I referenciajlel jiñi Jun chaʼan lac tempa bʌ I Subtʼan yicʼot i Melbal jiñi xÑoptʼan
1-7 I CHAʼAN JULIO
ÑUC TAC BɅ I CʼɅJÑIBAL TI BIBLIA | COLOSENSES 1-4
«Laʼ lac choc loqʼuel lac tsucul pusicʼal i laʼ lac xoj jiñi tsijiʼ bʌ»
(Colosenses 3:5-9, I tʼan Dios [ITD]) Jini chaʼan ti junyajlel chocola pejtelel i chaʼan bʌ pañimil am bʌ ti laʼ pusicʼal: laʼ tsʼiʼlel, laʼ bibiʼlel, laʼ jontolil, i colosojlel laʼ pusicʼal, yicʼot i tsʼiʼlel laʼ wut, come lajal i tsʼiʼlel lac wut bajcheʼ i chʼujutesʌntel diosteʼ. 6 Jini chaʼan tal i michʼajel Dios tiʼ tojlel jini muʼ bʌ i ñusañob mandar. 7 Ti yambʌ ora jatetla jaʼel tsaʼ laʼ ñusa Dios cheʼ bʌ tsaʼ ajniyetla ti mulil. 8 Pero wʌle cʌyʌla pejtelel jini: michʼajel, aʼleya, uʼyaj tʼan, jopʼ tʼan, yicʼot bibiʼ tʼan muʼ bʌ i loqʼuel ti laʼ wej. 9 Mach mi laʼ lotin laʼ piʼʌlob, come tsaʼix laʼ choco jini tsucul bʌ laʼ pusicʼal yicʼot i melbal.
w11-S 15/3 9, 10 párr. 12, 13
Laʼ lac pʌs ti lac melbal i yespíritu Dios i mach jiñic i chaʼan bʌ pañimil
12 ¿Muʼ ba c pʌs tic melbal i yespíritu Dios o i chaʼan bʌ pañimil? (Pejcan Colosenses 3:8-10, 13). Muʼ bʌ i coltañonla laj cʌn chuqui ti melbalʌl woli lac pʌs jiñʌch cheʼ mi laj qʼuel bajcheʼ yilalonla cheʼ bʌ mi lac melbentel mach bʌ weñic. ¿Muʼ ba lac pʌs jiñi melbalʌl i chaʼan bʌ ili pañimil? (Gá. 5:19-21). Jumpʼejl ejemplo, ¿chuqui mi lac mel cheʼ bʌ juntiquil hermano o juntiquil hermana maʼañic miʼ ñʌchʼtan chuqui mi la cʌl, miʼ lowonla tiʼ tʼan o miʼ mel mach bʌ weñic ti lac tojlel? Yambʌ baqui yom mi lac wen ñaʼtan bajcheʼ yilal lac melbal jiñʌch ti la cotot, come yaʼʌch baqui mi lac pʌs bajcheʼ ñoj yilalonla. Laʼ laj cʼajtiben lac bʌ: «Ti ili wʌcpʼejl uw ñumen bʌ tilel, ¿tsaʼix ba ñumen qʼuextʌyi c melbal bajcheʼ i chaʼan Cristo o woli ba c chaʼ mel mach bʌ weñic, tajol tic tʼan o tic melbal?».
13 Jiñi chʼujul bʌ espíritu miʼ coltañonla lac jacʼ ili ticʼojel: ‹Chocola jiñi tsucul bʌ laʼ pusicʼal yicʼot i melbal. [...] xojola jiñi tsijiʼ bʌ›. Mi cheʼ mi lac mel bajcheʼ ili mi caj lac ñumen pʌs laj cʼuxbiya yicʼot la cutslel. Cheʼ jaʼel, mi caj lac ñusʌben i mul yambʌlob anquese añʌch chuqui mach bʌ weñic miʼ melob ti lac tojlel. Cheʼ bʌ mi laj qʼuel chaʼan tsaʼ toʼol ticʼlʌntiyonla, mach yomic mi lac tech «tsʼaʼleya, michʼajel, aʼleya, michʼ bʌ tʼan, uʼyaj tʼan». Yom bʌ mi lac mel jiñʌch mi lac ‹pʼuntan lac piʼʌlob› (Ef. 4:31, 32).
(Colosenses 3:10-14, ITD) Tsaʼix laʼ xojo jini tsijiʼ bʌ laʼ pusicʼal tsaʼ bʌ i mele Dios chaʼan mi laʼ qʼuextʌyel majlel tiʼ yejtal Dios yicʼot tsijiʼ bʌ laʼ ñaʼtʌbal. 11 Ti Cristo mach jelchojquic miʼ qʼuejlelob winicob xʼixicob mi griego, mi judío, mi tsepbil i pʌchʌlel, mi mach tsepbilic i pʌchʌlel, mi ñajt chʼoyolob, mi mach yujilic jun, mi an tiʼ yum, o mi maʼanic i yum, pero Cristo i Yumʌch pejtelel winicob yicʼot pejtelel chuqui tac an. 12 Yajcʌbiletla i chaʼan Dios, chʼujuletla, cʼuxbibiletla. Jini chaʼan lʌpʌla tsijiʼ bʌ laʼ pusicʼal yujil bʌ pʼuntaya yicʼot cʼuxbiya. Qʼuele laʼ bʌ ti pecʼ. Yom uts laʼ pusicʼal. Cuchula wocol. 13 Cuchben laʼ bʌ laʼ sajtemal. Ñusʌben laʼ bʌ laʼ mul mi an laʼ contrajintel. Cheʼ bajcheʼ tsiʼ ñusʌbeyetla laʼ mul Cristo, cheʼʌch yom mi laʼ mel jatetla. 14 Jini ñumen yom bʌ jiñʌch cʼuxbiya, come miʼ yʌqʼuetla ti tem ajñel ti jumpʼejl laʼ pusicʼal.
w13-S 15/9 21 párr. 18, 19
¿Tsaʼix ba laj qʼuexta lac melbal?
