1 Timoteo
4 Pero, jiñi tʼan tilem bʌ ti Dios jamʌ tsiquil miʼ yʌl chaʼan, ti talto bʌ qʼuin, an muʼ bʌ caj i tʌtsʼob i bʌ* ti jiñi ñopoñel tiʼ caj miʼ ñʌchʼtañob lot bʌ tʼan tac poj tilem bʌ ti Dios yilal yicʼot cʌntesa tac tilem bʌ ti xiba, 2 tiʼ caj jiñi wiñicob poj wem bʌ miʼ pʌsob i bʌ muʼ bʌ i chaʼleñob lot i maʼañix bʌ chuqui miʼ yubiñob i conciencia, lajal bajcheʼ tsiʼ chaʼleyob ti marcar ti ticʌw bʌ fierro. 3 Miʼ mʌctañob jiñi ñujpuñel i miʼ subeñob jiñi lac piʼʌlob chaʼan maʼañic miʼ cʼuxob jiñi bʌlñʌcʼʌl tac tsaʼ bʌ i mele Dios chaʼan jiñi añoʼ bʌ i ñopoñel yicʼot jiñi i cʌñʌyoʼ bʌ ti tsʼʌcʌl jiñi i sujmlel miʼ cʼuxob i miʼ yʌqʼueñob wocolix i yʌlʌ Dios. 4 Come ñoj wen pejtelel chuqui melbil i chaʼan Dios, i maʼañic chuqui yom miʼ pʼajtʌl mi tsaʼ la cʌqʼue wocolix i yʌlʌ cheʼ bʌ mi lac chʼʌm, 5 come jiñi bʌlñʌcʼʌl miʼ sujtel ti chʼujul tiʼ coltaya jiñi i tʼan Dios yicʼot oración.
6 Cheʼ bʌ maʼ wʌqʼuen hermanojob ili ticʼojel tac, mi caj a sujtel ti wem bʌ xʼeʼtel i chaʼan Cristo, tsaʼ bʌ coli yicʼot tsaʼ pʼʌtʼa tiʼ coltaya jiñi tʼan tac chaʼan bʌ ñopoñel yicʼot tiʼ coltaya jiñi wem bʌ cʌntesa tsaʼ bʌ a tsajca ti a xucʼtʌlel. 7 Pero mach a ñʌchʼtan jiñi mach bʌ i sujmic tac muʼ bʌ i yʌjlel maʼañic bʌ miʼ yʌqʼuen i ñuclel Dios, bajcheʼ jiñi muʼ bʌ i yʌlob lac ñaʼob.* Pero chajpan a bʌ chaʼan xucʼul maʼ wajñel ti Dios. 8 Come jiñi ejercicio mucʼʌch i tsʼitaʼ aqʼueñonla lac wenlel, pero jiñi lac xucʼtʌlel ti Dios miʼ yʌqʼueñonla lac wenlel tiʼ pejtelel chuqui mi lac mel, miʼ yʌcʼ chaʼan jiñi lac piʼʌlob miʼ tajob jiñi bendición tac tsaʼ bʌ i yʌlʌ Dios, ti ili ora yicʼot ti talto bʌ qʼuin. 9 Ili tʼan mucʼʌch i mejlel ti ñojpel yicʼot mucʼʌch i mejlel ti chʼʌmol ti ñuc. 10 Jin chaʼan woliyonla ti wen eʼtel yicʼot woli lac chaʼlen wersa, come tsaʼ la cʌcʼʌ lac pijtaya tiʼ tojlel juntiquil cuxul bʌ Dios, Xyaj coltaya i chaʼan majqui jach bʌ lac piʼʌlob, ñumento tiʼ tojlel jiñi xucʼuloʼ bʌ.
11 Chʌn acʼʌ yicʼot pʌsʌ ili mandar tac. 12 Mach a wʌcʼ chaʼan an majqui maʼañic miʼ qʼuelet ti ñuc tiʼ caj chʼiton wiñiquetto. Sujten ti wem bʌ ejemplo tiʼ tojlel jiñi xucʼuloʼ bʌ chaʼan bajcheʼ maʼ chaʼlen tʼan, chaʼan a melbal, a cʼuxbiya, a ñopoñel, a sʌclel. 13 Chʌn pejcan jun ti cʼam bʌ tʼan yaʼ ti congregación, chʌn acʼʌ ticʼojel* yicʼot chaʼlen cʌntesa jinto mij cʼotel. 14 Cʌntan jiñi majtañʌl am bʌ a chaʼan yicʼot tsaʼ bʌ aqʼuentiyet tiʼ coltaya jumpʼejl profecía cheʼ bʌ jiñi junmojt ancianojob tsiʼ yʌcʼʌyob i cʼʌb ti a tojlel. 15 Wen ñaʼtan tac iliyi, acʼʌ a bʌ tiʼ melol iliyi, chaʼan pejtelel lac piʼʌlob jamʌ tsiquil miʼ qʼuelob chaʼan woli a colel tiʼ chaʼan bʌ Dios. 16 Tiʼ pejtelel ora wen qʼuele bajcheʼ yilal jiñi a melbal yicʼot jiñi a cʌntesa. Mach a cʌy a mel iliyi, come cheʼ bajcheʼ jiñi mi caj a coltan a bʌ yicʼot jiñi muʼ bʌ i ñʌchʼtañetob.