Sa Kongregasyon ki loue Zeova

“Mon pou anons [ou non] parmi mon bann frer, [pour] tou sa ki ou’n fer mon pou rann ou glwar dan zot lasanble.”—EBRE 2:12.

1, 2. Ki byenfe nou kapab gannyen avek kongregasyon, e ki premye rol kongregasyon i zwe?

TOUDILON listwar imen, dimoun in ganny bon lasosyasyon ek sekirite dan kad lafanmiy. Me Labib i koz lo en lot group kot en kantite dimoun dan lemonn antye ozordi pe rezwir sa lasosyasyon ek sekirite ki eksepsyonnel. Sa i dan kongregasyon Kretyen. Serten i annan en fanmiy ki pros avek zot e ki siport zot, pour lezot i pa leka, selman nou tou nou kapab e devret apresye sa ki Bondye in fer pour nou atraver kongregasyon. Byensir, si ou deza pe asosye avek en kongregasyon Temwen Zeova, ou kapab resanti ki sa vre lanmitye i egziste dan kongregasyon e ki ou santi ou an sekirite.

² Kongregasyon pa zis en group dimoun ki zwenn tanzantan. I pa en lasosyasyon dan kominote oubyen en klib kot dimoun ki annan menm lorizin oubyen lentere, parey en pastan oubyen sport, i pas letan ansanm. Plito, kongregasyon in ganny met an plas premyerman pour loue Bondye Zeova. Sa in leka pour bokou letan parey liv Psonm i demontre. Dan Psonm 35:18 nou lir: “Mon oule loue ou dan sa gran lasanble; Mon pou loue ou parmi en pep ki annan bokou dimoun.” Pareyman, dan Psonm 107:31, 32 i ankouraz nou: “Lepep, remersye Zeova pour sa labonte leker e pour son bann travay merveye pour bann garson zonm. Loue li bokou dan lasanble lepep.”

 3. Dapre sa ki Pol ti dir, ki litilite kongregasyon?

³ Zapot Pol ti fer resorti en lot rol esansyel ki kongregasyon i annan, ler i ti koz lo “lafanmir Bondye, setadir . . . [“kongregasyon,” NW] Bondye vivan, ki pilye ek sipor laverite.” (1 Timote 3:15) Pol ti pe koz lo ki kongregasyon? Dan ki fason Labib i servi sa mo “kongregasyon”? E ki lefe sa i devret annan lo nou lavi ek nou lespwar pour lavenir? Pour nou konnen, premyerman annou gete ki mannyer sa mo “kongregasyon” i ganny servi dan Parol Bondye.

 4. Ki mannyer sa mo “kongregasyon” i pli souvan ganny servi dan Lekritir Ebre?

⁴ Sa de mo ki souvan ganny tradwi “lasanble” ouswa “kongregasyon” i sorti dan en menm mo Ebre ki vedir “zwenn ansanm” oubyen “rasanble.” (Deterononm 4:10; 9:10) Dan Psonm, i servi sa mo “lasanble”oubyen “kongregasyon” an rapor avek bann lanz ki ti rasanble dan lesyel ouswa menm en group move dimoun. (Psonm 26:5; 89:5-7) Me selman, laplipar-di-tan dan Lekritir Ebre, sa mo i ganny servi pour refer avek bann Izraelit. Bondye ti dir ki desandans Zakob ti pou vin “en lasanble bann pep,” e se sanmenm ki ti arive. (Zenez 28:3; 35:11; 48:4) Bann Izraelit ti ganny swazir pour vin “kongregasyon Zeova,” “kongregasyon vre Bondye.”—Nonm 20:4; Neemya 13:1; Zozye 8:35; 1 Samyel 17:47; Mika 2:5.

