CɅNTESɅNTEL 21
¿Bajcheʼ woliʼ sujbel jiñi wen tʼan?
Tsʼitaʼ jax yom chaʼan Jehová mi caj i cʼʌn i Yumʌntel chaʼan miʼ jisan pejtelel jiñi wocol tac. ¡I jiñʌch la com bʌ lac sub ñumel! Jesús tsiʼ yʌlʌ chaʼan jiñʌch yom bʌ miʼ subob jiñi xcʌntʼañob i chaʼan tiʼ pejtelel pañimil (mulawil) (Mateo 28:19, 20). ¿Chuqui an i meleyob jiñi i testigojob Jehová chaʼan miʼ jacʼob tsaʼ bʌ i yʌlʌ Jesús?
1. ¿Bajcheʼ woliʼ tsʼʌctiyel ili ora muʼ bʌ i yʌl Mateo 24:14?
Jesús tsiʼ yʌlʌ: «Jiñi wen tʼan chaʼan bʌ Yumʌntel mi caj i sujbel tiʼ pejtelel pañimil» (Mateo 24:14). Jiñi i testigojonbʌlon Jehová mic wen mulan lojon c mel ili ñuc bʌ eʼtel (troñel). Mic sub lojon jiñi wen tʼan tiʼ pejtelel pañimil ñumen ti mil tʼan tac. Pero yomʌch miʼ chaʼlentel wersa yicʼot miʼ wen chajpʌntel bajcheʼ mi caj i mejlel. I woli (choncol) i mejlel cojach yicʼot i coltaya Jehová.
2. ¿Chuqui mi lon c mel chaʼan mic sub lojon jiñi wen tʼan?
Mic chaʼlen lojon subtʼan baqui jach an lac piʼʌlob. I cheʼ bajcheʼ tsiʼ meleyob jiñi xñoptʼañob ti ñaxam bʌ siglo, mic ñumel lojon ti subtʼan «ti jujumpʼejl otot» (Hechos 5:42). Cheʼ bajcheʼ jiñi miʼ mejlel lon c suben wen tʼan yonlel lac piʼʌlob ti jujumpʼejl jab. Pero mi lon c chaʼlen subtʼan jaʼel baqui miʼ ñumel cabʌl lac piʼʌlob come cabʌlob mach yaʼic añob tiʼ yotot. Mic chʌn sʌclan lojon bajcheʼ mi lon c mejlel ti subtʼan chaʼan jiñi yambʌ lac piʼʌlob miʼ cʌñob i chaʼan bʌ Jehová yicʼot muʼ bʌ i ñaʼtan i mel.
3. ¿Majqui añob tiʼ wenta i subob jiñi wen tʼan?
Pejtelel jiñi i sujm bʌ xñoptʼañob yom miʼ subob jiñi wen tʼan. Wen ñuc i cʼʌjñibal mi lon j qʼuel ili eʼtel. Jin chaʼan, mi lon c chaʼlen wersa c sub lojon jiñi wen tʼan come cujil lojon chaʼan jiñʌch muʼ bʌ mejlel i coltʌben i cuxtʌlel jiñi lac piʼʌlob (pejcan 1 Timoteo 4:16). Maʼañic mi lon c tojtʌl tiʼ melol ili eʼtel, come jiñi Biblia miʼ yʌl: «Majtan jach tsaʼ aqʼuentiyetla, majtan jach yom mi laʼ wʌcʼ» (Mateo 10:7, 8). I anquese mach tiʼ pejtelelic jiñi lac piʼʌlob miʼ ñʌchʼtañon lojon, maʼañic mij cʌy lojon subtʼan come cheʼʌch woli (yʌquel) lon c chʼujutesan Jehová yicʼot mi cʌqʼuen lojon i tijicñʌyel.
LAʼ LAC ÑUMEN ÑAʼTAN
La laj qʼuel bajcheʼ woliʼ chaʼleñob wersa jiñi i testigojob Jehová chaʼan miʼ subob jiñi wen tʼan tiʼ pejtelel pañimil yicʼot bajcheʼ woliʼ coltʌntelob ti Jehová.
Mic chaʼlen lojon subtʼan tiʼ pejtelel pañimil: A) Costa Rica, B) Estados Unidos, C) Benín, D) Tailandia, E) Yap (Micronesia), F) Suecia.
4. Mic chaʼlen lojon wersa c suben lojon wen tʼan pejtelel lac piʼʌlob
Jiñi i testigojonbʌlon Jehová mi lon c chaʼlen wersa chaʼan mic suben lojon wen tʼan jiñi lac piʼʌlob baqui jach añob. Qʼuelela jiñi VIDEO i tem alʌla iliyi:
¿Chuqui muʼ bʌ a ñumen mulan chaʼan bajcheʼ miʼ chaʼleñob subtʼan jiñi i testigojob Jehová?
Pejcanla Mateo 22:39 yicʼot Romanos 10:13-15, i tem alʌla iliyi:
¿Bajcheʼ miʼ pʌs jiñi lon c subtʼan chaʼan mij cʼuxbin lojon jiñi lac piʼʌlob?
¿Bajcheʼ yilal miʼ qʼuelob Jehová jiñi muʼ bʌ i subob jiñi wen tʼan? (Qʼuelela jiñi versículo 15).
