Montre Labonte Leker Anver Bann Ki Dan Bezwen

“Demontre kanmarad labonte leker.”—ZEKARYA 7:9.

1, 2. (a) Akoz nou devret demontre labonte leker? (b) Ki kestyon nou pou egzaminen?

PAROL Zeova i ankouraz nou pour kontan “labonte leker.” (Mika 6:8, not anba lo paz) I osi donn nou rezon akoz nou devret fer sa. Enn parmi sa bann rezon se ki “en zonm ki annan labonte leker pe fer dibyen son prop nanm.” (Proverb 11:17) Pa sa i vre! Kan nou demontre labonte leker, oubyen lanmour fidel, sa i form en relasyon pros e dirab avek lezot. An rezilta, nou pou ganny bann zanmi fidel—en rekonpans ki vreman presye!—Proverb 18:24.

² Deplis, Labib i dir nou: “Sa ki resers ladrwatir ek labonte leker pou trouv lavi.” (Proverb 21:21) Wi, kan nou resers labonte leker, i pou fer Bondye kontan nou e i pou donn nou loportinite pour rezwir bann fitir benediksyon, ki enkli lavi eternel. Me ki mannyer nou kapab montre labonte leker? Avek lekel ki nou devret ofer li? Eski labonte leker i diferan avek sa pitye ki dimoun i normalman annan pour lezot oubyen avek labonte an zeneral?

Pitye ek Labonte Leker

 3. Konman ki labonte leker ek pitye i diferan?

³ Pitye ek labonte leker i diferan dan plizyer fason. Par egzanp, bann dimoun ki pran pitye pour lezot i souvan fer li san ki zot atase personnelman oubyen annan okenn relasyon avek sa bann dimoun ki zot tret byen. Parkont, si nou demontre labonte leker anver en dimoun, nou atase avek sa dimoun. Dan Labib, labonte leker i ganny eksprimen antre dimoun ki ti deza annan en serten relasyon avek kanmarad. (Zenez 20:13; 2 Samyel 3:8; 16:17) Oubyen zot kapab baze lo bann relasyon ki’n ganny formen akoz bann akt labonte leker ki’n ganny demontre avan sa. (Zozye 2:1, 12-14; 1 Samyel 15:6; 2 Samyel 10:1, 2) Pour ilistre sa diferans, annou konpar de legzanp dan Labib, enn konsernan pitye e lot konsernan labonte leker ki’n ganny eksprimen antre imen.

4, 5. Konman ki sa de legzanp biblik ki’n ganny site i montre diferans ki i annan ant pitye ek labonte leker?

⁴ En legzanp pitye i annan pour fer avek en group dimoun, enkli zapot Pol, ki ti’n fer en nofraz. Zot ti al tonm lo zil Malt. (Akt 27:37–28:1) Menm si oparavan bann zabitan Malt ti napa okenn langazman ni okenn relasyon avek sa bann vwayazer ki ti’n retrouv zot la lo sa zil, sa bann zabitan ti byen resevwar sa bann etranze, e “montre zot tre bon” anver zot. (Akt 28:2, 7) Zot lospitalite ti bon, me i ti ganny fer par kwensidans e i ti ganny demontre anver bann etranze. Alors, zot ti senpleman annan pitye.

⁵ Lo lot kote, annou vwar lospitalite ki Lerwa David ti montre anver Mefiboset, garson son zanmi, Yonatann. David ti dir Mefiboset: “Ou pou toultan manz dipen lo mon latab.” David ti eksplik li akoz i ti pe fer sa provizyon, an dizan: “Mon pou vreman demontre labonte leker anver ou akoz ou papa Yonatann.” (2 Samyel 9:6, 7, 13) I apropriye pour refer avek lospitalite permanan David konman en zes labonte leker, non pa senpleman en zes ki i ti fer akoz i ti annan pitye, parski i ti en laprev son fidelite anver en relasyon ki ti’n deza ganny etablir. (1 Samyel 18:3; 20:15, 42) Pareyman, denozour serviter Bondye i annan pitye pour bann imen an zeneral. Me zot kontinyen eksprim labonte leker, oubyen lanmour fidel, anver bann ki zot annan en relasyon avek ki Bondye i aprouve.—Matye 5:45; Galat 6:10.

