¿Mucʼʌch ba lac ñop chaʼan añonla tiʼ sujmlel?

 1. ¿Chuqui com la cʌl cheʼ mi lac taj ti tʼan jiñi «i sujmlel»?

¿AM BAʼ wubi chaʼan jiñi hermanojob yicʼot hermanajob miʼ yʌlob jiñi tʼan «jiñi i sujmlel»? Tajol jatet maʼ wʌl jaʼel jiñi tʼan. ¿Chuqui com la cʌl cheʼ mi lac taj ti tʼan jiñi «i sujmlel»? Jiñʌch jiñi ñopol bʌ lac chaʼan, bajcheʼ mi lac chʼujutesan Dios yicʼot bajcheʼ chumulonla. Cheʼ bʌ mi la cʌl chaʼan an majqui an tiʼ «sujmlel», woli (choncol) la cʌl chaʼan yujil chuqui miʼ cʌntesañonla jiñi Biblia i miʼ jacʼ muʼ bʌ i yʌl. Jin chaʼan, maʼañix miʼ ñop i cʌntesa tac ñopbalʌl tac mach bʌ i sujmic i ti ili i pañimil (mulawil) Satanás ñumen tijicña chumul bajcheʼ yambʌ quixtañujob (Jn. 8:32).

 2. Cheʼ bajcheʼ miʼ yʌl Juan 13:34, 35, ¿chuqui jiñi tsaʼ bʌ i wen mulayob cabʌl quixtañujob chaʼan miʼ chʼʌmob estudio?

² ¿Chucoch tsaʼ mulaj a chʼʌm estudio? Tajol tsaʼ mulaj jiñi wem bʌ i melbalob (chaʼlibalob) jiñi i testigojob Jehová (1 P. 2:12). O tajol cheʼ miʼ pʌsob chaʼan mucʼʌch i wen cʼuxbiñob i bʌ. Jiñʌch tsaʼ bʌ i wen mulayob cabʌl wiñicob xʼixicob (quixtañujob) cheʼ bʌ cojaxto tsaʼ cʼotiyob ti jumpʼejl Yotlel tempa bʌ, ili jiñʌch muʼ bʌ i chʌn cʼajtesañob i mach jiñic tsaʼ bʌ ajli yaʼ ti plataforma. Ili maʼañic miʼ yʌcʼ ti toj sajtel lac pusicʼal come Jesús tsiʼ yʌlʌ chaʼan mi caj i cʌjñel jiñi xcʌntʼañob i chaʼan cheʼ miʼ cʼuxbiñob bʌ (pejcan Juan 13:34, 35). Pero mi la com chaʼan pʼʌtʌl lac ñopoñel (chʼujbiya), anto chuqui yom mi lac mel.

 3. ¿Chuqui miʼ mejlel ti ujtel mi jiñi lac ñopoñel ti Dios yaʼ jach cʌyʌl ti jiñi cʼuxbiya muʼ bʌ i pʌsbeñob i bʌ jiñi hermanojob?

³ Jiñi lac ñopoñel mach yaʼ jach yom cʌyʌl ti jiñi cʼuxbiya muʼ bʌ i pʌsbeñob i bʌ jiñi i sujm bʌ xñoptʼañob. ¿Chucoch? Come mi yaʼ jach cʌyʌl jiñi lac ñopoñel ti jiñi cʼuxbiya, miʼ mejlel lac sʌt jiñi lac ñopoñel. Jumpʼejl ejemplo, miʼ mejlel laj cʌy lac melben i yeʼtel (troñel) Jehová mi juntiquil hermano, cheʼto jaʼel juntiquil anciano o juntiquil precursor miʼ mel tsʌts bʌ mulil. Cheʼ jaʼel, miʼ mejlel laj cʌy lac melben i yeʼtel Jehová mi juntiquil hermano miʼ melbeñonla mach bʌ weñic o miʼ tech i contrajin jiñi i sujmlel i miʼ yʌl chaʼan mach añoñicla tiʼ sujm bʌ ñopbalʌl. Jin chaʼan, yom wem bʌ i yamigojonla Jehová mi la com chaʼan pʼʌtʌl lac ñopoñel. Jiñi muʼ bʌ la cubin tiʼ tojlel Jehová yicʼot tiʼ tejclum miʼ mejlel i coltañonla lac taj majlel lac ñopoñel. Pero ñuc i cʼʌjñibal jaʼel cheʼ bʌ mi lac pejcan jiñi Biblia, mi lac chʼʌmben i sujm chuqui woli (yʌquel) laj cʌn majlel yicʼot mi lac sʌclan chaʼan mi lac ñaʼtan chaʼan woli laj cʌn i sujmlel tiʼ tojlel Jehová (Ro. 12:2).