5. Mi lon c tem chaʼlen eʼtel lon quicʼot Dios
Cabʌl chuqui ujtem muʼ bʌ i pʌs chaʼan Jehová woliʼ qʼuel majlel jiñi subtʼan. La laj qʼuel tsaʼ bʌ ujti ti Nueva Zelanda. Juntiquil Testigo i cʼabaʼ Paul woli ti subtʼan cheʼ ti icʼan i tsiʼ taja juntiquil xʼixic. Cheʼ ti sʌcʼan, jiñi xʼixic tsiʼ cʼajtibe Jehová ti oración chaʼan an majqui miʼ cʼotel i julaʼtan. Paul miʼ yʌl: «Uxpʼejl jach hora tsaʼ ñumi i tsaʼ cʼotiyon tiʼ yotot».
Pejcanla 1 Corintios 3:9 i tem alʌla iliyi:
¿Bajcheʼ miʼ pʌs jiñi tsaʼ bʌ ujti ti Nueva Zelanda chaʼan Jehová woliʼ qʼuel jiñi subtʼan?
Pejcanla Hechos 1:8 i tem alʌla iliyi:
¿Chucoch i cʼʌjñibal lac chaʼan i coltaya Jehová chaʼan mi lac chaʼlen subtʼan?
¿A wujilix ba?
Yaʼ ti lon c tempa bʌ muʼ bʌ i mejlel cheʼ ti semana mi lon c pʌsbentel bajcheʼ yom mi lon c chaʼlen subtʼan. Mi añix ajñemet ti jiñi tempa bʌ tac, ¿bajcheʼ yilal an a qʼuele jiñi lon j cʌntesʌntel?
6. Cheʼ mi lon c chaʼlen subtʼan mi lon c jacʼben i mandar Dios
Cheʼ ti ñaxam bʌ siglo, jiñi i contrajob jiñi xcʌntʼañob i chaʼan Jesús tsiʼ ñopoyob i mʌctan jiñi subtʼan. Pero jiñi ñaxam bʌ xñoptʼañob tsiʼ coltayob i bʌ «chaʼan maʼañic chuqui miʼ mʌctan chaʼan miʼ sujbel jiñi wen tʼan» (Filipenses 1:7). Ili ora, jiñi i testigojonbʌlon Jehová cheʼʌch mic mel lojon jaʼel.a
Pejcanla Hechos 5:27-42 i tem alʌla iliyi:
¿Chucoch maʼañic mi caj lon j cʌy subtʼan? (Qʼuelela jiñi versículo 29, 38 yicʼot 39).
AN MUʼ BɅ I CAJTIBEÑOÑOBLA: «¿Chucoch jiñi i testigojob Jehová miʼ ñumelob ti jujumpʼejl otot?».
¿Bajcheʼ mi caj a jacʼ?
TSAʼ BɅ LAJ CɅÑɅ
Jesús tiʼ sube jiñi xcʌntʼañob i chaʼan chaʼan yom miʼ subob jiñi wen tʼan tiʼ pejtelel pañimil. Jehová woliʼ coltan jiñi i tejclum chaʼan miʼ tsʼʌctesan ili eʼtel.
¿Chuqui tsaʼ cʌñʌ?
¿Chuqui woliʼ mejlel chaʼan miʼ sujbel jiñi wen tʼan tiʼ pejtelel pañimil?
¿Bajcheʼ miʼ pʌs jiñi lon c subtʼan chaʼan mij cʼuxbin lojon jiñi lac piʼʌlob?
¿Muʼ baʼ ñop chaʼan jiñi subtʼan miʼ mejlel i yʌqʼueñonla lac tijicñʌyel? ¿Chucoch?
CɅÑɅ YAN TAC BɅ
Qʼuele bajcheʼ miʼ chaʼleñob subtʼan jiñi i testigojob Jehová ti colem bʌ tejclum tac.
Ñuc bʌ subtʼan baqui miʼ ñumel cabʌl lac piʼʌlob yaʼ ti París (5:11)
¿Chuqui an i meleyob jiñi i testigojob Jehová chaʼan miʼ coltañob jiñi cʼotemoʼ bʌ ti putsʼel ti yambʌ país?
Tsaʼ lon j colta tiʼ chaʼan bʌ Dios jiñi tilemoʼ bʌ ti yambʌ país (5:59)
Ubin bajcheʼ juntiquil xʼixic miʼ yʌl chucoch miʼ yʌqʼuen i tijicñʌyel cheʼ tsiʼ cʼʌñʌ i cuxtʌlel chaʼan miʼ chaʼlen subtʼan.
Cʌñʌ chuqui an ujtem tiʼ tojlel jiñi i testigojob Jehová yaʼ ti meloñibʌl tac chaʼan miʼ bej mejlelob ti subtʼan.
a Dios jiñʌch muʼ bʌ i yʌl chaʼan yom mi lon c chaʼlen subtʼan. Jin chaʼan, jiñi i testigojonbʌlon Jehová mach cʼʌñʌlic mi lon c subentel ti xʼeʼtelob chaʼan yom mi lon c chaʼlen subtʼan o maʼañic.