18 Chaʼan miʼ qʼuextan lac melbal jiñi Biblia, mach cojach yom mi lac pejcan yicʼot mi laj cʌn muʼ bʌ i yʌl. Cabʌl lac piʼʌlob miʼ bixel pejcañob yicʼot i wen cʌñʌyob chuqui miʼ yʌl. Tajol yaʼ ti a subtʼan añʌch a tajayob. Cheʼ jaʼel, an quixtañujob añobix bʌ tiʼ jol jiñi texto tac i mejlel i yʌlob tiʼ bajñelil. Pero jiñi i ñaʼtʌbalob maʼañic miʼ coltañob chaʼan miʼ qʼuextañob i pensar yicʼot bajcheʼ yilalob. ¿Chuquito yom miʼ melob? Chaʼan miʼ tojʼesan lac melbal jiñi i Tʼan Dios, yom mi la cʌcʼ ti ochel ti lac pusicʼal (Gá. 6:6). Jin chaʼan yom mi lac locʼsʌben i yorajlel chaʼan mi lac wen ñaʼtan chuqui woli bʌ laj cʌn majlel. Yom mi laj cʼajtiben lac bʌ: «¿Muʼ ba c ñop chaʼan mach jumpʼejl jach cʌntesʌntel jiñi woli bʌ j cʌn majlel? ¿Muʼ ba j qʼuel chaʼan i sujmlelʌch? Cheʼ jaʼel, ¿muʼ ba j qʼuel bajcheʼ miʼ mejlel j cʼʌn tij cuxtʌlel jiñi ticʼojel tac am bʌ ti Biblia o cojach ba mij qʼuel bajcheʼ miʼ mejlel cʼʌn chaʼan mij cʌntesan yambʌlob? ¿Joñon ba choncol i pejcañon Jehová mi cubin?». Cheʼ mucʼʌch lac wen ñaʼtan ili cʼajtiya tac, jiñi laj cʼuxbiya ti Jehová mi caj i ñumen colel majlel. Cheʼ bʌ miʼ cʼotel ti lac pusicʼal jiñi i Tʼan Dios mi caj i coltañonla chaʼan mi laj qʼuextan majlel lac melbal (Pr. 4:23; Lc. 6:45).
19 Cheʼ mi lac pejcan ti bele ora jiñi i Tʼan Dios yicʼot mi lac wen ñaʼtan, mi caj i coltañonla chaʼan mi lac jacʼ ili ticʼojel tsaʼ bʌ i yʌlʌ Pablo: ‹Chocola jiñi tsucul bʌ laʼ pusicʼal yicʼot i melbal. [...] xojola jiñi tsijiʼ bʌ laʼ pusicʼal tsaʼ bʌ i mele Dios chaʼan mi laʼ qʼuextʌyel majlel› (Col. 3:9, 10). Cheʼ mi lac wen chʼʌmben i sujm chuqui miʼ cʌntesañonla jiñi Biblia i mi lac pʌs ti lac melbal, mi caj i coltañonla lac xoj jiñi tsijiʼ bʌ lac pusicʼal, i mi caj i cʌntañonla chaʼan maʼañic mi lac yajlel tiʼ yʌc tac Satanás.
Laʼ lac sʌclan ñuc tac bʌ i cʼʌjñibal
(Colosenses 1:13, 14, ITD) Dios tsiʼ locʼsayonla tiʼ yumʌntel icʼchʼipan bʌ pañimil. Tsiʼ yotsayonla tiʼ yumʌntel jini cʼuxbibil bʌ i Yalobil 14 tsaʼ bʌ i yʌcʼʌyonla ti colel cheʼ bʌ tsiʼ ñusʌbeyonla lac mul tiʼ chʼichʼel.
it-2-S 819 párr. 4-6
I Yumʌntel Dios
I «yumʌntel jini cʼuxbibil bʌ i Yalobil». Cheʼ bʌ añix lujumpʼejl qʼuin i letsel Jesús ti panchan, cheʼ ti Pentecostés ti jabil 33, jiñi xcʌntʼañob tsaʼ cʼoti i cʌñob chaʼan Jesús ‹tsaʼix aqʼuenti i ñuclel tiʼ ñoj Dios› come tsaʼix chocbentiyob tilel chʼujul bʌ espíritu jiñi xcʌntʼañob (Hch. 1:8, 9; 2:1-4, 29-33). Cheʼ bajcheʼ ili tsaʼ tejchi ti cʼʌjñel jiñi ‹tsijiʼ bʌ xucʼul bʌ tʼan›. Jiñi xcʌntʼañob tsaʼ ochiyob bajcheʼ chʼujul bʌ i tejclum Dios come jiñʌch tsaʼ bʌ ñaxan yajcʌntiyob chaʼan miʼ majlelob ti panchan i miʼ chaʼleñob yumʌntel (He. 12:22-24; 1 P. 2:9, 10; Gá. 6:16).
