Tijicñayonla chaʼan i yutslel i pusicʼal Dios ti lac tojlel

1, 2. a) Tsictesan jiñi lajiya tsaʼ bʌ ajli chaʼan i yum tsʼusubil. b) ¿Bajcheʼ mi lac taj laj qʼuelben i yutslel i pusicʼal?

TI JUMPʼEJL bʌ qʼuin, juntiquil wiñic am bʌ i tsʼusubil wen sʌcʼan jach tsaʼ majli i sʌclan xʼeʼtelob (xtroñelob) yaʼ baqui an xchoñoñelob. Tsiʼ subeyob chaʼan wen mi caj i tojtʌlob i tsaʼʌch i jacʼʌyob. Ti wiʼil, tsiʼ qʼuele chaʼan anto yom xʼeʼtelob. Jin chaʼan, tsaʼ chaʼ majli i sʌclan i wiñicob. I tsiʼ subeyob chaʼan utsʼat mi caj i tojtʌlob. Cheʼ bʌ tsaʼ ujti jiñi eʼtel, tsiʼ tempa jiñi xʼeʼtelob chaʼan miʼ tojob. An tsaʼ bʌ i chaʼleyob eʼtel jumpʼejl qʼuin, pero an jumpʼejl jach bʌ ora. Pero jiñi wiñic lajal tsiʼ tojoyob. Jiñi jal bʌ tsiʼ chaʼleyob eʼtel tsaʼ cajiyob ti wulwul tʼan. Jiñi wiñic tsiʼ cʼajtesʌbeyob chaʼan tsaʼʌch i jacʼʌyob i chʼʌm jiñi taqʼuin tsaʼ bʌ i subeyob. Tsiʼ yalʌ jaʼel chaʼan añʌch tiʼ wenta miʼ ñaʼtan jaypʼejl yom miʼ toj i wiñicob. Ti wiʼil tsiʼ cʼajtibeyob mi tsʌytsʌyñayob i pusicʼal chaʼan tsiʼ pʌsʌ i yutslel (Mateo 20:1-15).

² Jesús tsiʼ yʌlʌ ili lajiya chaʼan miʼ cʌntesañonla junchajp wen ñuc bʌ chaʼan jiñi «i yutslel Dios mach bʌ i wentʌlel mi lac taj», o cheʼ bajcheʼ miʼ chaʼlentel ti traducir ti Biblia chʼol jiñi tʼan am bʌ ti Griego «i yutslel i pusicʼal Dios» (pejcan 2 Corintios 6:1)^[1] (qʼuele jiñi nota am bʌ tiʼ yujtibal ili temaj). Tajol an muʼ bʌ i ñaʼtañob chaʼan i wentʌlel ñumen lets tsaʼ tojleyob jiñi jal bʌ tsiʼ chaʼleyob eʼtel. Pero i yum tsʼusubil tsiʼ pʌsbe i yutslel i pusicʼal jiñi tsʼitaʼ jach bʌ ora tsiʼ chaʼleyob eʼtel. Juntiquil wen yujil bʌ tsiʼ yʌlʌ chaʼan jiñi tʼan muʼ bʌ i chaʼlentel ti traducir bajcheʼ «i yutslel i pusicʼal» yom i yʌl «mach bʌ tojbilic yicʼot mach bʌ i wentʌlelic mi laj cʌqʼuentel» i cheʼ jaʼel «muʼ bʌ i yʌqʼuentel juntiquil wiñic, anquese maʼañic chuqui melbil i chaʼan».

3, 4. a) ¿Chucoch an i pʌsbeyonla i yutslel i pusicʼal Jehová ti lac pejtelel? b) ¿Bajcheʼ an i mele?

