Chʌn pʌsʌ wem bʌ a ñaʼtʌbal cheʼ bʌ an ti wocol a xucʼtʌlel

 1. ¿Chuqui yom i yʌl cheʼ mi lac pʌs wem bʌ lac ñaʼtʌbal? (2 Timoteo 4:5).

AN I tajol wocol chaʼan xucʼul mi la cajñel tiʼ tojlel Jehová yicʼot i yorganización cheʼ bʌ mi lac ñusan jumpʼejl wocol. ¿Chuqui mi caj i coltañonla laj cuch? Jiñʌch cheʼ mi lac pʌs wem bʌ lac ñaʼtʌbal, chʌn yʌxʌl la co yicʼot xucʼulonla ti lac ñopoñel (pejcan 2 Timoteo 4:5). ¿Bajcheʼ mi lac pʌs wem bʌ lac ñaʼtʌbal? Jiñʌch cheʼ maʼañic mi lac michʼan, mi lac wen ñaʼtan muʼ bʌ caj lac mel (chaʼlen) yicʼot mi lac chaʼlen wersa chaʼan mi laj qʼuel jiñi muʼ bʌ i yujtel cheʼ bajcheʼ miʼ qʼuel Jehová. Mi mucʼʌch lac mel, jiñi muʼ bʌ la cubin maʼañic mi caj i soc lac pensar.

 2. ¿Chuqui mi caj laj qʼuel ti ili estudio?

² Ti jiñi yambʌ estudio, tsaʼ lac taja ti tʼan uxpʼejl wocol mach bʌ yaʼic miʼ yujtel ti congregación. Ti ili estudio, mi caj laj qʼuel uxpʼejl wocol muʼ bʌ i mejlel ti ujtel yaʼ ti congregación yicʼot muʼ bʌ i mejlel i yʌcʼ chaʼan mi laj cʌy lac pʌs lac xucʼtʌlel tiʼ tojlel Jehová: Cheʼ bʌ mi lac ñaʼtan chaʼan juntiquil hermano tsiʼ mele mach bʌ weñic ti lac tojlel, cheʼ bʌ mi lac tojʼesʌntel yicʼot cheʼ wocol mi la cubin chaʼan mi lac jacʼ chuqui tac miʼ qʼuextan jiñi organización. ¿Chuqui miʼ mejlel lac mel chaʼan mi lac chʌn pʌs wem bʌ lac ñaʼtʌbal yicʼot xucʼul mi la cajñel ti Jehová yicʼot tiʼ yorganización cheʼ bʌ mi lac ñusan tac iliyi?

 3. ¿Chuqui miʼ mejlel ti ujtel mi woli lac ñaʼtan chaʼan juntiquil hermano tsiʼ mele mach bʌ weñic ti lac tojlel?

³ ¿Am baʼ ñaʼta chaʼan juntiquil hermano tsiʼ mele mach bʌ weñic ti a tojlel, tajol juntiquil am bʌ i yeʼtel ti congregación? Tajol jiñi hermano mach yomic i ticʼlañet (Rom. 3:23; Sant. 3:2). Pero jatet cʼux tsaʼ wubi. Tajol maʼañic maʼ mejlel ti wʌyel tiʼ caj jiñi i tajol maʼ cʼajtiben a bʌ: «Mi juntiquil hermano tsiʼ mele jiñi, ¿jiñʌch ba i yorganización Dios iliyi?». Jiñʌch yom bʌ Satanás chaʼan maʼ ñaʼtan (2 Cor. 2:11). Iliyi miʼ mejlel i ñajtʼesañonla ti Jehová yicʼot tiʼ yorganización. Jin chaʼan, mi maʼ ñaʼtan chaʼan juntiquil hermano o juntiquil hermana tsiʼ mele mach bʌ weñic ti a tojlel, ¿chuqui miʼ mejlel a mel chaʼan maʼ chʌn pʌs wem bʌ a ñaʼtʌbal i maʼañic maʼ ñaʼtan mach bʌ weñic?