Cristo buchul tiʼ ñoj i Tat i jiñʌch i Jol jiñi congregación (Ef. 5:23; He. 1:3; Fil. 2:9-11). Jiñi Tsʼijbujel miʼ yʌl chaʼan Jesús tsaʼ caji i chaʼlen yumʌntel tiʼ tojlel jiñi xcʌntʼañob i chaʼan cheʼ ti Pentecostés ti jabil 33. Cheʼ bʌ jiñi apóstol Pablo tiʼ tsʼijbube jiñi xñoptʼañob añoʼ bʌ ti Colosas, tsiʼ yʌlʌ chaʼan Jesús tsaʼix aqʼuenti jumpʼejl i yumʌntel: «Dios tsiʼ locʼsayonla tiʼ yumʌntel icʼchʼipan bʌ pañimil. Tsiʼ yotsayonla tiʼ yumʌntel jini cʼuxbibil bʌ i Yalobil» (Col. 1:13; laja yicʼot Hch. 17:6, 7).
Cʼʌlʌl cheʼ ti Pentecostés ti jabil 33, yicʼot i coltaya jiñi chʼujul bʌ i yespíritu Dios, jiñi i Yumʌntel Cristo tsaʼ caji i mel i yeʼtel tiʼ tojlel jiñi bombiloʼ bʌ xñoptʼañob tsaʼ bʌ yajcʌntiyob chaʼan miʼ yochelob tiʼ yalobil Dios, ili cʌmbilob jaʼel bajcheʼ chʼujul bʌ Israel (Jn. 3:3, 5, 6). Cheʼ bʌ miʼ yʌqʼuentelob i majtan jiñi bombiloʼ bʌ ti espíritu mach wʌʼix mi caj i chumtʌlob ila ti lum come mi caj i chaʼleñob yumʌntel yicʼot Cristo yaʼ ti panchan (Ap. 5:9, 10).
(Colosenses 2:8, Traducción del Nuevo Mundo [TNM]) Chʌcʌ qʼuele laʼ bʌ chaʼan maʼañic majqui miʼ lotiñetla tiʼ ñaʼtʌbal pañimil yicʼot ti jiñi mach bʌ añic i cʼʌjñibal cʌntesa tilem bʌ tiʼ melbal lac piʼʌlob, ñuc bʌ i cʼʌjñibal chaʼan ili pañimil i mach jiñic tilem bʌ ti Cristo.
w08-S 15/8 28 párr. 9
Ñuc tac bʌ cʌntesʌntel am bʌ ti Gálatas, Efesios, Filipenses yicʼot Colosenses
2:8. ¿Chuqui jiñi «ñuc bʌ i cʼʌjñibal chaʼan ili pañimil» tsaʼ bʌ i yʌlʌ Pablo chaʼan maʼañic mi lac mel? Jiñʌch jiñi an tac bʌ tiʼ pañimil Satanás yom tac bʌ i tajob jiñi lac piʼʌlob cheʼ bajcheʼ jiñi filosofía, i mulʌntel chubʌʼañʌl, jiñi mach bʌ i sujmic ñopbalʌl yicʼot yan tac bʌ (1 Juan 2:16).
8-14 I CHAʼAN JULIO
ÑUC TAC BɅ I CʼɅJÑIBAL TI BIBLIA | 1 TESALONICENSES 1-5
«Ñuqʼuesʌben laʼ bʌ laʼ pusicʼal. Pʼʌtesʌben laʼ bʌ laʼ pusicʼal ti utsʼat»
(1 Tesalonicenses 5:11-13, ITD) Jini chaʼan ñuqʼuesʌben laʼ bʌ laʼ pusicʼal. Pʼʌtesʌben laʼ bʌ laʼ pusicʼal ti utsʼat cheʼ bajcheʼ woli laʼ mel. 12 Ti wocol tʼan mic subeñet lojon hermanojob, qʼuelela ti ñuc jini muʼ bʌ i chaʼleñob i yeʼtel lac Yum ti laʼ tojlel, muʼ bʌ i cʌntañetla ti lac Yum, muʼ bʌ i tiqʼuetla. 13 Yom wen ñuc mi laʼ chʌn qʼuelob yicʼot laʼ cʼuxbiya, come woliʼ chaʼlibeñob i yeʼtel lac Yum. Ñʌchʼʌl yom mi laʼ wajñel.