³ Jiñi Biblia miʼ yʌl chaʼan jiñi i yutslel i pusicʼal Dios jumpʼejlʌch lac «majtan» (2 Corintios 9:14, 15). Cheʼic yom Jehová maʼañic miʼ pʌsbeñonla i yutslel come mach tiʼ pejtelelic miʼ mejlel lac jacʼben i tʼan. Yom bʌ jiñʌch cheʼ mi lac chʌmel. Jiñi rey Salomón tsiʼ yʌlʌ: «Maʼanic ti pañimil mi juntiquilic muʼ bʌ i mel chuqui utsʼat tiʼ pejtelel ora. Maʼanic toj bʌ mach bʌ anic miʼ wis chaʼlen mulil» (Eclesiastés 7:20). Ti wiʼil, jiñi apóstol Pablo tsiʼ yʌlʌ chaʼan «tiʼ pejtelelob tsaʼix i chaʼleyob mulil. Mach i tajayobix i ñuclel Dios» yicʼot chaʼan «an i tojol mulil. Jini muʼ bʌ i chaʼleñob mulil wersa miʼ chʌmelob» (Romanos 3:23; 6:23a).

⁴ Jehová miʼ wen cʼuxbiñonla ti lac pejtelel. Jiñi chaʼan, tsiʼ choco tilel i yalobil. Ili jiñʌch ñumen ñuc bʌ bajcheʼ tsiʼ pʌsʌ i yutslel i pusicʼal (Juan 3:16). Pablo tsiʼ yʌlʌ chaʼan waʼli Jesús tsaʼix «aqʼuenti i ñuclel yicʼot i cʼuxbintel, chaʼan tsiʼ yʌcʼʌ i bʌ ti chʌmel», i wocolix i yʌlʌ i «yutslel i pusicʼal Dios» tsaʼ chʌmi Jesús chaʼan ti lac pejtelel (Hebreos 2:9). Jin chaʼan, jiñi majtañʌl muʼ bʌ i yʌqʼueñonla Dios «jiñʌch laj cuxtilel mach bʌ anic miʼ jilel ti lac Yum Cristo Jesús» (Romanos 6:23b).

5, 6. a) ¿Chuqui mi lac chaʼlen tiʼ caj añonla tiʼ pʼʌtʌlel mulil? b) ¿Baqui bʌ lac wenlel mi lac taj cheʼ miʼ yumañonla i yutslel i pusicʼal Dios?

⁵ ¿Chucoch mi lac chaʼlen mulil yicʼot mi lac chʌmel? Jiñi Biblia miʼ yʌl chaʼan tiʼ caj i mul Adán tsaʼ ochi jiñi chʌmel. Come yaʼ tilemonla tiʼ pʼolbal Adán, luʼ añonla tiʼ pʼʌtʌlel jiñi mulil yicʼot mi lac chʌmel (Romanos 5:12, 14, 17). Anquese cheʼʌchi, miʼ mejlel lac yajcan chaʼan mach jiñic jiñi mulil miʼ yumañonla. ¿Bajcheʼ miʼ mejlel lac mel? Cheʼ mi lac pʌs lac ñopoñel (chʼujbiya) tiʼ cuxtʌlel Cristo. Cheʼʌch mi la cʌcʼ chaʼan jin i yutslel i pusicʼal Jehová miʼ yumañonla. Jiñi Biblia miʼ yʌl: «Cheʼ bʌ tsaʼ pʼojli mulil, ñumen cabʌl tsaʼ pʼojli i yutslel i pusicʼal Dios. Tsiquil cheʼ jini, tsaʼ chʌmiyob cabʌlob tiʼ yumʌntel mulil, pero chaʼan tiʼ yutslel i pusicʼal Dios anix laj cuxtilel mach bʌ anic miʼ jilel, chaʼan tsaʼ aqʼuentiyonla toj bʌ lac pusicʼal ti Jesucristo» (Romanos 5:20, 21).