 5. Ki mo Grek ki ganny tradwi “kongregasyon” oubyen “lasanble”? Ki sinifikasyon sa mo i kapab annan?

⁵ Sa menm mo dan langaz Grek, ek·kle·siʹa, i sorti dan de mo Grek, enn i vedir “deor” e lot “apel” en dimoun. Sa mo i kapab ganny servi pour en group ki zwenn pour en rezon ki napa nanryen pour fer avek larelizyon. Par egzanp, sa menm mo Grek i ganny servi dan sa resi kot Demetriis ti koz avek en “lasanble” pour zot persekit Pol dan lavil Efez. (Akt 19:32, 39, 41) Me an zeneral, Labib i servi sa mo pour refer avek kongregasyon Kretyen. Dan serten tradiksyon Labib, i ganny tradwi “legliz,” me The Imperial Bible-Dictionary i mansyonnen ki i “pa ti zanmen reprezant sa batiman kot bann Kretyen ti rasanble pour ador Bondye piblikman.” Parkont i enteresan pour note ki dan Lekritir Grek Kretyen, sa mo ki ganny tradwi swa “kongregasyon,” “lasanble” ouswa menm “legliz” dan Nouvo Testaman i annan omwen kat sinifikasyon diferan.

“Kongregasyon Bondye” —bann Kretyen swazir

 6. Ki David ek Zezi ti fer dan kongregasyon?

⁶ Zapot Pol ti aplik parol David dan Psonm 22:22 lo Zezi kan i ti ekrir: “‘Mon pou anons [ou non] parmi mon bann frer, [pour] tou sa ki ou’n fer mon pou rann ou glwar dan zot lasanble [oubyen “kongregasyon,” NW].’ Pour sa rezon, i ti neseser ki i vin parey son bann frer dan tou fason, pour ki i vin zot Gran-Pret fidel, ranpli avek labonte dan son servis devan Bondye.” (Ebre 2:12, 17) David ti loue Bondye dan kongregasyon ansyen Izrael. (Psonm 40:9) Me ki Pol ti pe sey dir ler i ti dir ki Zezi ti loue Bondye “dan lasanble” ouswa “kongregasyon”? Ki sa kongregasyon ki Zezi ti pe loue Bondye ladan?

 7. Ki sa fason prensipal ki sa mo “kongregasyon” i ganny servi dan Lekritir Grek Kretyen?

⁷ Sa ki nou lir dan Ebre 2:12, 17 i annan en lenportans. I montre ki Zezi ti enkli dan sa lasanble, e ki Kris ti en manm sa kongregasyon kot i ti anons non Bondye parmi son bann frer. Lekel sa bann frer? Zot form parti ‘desandans Abraam,’ bann frer Kris ki’n ganny swazir par lespri sen, oubyen “ki Bondye in apele” pour al dan lesyel. (Ebre 2:16–3:1; Matye 25:40) Alors, fason prensipal ki sa mo “kongregasyon” i ganny servi dan Lekritir Grek, se pour refer avek sa group konpoze avek bann Kretyen swazir ki bann disip Kris. Sa 144,000 Kretyen swazir i form sa “lasanble [oubyen “kongregasyon,” NW] bann garson premye-ne ki’n ganny anrezistre dan lesyel.”—Ebre 12:23.

 8. Dan ki fason Zezi ti anonse davans ki kongregasyon Kretyen ti pe al ganny formen?

⁸ Zezi ti mansyonnen ki “kongregasyon” Kretyen ti pe al ganny formen. Apepre enn an avan son lanmor, Zezi ti dir enn son zapot: “Ou Pyer, e lo sa ros mon pou bati mon [“kongregasyon,” NW] e pisans lanmor pa pou ranport laviktwar kont li.” (Matye 16:18) Pyer ek Pol ti byen konpran ki se Zezi li menm sa ros ki ti’n ganny predir. Pyer ti ekrir ki bann “ros vivan” ki form par sa batiman spirityel ki pe ganny konstri lo sa ros prensipal, setadir Kris, ti “en pep ki pour Bondye, ki i’n swazir pour proklanm bann keksoz merveye” lo sa Enn ki’n apel zot.—1 Pyer 2:4-9; Psonm 118:22; Izai 8:14; 1 Korentyen 10:1-4.