w11-S 15/6 26 párr. 12
«Qʼuelela ti ñuc jini muʼ bʌ i chaʼleñob i yeʼtel lac Yum ti laʼ tojlel»
12 Chaʼan miʼ cʌntʌntel jiñi congregación mach cojach yom miʼ yʌjqʼuel cʌntesa tac. Yaʼ ti 1 Timoteo 3:4, Pablo tsiʼ cʼʌñʌ jaʼel jiñi tʼan «cʌntan» cheʼ bʌ tiʼ tsictesa chaʼan jiñi añoʼ bʌ i yeʼtel ti congregación «yom miʼ cʌntan ti utsʼat jini añoʼ bʌ tiʼ yotot. Yom miʼ juʼsʌbeñob i pusicʼal i yalobilob chaʼan miʼ yajñelob ti toj, chaʼan miʼ pʼisob tiʼ wenta i tat». Cheʼ bʌ miʼ yʌjlel chaʼan miʼ cʌntan mach cojach yom i yʌl chaʼan miʼ cʌntesan i yalobilob, yom i yʌl jaʼel chaʼan «miʼ juʼsʌbeñob i pusicʼal» yicʼot miʼ tojʼesan i familia. Cheʼ jaʼel jiñi ancianojob yom miʼ tojʼesañob majlel jiñi congregación yicʼot miʼ coltan jiñi hermanojob chaʼan miʼ jacʼbeñob i tʼan Jehová (1 Ti. 3:5).
(1 Tesalonicenses 5:14, ITD) Mic subeñet lojon jaʼel, hermanojob, tiqʼuila jini muʼ bʌ i toʼol ñusañob qʼuin ti tʼan. Ñuqʼuesʌbeñob i pusicʼal jini cʼuñoʼ bʌ. Coltanla jini mach bʌ añobic i pʼʌtʌlel. Cuchbenla i sajtemal pejtelel winicob.
w15-S 15/2 9 párr. 16
Laʼ lac lajiben i pʼuntaya yicʼot i pecʼlel Jesús
16 Bajcheʼ yilal mi lac pejcan yambʌlob. Jiñi lac pʼuntaya miʼ ñijcañonla chaʼan mi lac «ñuqʼuesʌbeñob i pusicʼal jini cʼuñoʼ bʌ» (1 Ts. 5:14). ¿Bajcheʼ miʼ mejlel lac tijicñesʌbeñob i pusicʼal jiñi chʼijiyemoʼ bʌ? Jiñʌch cheʼ mi lac subeñob chaʼan mucʼʌch lac ñaʼtañob yicʼot cheʼ mi lac subeñob chuqui wem bʌ miʼ melob. Cheʼ jaʼel, miʼ mejlel laj cʼajtesʌbeñob chaʼan mucʼʌch i qʼuejlelob ti ñuc ti Jehová, come jiñʌch tsaʼ bʌ i pʌyʌyob tilel baʼan i Yalobil (Juan 6:44). Miʼ mejlel lac subeñob jaʼel chaʼan Dios mucʼʌch i chʼʌm ti ñuc jiñi «chʼijiyemoʼ bʌ i pusicʼal» yicʼot «woli bʌ i melob i pusicʼal» (Sal. 34:18). Cheʼ mi laj cʼʌn uts bʌ tʼan mi lac tijicñesʌben i pusicʼal jiñi cʼuñoʼ bʌ (Pr. 16:24).
Laʼ lac sʌclan ñuc tac bʌ i cʼʌjñibal
(1 Tesalonicenses 4:3-6, ITD) Yom Dios mi laʼ sʌqʼuesʌntel. Mach yomic mi laʼ taj laʼ tsʼiʼlel. 4 Ti jujuntiquiletla yom mi laʼ ñaʼtan bajcheʼ yom mi laʼ pʌy laʼ wijñam tiʼ sʌclel laʼ pusicʼal yicʼot cʼuxbiya. 5 Mach yomic i colosojlel laʼ pusicʼal cheʼ bajcheʼ jini sajtemoʼ bʌ mach bʌ anic miʼ ñopob Dios. 6 Mach yomic mi laʼ lotin laʼ piʼʌl. Mach yomic mi laʼ contrajin ti mulil, come lac Yum miʼ yʌqʼueñob i toj i mul pejtelel muʼ bʌ i melob bajcheʼ jini. Tsaʼix c subeyet lojon.
it-1-S 963 párr. 7
Tsʼiʼlel
Jiñi tsʼiʼlel jiñʌch jumpʼejl mulil muʼ bʌ mejlel i yʌcʼ chaʼan miʼ chaʼlentel ti expulsar juntiquil ti congregación (1 Co. 5:9-13; He. 12:15, 16). Jiñi apóstol tiʼ tsictesa chaʼan jiñi xñoptʼan muʼ bʌ i chaʼlen tsʼiʼlel miʼ bajñel ticʼlan i bʌcʼtal come mach utsʼatic bajcheʼ miʼ cʼʌn jiñi aqʼuebil bʌ chaʼan miʼ chaʼlen piʼleya. Jiñi quixtañu muʼ bʌ i yajlel ti ili mulil miʼ ticʼlan tiʼ chaʼan bʌ Dios, mach utsʼatix miʼ yʌcʼ ti qʼuejlel jiñi congregación, cheʼ jaʼel miʼ mejlel i taj cʼamʌjel tac muʼ bʌ i mejlel i yʌcʼ ti chʌmel (1 Co. 6:18, 19). Jiñi muʼ bʌ i chaʼlen tsʼiʼlel maʼañic miʼ qʼuel ti ñuc jiñi hermanojob (1 Ts. 4:3-7), come: 1) jiñi i melbal miʼ yʌcʼ ti ochel i bibiʼlel jiñi congregación yicʼot mach utsʼatix miʼ yʌcʼ ti qʼuejlel (He. 12:15, 16), 2) miʼ bibʼesʌben i conciencia jiñi muʼ bʌ i chaʼlen tsʼiʼlel yicʼot, cheʼ jaʼel mi maxto ñujpuñemic mach sʌquix mi caj i tech i ñujpuñel, 3) miʼ yʌcʼ ti wajlentel i familia, i cheʼ jaʼel 4) miʼ yʌqʼuen i chʼijiyemlel i tatob, i ñoxiʼal yicʼot jiñi muʼ bʌ caj ti ñujpuñel yicʼot. Jiñi muʼ bʌ i chaʼlen tsʼiʼlel miʼ contrajin Dios i mi caj i yʌqʼuentel i toj i mul chaʼan woliʼ ñusʌbeñob i mandar (1 Ts. 4:8).