 4. Cheʼ bajcheʼ miʼ yʌl Mateo 13:3-6, 20, 21, ¿chuqui miʼ mel jiñi quixtañujob cheʼ miʼ ñusañob wocol chaʼan i ñopoñelob ti Dios?

⁴ Jesús tsiʼ yʌlʌ chaʼan an ‹tijicñayoʼ bʌ i pusicʼal› mi caj i jacʼob jiñi i sujmlel, pero miʼ jilelob i ñopoñel cheʼ miʼ cʼotel i ñusañob wocol (pejca Mateo 13:3-6, 20, 21). Tajol maʼañic miʼ chʼʌmbeñob i sujm chaʼan cheʼ miʼ jacʼbeñob i tʼan Jesús mi caj i ñusañob wocol (Mt. 16:24, TNM). Tajol miʼ ñaʼtañob chaʼan cheʼ miʼ sujtelob ti xñoptʼan luʼ wen chuqui mi caj i yujtel tiʼ tojelob. Pero ti ili pañimil wersajʌch mi caj lac taj wocol. An tac chuqui miʼ mejlel ti ujtel ti lac tojlel i miʼ chilbeñonla lac tijicñʌyel (Sal. 6:6; Ec. 9:11, 12).

 5. ¿Bajcheʼ miʼ pʌsob cabʌl i wiñicob Jehová chaʼan mucʼʌch i ñopob chaʼan añobʌch tiʼ sujmlel?

⁵ Cabʌl i wiñicob Dios miʼ pʌsob chaʼan mucʼʌch i ñopob chaʼan añobʌch tiʼ sujmlel. ¿Bajcheʼ la cujil? Come maʼañic miʼ sʌtob i ñopoñel cheʼ bʌ juntiquil hermano an chuqui mach bʌ weñic miʼ mel tiʼ tojlelob o mach bʌ yomic miʼ mel juntiquil xñoptʼan (Sal. 119:165). Ti jujumpʼejl wocol muʼ bʌ i ñusañob miʼ ñumen pʼʌtʼañob i ñopoñel (Stg. 1:2-4). ¿Chuqui yom mi lac mel chaʼan pʼʌtʌl miʼ yajñel lac ñopoñel jaʼel?

 6. ¿Baqui chuculob i ñopoñel jiñi xcʌntʼañob ti ñaxam bʌ siglo?