 4. a) ¿Chuqui tsiʼ mele José chaʼan miʼ chʌn pʌs wem bʌ i ñaʼtʌbal cheʼ bʌ tsaʼ ticʼlʌnti? (Génesis 50:19-21). b) ¿Chuqui mi laj cʌn tiʼ tojlel?

⁴ Mach a lot a michʼajel ti a pusicʼal. Cheʼ bʌ José xcolelto, jiñi i yerañob tsiʼ ticʼlayob. Tiʼ tsʼaʼleyob i tsaʼto i ñaʼtayob i tsʌnsan (Gn. 37:4, 18-22). Tsiʼ choñoyob bajcheʼ xyaj eʼtel (troñel). Tiʼ caj jiñi, 13 jab tsiʼ ñusa tsʌts tac bʌ wocol. Cheʼ cheʼic yom tsaʼ mejli i cʼajtiben i bʌ mi Jehová mucʼʌch i cʼuxbin yicʼot mi tsaʼix i cʌyʌ. Pero maʼañic tsiʼ loto i michʼajel. Tsiʼ chʌn pʌsʌ wem bʌ i ñaʼtʌbal i maʼañic tsaʼ michʼa. I, cheʼ bʌ tsaʼ mejli i yʌqʼuen i toj i mul jiñi i yerañob, maʼañic tsiʼ mele, tsiʼ pʌsʌ i cʼuxbiya i tsiʼ ñusʌbeyob i mul (Gn. 45:4, 5). ¿Chucoch tsiʼ mele jiñi? Come tsiʼ wen ñaʼta chuqui yom miʼ mel. Maʼañic tsiʼ cʌlʌx ñaʼta jiñi i wocol, tsiʼ ñaʼta chuqui yom Jehová (pejcan Génesis 50:19-21). ¿Chuqui mi laj cʌn? Mi an majqui miʼ mel mach bʌ weñic ti a tojlel, mach yomic maʼ michʼan i mach a ñaʼtan mach bʌ weñic tiʼ tojlel Jehová o maʼ cʼajtiben a bʌ mi tsaʼix ñajʌyi i chaʼañet. Wen ñaʼtan bajcheʼ woli (choncol) i coltañet chaʼan maʼ cuch jiñi wocol. Cheʼ jaʼel, yom maʼ ñusʌben i mul jiñi hermano i cʼajtesan chaʼan «jiñi cʼuxbiya miʼ ñusan cabʌl mulil» (1 Ped. 4:8).

 5. ¿Chuqui tsiʼ mele Miqueas chaʼan miʼ chʌn pʌs wem bʌ i ñaʼtʌbal cheʼ bʌ tsaʼ melbenti mach bʌ weñic tsiʼ yubi?

⁵ Laʼ laj qʼuel tsaʼ bʌ ujti tiʼ tojlel juntiquil anciano ti Sudamérica i cʼabaʼ Miqueas.b Ti jumpʼejl bʌ qʼuin, mach weñic tsiʼ yubi bajcheʼ tsiʼ pejcayob chaʼtiqui uxtiquil ancianojob. Miʼ yʌl: «Maʼañic baʼ ora ñusʌbil c chaʼan bajcheʼ jiñi. Tsiʼ wen acʼʌyon ti pensar. Maʼañic mic mejlel ti wʌyel i mic chaʼlen uqʼuel tiʼ caj maʼañic mic ñaʼtan chuqui yom mic mel». Pero Miqueas tsiʼ chʌn pʌsʌ wem bʌ i ñaʼtʌbal i tsiʼ chaʼle wersa chaʼan wen jach chuqui miʼ ñaʼtan. Tsiʼ wen melbe oración Jehová chaʼan miʼ cʼajtiben i yespíritu yicʼot i pʼʌtʌlel chaʼan miʼ cuch. Cheʼ jaʼel, tiʼ sʌcla información ti jiñi lac jun tac. ¿Chuqui mi laj cʌn? Mi maʼ ñaʼtan chaʼan an majqui tsiʼ mele mach bʌ weñic ti a tojlel, mach yomic maʼ michʼan i chaʼlen wersa chaʼan maʼañic maʼ ñaʼtan mach bʌ weñic. Tajol an chuqui tac tsaʼ ujti tsaʼ bʌ i yʌcʼʌ chaʼan jiñi quixtañu miʼ yʌl o miʼ mel bajcheʼ jiñi, i mach a wujilic. Jin chaʼan, laj suben Jehová i cʼajtiben chaʼan miʼ coltañet a qʼuel jiñi tsaʼ bʌ ujti cheʼ bajcheʼ miʼ qʼuel jiñi hermano. Cheʼ maʼ mel iliyi mi caj i coltañet chaʼan wen chuqui maʼ ñaʼtan tiʼ tojlel i maʼ ñusʌben i mul (Pr. 19:11). Cʼajtesan chaʼan Jehová woli (yʌquel) i laj qʼuel jiñi wocol yicʼot mi caj i yʌqʼueñet a pʼʌtʌlel chaʼan maʼ cuch (2 Cr. 16:9; Ec. 5:8).