 9. Kan kongregasyon Bondye ti konmans ganny formen?

⁹ Kan sa “pep ki pour Bondye” ti ganny formen konman en kongregasyon Kretyen? Sa ti zour Lapannkot lannen 33 N.L. ler Bondye ti anvoy son lespri sen lo bann disip ki ti rasanble Zerizalenm. Plitar sa zour, Pyer ti donn en diskour enpresyonan avek en group Zwif ek bann ki ti’n konverti dan larelizyon Zwif. En kantite ti trouble en kantite osize lanmor Zezi. Zot ti repantir e zot ti ganny batize. Dapre sa resi, trwa mil ti batize e deswit zot ti konmans form par sa nouvo kongregasyon Bondye ki ti pe kontinyen ogmante. (Akt 2:1-4, 14, 37-47) I ti pe ogmante akoz en pli gran kantite Zwif ek bann ki ti’n konverti ti rekonnet ki nasyon Izrael ti nepli kongregasyon Bondye. Plito, aprezan se sa bann Kretyen swazir ki form Izrael spirityel ouswa “Izrael Bondye” ki ti vin vre kongregasyon Bondye.—Galat 6:16, NW; Akt 20:28.

10. Ki relasyon Zezi i annan avek kongregasyon Bondye?

¹⁰ Labib i souvan fer en diferans ant Zezi ek bann Kretyen swazir, par egzanp Labib i dir, sa “i aplik avek Kris ek [“kongregasyon,” NW].” Zezi i sef sa kongregasyon bann Kretyen swazir. Pol ti ekrir ki Bondye in “etabli li konman pli gran sef lo tou keksoz [kongregasyon], ki son lekor.” (Efezyen 1:22, 23; 5:23, 32; Kolosyen 1:18, 24) Ozordi i reste zis en pti gin zot dan sa kongregasyon bann Kretyen swazir ki ankor lo later. Selman nou kapab asire ki zot Sef, setadir Zezi Kri, i kontan zot. Santiman Zezi Kri anver zot i ganny dekri dan Efezyen 5:25 kot i dir: “Kris in kontan [kongregasyon] e in donn son lavi pour li.” I kontan zot akoz zot byen okipe pe ‘rann glwar Bondye, setadir, toultan loue son non par zot labous,’ parey Zezi ti fer ler i ti lo later.—Ebre 13:15.

‘Kongregasyon’—lezot Fason ki sa Mo i ganny servi

11. Ki sa dezyenm sans ki sa mo ‘kongregasyon’ i annan dan Lekritir Grek Kretyen?

¹¹ Parler, Labib i servi sa mo ‘kongregasyon’ dan en sans pli presi. Dan sa ka, i pa pe refer avek sa 144,000 Kretyen swazir ki form ‘kongregasyon Bondye.’ Par egzanp, Pol ti ekri en group Kretyen: “Viv dan en fason ki ou pa eskandaliz personn ni Zwif, ni Grek, ni personn dan [kongregasyon] Bondye.” (1 Korentyen 10:32) I evidan ki si en Kretyen ti pe viv en move lavi dan ansyen Lavil Korent, sa ti’n kapab fer tonbe serten Kretyen. Me eski i ti pou kapab fer tonbe tou bann Grek, Zwif, oubyen Kretyen swazir depi sa lepok ziska ozordi. I pa fer sans. Pour sa rezon, i paret ki dan sa verse, la ‘kongregasyon Bondye’ pe refer avek bann Kretyen dan en serten lepok. Lo menm laliny, nou kapab dir ki Bondye i gid, ed, oubyen beni kongregasyon setadir tou bann Kretyen ki viv dan en serten lepok, nenport landrwa kot zot reste. Nou osi kapab koz lo lazwa ek lape ki egziste dan kongregasyon Bondye ozordi, setadir parmi tou bann frer ek ser ki lo later ozordi.