⁶ Jiñi xñoptʼañob ti ñaxam bʌ siglo añob i ñopoñel come i cʌñʌyob jiñi Tsʼijbujel yicʼot i cʌntesa tac Jesucristo, yom bʌ i yʌl, «i sujmlel jini wen tʼan» (Gá. 2:5). Jiñi i sujmlel jiñʌch pejtelel muʼ bʌ i ñopob jiñi xñoptʼañob, yaʼ ochem cheʼ bʌ tsaʼ chʌmi (sajti) Jesús yicʼot cheʼ bʌ tsaʼ chaʼ cuxtʌyi. Jiñi apóstol Pablo tsaʼʌch i ñopo chaʼan i sujmʌch ili cʌntesʌntel tac. ¿Chucoch la cujilʌch? Come tsiʼ cʼʌñʌ jiñi Tsʼijbujel chaʼan miʼ pʌs chaʼan «wersa miʼ yubin wocol jini Cristo. Wersa miʼ tejchel loqʼuel baʼan chʌmeñoʼ bʌ» (Hch. 17:2, 3). Jiñi ñaxam bʌ xñoptʼañob tsiʼ jacʼʌyob jiñi cʌntesʌntel tac i tiʼ sʌclʌbeyob i coltaya jiñi chʼujul bʌ espíritu chaʼan miʼ chʼʌmbeñob i sujm jiñi i Tʼan Dios. Tsiʼ wen qʼueleyob mi chuculʌch ti jiñi Tsʼijbujel jiñi cʌntesa tac (Hch. 17:11, 12; He. 5:14). Jiñi i ñopoñelob mach yaʼic chucul chaʼan bajcheʼ yubil miʼ yubiñob i bʌ. I maʼañic tsiʼ melbeyob i yeʼtel Jehová chaʼan jach tijicña miʼ yubiñob i bʌ cheʼ yaʼañob yicʼot yambʌ xñoptʼañob. Yaʼʌch chuculob i ñopoñel ti jiñi i sujm bʌ i ‹ñaʼtʌbal Dios› (Col. 1:9, 10).

 7. ¿Bajcheʼ mi caj i coltañonla cheʼ mi lac ñop jiñi i sujmlel tac am bʌ ti Biblia?

⁷ Maʼañic baʼ ora miʼ qʼuextʌyel jiñi i sujmlel tac am bʌ tiʼ Tʼan Dios (Sal. 119:160). Jumpʼejl ejemplo, maʼañic miʼ qʼuextʌyel cheʼ bʌ juntiquil hermano miʼ michʼesañonla o miʼ mel tsʌts bʌ mulil. Cheʼ jaʼel, maʼañic miʼ qʼuextʌyel cheʼ bʌ an lac wocol tac. Jin chaʼan, yom mi lac wen cʌn jiñi cʌntesa tac am bʌ ti Biblia yicʼot lac ñop chaʼan i sujmʌch. Cheʼ bajcheʼ i wiʼ juntejc teʼ miʼ coltan chaʼan maʼañic miʼ bujchel cheʼ bʌ miʼ ñumel pʼʌtʌl bʌ icʼ, jiñi lac ñopoñel chucul bʌ ti jiñi i sujmlel tac am bʌ ti Biblia mi caj i coltañonla chaʼan xucʼul mi la cajñel cheʼ bʌ mi lac ñusan tsʌts bʌ wocol tac. ¿Bajcheʼ miʼ mejlel lac ñumen ñaʼtan chaʼan añoñʌchla tiʼ sujmlel?