 6. ¿Chucoch ñuc i cʼʌjñibal cheʼ mi laj qʼuel jiñi tojʼesʌntel muʼ bʌ i yʌcʼ Jehová bajcheʼ junchajp bajcheʼ miʼ pʌs cʼuxbiya? (Hebreos 12:5, 6, 11).

⁶ Cʼuxʌch cheʼ bʌ mi lac tojʼesʌntel. Pero, mi jin jach mi lac ñaʼtan jiñi, tajol maʼañic mi caj laj qʼuel ti ñuc jiñi lac tojʼesʌntel i mi lac ñaʼtan chaʼan mach weñic o ñoj tsʌts bajcheʼ tsaʼ aqʼuentiyonla. Cheʼ jaʼel, tajol maʼañic mi lac taj laj qʼuel junchajp ñuc bʌ i cʼʌjñibal: Chaʼan jiñi lac tojʼesʌntel junchajpʌch bajcheʼ miʼ pʌsbeñonla i cʼuxbiya Jehová (pejcan Hebreos 12:5, 6, 11). Mi jin mi la cʌcʼ ti ñuc bajcheʼ yubil mi la cubin, mi la cʌcʼ chaʼan Satanás miʼ ticʼlañonla. Yom chaʼan maʼañic mi lac jacʼ jiñi lac tojʼesʌntel yicʼot chaʼan mi lac ñajtʼesan lac bʌ tiʼ tojlel Jehová yicʼot jiñi congregación. ¿Chuqui miʼ mejlel a mel chaʼan maʼ chʌn pʌs wem bʌ a ñaʼtʌbal mi tsaʼ tojʼesʌntiyet?

 7. a) Cheʼ bajcheʼ mi laj qʼuel ti jiñi dibujo tac, ¿chuqui ti eʼtel tsaʼ aqʼuenti Pedro cheʼ bʌ tsaʼʌch i jacʼʌ i tojʼesʌntel? b) ¿Chuqui mi laj cʌn tiʼ tojlel Pedro?

⁷ Jacʼʌ a tojʼesʌntel i qʼuextan a bʌ. Jesús mach junsujtelic jach tsiʼ tojʼesa Pedro tiʼ wut jiñi yambʌ apóstolob (Mar. 8:33; Luc. 22:31-34). ¡Pedro tsaʼʌch i wen ubi quisin! Pero xucʼul tsaʼ ajñi tiʼ tojlel Jesús, tsiʼ jacʼʌ i tojʼesʌntel i tsiʼ cʌñʌ ti jiñi i sajtemal tac. Jehová tsiʼ yʌqʼue i bendición chaʼan jiñi i xucʼtʌlel i tsiʼ yʌqʼue ñuc tac bʌ eʼtel yaʼ ti congregación (Juan 21:15-17; Hech. 10:24-33; 1 Ped. 1:1). ¿Chuqui mi laj cʌn? Chaʼan mach jiñic jach yom mi lac ñaʼtan chaʼan quisintic jax tsaʼ la cubi, yom mi lac jacʼ lac tojʼesʌntel i mi laj qʼuextan lac bʌ. Mi mucʼʌch a mel, ñumen an a cʼʌjñibal tiʼ wut Jehová yicʼot tiʼ tojlel jiñi hermanojob.