 6. Ki karakteristik labonte leker ki ganny eksprimen antre imen ki resorti byen dan Parol Bondye?

⁶ Pour idantifye serten lezot karakteristik labonte leker, nou pou egzamin an bref trwa resi biblik ki montre sa kalite. Nou pou remarke dan sa bann legzanp, ki labonte leker ki bann imen i ofer i (1) ganny eksprimen par bann aksyon spesifik, (2) i ganny ofer volonterman, e (3) i ganny demontre anver bann ki sirtou dan bezwen. Deplis, sa bann resi i montre konman nou kapab demontre labonte leker denozour.

En Papa i montre Labonte Leker

 7. Ki serviter Abraam ti dir Betouel ek Labann, e ki topik sa serviter ti leve?

⁷ Zenez 24:28-67 i rakont larestan zistwar serviter Abraam, ki ti ganny mansyonnen dan lartik presedan. Apre ki i ti’n rankontre Rebeka, i ti ganny envite dan lakaz son papa, Betouel. (Verse 28-32) Laba, sa serviter ti eksplike an detay ki i ti pe rod en madanm pour garson Abraam. (Verse 33-47) I ti fer resorti ki i ti konsider sa sikse ki i ti’n gannyen ziska prezan konman en siny ki sorti kot Zeova, “ki ti’n gid mwan dan sa vre semen pour pran fiy frer mon met pour son garson.” (Verse 48) San dout, sa serviter ti swete ki Betouel ek son garson Labann ti pou konvenki ki Zeova ti par deryer sa misyon, apre ki i ti’n rakont sa lensidan avek santiman. Finalman, sa serviter ti dir: “Si zot pe vreman demontre labonte leker ek konfyans anver mon met, dir mwan; me si non, dir mwan, pour ki mon ava tourn swa adrwat oubyen agos.”—Verse 49.

 8. Ki reaksyon Betouel vizavi sa sitiasyon ki ti enplik Rebeka?

⁸ Zeova ti’n fini demontre labonte leker anver Abraam. (Zenez 24:12, 14, 27) Eski Betouel ti pou pare pour fer parey par les Rebeka al avek serviter Abraam? Eski sa labonte leker ki Bondye ti’n demontre ti pou ganny konplemante par labonte leker demontre par zonm? Oubyen eski sa gran vwayaz ki sa serviter ti’n fer ti pou anven? I ti bezwen vreman rekonfortan pour serviter Abraam tann Labann ek Betouel dir: “Sa keksoz i sorti kot Zeova.” (Verse 50) Zot ti rekonnet lanmen Zeova dan sa zafer e deswit zot ti aksepte son desizyon. Apre, Betouel ti eksprim son labonte leker an azoutan: “La Rebeka devan ou. Pran li e ale, e ki i vin madanm garson ou met, zis parey Zeova in dir.” (Verse 51) Rebeka ti volonterman akonpanny serviter Abraam, e pa bokou letan apre, i ti vin madanm Izaak ki i ti byen kontan.—Verse 49, 52-58, 67.

Labonte Leker demontre par en Garson

9, 10. (a) Ki Zakob ti demann son garson Zozef pour fer pour li? (b) Konman ki Zozef ti montre labonte leker anver son papa?

⁹ Pti zanfan Abraam, Zakob, ti osi resevwar labonte leker. Parey Zenez sapit 47 i rakonte, Zakob ti pe viv an Lezip sa letan, e “letan ti aprose pour [li] mor.” (Verse 27-29) I ti pe trakase akoz i ti pe al mor an deor sa pei ki Bondye ti’n promet Abraam. (Zenez 15:18; 35:10, 12; 49:29-32) Zakob pa ti anvi ganny antere Lezip, alors i ti fer laranzman pour son lekor ganny transporte dan pei Kanaan. Lekel ki ti pou dan en pli bon pozisyon pour fer sir ki son swe i ganny realize ki son garson byen plase, Zozef ?