⁶ Anquese xmulilontola, mach yomic mi laj cʌy chaʼan miʼ yumañonla jiñi mulil. Jin chaʼan, cheʼ mi lac mel mach bʌ tojic, mi laj cʼajtin i ñusʌntel lac mul ti Jehová. Pablo tsiʼ yʌlʌ: «Mach chʌn añetixla tiʼ pʼʌtʌlel mulil chaʼan mi laʼ jacʼ. Mach añetixla tiʼ wenta jini mandar, come añetixla tiʼ yutslel i pusicʼal Dios» (Romanos 6:14). ¿Baqui tac bʌ lac wenlel mi caj lac taj cheʼ mi laj cʌy chaʼan jin i yutslel i pusicʼal Dios miʼ yumañonla? Pablo tsiʼ yʌlʌ chaʼan yom mi lac tsʼaʼlen «chuqui mach tojic, yicʼot i colosojlel [o tsuculel] lac pusicʼal yicʼot i chaʼan bʌ pañimil chaʼan mi lac wen ñaʼtan chuqui yom, chaʼan toj mi la cajñel ti ili ora cheʼ bajcheʼ i chaʼañoʼ bʌ Dios» (Tito 2:11, 12).

7, 8. ¿Chuqui yom i yʌl cheʼ miʼ pʌsbeñonla i yutslel i pusicʼal Jehová «ti chajp ti chajp»? (Qʼuele jiñi foto tac am bʌ tiʼ tejchibal).

⁷ Jiñi apóstol Pedro tsiʼ yʌlʌ chaʼan jiñi aqʼuebil bʌ i chaʼañonla Dios yom mi laj cʼʌn ‹laj coltan lac piʼʌlob, chaʼan miʼ tajob i wenlel ti Dios jaʼel yicʼot i cʼʌjñibal ti chajp ti chajp› (1 Pedro 4:10). ¿Chuqui yom i yʌl cheʼ miʼ pʌsbeñonla i yutslel i pusicʼal Jehová «ti chajp ti chajp»? Chaʼan miʼ yʌqʼueñonla jiñi i cʼʌjñibal bʌ lac chaʼan tiʼ cuchol baqui jach bʌ wocol miʼ tilel ti lac tojlel (1 Pedro 1:6). Ti jujumpʼejl wocol miʼ yʌqʼueñonla i cʼʌjñibal bʌ lac chaʼan ti jiñi bʌ ora chaʼan mi lac ñusan.

⁸ Wen tsiquil chaʼan cabʌl bajcheʼ miʼ pʌsbeñonla i yutslel i pusicʼal Jehová. Jiñi apóstol Juan tiʼ tsʼijbu: «Ti lac pejtelel miʼ la chʼʌm i bujtʼemal Cristo, jiñʌch i yutslel i pusicʼal muʼ bʌ i yʌqʼueñonla ti lac majtan» (Juan 1:16, Jiñi tsijiʼ bʌ wen tʼañ chaʼañ estudio). Cabʌl bendición mi lac taj come Jehová cabʌl bajcheʼ miʼ pʌsbeñonla i yutslel i pusicʼal. Laʼ laj qʼuel baqui tac bʌ.

 9. a) ¿Bajcheʼ miʼ coltañonla jiñi i yutslel i pusicʼal Dios? b) ¿Bajcheʼ mi lac pʌs chaʼan wocolix i yʌlʌ?

⁹ Jehová miʼ ñusʌbeñonla lac mul. Chaʼan an i yutslel i pusicʼal Jehová miʼ ñusʌbeñonla lac mul. Pero cojach miʼ ñusʌbeñonla mi mucʼʌch laj cʌy i mi lac chaʼlen wersa chaʼan maʼañic miʼ yochel ti lac pusicʼal ti melol mach bʌ weñic (pejcan 1 Juan 1:8, 9). Pablo tiʼ tsictesʌbe jiñi xñoptʼañob bombiloʼ bʌ ti espíritu bajcheʼ miʼ ñusʌbeñonla lac mul Jehová. Tsiʼ yʌlʌ: «Dios tsiʼ locʼsayonla tiʼ yumʌntel icʼchʼipan bʌ pañimil. Tsiʼ yotsayonla tiʼ yumʌntel jini cʼuxbibil bʌ i Yalobil tsaʼ bʌ i yʌcʼʌyonla ti colel cheʼ bʌ tsiʼ ñusʌbeyonla lac mul tiʼ chʼichʼel» (Colosenses 1:13, 14). Mi caj la cʌqʼuen i ñuclel Jehová mi mucʼʌch la cʌqʼuen wocolix i yʌlʌ ti chuqui melbil i chaʼan ti lac tojlel. Cabʌl utsʼatax bʌ bendición miʼ mejlel lac taj come miʼ ñusan jiñi mulil.