8, 9. ¿Bajcheʼ yubil tsiʼ yubi i bʌ Bernardo cheʼ bʌ tsaʼ tojʼesʌnti, pero chuqui tsiʼ colta chaʼan miʼ qʼuextan i pensar?

⁸ Laʼ laj qʼuel tsaʼ bʌ ujti tiʼ tojlel Bernardo, juntiquil hermano ti Mozambique. Tiʼ sʌtʌ i yeʼtel bajcheʼ anciano. ¿Bajcheʼ yubil tsiʼ yubi i bʌ? Miʼ yʌl: «Wen cʼux tsaʼ cubi come maʼañic tsaʼ c mulaj jiñi tsaʼ bʌ i meleyob». Mach yomic chaʼan jiñi hermanojob miʼ ñaʼtañob mach bʌ weñic tiʼ tojlel. Bernardo miʼ yʌl: «Cabʌl uw tsaʼ ñumi chaʼan mij qʼuel ti wen jiñi tsaʼ bʌ ujti i mic chaʼ ñop tiʼ tojlel Jehová yicʼot i yorganización». ¿Chuqui tsiʼ colta?

⁹ Bernardo tsiʼ qʼuexta i pensar. Miʼ yʌl: «Cheʼ bʌ ancianojonto, mij cʼʌn Hebreos 12:7 chaʼan mij coltan jiñi hermanojob chaʼan wen miʼ qʼuelob jiñi tojʼesʌntel muʼ bʌ i yʌcʼ Jehová. Jin chaʼan tsaʼ j cʼajtibe c bʌ: ‹¿Majqui yom miʼ jacʼob ili versículo?›. Pejtelel jiñi i wiñicob Jehová, i yaʼ ochemon jaʼel». Bernardo an chuqui yambʌ tsiʼ mele chaʼan miʼ ñumen ñop ti Jehová yicʼot tiʼ yorganización. Tsiʼ ñumen aqʼue i yorajlel chaʼan miʼ pejcan jiñi Biblia i miʼ wen ñaʼtan muʼ bʌ i yʌl. I anquese muʼto i pensarin chuqui miʼ ñaʼtan jiñi hermanojob tiʼ tojlel, tsaʼ loqʼui ti subtʼan yicʼotob i tsiʼ yʌcʼʌ i comentario ti tempa bʌ tac. Ti wiʼil, tsaʼ chaʼ sujti ti anciano. Mi tsaʼ tojʼesʌntiyet, cheʼ bajcheʼ Bernardo, chaʼlen wersa chaʼan mach jin jach maʼ ñaʼtan jiñi quisin tsaʼ bʌ a wubi, jacʼʌ jiñi ticʼojel i qʼuextan a bʌ (Pr. 8:33; 22:4).c Mi mucʼʌch a mel jiñi, miʼ mejlel a ñop chaʼan Jehová mi caj i yʌqʼueñet i bendición cheʼ maʼañic tsaʼ ñajtʼesa a bʌ tiʼ tojlel yicʼot tiʼ yorganización.

10. ¿Chuqui jiñi tsaʼ bʌ qʼuextʌyi ti organización tsaʼ bʌ mejli i yʌcʼ ti wocol i xucʼtʌlel jiñi israelitajob?