 8. Cheʼ bajcheʼ miʼ yʌl 2 Timoteo 3:14, 15 (TNM), ¿bajcheʼ tsaʼ cʼoti i ñaʼtan Timoteo chaʼan añʌch tiʼ sujmlel?

⁸ Timoteo yujil chaʼan añʌch tiʼ sujmlel. ¿Bajcheʼ tsaʼ cʼoti i ñaʼtan? (Pejcan 2 Timoteo 3:14, 15, TNM).b Jiñi i ñaʼ yicʼot i chuchuʼ (coʼ) jiñʌch tsaʼ bʌ i ñaxan cʌntesayob Timoteo chaʼan «jiñi chʼujul bʌ tsʼijbujel tac». Pero cheʼ jaʼel, tsaʼʌch i yʌqʼue i yorajlel i tsaʼʌch i bajñel chaʼle wersa i pejcan. Jin chaʼan, tsiʼ ñopo chaʼan añobʌch tiʼ sujmlel. Ti wiʼil, Timoteo, i ñaʼ yicʼot i chuchuʼ tsiʼ ñopoyob jiñi i cʌntesa tac Cristo. Tsaʼʌch i wen mulaj jiñi cʼuxbiya muʼ bʌ i pʌsbeñob i bʌ jiñi xcʌntʼañob i chaʼan Jesús, i tiʼ sujm yomʌch ajñel yicʼotob jiñi hermanojob muʼ bʌ i chʼujutesañob Dios jaʼel yicʼot yom i cʌntañob (Fil. 2:19, 20). Pero jiñi i ñopoñel mach yaʼ cʌyʌl cheʼ miʼ cʼuxbin yambʌlob, yaʼʌch cʌyʌl ti jiñi cʌntesa tac am bʌ ti Biblia tsaʼ bʌ i yʌqʼue i ñaʼtan chaʼan jiñʌch jiñi i sujmlel i tsiʼ colta chaʼan yom sujtel tiʼ yamigo Dios. Joñonla jaʼel yom mi lac wen pejcan chuqui miʼ yʌl jiñi Biblia tiʼ tojlel Jehová yicʼot mi lac wen ñaʼtan chaʼan mi laj cʌn chuqui i sujm.

 9. ¿Chuqui uxchajp i sujmlel yom mi lac wen ñop?

⁹ An uxchajp i sujmlel yom bʌ mi lac wen ñop. Ñaxam bʌ, chaʼan Jehová jiñʌch tsiʼ mele (pʌtʌ) pejtel chuqui an (Éx. 3:14, 15, TNM; He. 3:4; Ap. 4:11). I chaʼpʼejlel, chaʼan yom mi lac ñop chaʼan jiñi Biblia miʼ chʼʌm tilel muʼ bʌ i yʌl Dios (2 Ti. 3:16, 17). I yuxpʼejlel, chaʼan Jehová chajpʌbil i chaʼan quixtañujob muʼ bʌ i chʼujutesañob tiʼ coltaya Cristo: Jiñʌch i testigojob Jehová (Is. 43:10-12; Jn. 14:6; Hch. 15:14). Chaʼan mi lac ñop jiñi uxchajp i sujmlel, mach wersajic yom mi lac luʼ cʌn chuqui miʼ yʌl jiñi Biblia. La com lac «wen ñaʼtan pañimil» chaʼan mi lac ñop chaʼan añoñʌchla tiʼ sujmlel (Pr. 3:21).

10. ¿Chuqui yom la cujil melol cheʼ laj cʌñʌyix jiñi i sujmlel?

¹⁰ Cheʼ laj cʌñʌyix jiñi i sujmlel chaʼan Jehová, jiñi Biblia yicʼot i tejclum Dios, yom la cujil cʼʌñol jiñi Tsʼijbujel chaʼan mi lac pʌsben jiñi yambʌ quixtañujob. ¿Chucoch? Come jiñi xñoptʼañonbʌla an ti lac wenta chaʼan mi laj cʌntesan jiñi quixtañujob ti jiñi i sujmlel am bʌ laj cʌñʌ (1 Ti. 4:16).c I cheʼ bʌ mi lac chaʼlen wersa laj coltan jiñi quixtañujob chaʼan miʼ ñopob chaʼan i sujmʌch chuqui miʼ yʌl jiñi Biblia, jiñi lac ñopoñel miʼ ñumen pʼʌtʼan.

11. ¿Chuqui wem bʌ ejemplo tsiʼ cʌybeyonla Pablo cheʼ mi laj cʌntesan yambʌlob?

¹¹ Cheʼ bʌ Pablo tsiʼ cʌntesa yambʌlob, tsiʼ chaʼle wersa chaʼan miʼ ‹wen tsictesʌbeñob i sujmlel Jesús cheʼ bajcheʼ tsʼijbubil tiʼ mandar Moisés yicʼot tiʼ jun jiñi xʼaltʼañob› (Hch. 28:23). ¿Bajcheʼ miʼ mejlel lac lajiben i melbal cheʼ bʌ an majqui woli laj cʌntesʌben jiñi i sujmlel am bʌ ti Biblia? Mach cojach yom mi lac pʌsben chuqui miʼ yʌl jiñi Biblia. Yom mi laj coltan i chʼʌmben i sujm jiñi woli bʌ i cʌn chaʼan miʼ mejlel i lʌcʼtesan i bʌ ti Jehová. Mach la comic chaʼan miʼ jacʼ i chʼʌm jiñi i sujmlel chaʼan jach miʼ qʼuelonla ti ñuc, la com miʼ jacʼ chaʼañʌch i sujmʌch miʼ qʼuel woli bʌ i cʌn tiʼ tojlel Dios.

