¿Ti chuqui mi caj i sujtesañonla Jehová?

 1. ¿Chuqui miʼ mejlel i mel Jehová chaʼan mi tsʼʌctesan jiñi ñaʼtʌbil bʌ i chaʼan?

JEHOVÁ miʼ mejlel ti sujtel ti chuqui jach chaʼan miʼ tsʼʌctesan jiñi ñaʼtʌbil bʌ i chaʼan. Jumpʼejl ejemplo, an i sujtesa i bʌ ti xCʌntesa, ti lac Tat muʼ bʌ i ñuqʼuesan lac pusicʼal yicʼot bajcheʼ juntiquil xSubtʼan (Is. 48:17; 2 Co. 7:6; Gá. 3:8). Ti bele ora miʼ cʼʌn wiñicob xʼixicob (quixtañujob) chaʼan miʼ mel chuqui yom (Mt. 24:14; 28:19, 20; 2 Co. 1:3, 4). Miʼ mejlel i yʌqʼueñonla lac ñaʼtʌbal yicʼot lac pʼʌtʌlel chaʼan mi lac sujtel ti chuqui yom chaʼan miʼ tsʼʌctesan jiñi ñaʼtʌbil bʌ i chaʼan. Pejtelel iliyi yaʼ ochem ti chuqui yom i yʌl i cʼabaʼ Jehová cheʼ bajcheʼ miʼ yʌlob jiñi quixtañujob wen yujiloʼ bʌ.

 2. a) ¿Chucoch an i tajol maʼañic mi lac wen ñop chaʼan Jehová woliʼ cʼʌñonla? b) ¿Chuqui mi caj lac tsajin ti ili temaj?

² Ti lac pejtelel la com chaʼan Jehová miʼ cʼʌñonla, pero tajol an hermanojob muʼ bʌ i ñaʼtañob chaʼan mach cheʼic woli (choncol) i mel tiʼ tojlelob. ¿Chucoch? Tajol tiʼ caj i jabilelob, chuqui woli (yʌquel) i ñusañob o chaʼan mach wen mejlix i melob jumpʼejl eʼtel (troñel). Yambʌlob miʼ ñaʼtañob chaʼan wolix i melob jumpʼejl eʼtel tiʼ chaʼan bʌ Dios i chaʼan jasʌl jach jiñi. Ti ili temaj mi caj laj qʼuel bajcheʼ miʼ chajpañonla Jehová chaʼan miʼ tsʼʌctesan jiñi ñaʼtʌbil bʌ i chaʼan. Mi caj laj qʼuel jaʼel bajcheʼ tsiʼ ñijcʌbe i pusicʼal jiñi wiñicob yicʼot xʼixicob ti wajali chaʼan miʼ melob chuqui yom yicʼot bajcheʼ tsiʼ yʌqʼueyob i pʼʌtʌlel. Tiʼ yujtibal, mi caj laj qʼuel chuqui miʼ mejlel lac mel chaʼan Jehová miʼ cʼʌñonla.

 3. Cheʼ bajcheʼ miʼ yʌl Filipenses 2:13, ¿chuqui miʼ mejlel i yʌqʼueñonla Jehová?

³ (Pejcan Filipenses 2:13).b Jehová miʼ mejlel i coltañonla chaʼan mi lac mulan lac mel chuqui yom. ¿Bajcheʼ? Tajol mi la cubin chaʼan anto chuqui yom melol yaʼ ti laj congregación o jiñi ancianojob miʼ pejcañob jumpʼejl carta tsaʼ bʌ i choco tilel jiñi sucursal chaʼan anto yom coltʌntel ti yambʌ parte. I cheʼ jiñi, miʼ mejlel laj cʼajtiben lac bʌ chuqui miʼ mejlel lac mel chaʼan mi la cʌcʼ laj coltaya. O tajol tsaʼ aqʼuentiyonla jumpʼejl eʼtel wocol bʌ ti melol i mi lac ñaʼtan chaʼan mach mejlic lac mel. Cheʼ jaʼel, cheʼ woli lac pejcan jiñi texto tac am bʌ ti Biblia mi lac ñaʼtan bajcheʼ miʼ mejlel laj cʼʌn chaʼan mi laj coltan yambʌlob. Jehová maʼañic miʼ wersa xicʼonla chaʼan an chuqui mi lac mel. Pero mi tsiʼ qʼuele chaʼan la comʌch lac chaʼlen coltaya, mi caj i ñijcañonla chaʼan mucʼʌch lac mel.