10. ¿Chuqui mi lac taj chaʼan i yutslel i pusicʼal Dios?

¹⁰ Mi lac taj lac ñʌchʼtʌlel la quicʼot Dios yicʼot mi lac sujtel tiʼ yamigo. Come xmulilonla, i contrajonla Dios cʼʌlʌl cheʼ mi la quilan pañimil (lac chʼocʼan). Pero jiñi apóstol Pablo tsiʼ yʌlʌ: «Cheʼ i contrajonla Dios, tsaʼ chʌmi i Yalobil chaʼan miʼ yutsesan lac pusicʼal yicʼot Dios» (Romanos 5:10). Utsʼat mi lac mejlel ti ajñel la quicʼot Dios come tsiʼ yʌcʼʌ i cuxtʌlel Jesús. Yom i yʌl chaʼan ti ñʌchʼtʌlel mi laj cajñel la quicʼot yicʼot miʼ mejlel i sujtel ti la camigo. Pero ¿bajcheʼ miʼ taj i bʌ yicʼot i yutslel i pusicʼal Dios? Pablo tsiʼ yʌlʌ cheʼ tsiʼ taja tiʼ tʼan bombiloʼ bʌ: «Dios tsaʼix i ñusʌbeyonla lac mul. Tsaʼix i yotsayonla tiʼ wenta chaʼan tsaʼ lac ñopo Cristo. Maʼanix woli laj contrajin Dios, come tsiʼ yutsʼesayonla lac Yum Jesucristo. Chaʼan Jesucristo muʼ bʌ lac ñop, ochemonixla jaʼel tiʼ yutslel i pusicʼal. Jini chaʼan xucʼulonla» (Romanos 5:1, 2). Tijicñayonla cheʼ mi la cajñel ti ñʌchʼtʌlel la quicʼot Jehová i mi lac mejlel ti sujtel tiʼ yamigo.

11. ¿Bajcheʼ miʼ melob jiñi bombiloʼ bʌ chaʼan miʼ tojʼesañob jiñi ‹yambʌ tiñʌmeʼ›?

¹¹ Toj mi lac mejlel ti ajñel tiʼ wut Dios. Jiñi xʼaltʼan Daniel tiʼ tsʼijbu chaʼan jiñi bombiloʼ bʌ ti cojix bʌ qʼuin mi caj ‹i tojʼesañob cabʌl winicob› (pejcan Daniel 12:3). ¿Bajcheʼ? Jiñʌch cheʼ miʼ subob jiñi wen tʼan chaʼan Yumʌntel yicʼot miʼ cʌntesañob yonlel ‹yambʌ tiñʌmeʼ› chaʼan bʌ i mandar tac Jehová (Juan 10:16). Cheʼʌch miʼ chaʼleñob coltaya chaʼan utsʼat miʼ qʼuejlelob ti Dios jiñi yambʌlob. Iliyi miʼ mejlel chaʼañʌch i yutslel i pusicʼal Jehová. Pablo tiʼ tsictesa: «Dios miʼ yotsañob tiʼ wenta chaʼan jach i yutslel i pusicʼal. Miʼ ñusʌbeñob i mul tiʼ majtan jach, come Cristo Jesús tsiʼ mʌñʌyob chaʼan miʼ yʌcʼob ti colel» (Romanos 3:23, 24).