¹⁰ Sa resi i dir: “Alor [Zakob] ti apel son garson Zozef e dir li: ‘Si, aprezan, mon’n trouv faver dan ou lizye, . . . ou devret demontre labonte leker ek konfyans dan mwan. (Silvouple, pa anter mwan Lezip.) E mon bezwen repoz avek mon bann papa, e ou bezwen sorti avek mwan Lezip e anter mwan dan zot latonm.’ ” (Zenez 47:29, 30) Zozef ti promet pour respekte son demann, e en pti pe letan apre Zakob ti mor. Zozef ek lezot garson Zakob ti anmenn son lekor “dan pei Kanaan e anter li dan kavern laplenn Makpela, laplenn ki Abraam ti’n aste.” (Zenez 50:5-8, 12-14) Dan sa fason, Zozef ti demontre labonte leker anver son papa.

En Belfiy i demontre Labonte Leker

11, 12. (a) Ki mannyer Rit ti montre labonte leker anver Naomi? (b) Dan ki fason ki Rit ti demontre labonte leker pli byen “dezyenm fwa” ki “premye fwa”?

¹¹ Liv Rit i rakonte konman ki Naomi, ki ti en vev, ti resevwar labonte leker avek son belfiy Rit, ki ti en Moabit e osi en vev. Kan Naomi ti deside pour retourn Betleenm an Zida, Rit ti demontre labonte leker ek determinasyon, an dizan: “Kot ou ale mon pou ale, e kot ou pas lannwit mon pou pas lannwit. Ou pep pou vin mon pep, e ou Bondye mon Bondye.” (Rit 1:16) Plitar, Rit ti eksprim son labonte leker kan i ti endike ki i pare pour marye avek en fanmiy pli aze Naomi, Boaz.a (Deterononm 25:5, 6; Rit 3:6-9) Boaz ti dir avek Rit: “Ou’n demontre ou labonte leker pli byen dezyenm fwa ki premye fwa, dan le sans ki ou pa’n tay deryer bann zenn zan ki swa zot senp oubyen ris.”—Rit 3:10.

¹² “Premye fwa” ki Rit ti demontre son labonte leker i letan i ti kit son bann dimoun e reste atase avek Naomi. (Rit 1:14; 2:11) Menm sa akt labonte leker ti ganny depase par sa enn ki i ti demontre “dezyenm fwa”—kan Rit ti pare pour marye avek Boaz. Aprezan, Rit ti pou kapab fourni en eritye pour Naomi, ki ti’n depas laz pour ganny zanfan. Rit ti marye e apre kan i ti donn nesans, bann madanm an Betleenm ti kriye: “En garson in ne pour Naomi.” (Rit 4:14, 17) Rit ti vreman “en fanm ekselan,” ki ti ganny rekonpanse avek Zeova par sa privilez merveye pour vin en zanset Zezi Kri.—Rit 2:12; 3:11; 4:18-22; Matye 1:1, 5, 6.

Eksprimen par Aksyon

13. Konman ki Betouel, Zozef, ek Rit ti eksprim zot labonte leker?

¹³ Eski ou’n remarke konman ki Betouel, Zozef, ek Rit ti eksprim zot labonte leker? Zot pa ti fer li senpleman par bann bon parol me par bann aksyon spesifik. Betouel pa ti zis dir, “La Rebeka” me i ti vreman “anvoy Rebeka.” (Zenez 24:51, 59) Zozef pa ti senpleman dir, “Sa ki ou’n dir, mon pou fer” me li ek son bann frer ti fer “egzakteman parey [Zakob] ti’n demann zot.” (Zenez 47:30; 50:12, 13) Rit pa ti zis dir, “Kot ou ale mon pou ale” me i ti kit son bann dimoun e akonpanny Naomi, ki fer ki “zot tou le de zot ti kontinyen zot semen ziska ki zot ti ariv Betleenm.” (Rit 1:16, 19) An Zida, ankor Rit ti “fer tou sa ki son belmer ti’n demann li pour fer.” (Rit 3:6) Wi, labonte leker Rit, parey pour lezot, ti ganny eksprimen par aksyon.

