CɅNTESɅNTEL 46
¿Chucoch yom mi la cʌcʼ lac bʌ ti Dios yicʼot mi lac chʼʌmjaʼ?
Cheʼ bʌ an majqui miʼ yʌcʼ i bʌ ti Jehová, miʼ melben jumpʼejl oración chaʼan miʼ suben chaʼan jin jach mi caj i chʼujutesan yicʼot chaʼan ñumen ñuc bʌ i cʼʌjñibal i chaʼan miʼ cajel jiñʌch cheʼ miʼ mel chuqui yom Dios (Salmo 40:8). I cheʼ bʌ miʼ chʼʌmjaʼ miʼ pʌsben yambʌlob chaʼan tsaʼix i yʌcʼʌ i bʌ ti Dios. Cheʼ mi la cʌcʼ lac bʌ ti Jehová jiñʌch ñumen ñuc bʌ i cʼʌjñibal miʼ mejlel lac mel muʼ bʌ i qʼuextʌbeñonla laj cuxtʌlel. ¿Chuqui miʼ mejlel i coltañet chaʼan maʼ wʌcʼ a bʌ ti Dios?
1. ¿Chucoch mi la cʌcʼ lac bʌ ti Jehová?
Mi la cʌcʼ lac bʌ ti Jehová come mi laj cʼuxbin (1 Juan 4:10, 19). Jiñi Biblia miʼ yʌl: «Cʼuxbin a Dios Jehová tiʼ pejtelel a pusicʼal, tiʼ pejtelel a cuxtʌlel, tiʼ pejtelel a ñaʼtʌbal yicʼot tiʼ pejtelel a pʼʌtʌlel» (Marcos 12:30). Mi lac pʌs chaʼan mi laj cʼuxbin Jehová ti chuqui mi la cʌl yicʼot ti muʼ bʌ lac mel. Lajal bajcheʼ chaʼtiquilob miʼ ñujpuñelob come miʼ cʼuxbiñob i bʌ, mi mucʼʌch laj cʼuxbin Jehová jaʼel mi caj la cʌcʼ lac bʌ tiʼ tojlel yicʼot mi caj lac chʼʌmjaʼ.
2. ¿Chuqui ti bendición miʼ yʌqʼuen Jehová jiñi i Testigojob muʼ bʌ i chʼʌmob jaʼ?
Cheʼ bʌ maʼ chʼʌmjaʼ, mi caj a wochel tiʼ familia Jehová, ti jumpʼejl familia wen tijicña bʌ. Cheʼ jiñi, cabʌl bajcheʼ mi caj a wubiben i cʼuxbiya Jehová i ñumen lʌcʼʌl mi caj a wubin a bʌ tiʼ tojlel (pejcan Malaquías 3:16-18). Cheʼ jaʼel, Jehová mi caj i sujtel ti a Tat, i mi caj a taj a wermañujob tiʼ pejtelel pañimil (pejcan Marcos 10:29, 30). Pero chaʼan maʼ chʼʌmjaʼ añʌch chuqui ñaxan yom maʼ mel. Yom maʼ cʌn Jehová, maʼ cʼuxbin yicʼot maʼ pʌs chaʼan maʼ ñop tiʼ tojlel i Yalobil. Cheʼ jiñi, yom maʼ wʌqʼuen a tʼan Jehová chaʼan mi caj a wʌqʼuen a cuxtʌlel. Mi cheʼʌch maʼ mel yicʼot maʼ chʼʌmjaʼ, tijicña mi caj a mejlel ti chumtʌl tiʼ pejtelel ora. Jiñi i Tʼan Dios miʼ yʌl: «Jiñi chʼʌmjaʼ woli [...] i coltañetla ili ora» (1 Pedro 3:21).
LAʼ LAC ÑUMEN ÑAʼTAN
Laʼ laj qʼuel chucoch ñuc i cʼʌjñibal cheʼ maʼ wʌcʼ a bʌ ti Jehová yicʼot cheʼ maʼ chʼʌmjaʼ.
3. Ti lac pejtelel yom mi lac yajcan majqui mi caj lac chʼujutesan
Jiñi israelitajob ti wajali tsiʼ ñaʼtayob chaʼan miʼ mejlel i chʼujutesañob Jehová yicʼot jiñi dios Baal. Pero mach tojic jiñi tsaʼ bʌ i ñaʼtayob. Jin chaʼan, Jehová tsiʼ choco majlel jiñi xʼaltʼan Elías chaʼan miʼ tojʼesʌbeñob i pensar. Pejcanla 1 Reyes 18:21 i tem alʌla iliyi:
¿Chuqui yom bʌ miʼ yajcañob jiñi israelitajob?
Lajal bajcheʼ jiñi israelitajob, joñonla jaʼel yom mi lac yajcan majqui mi caj lac chʼujutesan. Pejcanla Lucas 16:13 i tem alʌla iliyi:
¿Chucoch mach yomic mi lac chʼujutesan Jehová i cheʼ jaʼel mi lac chʼujutesan juntiquil quixtañu o chuqui tac jach?
¿Chuqui miʼ mejlel lac mel chaʼan Jehová miʼ qʼuel chaʼan jiñʌch tsaʼ lac yajca lac chʼujutesan?
4. Ñaʼtan bajcheʼ cʼamel miʼ cʼuxbiñet Jehová
Jehová cabʌl chuqui miʼ yʌqʼueñonla. Ixcu joñonla, ¿chuqui miʼ mejlel la cʌqʼuen? Qʼuelela jiñi VIDEO.