15-21 I CHAʼAN JULIO
ÑUC TAC BɅ I CʼɅJÑIBAL TI BIBLIA | 2 TESALONICENSES 1-3
Laʼ lac sʌclan ñuc tac bʌ i cʼʌjñibal
(2 Tesalonicenses 1:7, 8, ITD) Mi caj i yʌqʼueñetla laʼ cʼaj laʼ wo quicʼot lojon cheʼ miʼ pʌstʌl lac Yum Jesús ti panchan yicʼot jini ángelob am bʌ i pʼʌtʌlel. 8 Mi caj i tilel yicʼot cʼajc chaʼan miʼ qʼuextʌbeñob i jontolil jini mach bʌ anic miʼ cʌñob Dios yicʼot jini mach bʌ anic miʼ chʼujbibeñob i wen tʼan lac Yum Jesucristo.
it-1-S 972 párr. 4
Cʼajc
Pedro tsiʼ yʌlʌ chaʼan «woliʼ cʌntʌntel jini panchan yicʼot pañimil am bʌ wʌle chaʼan miʼ pulel ti cʼajc». Ti ili texto yicʼot ti yan tac bʌ miʼ pʌs chaʼan mach yoque cʼajquic woli bʌ i taj ti tʼan, yom bʌ i yʌl chaʼan jiñʌch jiñi jisʌntel. Cheʼ bajcheʼ tiʼ yorajlel Noé maʼañic tsaʼ yoque jisʌnti jiñi panchan yicʼot jiñi Lum, cojach tsaʼ jisʌntiyob jontol bʌ quixtañujob. Cheʼ bʌ miʼ yʌl chaʼan Jesucristo yicʼot i yángelob miʼ tilelob yicʼot cʼajc yom i yʌl chaʼan mi caj i jisʌntelob jiñi jontoloʼ bʌ quixtañujob yicʼot tiʼ pejtelel am bʌ tiʼ wenta Satanás (2 P. 3:5-7, 10-13; 2 Ts. 1:6-10; laja yicʼot Is. 66:15, 16, 22, 24).
(2 Tesalonicenses 3:10, ITD) Come cheʼ yaʼto añon lojon laʼ wicʼot tsac subeyetla ti mandar: Mi an majqui mach yomic eʼtel, mach i toʼol cʼux waj.
w08-S 15/9 11 párr. 17
Miʼ yʌqʼueñonla chuqui i cʼʌjñibal bʌ lac chaʼan
17 Jehová tsiʼ yʌcʼʌ i tʼan chaʼan mi caj i yʌqʼueñonla chuqui i cʼʌjñibal bʌ lac chaʼan (pejcan Mateo 6:33, 34 yicʼot Hebreos 13:5, 6). Pero mach yomic i yʌl chaʼan cheʼ jach mi caj lac waʼ taj chuqui la com o chaʼan mach cʼʌñʌlix mi lac chaʼlen eʼtel (2 Ts. 3:10). Cheʼ mi la cʌcʼ ti ñaxan jiñi i Yumʌntel Dios yicʼot cheʼ mi lac chaʼlen eʼtel, Jehová mi caj i coltañonla chaʼan mi lac taj jiñi i cʼʌjñibal bʌ lac chaʼan ti laj cuxtʌlel (1 Ts. 4:11, 12; 1 Ti. 5:8). Jehová miʼ mejlel i coltañonla cheʼ bajcheʼ mach pijtʌbilic lac chaʼan, jumpʼejl ejemplo, miʼ mejlel i cʼʌn hermanojob chaʼan miʼ yʌqʼueñoñobla eʼtel o yan tac bʌ bajcheʼ miʼ coltañonla.