12. Ki trwazyenm sans ki sa mo ‘kongregasyon’ i kapab annan dan Labib?

¹² Trwazyenmman, sa mo ‘kongregasyon’ i kapab ganny servi pour refer avek tou bann Kretyen dan en serten rezyon. Nou lir: ‘Sa letan la [kongregasyon] ti pe viv anpe dan Zide antye, dan Galile ek Samari.’ (Akt 9:31) Sa ti en gran rezyon kot ti annan plis ki en group bann Kretyen ki ti zwenn. Me tou sa bann group Kretyen an Zide, Galile ek Samari ti enkli dan sa “kongregasyon” ki sa verse i koz lo la. Ler ou get lakantite ki ti batize zour Lapannkot lannen 33 N.L. e apre sa, i paret ki i ti annan plis ki en group ki ti zwenn regilyerman dan rezyon Zerizalenm. (Akt 2:41, 46, 47; 4:4; 6:1, 7) Erod Agripa 1 ti diriz rezyon Zide ziska son lanmor an 44 N.L., e i evidan dapre sa ki nou lir dan 1 Tesalonisyen 2:14 ki avan lannen 50 N.L. i ti annan en bon pe kongregasyon an Zide sa letan. Alors, ler nou lir ki Erod ti “konmans persekit serten bann manm [kongregasyon],” i kapab pe refer avek plis ki en sel group ki ti reini Zerizalenm.—Akt 12:1.

13. Ki sa katriyenm fason ki Labib i souvan servi sa mo ‘kongregasyon’?

¹³ Katriyenmman, sa mo ‘kongregasyon’ i kapab annan en sans ankor pli presi ki pli souvan ganny servi. Sirtou ler Labib pe refer avek bann Kretyen ki konpoz en sel kongregasyon lokalman, par egzanp ki zwenn dan lakour en dimoun. Pol ti koz lo ‘bann kongregasyon dan Galasi.’ Sa provens dan lanpir Romen ti ase gran, e ti annan plis ki en kongregasyon dan sa rezyon. Pol ti dir ‘bann kongregasyon,’ sa mo ‘bann’ i montre ki sa ti enkli plis ki en kongregasyon, par egzanp dan lavil Antyos, Derb, List ek Ikonyonm. Bann ansyen oubyen sirveyan kalifye ti ganny apwente dan sak kongregasyon. (1 Korentyen 16:1; Galat 1:2; Akt 14:19-23) Dapre Labib, zot tou ti “bann kongregasyon Bondye.”—1 Korentyen 11:16, NW; 2 Tesalonisyen 1:4.

14. Ki konklizyon nou tire lo sa mo ‘kongregasyon’ ler nou egzamin serten verse dan Labib?

¹⁴ Dan serten ka, sa group bann Kretyen ki ti zwenn ti’n bezwen ase pti pti pour ki zot kapab reini dan lakour en dimoun. Toudmenm, sa bann pti group ti ganny apele ‘kongregasyon.’ Nou annan legzanp bann kongregasyon ki ti zwenn dan lakour Akilas ek Prisil, Nenfa ek Filemon. (Romen 16:3-5; Kolosyen 4:15; Filemon 2) Sa i devret ankouraz bann pti kongregasyon ozordi ki zwenn regilyerman, menm parfwa dan lakour en dimoun. Zeova ti aksepte sa bann pti kongregasyon dan premye syek, e i osi leka ozordi. I beni zot avek son lespri sen.

Bann Kongregasyon ki loue Zeova

15. Dan serten kongregasyon premye syek, ki serten Kretyen ti kapab fer gras a lespri sen?

¹⁵ Nou ti vwar pli boner ki Zezi ti akonpli Psonm 22:22, ler i ti loue Bondye dan kongregasyon. (Ebre 2:12) Son bann disip fidel ti bezwen fer parey li. Dan premye syek, bann vre Kretyen ti ganny swazir par lespri sen e zot ti vin bann garson Bondye setadir bann frer Kris. Sa letan, gras a lespri sen, serten ti konmans resevwar bann privilez spesyal, bann don spirityel. Serten sa bann don ti en konnesans oubyen lasazes spesyal, pouvwar pour geri dimoun oubyen profetize, e menm pouvwar pour koz bann langaz ki zot pa ti konnen avan.—1 Korentyen 12:4-11.