 4. ¿Bajcheʼ miʼ mejlel i yʌqʼueñonla lac pʼʌtʌlel Jehová chaʼan mi lac mel chuqui yom?

⁴ Jehová miʼ mejlel i yʌqʼueñonla jaʼel lac pʼʌtʌlel chaʼan mi lac mel chuqui yom (Is. 40:29). Miʼ cʼʌn jiñi chʼujul bʌ i yespíritu chaʼan miʼ ñumen weñʼesan jiñi la cujilix bʌ melol (Éx. 35:30-35). I miʼ cʼʌn jiñi i yorganización chaʼan miʼ cʌntesañonla lac mel eʼtel tac. Mi mach la cujilic bajcheʼ mi caj lac tsʼʌctesan chuqui mi la cʌqʼuentel lac mel, laʼ laj cʼajtin laj coltʌntel. Cheʼ jaʼel, laʼ lac lʌcʼtesan lac bʌ tiʼ tojlel jiñi lac Tat am bʌ ti panchan i laʼ laj cʼajtiben «jini ñuc bʌ lac pʼʌtʌlel» (2 Co. 4:7; Lc. 11:13). Yaʼ ti Biblia, mi lac pejcan bajcheʼ Jehová tsiʼ ñijcʌbe i pusicʼal jiñi wiñicob yicʼot xʼixicob ti wajali chaʼan miʼ melob chuqui yom yicʼot bajcheʼ tsiʼ yʌqʼueyob i pʼʌtʌlel. Laʼ laj qʼuel chaʼpʼejl uxpʼejl ejemplo, i la lac ñaʼtan bajcheʼ miʼ mejlel i cʼʌñonla cheʼ bajcheʼ tsiʼ mele tiʼ tojlelob.

 5. ¿Chuqui miʼ mejlel laj cʌn chaʼan cheʼ ba ora Jehová tsiʼ cʼʌñʌ jiñi Moisés chaʼan miʼ coltan i tejclum Israel?

⁵ Jehová tiʼ sujtesa jiñi Moisés bajcheʼ juntiquil xcoltaya chaʼan i tejclum Israel. Pero ¿baqui ora tsiʼ cʼʌñʌ Jehová? ¿Jimba cheʼ bʌ Moisés wen chajpʌbil tsiʼ yubi i bʌ come tsaʼ cʌntesʌnti «tiʼ pejtelel i ñaʼtʌbal egiptojob»? (Hch. 7:22-25). Maʼañic, Jehová tsiʼ ñaxan cʌntesa chaʼan yom miʼ pʌs i pecʼlel yicʼot i yutslel, i cheʼ jiñi tsiʼ cʼʌñʌ (Hch. 7:30, 34-36). I tsiʼ yʌqʼue i chʼejlel chaʼan miʼ pejcan jiñi pʼʌtʌl bʌ yumʌl ti Egipto (Éx. 9:13-19). ¿Chuqui miʼ mejlel laj cʌn chaʼan cheʼ baʼ ora Jehová tsiʼ cʼʌñʌ jiñi Moisés? Chaʼan miʼ cʼʌn majqui jach am bʌ wen tac bʌ i melbal (chaʼlebal) tiʼ chaʼan bʌ Dios i miʼ ñopbeñob jiñi i pʼʌtʌlel muʼ bʌ i yʌqʼueñob (Is. 12:2).

 6. ¿Chuqui mi laj cʌn chaʼan bajcheʼ Jehová tsiʼ cʼʌñʌ jiñi Barzilái chaʼan miʼ coltan jiñi rey David?