12. ¿Bajcheʼ miʼ taj i bʌ i yutslel i pusicʼal Dios yicʼot jiñi oración?

¹² Mi lac mejlel ti lʌcʼtiyel ti Dios ti oración. Wocolix i yʌlʌ i yutslel i pusicʼal Dios, miʼ mejlel lac pejcan ti oración. Pablo miʼ yʌl chaʼan i buchlib Jehová jiñʌch «baʼ miʼ pʌsbeñonla i yutslel i pusicʼal» come miʼ chaʼlen yumʌntel yicʼot i yutslel, i miʼ pʌyonla lac lʌcʼtesan lac bʌ tiʼ ‹chʼejlel lac pusicʼal› (Hebreos 4:16a). Bajcheʼ jach ora miʼ mejlel lac pejcan tiʼ cʼabaʼ Jesús. Jiñʌch ñuc bʌ lac majtan. Pablo miʼ yʌl: «Chaʼan ti lac chʼujbi Cristo machʼan mi lac saj bʌcʼñan lac pejcan Dios ti oración. Como la cujil isujm mux i yubibeñon la coración cheʼ mi lac pejcan» (Efesios 3:12, Jini wen bʌ tʼan).

13. ¿Bajcheʼ miʼ coltañonla «cheʼ an wocol» jiñi i yutslel i pusicʼal Dios?

¹³ Mi lac taj laj coltʌntel cheʼ bʌ i cʼʌjñibal lac chaʼan. Pablo tsiʼ yʌlʌ chaʼan yom mi lac pejcan Jehová ti oración cheʼ la com i coltaya, chaʼan mi lac taj «i yutslel i pusicʼal. Yaʼi mi caj lac pʼuntʌntel. Mi caj laj coltʌntel tiʼ yutslel i pusicʼal cheʼ an wocol ti lac tojlel» (Hebreos 4:16b). Cheʼ an lac wocol, tiʼ pejtelel ora yom mi laj cʼajtin laj coltʌntel ti Jehová. Anquese mach wersajic yom miʼ mel, miʼ jacʼbeñonla. Ti bele ora miʼ cʼʌn jiñi hermanojob ti congregación. Come jiñʌch miʼ jacʼ la coración, «yom chʼejl lac pusicʼal mi lac sub: ‹Lac Yum jiñʌch caj Coltaya. Maʼanic mi caj c bʌcʼñan chuqui miʼ tumbeñon winicob›» (Hebreos 13:6).

14. ¿Baqui bʌ yambʌ wenlel mi lac taj chaʼan i yutslel i pusicʼal Jehová?

¹⁴ Mi lac taj i tijicñʌyel lac pusicʼal. Yambʌ ñuc bʌ lac wenlel mi lac taj jiñʌch chaʼan cheʼ cabʌl jax bajcheʼ yubil woli (choncol) la cubin, mi lac taj i tijicñʌyel lac pusicʼal. Pablo tiʼ tsʼijbu cheʼ bʌ woli (yʌquel) i wen tsʼaʼlentelob jiñi xñoptʼañob ti tejclum Tesalónica: «Lac Yum Jesucristo, yicʼot Dios lac Tat tsaʼ bʌ i cʼuxbiyonla, jini tsaʼ bʌ i yʌqʼueyonla i ñuclel lac pusicʼal mach bʌ anic miʼ jilel yicʼot wen bʌ lac pijtaya tiʼ yutslel i pusicʼal, laʼ i ñuqʼuesʌbeñetla laʼ pusicʼal. Laʼ i xucʼchocoñetla» (2 Tesalonicenses 2:16, 17). Cheʼ la cujil chaʼan Jehová miʼ cʼuxbiñonla yicʼot miʼ cʌntañonla tiʼ yutslel i pusicʼal, ¿mach ba muqʼuic i tijicñesañonla?

15. ¿Baqui bʌ lac pijtaya miʼ mejlel lac taj chaʼan an i yutslel i pusicʼal Dios?