¹⁰ Tajol wocol mi la cubin chaʼan xucʼul mi la cajñel cheʼ bʌ an chuqui miʼ qʼuextʌyel ti organización. Mi maʼañic mi laj cʌntan lac bʌ, ili miʼ mejlel i ñajtʼesañonla ti Jehová. Laʼcu lac ñaʼtan junchajp tsaʼ bʌ qʼuextʌyi cheʼ bʌ tsaʼ aqʼuenti Moisés jiñi Mandar yom bʌ miʼ jacʼob jiñi israelitajob. Ti jimbʌ ora, jiñi i jolob familia miʼ melob i bʌ bajcheʼ sacerdote, miʼ melob (pʌtob) pulʌntib i miʼ yʌcʼob majtañʌl chaʼan jiñi i familia (Gn. 8:20, 21; 12:7; 26:25; 35:1, 6, 7; Job 1:5). Pero, cheʼ bʌ tsaʼ aqʼuenti Moisés jiñi Mandar, jiñi i jolob familia maʼañix tsaʼ caji i chʌn melob jiñi. Jehová tsiʼ yajca sacerdotejob tiʼ familia Aarón chaʼan miʼ yʌcʼob jiñi majtañʌl. Cʼʌlʌl ti jimbʌ ora, mi juntiquil i jol familia mach bʌ i pʼolbalic Aarón miʼ mel i bʌ bajcheʼ sacerdote, yom miʼ chʌmel (sajtel) (Lv. 17:3-6, 8, 9, TNM).d ¿Jimba tiʼ caj ili tsaʼ bʌ qʼuextʌyi cheʼ Coré, Datán yicʼot Abiram i jiñi 250 añoʼ bʌ i yeʼtel ti jiñi tejclum tsiʼ chañʼesayob i bʌ tiʼ contra Moisés yicʼot Aarón? (Nm. 16:1-3). Mach la cujilic. Pero Coré yicʼot jiñi wiñicob tsaʼ bʌ i coltayob mach xucʼulic tsaʼ ajñiyob ti Jehová. ¿Chuqui miʼ mejlel a mel mi wocol maʼ wubin chaʼan xucʼul maʼ wajñel cheʼ bʌ an chuqui miʼ qʼuextʌyel ti organización?

11. ¿Chuqui mi laj cʌn tiʼ tojlel jiñi levitajob cohatitajoʼ bʌ?

¹¹ Coltan tiʼ pejtelel a pusicʼal chuqui tac miʼ qʼuextan jiñi organización. Cheʼ bʌ jiñi israelitajob añob tiʼ tiquiñal lum, jiñi levitajob tilemoʼ bʌ tiʼ familia Cohat añob ñuc bʌ i yeʼtel. Jajayajl miʼ techob i xʌmbal jiñi israelitajob, an cohatitajob muʼ bʌ i cuchob majlel jiñi arca chaʼan bʌ trato tiʼ tojel i wut pejtelel jiñi tejclum (Nm. 3:27-32; 10:33; Jos. 3:2-4). ¡Jumpʼejlʌch ñuc bʌ eʼtel! Pero tsaʼ qʼuextʌyi jiñi cheʼ bʌ jiñi israelitajob tsaʼ ochiyob ti jiñi Lum tsaʼ bʌ wʌn subentiyob. Mach cʼʌñʌlix miʼ ñijcañob jiñi Arca. Jin chaʼan, cheʼ bʌ woli ti yumʌntel Salomón, an cohatitajob xcʼayoʼ bʌ, an muʼ bʌ i cʌntañob jiñi templo i yañoʼ bʌ miʼ cʌntañob jiñi chubʌʼañʌl tac (1 Cr. 6:31-33; 26:1, 23, 24). Jiñi Biblia maʼañic miʼ yʌl chaʼan jiñi cohatitajob maʼañic tsiʼ mulayob o tsiʼ cʼajtiyob ñumen ñuc tac bʌ eʼtel tiʼ caj ti ñaxan añob i chaʼan ñumen ñuc tac bʌ eʼtel. ¿Chuqui mi laj cʌn? Coltan tiʼ pejtelel a pusicʼal chuqui tac miʼ qʼuextan jiñi i yorganización Jehová, mach yʌlʌyic mi miʼ tajet. Ubin a tijicñʌyel chaʼan jiñi eʼtel tac muʼ bʌ a wʌqʼuentel. Cʼajtesan chaʼan jiñi ñumen ñuc bʌ i cʼʌjñibal mach jiñic jiñi asignación tac muʼ bʌ a wʌqʼuentel. Tiʼ wut Jehová, jiñi ñumen ñuc bʌ i cʼʌjñibal jiñʌch cheʼ maʼ jacʼben i tʼan i mach jiñic jiñi asignación (1 S. 15:22).

12. ¿Bajcheʼ yubil tsiʼ yubi i bʌ Zaira cheʼ bʌ tsaʼ loqʼui ti Betel?