22-28 I CHAʼAN JULIO
ÑUC TAC BɅ I CʼɅJÑIBAL TI BIBLIA | 1 TIMOTEO 1-3
«Chaʼlenla wersa chaʼan mi laʼ taj chuqui wem bʌ»
(1 Timoteo 3:13, ITD) Come jini muʼ bʌ i chaʼleñob i yeʼtel ti utsʼat, cabʌl miʼ chobejtañob i ñuclel. Cheʼ jaʼel miʼ yutsi pʼojlel i xucʼtʌlel i pusicʼal yicʼot jini tʼan muʼ bʌ lac ñop ti Cristo Jesús.
km-S 11/78 4 párr. 7
Jiñi muʼ bʌ i chobejtañob i ñuclel
7 Mach wocolic mi lac taj laj qʼuel i melbalob come Pablo tsiʼ yʌlʌ chaʼan ili wiñicob woliʼ «chobejtañob i ñuclel». Pero ili mach yomic i yʌl chaʼan mi caj i tajob ñuc bʌ i yeʼtel cheʼ bajcheʼ ti yan tac bʌ ñopbalʌl. Jiñi añoʼ bʌ bajcheʼ siervo ministerial «muʼ bʌ i chaʼleñob i yeʼtel ti utsʼat» miʼ mejlel i ñopob chaʼan mi caj i tajob bendición tilem bʌ ti Jehová yicʼot ti Jesús, i cheʼ jaʼel mi caj i qʼuejlelob ti ñuc yicʼot mi caj i coltʌntelob ti jiñi congregación. «Cheʼ jaʼel miʼ yutsi pʼojlel i xucʼtʌlel i pusicʼal yicʼot jini tʼan muʼ bʌ lac ñop ti Cristo Jesús». Come miʼ tsʼʌctesañob i yeʼtel jin chaʼan wen miʼ qʼuejlelob yicʼot pʼʌtʌlob i ñopoñel i miʼ jamʌ tsictesañob.
Laʼ lac sʌclan ñuc tac bʌ i cʼʌjñibal
(1 Timoteo 1:4, ITD) Subeñob chaʼan maʼanic miʼ chʌn ñopob i sajtemal i ñojteʼelob yicʼot i juñilel i cʼabaʼ tac i ñojteʼelob muʼ bʌ i yʌcʼob ti cʌlʌx tʼan. Mach mejlic i wis coltañob chaʼan miʼ tajob i bijlel Dios baʼ miʼ coltʌntel jini muʼ bʌ i ñopob.
it-1-S 1007 párr. 3
I cʼabaʼ tac i ñojteʼelob
Mach i cʼʌjñibalix miʼ chaʼ wen tsajintel i cʼabaʼ i ñojteʼelob, ñumento cheʼ bʌ Pablo tiʼ tsʼijbube Timoteo. Ti jimbʌ ora mach cʼʌñʌlix miʼ chaʼ qʼuejlel come Dios junlajalix miʼ qʼuel jiñi judíojob yicʼot gentilob xñoptʼañoʼ bʌ (Gá. 3:28). Jiñi tsʼijbujel tsaʼix i yʌlʌ chaʼan Cristo tilemʌch tiʼ pʼolbal David. Cheʼ jaʼel, Jerusalén mach jalix mi caj i jisʌntel i mi caj i laj jilel baqui chucul i cʼabaʼ jiñi judíojob. Dios tsiʼ yʌcʼʌ chaʼan maʼañix miʼ cʌytʌl. Jin chaʼan, Pablo mach yomic chaʼan Timoteo yicʼot jiñi congregación tac miʼ toʼol ñusañob qʼuin i sʌclʌbeñob i cʼabaʼ i ñojteʼelob come ili maʼañic miʼ pʼʌtʼesʌbeñob i ñopoñel i mucʼ jach i tech wocol. Jiñi i cʼabaʼ i ñojteʼelob am bʌ ti Biblia miʼ yʌcʼ ti cʌjñel chaʼan Cristo jiñʌch jiñi Mesías, i jiñʌch ñuc bʌ i cʼʌjñibal chaʼan jiñi xñoptʼañob. Jiñi yan tac bʌ cʼabaʼʌl am bʌ ti jiñi Tsʼijbujel miʼ yʌcʼ ti cʌjñel chaʼan isujmʌch muʼ bʌ i yʌl jiñi Biblia.
(1 Timoteo 1:17, ITD) Laʼ qʼuejlic ti ñuc jini Rey am bʌ tiʼ pejtelel ora, mach bʌ yujilic chʌmel, mach bʌ tsiquilic ti lac wut. Jiñʌch cojach bʌ Dios am bʌ i ñaʼtʌbal. Laʼ tsictiyic i ñuclel tiʼ pejtelel ora. Amén.
cl-S 11 párr. 15
Ili «jiñʌch lac Dios»
15 Dios miʼ subentel jaʼel bajcheʼ «Rey am bʌ tiʼ pejtelel ora» (1 Timoteo 1:17; Apocalipsis 15:3, TNM). ¿Chuqui yom i yʌl jiñi? Anquese maʼañic mi lac luʼ chʼʌmben i sujm, Jehová cʼʌlʌl an jach tiʼ pejtelel ora. Salmo 90:1, 2 miʼ yʌl: «Cʼʌlʌl wajali cʼʌlʌl tiʼ pejtelel ora, Dioset». Maʼañic i tejchibal yicʼot i jilibal. Jin chaʼan cʌmbil bajcheʼ «Am bʌ Cabʌl i Jabilel», come wʌn añix cheʼ bʌ maxto añic chuqui melbil i chaʼan (Daniel 7:9, 13, 22). ¿Am ba majqui miʼ mejlel i yʌl chaʼan Jehová maʼañic tiʼ wenta miʼ chaʼlen Yumʌntel?