16. Ki lobzektif bann don lespri sen ti akonplir?

¹⁶ Konsernan sa don pour koz bann diferan langaz, Pol ti dir: “Mon pou sant avek [sa don lespri sen], e mon pou sant osi avek mon lentelizans.” (1 Korentyen 14:15) I ti vwar lenportans pour lezot konpran sa ki i ti pe dir, dan sa fason zot ti pou benefisye avek son lansennyman. Pol ti oule loue Zeova dan kongregasyon. I ti konsey bann ki ti annan sa bann don lespri sen pour anvi “vin ris dan sa ki fer progrese [kongregasyon],” setadir sa kongregasyon kot zot ti ganny sa don. (1 Korentyen 14:4, 5, 12, 23) I evidan alor ki Pol ti pran en lentere dan sa bann kongregasyon akoz i ti konnen ki dan sak kongregasyon bann Kretyen ti kapab loue Bondye.

17. Ki lasirans nou annan konsernan nou kongregasyon?

¹⁷ Zeova pe kontinyen servi e siport son kongregasyon. I pe beni sa group bann Kretyen swazir lo later ozordi. Ou kapab vwar sa ler ou get lakantite manze spirityel ki pep Bondye i resevwar dan nou letan. (Lik 12:42) Zeova pe beni tou bann frer ek ser dan lemonn antye. I osi beni tou bann kongregasyon lokalman, kot nou loue nou Kreater par nou aksyon e par nou bann larepons ki batir lezot. Dan sa bann kongregasyon, nou resevwar en ledikasyon ek en formasyon pour nou kontinyen loue Zeova menm dan lezot moman ki nou pa vreman dan nou kongregasyon.

18, 19. Ki bann Kretyen fidel i anvi fer dan zot kongregasyon?

¹⁸ Mazin osi konsey ki Pol ti donn bann Kretyen dan kongregasyon Filip, Masedwann, i ti dir: “Mon demande dan mon lapriyer ki . . . zot lavi i ava ranpli avek bann bon kalite ki zis Zezi-Kri i kapab prodwi, pour laglwar [ek louanz] Bondye.” Sa ti pou enkli koz avek lezot, bann ki pa dan kongregasyon, lo zot lafwa dan Zezi e lo zot lespwar merveye. (Filipyen 1:9-11; 3:8-11) Lo menm laliny, Pol ti konsey son bann frer ek ser Kretyen: “Alor, atraver li [Zezi], annou touzour rann glwar Bondye, setadir, annou toultan loue [piblikman] son non par nou labous.”—Ebre 13:15.

¹⁹ Eski i en lazwa pour ou loue Bondye dan kongregasyon parey Zezi ti fer? Eski ou kontan pour servi ou labous pour loue Zeova devan bann ki pa ankor konn e loue Bondye? (Ebre 2:12; Romen 15:9-11) Lo en serten degre, nou larepons i kapab depan lo lafason ki nou vwar rol ki kongregasyon i zwe pour akonpli plan Bondye. Dan lot lartik, nou pou vwar ki mannyer Zeova i diriz e servi nou kongregasyon lokalman e ki rol nou kongregasyon i zwe dan nou lavi ozordi.

Eski ou rapel?

• Ki mannyer ‘kongregasyon Bondye’ ki konpoze avek bann Kretyen swazir ti konmanse?

• Ki trwa lezot fason Labib i servi sa mo ‘kongregasyon’?

• Konsernan kongregasyon, ki David, Zezi ek bann Kretyen dan premye syek ti anvi fer? Ki lefe sa i devret annan lo nou?

[Portre lo paz 9]

Zezi ti fondasyon ki kongregasyon?

[Portre lo paz 10]

Bann group Kretyen ti zwenn ansanm konman bann ‘kongregasyon Bondye’

[Portre lo paz 12]

Parey sa bann Kretyen Benen, nou kapab loue Zeova dan sa lasanble