12, 13. ¿Bajcheʼ miʼ mejlel i coltan i yalobilob jiñi tatʌlob chaʼan maʼañic miʼ cʌyob jiñi i sujmlel?

¹² Tatʌlob, laʼ wom chaʼan jiñi laʼ walobilob miʼ chʌn ajñelob ti jiñi i sujmlel. Tajol mi laʼ ñaʼtan chaʼan pʼʌtʌl mi caj i yajñel i ñopoñelob come an wem bʌ i yamigojob yaʼ ti congregación. Pero mach jasʌlic jiñi, jiñi laʼ walobilob yom miʼ bajñel ñaʼtañob chaʼan i sujmʌch chuqui miʼ ñopob. I cʼʌjñibal i chaʼañob cheʼ miʼ sujtelob tiʼ yamigo Dios i miʼ ñopob chaʼan yaʼ ti Biblia mi lac taj jiñi i sujmlel.

¹³ Mi laʼ wom laʼ cʌntesan laʼ walobilob ti jiñi i sujmlel i chaʼan bʌ Dios, yom mi laʼ pʌs chaʼan mucʼʌch laʼ pejcan jiñi Biblia. Aqʼuenla i yorajlel chaʼan mi laʼ ñaʼtan chuqui mi laʼ pejcan. Cheʼ jiñi, mi caj laʼ cʌntesan laʼ walobilob chaʼan cheʼʌch yom miʼ melob jaʼel. Cheʼ bajcheʼ mi laʼ mel cheʼ an majqui mi laʼ wʌqʼuen estudio, pʌsben laʼ walobilob bajcheʼ miʼ mejlel i cʼʌñob jiñi eʼtijib tac am bʌ lac chaʼan, bajcheʼ jiñi Coltʌntel chaʼan estudio, jiñi BIBLIOTECA TI INTERNET Watchtower yicʼot lac jun tac. Cheʼ bajcheʼ jiñi, mi caj laʼ coltan laʼ walobilob chaʼan miʼ cʼuxbiñob Jehová yicʼot chaʼan miʼ jacʼbeñob i coltaya jiñi muʼ bʌ i yʌqʼueñonla jiñi chʼujul bʌ bʌlñʌcʼʌl: Jiñi xucʼul bʌ xʼeʼtel am bʌ cabʌl i ñaʼtʌbal (Mt. 24:45-47). Mach cojach yom mi laʼ pʌsbeñob jiñi cʌntesa tac mach bʌ wocolic ti ñaʼtʌntel. Coltañob chaʼan miʼ cʌñob jiñi «i sujmlel Dios wocol bʌ ti cʌñol», pero yom mi laʼ chʼʌm ti ñuc jaypʼejl i jabilelob yicʼot bajcheʼ cʼamel miʼ mejlel i cʌñob, cheʼ bajcheʼ jiñi, pʼʌtʌl mi caj i yajñelob i ñopoñel (1 Co. 2:10).

14. ¿Chucoch yom mi lac wen pejcan jiñi profecía tac am bʌ ti Biblia? (Qʼuele jaʼel jiñi recuadro «¿Mejl baʼ tsictesan ili profecía tac?»).