¹² Laʼ laj qʼuel tsaʼ bʌ ujti tiʼ tojlel Zaira, juntiquil hermana ti Oriente Medio. Tsiʼ wen qʼuele ti ñuc jiñi i yeʼtel ti Betel, baqui tsaʼ ajñi ñumen ti 23 jab. Pero cheʼ jiñi tsaʼ chojqui majlel bajcheʼ precursora especial. Miʼ yʌl: «Wen cʼux tsaʼ cubi jiñi. Tsaʼ c ñaʼta chaʼan maʼañic j cʼʌjñibal i mij cʼajtiben c bʌ chuqui jiñi mach bʌ weñic tsaʼ c mele». Cheʼto jaʼel, an hermanojob yicʼot hermanajob tiʼ congregación tsaʼ bʌ caji i subeñob: «Cheʼ weñic tsaʼ mele a weʼtel, maʼañic tsaʼ chojquiyet loqʼuel ti Betel». Zaira cabʌl tiempo wen chʼijyem tsiʼ yubi i bʌ i miʼ wen chaʼlen uqʼuel ti acʼʌlel. Pero miʼ yʌl: «Tsaʼ c chʌn ñopo ti jiñi organización yicʼot chaʼan Jehová miʼ cʼuxbiñon». ¿Chuqui tsiʼ colta chaʼan miʼ chʌn pʌs wem bʌ i ñaʼtʌbal?

13. ¿Chuqui tsiʼ mele Zaira chaʼan miʼ ñusan jiñi i chʼijyemlel?

¹³ Zaira tsiʼ pejca tema tac am bʌ ti jiñi lac jun tac muʼ bʌ i taj ti tʼan jiñi wocol woli bʌ i ñusan chaʼan miʼ mejlel i ñusan jiñi i chʼijyemlel. Jumpʼejl tsaʼ bʌ i wen coltan jiñʌch muʼ bʌ i loqʼuel ti La Atalaya 1 chaʼan febrero, 2001, am bʌ i temajlel «Usted puede afrontar el desánimo». Ili tema tsiʼ taja ti tʼan i yejemplo Marcos, jiñi tsaʼ bʌ i tsʼijbu Biblia jaʼel, tajol cheʼ tsiʼ yubi i bʌ jaʼel cheʼ bʌ an chuqui tsaʼ qʼuextʌyi tiʼ cuxtʌlel. Zaira miʼ yʌl: «Jiñi i yejemplo Marcos jiñʌch tsaʼ bʌ i ñumen coltayon ti jiñi c chʼijyemlel». Zaira tsiʼ colta i bʌ ti jiñi i yamigojob, maʼañic tsiʼ ñajtʼesa i bʌ ti jiñi hermanojob i maʼañic tsiʼ bej ñaʼta jiñi i chʼijyemlel. Tsiʼ ñaʼta chaʼan jiñi i yespíritu Jehová woliʼ coltan jiñi organización yicʼot chaʼan jiñi hermanojob waʼchocobiloʼ bʌ i wentajobʌch. Pero tsiʼ qʼuele jaʼel chaʼan ti jiñi i yorganización Jehová jiñi ñumen ñuc bʌ i cʼʌjñibal jiñʌch cheʼ miʼ mejlel jiñi eʼtel tsaʼ bʌ aqʼuenti tiʼ wenta.

14. ¿Chuqui tac tsaʼ qʼuextʌyi ti organización wocol bʌ tsiʼ yubi Vlado chaʼan miʼ jacʼ, i chuqui tsiʼ colta chaʼan miʼ mel?