14. (a) Konman ki bann serviter Bondye denozour i demontre zot labonte leker par aksyon? (b) Eski ou konn okenn keksoz ki bann Kretyen dan ou rezyon i fer pour eksprim zot labonte leker?

¹⁴ I rekonfortan pour vwar konman ki bann serviter Bondye denozour pe kontinyen eksprim zot labonte leker par bann aksyon. Par egzanp, mazin bann ki pe konstaman soutenir emosyonnelman zot bann konpanyon Kretyen ki pli feb, ki dan depresyon, oubyen ki pe soufer en kantite. (Proverb 12:25) Oubyen mazin sa kantite Temwen Zeova ki toultan anmenn bann aze kot Lasal Rwayonm sak semenn pour asiste renyon kongregasyon. Anna, ki aze 82 an e ki soufer avek arthritis, i eksprim santiman bokou lezot kan i dir: “Ganny anmennen dan tou bann renyon i en benediksyon sorti kot Zeova. Mon remersye li ofon mon leker pour donn mwan sa bann frer ek ser ki ranpli avek lanmour.” Eski ou osi ou pe kontribye dan sa domenn dan ou kongregasyon? (1 Zan 3:17, 18) Si ou pe fer li, asire ki ou labonte leker i vreman ganny apresye.

Ganny demontre volonterman

15. Ki sa lot karakteristik labonte leker ki ganny resorti dan sa trwa resi biblik ki nou’n vwar?

¹⁵ Sa bann resi biblik ki nou’n vwar i osi montre ki labonte leker i ganny ofer libreman e volonterman, pa akoz nou ganny forse pour fer li. Betouel ti volonterman korpere avek serviter Abraam, e Rebeka osi ti fer parey. (Zenez 24:51, 58) Zozef ti demontre son labonte leker san ki lezot ti bezwen ankouraz li pour fer sa. (Zenez 50:4, 5) Rit “ti persiste pour al avek [Naomi].” (Rit 1:18) Kan Naomi ti sizer avek Rit pour apros Boaz, labonte leker ti pous sa Moabit pour dir: “Tou sa ki ou dir mwan, mon pou fer.”—Rit 3:1-5.

16, 17. Kwa ki fer labonte leker Betouel, Zozef ek Rit vreman remarkab, e kwa ki ti pous zot pour demontre sa kalite?

¹⁶ Labonte leker ki Betouel, Zozef, ek Rit ti demontre i vreman remarkab akoz Abraam, Zakob, ek Naomi pa ti dan en pozisyon pour met presyon lo zot. Apre tou, ti napa okenn lalwa ki ti fer Betouel oblize donn son fiy. I ti kapab fasilman dir avek serviter Abraam: ‘Non, mon pa anvi ki mon fiy travayan i al reste lwen avek mwan.’ (Zenez 24:18-20) Pareyman, Zozef ti lib pour deside si i pou respekte demann son papa ou non, parski Zakob ti pou’n mor e pa ti pou kapab demann li pour gard son parol. Naomi li menm ti endike ki Rit ti lib pour reste an Moab. (Rit 1:8) Rit osi ti kapab marye avek enn sa “bann zenn zan” olye avek Boaz ki ti avanse dan laz.

¹⁷ Betouel, Zozef, ek Rit ti demontre labonte leker volonterman; zot ti ganny motive dan zot leker pour fer li. Zot ti santi en lobligasyon moral pour demontre sa kalite anver bann ki zot ti annan en relasyon avek, zis parey Lerwa David ti santi li oblize pour demontre labonte leker anver Mefiboset.

18. (a) Avek ki latitid bann ansyen i “pran byen swen troupo”? (b) Konman ki en ansyen ti eksprim son santiman vizavi ed bann konpanyon Kretyen?