¹⁴ Jiñi profecía tac jiñʌch junchajp wen ñuc bʌ i cʼʌjñibal muʼ bʌ i chʼʌm tilel i Tʼan Dios i miʼ coltañonla chaʼan pʼʌtʌl miʼ yajñel lac ñopoñel. ¿Baqui bʌ profecía an i wen pʼʌtʼesa a ñopoñel? Tajol mi lac ñaʼtan jiñi profecía muʼ bʌ i yʌl chaʼan jiñi «cojix bʌ qʼuin tac» (Mt. 24:3, 7; 2 Ti. 3:1-5). Pero an profecía tac tsaʼix bʌ tsʼʌctiyi mejl bʌ i pʼʌtʼesan lac ñopoñel. Jumpʼejl ejemplo, ¿mejl baʼ tsictesan bajcheʼ tsaʼ tsʼʌctiyi yicʼot bajcheʼ woliʼ bej tsʼʌctiyel jiñi profecía tac am bʌ ti capítulo 2 yicʼot 11 i chaʼan Daniel?d Mi jiñi lac ñopoñel yaʼʌch chucul ti jiñi i cʌntesa tac Biblia, mi caj i mejlel lac lʌtʼ baqui jach bʌ wocol. Laʼ laj qʼuel tiʼ tojlel jiñi hermanojob tsaʼ bʌ i cuchuyob tsʌts bʌ contrajintel yaʼ ti Alemania cheʼ ti Segunda Guerra Mundial. Anquese ti jimbʌ ora maʼañic tsaʼ wen chʼʌmbenti i sujm jiñi profecía tac muʼ bʌ i yʌl chaʼan jiñi cojix bʌ qʼuin tac, tsaʼʌch i wen ñopoyob chuqui yujilob ti jiñi Biblia.

15-17. ¿Bajcheʼ tsiʼ colta jiñi hermanojob i wen pejcʌntel jiñi Biblia cheʼ bʌ jiñi nazijob tsiʼ contrajiyob?

¹⁵ Cabʌl hermanojob yaʼ ti Alemania tsaʼ otsʌntiyob ti jiñi cárcel i chaʼan nazijob. Hitler yicʼot Heinrich Himmler, i yum jiñi soldadojob, tiʼ tsʼaʼleyob jiñi i testigojob Jehová. Juntiquil hermana tsiʼ yʌlʌ chaʼan jiñi Himmler tiʼ sube jiñi hermanajob añoʼ bʌ ti jiñi cárcel ili tʼan: «¡Mi laʼ wom, jiñi laʼ Dios Jehová miʼ mejlel i chaʼlen yumʌntel yaʼ ti panchan, pero ila ti Pañimil joñon lojon mi lon c chaʼlen yumʌntel! ¡Muʼto caj laj qʼuel majqui mi caj i ñumen cuch, jatetla o joñon lojon!». ¿Chuqui tsiʼ colta jiñi i wiñicob Jehová chaʼan bej xucʼul miʼ yajñelob tiʼ tojlel?

¹⁶ Jiñi xPejcaya bibliajob yujilob chaʼan ti 1914 tsiʼ teche i mel i yeʼtel jiñi i Yumʌntel Dios. I maʼañic tsaʼ toj sajtiyob i pusicʼal cheʼ tsaʼ wen ticʼlʌntiyob. Jiñi i tejclum Jehová yujil chaʼan mi jumpʼejlic i yumʌntel wiñic miʼ mejlel i mʌctan chaʼan miʼ mejlel chuqui yom Dios. Hitler maʼañic mi caj i mejlel i jisan jiñi i sujm bʌ chʼujutesaya yicʼot i waʼchocon jumpʼejl yumʌntel mejl bʌ i jisan jiñi i Yumʌntel Dios. Jiñi hermanojob yujilob chaʼan mi caj i jilel i yumʌntel Hitler.