¹⁴ Juntiquil anciano ti Eslovenia i cʼabaʼ Vlado am bʌ 73 i jabilel wocol tsiʼ yubi chaʼan miʼ jacʼ cheʼ tsaʼ xʌjbi jiñi i congregación yicʼot cheʼ maʼañix tsaʼ cʼʌjñi jiñi i Yotlel tempa bʌ. Miʼ yʌl: «Maʼañic mic ñaʼtan chucoch tsaʼ ñujpʼi jumpʼejl utsʼatax bʌ i Yotlel tempa bʌ. Tsiʼ michʼesayon come maxto wen jali tsaʼ lon c tojʼesa. Carpinterojon i tsaʼ c mele chaʼpʼej uxpʼejl mueble am bʌ yaʼi. Cheʼ jaʼel, jiñi añix bʌ lon c jabilel wocol tsaʼ lon cubi cheʼ tsaʼ xʌjbi jiñi congregación». ¿Chuqui tsiʼ colta chaʼan miʼ jacʼ ili tsaʼ bʌ mejli? Miʼ yʌl: «Tiʼ pejtelel ora mi lac taj lac wenlel cheʼ mi lac jacʼ chuqui tac miʼ qʼuextan jiñi i yorganización Jehová. Ili miʼ coltañonla cheʼ bʌ an chuqui tac ñumen ñuc bʌ miʼ qʼuextʌyel ti talto bʌ qʼuin». ¿Wocol ba woli a wubin chaʼan woliʼ xʌjbel congregación tac o chaʼan tsaʼ aqʼuentiyet jumpʼejl tsijiʼ bʌ asignación? Mach a pensarin, Jehová miʼ chʼʌmben i sujm bajcheʼ yubil maʼ wubin. Mi maʼ coltan chuqui tac woliʼ qʼuextʌyel i xucʼul maʼ wajñel ti Jehová i tiʼ yorganización, mi caj a taj cabʌl bendición (Sal. 18:25).

15. ¿Chuqui miʼ mejlel lac mel chaʼan mi lac chʌn pʌs wem bʌ lac ñaʼtʌbal cheʼ bʌ mi lac taj wocol tac ti congregación?

¹⁵ Cheʼ bʌ woli lac lʌcʼtiyel majlel tiʼ jilibal ili pañimil (mulawil), maʼañic miʼ toj sajtel lac pusicʼal cheʼ mi lac taj wocol tac ti congregación muʼ bʌ i mejlel i yʌcʼ ti wocol lac xucʼtʌlel ti Jehová. Yom mi lac chʌn pʌs wem bʌ lac ñaʼtʌbal. Mi woli lac ñaʼtan chaʼan juntiquil hermano tsiʼ mele mach bʌ weñic ti lac tojlel, mach yomic mi lac lot lac michʼajel. Cheʼ mi lac tojʼesʌntel, mach jin jach yom mi lac ñaʼtan jiñi quisin tsaʼ bʌ lac ñusa, laʼ lac jacʼ jiñi ticʼojel i laʼ laj qʼuextan lac bʌ. I, cheʼ bʌ jiñi i yorganización Jehová an chuqui tac miʼ qʼuextan muʼ bʌ i tajonla, laʼ laj coltan tiʼ pejtelel lac pusicʼal i laʼ lac jacʼ chuqui miʼ subeñonla.

16. ¿Chuqui miʼ mejlel a mel chaʼan maʼ bej ñop ti Jehová yicʼot tiʼ yorganización?

¹⁶ Miʼ mejlel a bej ñop ti Jehová yicʼot tiʼ yorganización cheʼ bʌ an ti wocol a xucʼtʌlel. Pero yom maʼ chʌn pʌs wem bʌ a ñaʼtʌbal chaʼan miʼ mejlel a mel, ili yom i yʌl chaʼan maʼañic maʼ michʼan, maʼ wen ñaʼtan chuqui mi caj a mel yicʼot maʼ qʼuel jiñi tsaʼ bʌ ujti cheʼ bajcheʼ miʼ qʼuel Jehová. Aqʼuen a bʌ jiñi meta chaʼan maʼ pejcan chuqui tac tsaʼ ujti tiʼ tojlelob jiñi muʼ bʌ i yʌjlelob ti Biblia tsaʼ bʌ i ñusayob wocol tac lʌcʼʌ lajal bʌ bajcheʼ a chaʼan i wen ñaʼtan jiñi i yejemplo. Cʼajtiben Jehová chaʼan miʼ coltañet i mach a ñajtʼesan a bʌ tiʼ tojlel jiñi hermanojob. Mi cheʼ maʼ mel, mach yʌlʌyic chuqui miʼ yujtel, Satanás maʼañic mi caj i mejlel i ñajtʼesañet ti Jehová yicʼot tiʼ yorganización (Sant. 4:7).