29 I CHAʼAN JULIO-4 I CHAʼAN AGOSTO
ÑUC TAC BɅ I CʼɅJÑIBAL TI BIBLIA | 1 TIMOTEO 4-6
«¿Majqui a wom a chʼujutesan, Dios o jiñi taqʼuin?»
(1 Timoteo 6:6, Jini wen bʌ tʼan [WT]) Tsiquil ricojʌch jini muʼ bʌ i chʼujbin Dios pero cheʼ jasʌlʌch am bʌ i chaʼan mi yubin.
(1 Timoteo 6:7, 8, ITD) Come maʼanic chuqui tsaʼ lac chʼʌmʌ tilel ila ti pañimil. Isujm maʼanic chuqui mi mejlel lac chʼʌm majlel. 8 Jini chaʼan cheʼ an lac waj yicʼot lac pislel, yom tijicñayonla cheʼ jini.
w03-S 1/6 9 párr. 1, 2
Laʼ laj cʌn chumtʌl cheʼ jasʌlʌch chuqui an lac chaʼan
Junchajp tsaʼ bʌ i yʌqʼue i tijicñʌyel yicʼot chaʼan miʼ ñusan i bʌ jiñi apóstol Pablo jiñʌch cheʼ jasʌl jach am bʌ i chaʼan tsiʼ yubi. Ili yom i yʌl chaʼan maʼañic mi laj cʌlʌx sʌclan jiñi chubʌʼañʌl tac. Pablo tiʼ sube Timoteo, i piʼʌl bʌ ti subtʼan: «Tsiquil ricojʌch jini muʼ bʌ i chʼujbin Dios pero cheʼ jasʌlʌch am bʌ i chaʼan mi yubin». Cheʼ jaʼel tsiʼ chaʼ alʌ: «Come maʼanic chuqui tsaʼ lac chʼʌmʌ tilel ila ti pañimil. Isujm maʼanic chuqui mi mejlel lac chʼʌm majlel. Jini chaʼan cheʼ an lac waj yicʼot lac pislel, yom tijicñayonla cheʼ jini» (1 Timoteo 6:6, WT; 7, 8).
Jiñi apóstol Pablo tsiʼ yʌlʌ chaʼan lajalʌch bajcheʼ i chʼujbibentel i mandar Dios cheʼ jasʌl jach chuqui an lac chaʼan mi la cubin. Tsiʼ cʌñʌ chaʼan cheʼ mi lac ñaxan acʼ ti laj cuxtʌlel i melbentel i yeʼtel Dios miʼ yʌqʼueñonla lac tijicñʌyel i mach jiñic jiñi chubʌʼañʌl tac am bʌ ila ti pañimil. Jin chaʼan «cheʼ an lac waj yicʼot lac pislel» jiñʌch junchajp muʼ bʌ i coltañonla chaʼan mi lac chʼujbiben i mandar Dios. Tsaʼ bʌ i yʌqʼue i tijicñʌyel jiñi apóstol Pablo jiñʌch cheʼ miʼ yʌcʼ i ñopoñel ti Jehová anquese mach cabʌlic chuqui an i chaʼan.
(1 Timoteo 6:9, ITD) Jini yomoʼ bʌ i taj cabʌl i chubʌʼan miʼ jacʼob i pʌyol ti mulil. Miʼ yochelob ti yac, ñijcʌbilob chaʼan i colosojlel i pusicʼal muʼ bʌ i yʌcʼob ti wocol. Miʼ sʌtob i bʌ. Mi caj i jisʌntelob.
g-S 6/07 6 párr. 3
¿Chuqui ti wocol miʼ yʌqʼueñonla cheʼ la com lac taj cabʌl chubʌʼañʌl?
Tiʼ sujm wen utsʼatax tiʼ tempʌntel chubʌʼañʌl pero miʼ mejlel i chilbeñonla lac tijicñʌyel. Cheʼ jaʼel, jiñi cʌlʌx eʼtel yicʼot i sʌclʌntel cabʌl taqʼuin miʼ mejlel i yʌcʼ cʼamʌjel tac bajcheʼ: Cʌlʌx bʌqʼuen, maʼañix miʼ yochel lac wʌyel, tsʌts bʌ cʼux jol yicʼot jiñi úlcera, tiʼ pejtelel ili miʼ mejlel i yʌqʼueñonla lac sʌt laj cuxtʌlel. Cheʼ bʌ jiñi lac piʼʌl miʼ cʼotel i ñaʼtan chaʼan mach weñic chuqui woliʼ mel tiʼ cuxtʌlel, tajol maʼañix i yorajlel chaʼan miʼ tojʼesan. Jiñi i piʼʌl maʼañix miʼ ñopben i tʼan, mach weñix an yicʼot i yalobilob i cheʼ jaʼel tsaʼix ñumen tsʌtsʼa i cʼamʌjel. Tajol añixto bajcheʼ miʼ mejlel i tsʼitaʼ tojʼesan jiñi wocol pero yom miʼ chaʼlen wersa. Tiʼ sujm jiñi muʼ bʌ i sʌclañob cabʌl chubʌʼañʌl miʼ ‹yotsañob i bʌ ti cabʌl wocol› (1 Timoteo 6:10).