¹⁷ ¡I cheʼʌch tsaʼ ujti! Mach jalic tsaʼ ñumi, jiñi i yumʌntel nazijob tsaʼ jili i jiñi Himmler, jiñi wiñic tsaʼ bʌ i yʌlʌ chaʼan ila ti Pañimil jiñʌch miʼ chaʼleñob yumʌntel, tsaʼ wersa putsʼi. Cheʼ bʌ woli ti putsʼel, tsaʼ cʼoti i taj juntiquil hermano tsaʼ bʌ i yotsa ti cárcel am bʌ i jol i cʼabaʼ bajcheʼ Lübke. Come tsaʼix mʌlbenti (jotbenti), tiʼ sube jiñi hermano: «Weno, xPejcaya biblia, ¿chuqui mi caj i yujtel wʌle?». Jiñi hermano Lübke tiʼ sube chaʼan jiñi i testigojob Jehová ti bele ora tsiʼ ñaʼtayob chaʼan jiñi i yumʌntel nazijob mi caj i jilel yicʼot chaʼan mi caj i yʌjqʼuelob ti libre. Ti jimbʌ ora, Himmler, jiñi wiñic tsaʼ bʌ i yʌlʌ mach tac bʌ weñic tiʼ tojlel i testigojob Jehová, maʼañix chuqui tsiʼ yʌlʌ. Mach jalic tsaʼ ñumi, i tiʼ tsʌnsa i bʌ. ¿Chuqui mi laj cʌn? Chaʼan jiñi i wen pejcʌntel jiñi Biblia yicʼot jiñi profecía tac, mi caj i coltañonla chaʼan mi lac pʼʌtʼesan lac ñopoñel yicʼot chaʼan xucʼul mi la cajñel cheʼ mi lac taj laj contrajintel (2 P. 1:19-21).

18. Cheʼ bajcheʼ miʼ yʌl Juan 6:67, 68, ¿chucoch ñuc i cʼʌjñibal cheʼ an ‹cabʌl lac ñaʼtʌbal yicʼot mi lac chʼʌmben i sujm ti tsʼʌcʌl›, cheʼ bajcheʼ tsiʼ yʌlʌ Pablo?

¹⁸ Ti lac pejtelel yom mi lac pʌs jiñi cʼuxbiya muʼ bʌ i yʌcʼ ti cʌjñel jiñi i sujm bʌ xñoptʼañob. Pero cheʼ jaʼel ñuc i cʼʌjñibal cheʼ an ‹cabʌl lac ñaʼtʌbal yicʼot mi lac chʼʌmben i sujm ti tsʼʌcʌl› (Fil. 1:9). Mi mach cheʼiqui, miʼ mejlel lac toy jiñi ‹i cʌntesa wiñicob cheʼ bajcheʼ i yopol teʼ muʼ bʌ i ñijcan icʼ, maña jax bʌ miʼ melob tiʼ bajñel sojquemal chaʼan miʼ lotiñonla›, cheʼ bajcheʼ jiñi tsaʼ bʌ cʌn ajñiyob tiʼ testigojob Jehová i miʼ contrajiñob jiñi i sujmlel (Ef. 4:14). Ti wajali, cheʼ bʌ jiñi xcʌntʼañob i chaʼan Jesús tsiʼ cʌyʌyob, jiñi apóstol Pedro tsiʼ jamʌ alʌ chaʼan Jesús miʼ sub ‹jiñi tʼan chaʼan bʌ cuxtʌlel mach bʌ añic miʼ jilel› (pejcan Juan 6:67, 68). Anquese ti jimbʌ ora Pedro maʼañic tsiʼ wen chʼʌmbe i sujm jiñi tʼan tac, chʌn xucʼulʌch tsaʼ ajñi come yujilʌch i sujmlel tiʼ tojlel Cristo. Mi joñonla mi lac chʌn ñop chaʼan jiñi Biblia mucʼʌch i yʌl i sujmlel, jiñi lac ñopoñel chʌn pʼʌtʌl mi caj i yajñel cheʼ bʌ mi lac ñusan contrajintel i cheʼ jaʼel, mi caj i mejlel laj coltan yambʌlob chaʼan miʼ mejlel i pʼʌtʼesañob i ñopoñel (2 Jn. 1, 2).