¿Bajcheʼ tac an i pʌsbeyet Jehová chaʼan miʼ cʼuxbiñet? Pejcanla Salmo 104:14, 15 yicʼot 1 Juan 4:9, 10, i tem alʌla iliyi:
Tiʼ pejtelel chuqui am bʌ i yʌqʼueyonla Jehová, ¿baqui bʌ maʼ ñumen qʼuel ti ñuc?
Cheʼ bʌ maʼ ñaʼtan pejtelel am bʌ i yʌqʼueyet, ¿chuqui maʼ wubin tiʼ tojlel?
Cheʼ an majqui miʼ yʌqʼueñonla jumpʼejl majtañʌl muʼ bʌ lac wen mulan, la com la cʌqʼuen i yubin chaʼan mi lac wen qʼuel ti ñuc. Pejcanla Deuteronomio 16:17 i tem alʌla iliyi:
Cheʼ bʌ maʼ ñaʼtan pejtelel chuqui an i yʌqʼueyet Jehová, ¿muʼ ba i tilel ti a pusicʼal chaʼan an chuqui a wom a wʌqʼuen jaʼel? ¿Chuqui a wom a wʌqʼuen?
5. Cheʼ mi la cʌcʼ lac bʌ ti Dios mi lac taj cabʌl bendición
Cabʌlob miʼ yʌlob chaʼan cheʼ bʌ wen cʌmbilonla, an wem bʌ la queʼtel o cabʌl lac taqʼuin miʼ yʌqʼueñonla lac tijicñʌyel. ¿Pero i sujm ba jiñi? Qʼuelela jiñi VIDEO i tem alʌla iliyi:
Anquese Andrey tsiʼ wen mulaj jiñi fútbol, ¿chucoch tsiʼ cʌyʌ?
Andrey tsiʼ yʌqʼue i cuxtʌlel Jehová i mach jiñic jiñi fútbol. ¿Weñʌch ba maʼ wʌl jiñi tsaʼ bʌ i mele? ¿Chucoch?
Cheʼ bʌ jiñi apóstol Pablo maxto xñoptʼañic an i chaʼan ñuc bʌ eʼtel (troñel). Juntiquil maestro wen cʌmbil bʌ chaʼan i mandar jiñi judíojob tsiʼ yʌqʼue clase. Pero tsiʼ cʌyʌ pejtelel jiñi chaʼan miʼ sujtel ti xñoptʼan. ¿Tsaʼ ba i chaʼ ñaʼta i bʌ? Pejcanla Filipenses 3:8 i tem alʌla iliyi:
¿Chucoch Pablo tsiʼ yʌlʌ chaʼan jiñi tsaʼ bʌ i mele cheʼ bʌ maxto xñoptʼañic lajal bajcheʼ «yonlel basura»?
¿Chuqui tsiʼ taja cheʼ bʌ tsiʼ cʌyʌ jiñi am bʌ i chaʼan ti ñaxan?
¿Ñumen wem ba mi caj a wajñel maʼ wʌl mi tsaʼ wʌqʼue a cuxtʌlel Jehová? ¿Chucoch cheʼ maʼ ñaʼtan bajcheʼ jiñi?
Cheʼ bʌ Pablo ti sujti ti xñoptʼan, ñumento chuqui tsiʼ taja bajcheʼ jiñi tsaʼ bʌ i cʌyʌ.
AN MUʼ BɅ I YɅLOB: «Cujil chaʼan iliyi jiñʌch i sujmlel, pero mach comic cʌqʼueʼ c tʼan ame maʼañic mic tsʼʌctesan».
¿Añʌch ba i sujmlel maʼ wʌl cheʼ mi la cʌqʼuen laj cuxtʌlel Jehová? ¿Chucoch?
TSAʼ BɅ LAJ CɅÑɅ
Mi la cʌcʼ lac bʌ ti Jehová yicʼot mi lac chʼʌmeʼ jaʼ come mi laj cʼuxbin.
¿Chuqui tsaʼ cʌñʌ?
¿Chucoch jin jach Jehová yom mi laj cʼuxbin tiʼ pejtelel lac pusicʼal yicʼot mi lac chʼujutesan?
¿Chuqui ti bendición miʼ yʌqʼuen Jehová jiñi i Testigojob muʼ bʌ i chʼʌmob jaʼ?
¿A wom baʼ wʌcʼ a bʌ ti Jehová?
CɅÑɅ YAN TAC BɅ
Qʼuele chucoch juntiquil xcʼay yicʼot juntiquil xʼalas tsiʼ yʌcʼʌyob i bʌ ti Jehová.
Qʼuele chucoch yomʌch mi la cʌcʼ lac bʌ ti Jehová.
«¿Chucoch yom mi la cʌcʼ lac bʌ ti Jehová?» (Lac Tsictesʌbentel, 15 i chaʼan enero, 2010)
Qʼuele ti ili video yicʼot bʌ música bajcheʼ yubil miʼ yubiñob i bʌ jiñi muʼ bʌ i yʌcʼob i bʌ ti Jehová.
Qʼuele chucoch tsiʼ chaʼ ñaʼta i bʌ juntiquil xʼixic, ti jiñi tema «Cabʌl jab tsaʼ j cʼajtibe c bʌ chucoch wʌʼañonla wʌʼi».
«Jiñi Biblia tsiʼ qʼuextʌbeyob i pensar» (Lac Tsictesʌbentel, 1 i chaʼan noviembre, 2012)