⁶ Cheʼ ñumeñix cabʌl jab, Jehová tsiʼ cʼʌñʌ jiñi Barzilái chaʼan miʼ coltan jiñi rey David. Cheʼ bʌ jiñi rey yicʼot jiñi i wiñicob woliʼ putsʼtañob jiñi Absalón, i yalobil David, tsaʼ wen lujbʼayob yicʼot wiʼñalob. Anquese ñoxix jiñi Barzilái, tsiʼ yʌcʼʌ ti wocol jiñi i cuxtʌlelob yicʼot i piʼʌlob chaʼan miʼ coltañob David. Barzilái wen añix i jabilel, pero maʼañic tsiʼ ñaʼta chaʼan maʼañix i cʼʌjñibal tiʼ wut Jehová. Tsiʼ pʌsʌ i yutslel i pusicʼal i tsiʼ cʼʌñʌ jiñi am bʌ i chaʼan chaʼan miʼ coltan jiñi i wiñicob Dios woli bʌ i ñusañob wocol (2 S. 17:27-29). ¿Chuqui mi laj cʌn? Chaʼan mach yʌlʌyic jaypʼejl lac jabilel, Jehová miʼ mejlel i cʼʌñonla chaʼan mi laj coltan jiñi la quermañujob añoʼ bʌ tiʼ pejtelel pañimil (mulawil) ti chuqui cʼʌjñibalob i chaʼan (Pr. 3:27, 28; 19:17). Anquese maʼañic mi lac mejlel ti majlel chaʼan mi laj coltañob, mejlʌch la cʌcʼ lac taqʼuin chaʼan miʼ coltʌntelob yaʼ baqui añob yicʼot cheʼ i cʼʌjñibalob i chaʼan cheʼ miʼ yujtel wocol (2 Co. 8:14, 15; 9:11).

 7. a) ¿Bajcheʼ tsiʼ cʼʌñʌ Jehová jiñi Simeón? b) ¿Chucoch miʼ ñuqʼuesan lac pusicʼal jiñi?

⁷ Simeón jiñʌch xucʼul bʌ wiñic añix bʌ i jabilel ti Jerusalén tsaʼ bʌ i subenti ti Jehová chaʼan mi caj i qʼuel jiñi Mesías cheʼ cuxulto. Mi lac ñaʼtan chaʼan iliyi tsaʼʌch i ñuqʼuesʌbe i pusicʼal come tsiʼ pijta cabʌl jabil chaʼan miʼ julel jiñi Mesías. Jehová tsiʼ yʌqʼue i bendición chaʼan tsiʼ pʌsʌ i ñopoñel yicʼot cheʼ jal tsiʼ pijta. Ti jumpʼejl bʌ qʼuin, jiñi chʼujul bʌ espíritu tsiʼ pʌyʌ majlel yaʼ ti Templo, i yaʼi tsiʼ qʼuele jiñi Jesús cheʼ alʌlto. Cheʼ jiñi, Jehová tsiʼ cʼʌñʌ chaʼan miʼ yʌl jumpʼejl profecía tiʼ tojlel jiñi alʌl, muʼ bʌ caj i yochel bajcheʼ Cristo (Lc. 2:25-35). Anquese Simeón tajol maʼañic tsiʼ qʼuele Jesús ti subtʼan, tsiʼ wen qʼuele ti ñuc cheʼ Jehová tsiʼ cʼʌñʌ i yʌl jiñi profecía. Ili xucʼul bʌ wiñic wen utsʼatax chuqui mi caj i yʌqʼuentel come mi caj i qʼuel yaʼ ti tsijiʼ bʌ pañimil chaʼan jiñi i yumʌntel Jesús mi caj i yʌqʼuen i bendición pejtelel jiñi familia ila ti Pañimil (Gn. 22:18). Joñonla miʼ mejlel laj qʼuel ti ñuc jaʼel baqui jach bʌ eʼtel miʼ yʌqʼueñonla Jehová.

 8. ¿Bajcheʼ miʼ mejlel i cʼʌñonla Jehová?

