swivan.

[Not anba lo paz]

Ki ou pou reponn?

• Ki bann leprev David ti andire konman en zennonm?

• Parey David, kwa ki nou priyorite?

• Ki mannyer nou konsider bann renyon Kretyen?

• Ki mannyer Zeova i servi son bann lanz pour ed nou?

[Map lo paz 25]

(For fully formatted text, see publication)

Rama

Gat

Ziklag

Gibea

Zerizalenm

Adoulam

Keyla

Ebronn

Zip

Ores

Maon

Nob

Betleenm

Enn-gedi

Karmel

Lanmer Sale

[Credit line]

Map: I baze lo map kopirayt par Pictorial Archive (Near Eastern History) Est. and Survey of Israel

[Portre lo paz 25]

Menm si i ti viv son lavi an tayan, David ti kontinyen glorifye non Zeova