¹⁸ Labonte leker i ankor touzour en mark pep Bondye, enkli bann zonm ki pran swen avek troupo Bondye. (Psonm 110:3; 1 Tesalonisyen 5:12) Sa bann ansyen oubyen sirveyan i santi en responsabilite lo zot par pour azir an akor avek sa konfyans ki’n ganny plase dan zot ler zot ti ganny apwente. (Akt 20:28) Kantmenm sa, zot travay sirveyans ek lezot akt labonte leker ki zot fer pour kongregasyon pa ganny fer “kontre-ker me avek bonn volonte.” (1 Pyer 5:2) Bann ansyen i pran swen avek troupo akoz zot annan sa responsabilite, me osi sa dezir pour fer li. Zot eksprim labonte leker anver bann mouton Kris akoz zot devret fer li me osi akoz zot anvi fer li. (Zan 21:15-17) En ansyen i dir: “Mon kontan vizit bann frer ek ser se zot oubyen telefonn zot senpleman pour fer zot konnen ki mon ti pe mazin zot.” “Ed bann frer ek ser i en gran sours lazwa ek satisfaksyon pour mwan!” Bann ansyen partou ki pran aker lentere lezot i senserman partaz sa menm pwenn-vi.

Demontre Labonte Leker anver bann ki dan Bezwen

19. Ki fe konsernan labonte leker ki ganny aksantye par sa bann resi biblik ki nou’n diskite dan sa lartik?

¹⁹ Bann resi biblik ki nou’n diskite i osi met lanfaz lo lefe ki labonte leker i devret ganny demontre anver bann ki dan en bezwen ki zot menm zot pa kapab ranpli. Pour ki son laliny desandans i kontinyen, Abraam ti bezwen korperasyon Betouel. Pour transport son lekor an Kanaan, Zakob ti bezwen led Zozef. E pour prodwir en eritye, Naomi ti bezwen led Rit. Tou le trwa, Abraam, Zakob, ek Naomi pa ti kapab ranpli sa bann bezwen san led lezot. Pareyman, denozour labonte leker i devret ganny demontre sirtou anver bann ki dan bezwen. (Proverb 19:17) Nou devret imit patrias Zob, ki ti donn son latansyon “sa ki pe soufer ki pe kriy osekour, sa ki napa papa e sa ki napa personn pour vin ed li” e osi “sa enn ki pe al mor.” Zob ti osi “fer leker en vev kontan” e i ti ‘vin lizye pour sa ki aveg e lipye pour sa ki bwate.’—Zob 29:12-15.

20, 21. Nou bezwen eksprim nou labonte leker anver lekel, e ki sakenn antre nou i devret determinen pour fer?

²⁰ Anfet, i annan ‘bann ki pe soufer e ki pe kriy osekour’ dan tou kongregasyon Kretyen. Sa i kapab akoz bann fakter parey lasolitid, dekourazman, santiman ki nou pa vo nanryen, dezapwentman avek lezot, en maladi grav, oubyen lanmor en dimoun ki nou ti kontan. Nenport ki soufrans zot ladan, nou bann konpanyon ki nou kontan i annan bann bezwen ki nou kapab e devret konble par eksprim nou labonte leker volonterman e kontinyelman.—1 Tesalonisyen 5:14.

²¹ Alor, annou kontinyen imit Zeova, ki “ris an labonte leker.” (Egzod 34:6; Efezyen 5:1) Nou kapab fer sa par volonterman pran bann aksyon spesifik, sirtou an faver bann ki dan bezwen. E sirman nou pou onor Zeova e eksperyans gran lazwa anmenmtan ki nou “demontre kanmarad labonte leker.”—Zekarya 7:9.

[Not anba lo paz]

Konman ou pou reponn?

• Konman ki labonte leker ek pitye i diferan?

• Konman ki Betouel, Zozef, ek Rit ti demontre labonte leker?

• Avek ki latitid nou devret demontre labonte leker?

• Nou bezwen eksprim nou labonte leker anver lekel?

[Portre lo paz 15]

Konman ki Betouel ti demontre labonte leker?

[Portre lo paz 17]

Lanmour fidel Rit ti en benediksyon pour Naomi

[Portre lo paz 19]

Nou demontre labonte leker volonterman, par bann aksyon spesifik, e anver bann ki dan bezwen