(1 Timoteo 6:10, ITD) Come i mulʌntel taqʼuin miʼ tech pejtelel jontolil. Jini muʼoʼ bʌ i mulan cabʌl taqʼuin tsaʼix i cʌyʌyob i ñop lac Yum. Tsiʼ yotsayob i bʌ ti cabʌl wocol.
g-S 11/08 6 párr. 4-6
Wʌcchajp ticʼojel muʼ bʌ mejlel i yʌqʼueñonla lac tijicñʌyel
Cheʼ bajcheʼ tsaʼ laj qʼuele ti ñaxam bʌ temaj, jiñi muʼ bʌ i ñaʼtañob chaʼan i sʌclʌntel cabʌl taqʼuin miʼ yʌcʼ tijicñʌyel, woli jach i lotiñob i bʌ. Mach cojach mi caj i yubiñob i chʼijiyemlel, mi caj i tajob cabʌl wocol jaʼel. Jumpʼejl ejemplo, tiʼ caj i sʌclʌntel cabʌl taqʼuin miʼ ñajtʼesañob i bʌ tiʼ familia yicʼot tiʼ yamigojob. Yambʌlob maʼañix mi wen cʼajob i yoj chaʼan tiʼ caj i yeʼtelob o chaʼan mucʼob ti cʌlʌx pensar yicʼot ti caj yan tac bʌ wocol. Eclesiastés 5:12 miʼ yʌl: «Jini bʌx bʌ ti eʼtel tijicña miʼ chaʼlen wʌyel, mi tsʼita jach miʼ cʼux waj o mi cabʌl miʼ cʼux waj. Pero jini wen chumul bʌ mach mejlic ti wʌyel chaʼan cabʌl i chubʌʼan [o taqʼuin]».
Jesucristo tsiʼ yʌlʌ chaʼan i «mulʌntel chubʌʼañʌl [o taqʼuin]» jumpʼejlʌch lotintel (Marcos 4:19). Ili yom i yʌl chaʼan jiñi taqʼuin maʼañic miʼ yʌcʼ tijicñʌyel cojach miʼ yʌqʼueñonla chaʼan mi lac ñumen sʌclan. Eclesiastés 5:10 miʼ yʌl: «Jini am bʌ i woʼlel chaʼan taqʼuin maʼanic mi caj i jastiyel ti taqʼuin».
Tiʼ sujm, i mulʌntel taqʼuin miʼ tech pejtelel jontolil, miʼ yʌcʼ chʼijiyemlel, michʼajel yicʼot miʼ yʌqʼueñonla lac mel mach bʌ weñic (Proverbios 28:20). Jiñi muʼ bʌ i yʌqʼueñonla lac tijicñʌyel yicʼot chaʼan wen miʼ loqʼuel chuqui mi lac mel jiñʌch cheʼ mi lac pʌs la cutslel, cheʼ mi lac ñusʌben i mul yambʌlob, cheʼ mi lac pʌs wem bʌ lac melbal, cheʼ mi lac pʌs laj cʼuxbiya yicʼot cheʼ mi lac jacʼben i mandar Dios.
Laʼ lac sʌclan ñuc tac bʌ i cʼʌjñibal
(1 Timoteo 4:13, ITD) Pejcʌbeñob i tsʼijbujel Dios. Chaʼlen subtʼan yicʼot cʌntesa jinto mij cʼotel.
it-2-S 198 párr. 6, 7
I pejcʌntel i tsʼijbujel Dios
Yaʼ ti congregación. Ti jiñi ñaxam bʌ siglo mach wen cabʌlic am bʌ i chaʼañob i copiajlel jiñi Biblia, jin chaʼan ñuc i cʼʌjñibal miʼ pejcʌbentelob i Tsʼijbujel Dios. Jiñi apóstol Pablo tsiʼ yʌlʌ chaʼan yom miʼ pejcʌntel ti congregación jiñi carta tac tsaʼ bʌ i tsʼijbu. Cheʼ jaʼel, tsiʼ yʌlʌ chaʼan yom miʼ majñʌbeñob i bʌ chaʼan miʼ mejlel i pejcañob jaʼel jiñi yan tac bʌ congregación (Col. 4:16; 1 Ts. 5:27). Pablo tiʼ sube Timoteo chaʼan miʼ chʌn pejcʌben i Tsʼijbujel Dios, miʼ chaʼlen subtʼan yicʼot chaʼan miʼ chaʼlen cʌntesa (1 Ti. 4:13).
Jiñi i Tsʼijbujel Dios yom miʼ pejcʌntel baqui an cabʌl lac piʼʌlob (Hab. 2:2, TNM). Come jiñʌch muʼ bʌ caj i coltan jiñi quixtañujob, jin chaʼan, jiñi muʼ bʌ i pejcan yom miʼ chʼʌmben i sujm chuqui yom bʌ i yʌl jiñi xtsʼijbaya, i wen jach yom miʼ pejcan jiñi tʼan tac chaʼan maʼañic miʼ yʌmben i sujmlel i mach yambʌlic miʼ chʼʌmbeñob i sujm jiñi muʼ bʌ i yubiñob. Cheʼ bajcheʼ miʼ yʌl Apocalipsis 1:3, jiñi muʼ bʌ i qʼuelob yicʼot muʼ bʌ i yubiñob jiñi profecía i miʼ jacʼob chuqui tsʼijbubil, mi caj i yubiñob i tijicñʌyel.