⁸ Cheʼ ti ñaxam bʌ siglo, juntiquil wiñic i cʼabaʼ José am bʌ i yutslel i pusicʼal tsiʼ yʌcʼʌ i bʌ chaʼan miʼ cʼʌjñel ti Jehová (Hch. 4:36, 37). Jiñi apóstolob tsiʼ pejcayob bajcheʼ Bernabé, yom bʌ i yʌl «jini muʼ bʌ i ñuqʼuesan lac pusicʼal», come tajol miʼ ñuqʼuesʌben i pusicʼal yambʌlob. Jumpʼejl ejemplo, cheʼ bʌ Saulo xñoptʼañix, cabʌl hermanojob tsiʼ bʌcʼña i lʌcʼtesañob i bʌ tiʼ tojlel come yujilob chaʼan tsiʼ wen ticʼla jiñi xñoptʼañob. Pero Bernabé tsiʼ colta. Mi lac ñaʼtan chaʼan Saulo tsaʼʌch i wen qʼuele ti ñuc cheʼ tsiʼ pʌsbe i yutslel i pusicʼal (Hch. 9:21, 26-28). Ti wiʼil, jiñi ancianojob ti Jerusalén tsaʼ cʼoti i ñaʼtañob chaʼan jiñi xñoptʼañob ti Antioquía i chaʼan Siria, ñajt bʌ an tiʼ tojlelob, yomob chaʼan miʼ ñuqʼuesʌbentelob i pusicʼal. ¿Majqui tsiʼ chocoyob majlel? Jiñʌch Bernabé. Weñʌch cheʼ tsiʼ chocoyob majlel come jiñi Biblia miʼ yʌl chaʼan jiñi Bernabé «tsiʼ xicʼbeyob [o tsiʼ ñuqʼuesʌbeyob i pusicʼal] tiʼ pejtelelob chaʼan miʼ chʌn ñopob lac Yum tiʼ xucʼtilel i pusicʼal» (Hch. 11:22-24). Ili ora, Jehová miʼ mejlel i coltañonla chaʼan mi lac ñuqʼuesʌben i pusicʼal la quermañujob, jumpʼejl ejemplo, cheʼ an majqui miʼ chʌmel (sajtel) tiʼ familia. O tajol miʼ ñijcan lac pusicʼal chaʼan mi lac julaʼtan o mi lac pejcan ti teléfono majqui cʼam bʌ o am bʌ i chʼijiyemlel i mi lac suben muʼ bʌ i ñuqʼuesʌben i pusicʼal. ¿La com ba la cʌcʼ lac bʌ chaʼan Jehová miʼ cʼʌñonla bajcheʼ Bernabé? (1 Ts. 5:14).

 9. ¿Chuqui mi laj cʌn chaʼan bajcheʼ Jehová tsiʼ colta juntiquil hermano i cʼabaʼ Vasily?

⁹ Jehová tsiʼ colta juntiquil hermano i cʼabaʼ Vasily chaʼan miʼ sujtel ti wem bʌ anciano. Cheʼ bʌ tsaʼ waʼchoconti bajcheʼ anciano, cheʼ 26 jaxto i jabilel, tsiʼ yubi i bʌ chaʼan maxto chajpʌbilic chaʼan miʼ coltan jiñi congregación, ñumento tiʼ tojlel jiñi hermanojob añoʼ bʌ i wocol. Pero wocolix i yʌlʌ i coltaya jiñi ancianojob añobix bʌ i ñaʼtʌbal, tsaʼʌch wen cʌntesʌnti yicʼot cheʼ tsajñi yaʼ ti Cʌntesʌntel tiʼ chaʼan bʌ i Yumʌntel Dios. Tsaʼʌch i chaʼle wersa. Jumpʼejl ejemplo, tsiʼ mele jumpʼejl lista chaʼan chuqui tac yom i mel. Cheʼ tsaʼ cʼoti i mel ti jujunchajp iliyi, tsaʼ cʼunteʼ jili majlel i bʌqʼuen. Miʼ yʌl: «Jiñi muʼ bʌ c bʌcʼñan ti ñaxan, wʌle jiñʌch muʼ bʌ i yʌqʼueñon c tijicñʌyel. Cheʼ bʌ Jehová miʼ coltañon c taj jumpʼej texto chaʼan mic ñuqʼuesʌben i pusicʼal juntiquil hermano o juntiquil hermana, wen tijicña mi cubin c bʌ». Quermañujob, mi jatetla mi laʼ mel bajcheʼ Vasily yicʼot mi laʼ wʌcʼ laʼ bʌ bajcheʼ jumpʼejl eʼtijibʌl tiʼ cʼʌb Jehová, jin mi caj i cʌntesañetla chaʼan mi laʼ ñumen taj eʼtel ti congregación.

10. ¿Chuqui tsiʼ mele Abigaíl, i chuqui mi laj cʌn tiʼ tojlel?

¹⁰ Jiñi David yicʼot jiñi xucʼul bʌ i wiñicob yomobʌch coltʌntel cheʼ bʌ jiñi rey Saúl woliʼ sʌclañob. Ti jumpʼejl bʌ qʼuin, jiñi i wiñicob David tsiʼ cʼajtibeyob bʌlñʌcʼʌl juntiquil israelita i cʼabaʼ Nabal. Tsaʼʌch i meleyob iliyi come tsiʼ cʌntʌbeyob i tiñʌmeʼ yaʼ ti tiquiñal lum. Pero wen chʌc jiñi Nabal i maʼañic chuqui tsiʼ yʌqʼueyob. Iliyi tsiʼ michʼesa David i tsiʼ yʌlʌ chaʼan mi caj i tsʌnsan Nabal yicʼot jiñi i wiñicob añoʼ bʌ tiʼ yotot (1 S. 25:3-13, 22). Pero jiñi i tʼojol jax bʌ i yijñam Nabal i cʼabaʼ Abigaíl an chuqui tsiʼ mele. Ili xʼixic am bʌ cabʌl i ñaʼtʌbal tsiʼ pʌsʌ i chʼejlel come tsaʼ majli i pejcan David, tsiʼ pʌcchoco i bʌ tiʼ yoc i tiʼ sube chaʼan maʼañic miʼ chʼʌm tiʼ wenta tsaʼ bʌ melbenti i miʼ sujtel ti xtsʌnsa. Ti wen jach bʌ tʼan tiʼ sube chaʼan miʼ yʌqʼuen tiʼ wenta Jehová. Jiñi tsaʼ bʌ i yʌlʌ yicʼot tsaʼ bʌ i mele tsaʼ cʼoti tiʼ pusicʼal David i tsiʼ yʌqʼue i ñaʼtan chaʼan Jehová tsiʼ choco majlel baʼan (1 S. 25:23-28, 32-34). Abigaíl tsiʼ chaʼle wersa i pʌs jiñi wen tac i melbal, jin chaʼan Jehová tsiʼ cʼʌñʌ. Ili ora, Jehová miʼ mejlel i cʼʌn jiñi hermanajob muʼ bʌ i pʌsob i ñaʼtʌbal yicʼot cheʼ wen jach mucʼob ti tʼan chaʼan miʼ pʼʌtʼesañob i familia yicʼot jiñi congregación (Pr. 24:3; Tit. 2:3-5).

11. ¿Chuqui tsiʼ meleyob jiñi i yixicʼalob Salum, i majquiyob miʼ lajibeñob i melbal ili ora?

¹¹ Cheʼ añix ñumen cabʌl jab, jiñi i yixicʼalob Salum tsaʼ cʼʌjñiyob ti Jehová chaʼan miʼ tojʼesʌntel jiñi tsʼajc am bʌ ti Jerusalén (Neh. 2:20; 3:12). Anquese Salum juntiquilʌch yumʌl, jiñi i yixicʼalob tsaʼʌch i mulayob i mel jiñi tsʌts bʌ eʼtel yicʼot bʌbʌqʼuen bʌ (Neh. 4:15-18). Pero mach cheʼic tsiʼ meleyob jiñi wiñicob ñuc bʌ miʼ qʼuejlelob ti tecoítajob come «maʼañic tsiʼ yʌcʼʌyob i bʌ chaʼan i yeʼtel lac Yum» (Neh. 3:5). Jiñi i yixicʼalob Salum wen tijicñayʌch tsiʼ yubiyob i bʌ cheʼ bʌ ti 52 qʼuin tsaʼ ujti jiñi eʼtel (Neh. 6:15). Ili ora, an hermanajob muʼ bʌ i wen mulañob eʼtel ti chuqui miʼ mejlel tiʼ chaʼan bʌ Dios, bajcheʼ i melol i yotlel chʼujutesaya tac yicʼot cheʼ miʼ tojʼesʌntel o i cʌntʌntel. Jiñi yujiloʼ bʌ melol, cheʼ tijicñayob miʼ melob jiñi eʼtel tac yicʼot cheʼ xucʼulob wen ñuc i cʼʌjñibal chaʼan wen miʼ loqʼuel jiñi eʼtel.

12. Cheʼ bajcheʼ jiñi Tabita, ¿bajcheʼ miʼ mejlel i cʼʌñonla Jehová?

¹² Jehová tsiʼ ñijcʌbe i pusicʼal Tabita chaʼan miʼ mel wem bʌ ‹eʼtel› yicʼot miʼ ‹yʌqʼueñob i chubʌʼan jiñi mach bʌ añobic i chaʼan›, ñumento jiñi mebaʼ xʼixicob (Hch. 9:36). Come cʌlʌxix i yutslel i pusicʼal, cabʌl majqui tsiʼ yucʼtayob cheʼ bʌ tsaʼ chʌmi. Pero tsaʼʌch wen ubiyob i tijicñʌyel cheʼ bʌ jiñi apóstol Pedro tsiʼ chaʼ cuxtesa (Hch. 9:39-41). ¿Chuqui mi laj cʌn tiʼ tojlel Tabita? Chaʼan anquese xcolelontola o añix lac jabilel, mi wiñiconla o xʼixiconla, ti lac pejtelel an chuqui miʼ mejlel lac mel chaʼan mi laj coltan jiñi la quermañujob (He. 13:16).

13. ¿Bajcheʼ tsiʼ colta Jehová juntiquil hermana yujil bʌ bʌqʼuen, i cʼabaʼ Ruth, i chuqui tsaʼ cʼoti i ñaʼtan?

¹³ Juntiquil hermana yujil bʌ bʌqʼuen i cʼabaʼ Ruth tsiʼ mulaj ochel bajcheʼ misionera. Cheʼ alʌ xchʼocto, ti ora miʼ ñumel i yʌcʼ tratado tac ti jujumpʼejl otot come miʼ wen mulan subtʼan. Tsiʼ yʌlʌ: «Tsaʼ c wen mulaj jiñi eʼtel». Pero wocol miʼ yubin chaʼan miʼ pejcan jiñi quixtañujob i miʼ subeñob jiñi wen tʼan chaʼan i Yumʌntel Dios. Anquese yujil bʌqʼuen, jiñi Ruth tsaʼ ochi bajcheʼ precursora cheʼ 18 i jabilel. Cheʼ ti 1946, tsajñi yaʼ ti Cʌntesʌntel loqʼuem bʌ ti Biblia i chaʼan Galaad de la Watchtower i tsiʼ chaʼle subtʼan ti Hawái yicʼot ti Japón. Jehová tsiʼ cʼʌñʌ chaʼan miʼ suben wen tʼan jiñi quixtañujob chumuloʼ bʌ yaʼi. Cheʼ añix lʌcʼʌ 80 jab i cajel ti subtʼan, Ruth tsaʼ cʼoti i ñaʼtan iliyi: «Jehová jiñʌch am bʌ i yʌqʼueyon c pʼʌtʌlel. An i coltayon chaʼan mic sʌt jiñi c bʌqʼuen. Mic ñop chaʼan Jehová miʼ mejlel i cʼʌn majqui jach miʼ ñopben i coltaya».

14. Cheʼ bajcheʼ miʼ yʌl Efesios 3:16, 17, ¿chuqui yom mi lac mel mi la com chaʼan Jehová miʼ cʼʌñonla?

¹⁴ Cʼʌlʌl ti wajali, mach junsujmic jach bajcheʼ an i cʼʌñʌ Jehová i wiñicob. Ixcu ti lac tojlel, ¿ti chuqui mi caj i sujtesañonla? Mi caj i qʼuejlel ti bajcheʼ cʼamel mi lac chaʼlen wersa (pejcan Efesios 3:16, 17). Mi la comʌch lac melben i yeʼtel Jehová, miʼ mejlel i coltañonla chaʼan mi lac chaʼlen subtʼan yicʼot lac chʼejlel, chaʼan mi lac sujtel ti wem bʌ xcʌntesa, chaʼan mi lac ñuqʼuesʌben i pusicʼal yambʌlob, chaʼan mi lac sujtel ti wem bʌ xʼeʼtel, chaʼan mi lac chʼʌmben i sujm bajcheʼ miʼ yubiñob i bʌ yambʌlob o ti chuqui jach chaʼan miʼ tsʼʌctesan chuqui ñaʼtʌbil i chaʼan.

15. Cheʼ bajcheʼ miʼ yʌl 1 Timoteo 4:12, 15, ¿chuqui yom miʼ cʼajtibeñob Jehová jiñi xcolelob?

¹⁵ ¿xColelet i wolix baʼ taj a colel? Com lojon i coltaya jiñi wiñicob wen añobto bʌ i pʼʌtʌlel yomoʼ bʌ jumpʼejl eʼtel i miʼ sujtelob ti siervo ministerial. Ti cabʌl congregación, ñumen añob ancianojob bajcheʼ jiñi siervo ministerial. ¿Mejl baʼ wʌcʼ ti a pusicʼal chaʼan a wom a ñumen chaʼlen coltaya yaʼ ti congregación? An i tajol an hermanojob muʼ bʌ i yʌlob: «Tijicñayon cheʼ xsubtʼañon jach». Mi cheʼ baʼ wubin a bʌ, cʼajtiben Jehová chaʼan miʼ coltañet a mulan ochel bajcheʼ siervo ministerial yicʼot chaʼan miʼ yʌqʼueñet a pʼʌtʌlel chaʼan maʼ melben i yeʼtel cheʼ bajcheʼ cʼamel maʼ mejlel (Ec. 12:1). Com lojon a coltaya (pejcan 1 Timoteo 4:12, 15).

16. ¿Chuqui yom mi laj cʼajtiben Jehová, i chucoch?

¹⁶ Jehová miʼ mejlel i sujtesañonla ti chuqui jach chaʼan miʼ tsʼʌctesan chuqui ñaʼtʌbil i chaʼan. Jin chaʼan, laʼ laj cʼajtiben chaʼan miʼ coltañonla lac mulan lac melben i yeʼtel i cheʼ jiñi, laʼ laj cʼajtiben lac pʼʌtʌlel chaʼan mi lac mel. Mi xcolelontola o mi añix lac jabilel, laʼ laj cʼʌn i yorajlel am bʌ lac chaʼan, lac pʼʌtʌlel, la cujil bʌ melol yicʼot chuqui an lac chaʼan chaʼan mi la cʌqʼuen i ñuclel Jehová (Ec. 9:10). Mach la cʌcʼ ti ñumel chuqui tac miʼ mejlel lac mel tiʼ yeʼtel tiʼ caj lac bʌqʼuen o cheʼ mi lac ñaʼtan chaʼan mach mejliconla. Anquese cabʌl chuqui mi lac mel o tsʼitaʼ jach, ti lac pejtelel miʼ mejlel la cʌqʼuen i ñuclel lac Tat cheʼ bajcheʼ yom.