¹⁵ Mi lac taj lac pijtaya chaʼan mi lac chumtʌl tiʼ pejtelel ora. Mi maʼañic la quicʼot i coltaya Jehová, maʼañic lac pijtaya come xmulilonla (pejcan Salmo 49:7, 8). Pero an wen utsʼat bʌ lac pijtaya tsiʼ yʌqʼueyonla. ¿Baqui bʌ? Jesús tsiʼ yʌlʌ: «Jiñʌch chuqui yom c Tat tsaʼ bʌ i chocoyon tilel. Yom miʼ tajob i cuxtʌlel mach bʌ anic miʼ jilel pejtelel muʼ bʌ i qʼuelob i Yalobil, muʼ bʌ i ñopob» (Juan 6:40). Jin chaʼan, mi lac mejlel ti chumtʌl tiʼ pejtelel ora wocolix i yʌlʌ i yutslel i pusicʼal Jehová. Pablo tsiʼ yʌlʌ: «Tsaʼix tsictiyi i yutslel i pusicʼal Dios ti coltaya tiʼ tojlel pejtelel winicob xʼixicob» (Tito 2:11).

16. ¿Bajcheʼ tsiʼ cʼʌñʌyob i yutslel i pusicʼal Dios chaʼtiquil uxtiquil xñoptʼañob ti wajali?

¹⁶ Tsaʼix laj qʼuele chaʼan cabʌl bendición mi lac taj tiʼ yutslel i pusicʼal Jehová. Pero mach yom lecoj mi laj cʼʌn. Yom i yʌl chaʼan mach yom mi laj cʼʌn lac yʌlol chaʼlen mulil. Tiʼ yorajlel ñaxam bʌ xñoptʼañob, an tsaʼ bʌ i cʼʌñʌyob chaʼan jach miʼ melob mulil (Judas 4). Ili maʼañic bʌ tsiʼ pʌsʌyob i xucʼtʌlel tsiʼ ñaʼtayob chaʼan miʼ mejlelob ti mulil i chaʼan mi caj i ñusʌbentelob. Tsaʼto i ñopoyob chaʼan cheʼ miʼ melob jiñi yambʌ xñoptʼañob. Majqui jach cheʼ miʼ mel ili ora tsʌts chuqui woli i mel tiʼ contra «jini Espíritu woli bʌ i pʌyonla tiʼ yutslel i pusicʼal [Dios]» (Hebreos 10:29).

17. ¿Baqui bʌ ticʼojel tsiʼ yʌcʼʌ Pedro?

¹⁷ Ili ora, Satanás an i loti chaʼtiquil uxtiquil xñoptʼañob chaʼan miʼ ñaʼtañob miʼ mejlelob ti mulil i Jehová mi caj i ñusʌbeñob. Isujmʌch chaʼan Jehová miʼ ñusʌben i mul jiñi muʼ bʌ i cʌy. Pero yom mi lac chaʼlen wersa laj cʌy jiñi mach bʌ weñic. Jehová tsiʼ yʌqʼue i tsʼijbun jiñi apóstol Pedro ili ticʼojel: «Tsajiletla ame lotintiquetla ame laʼ ñopben i sojquemal jini xjontolilob, ame laʼ cʌy laʼ ñop chuqui isujm. Yom mi laʼ taj laʼ colel ti Cristo cheʼ mi laʼ cʌmben i yutslel i pusicʼal yicʼot i ñaʼtʌbal lac Yum Jesucristo la caj Coltaya» (2 Pedro 3:17, 18).

18. Mi Jehová an i pʌsbeyonla i yutslel i pusicʼal, ¿chuqui ti eʼtel an lac chaʼan?

¹⁸ Mi mucʼʌch laj cʌqʼuen wocolix i yʌlʌ Jehová chaʼan jiñi, laʼ laj cʼʌn ti utsʼat muʼ bʌ i yʌqʼueñonla chaʼan mi laj cʌqʼuen i ñuclel yicʼot mi laj coltan yambʌlob. ¿Bajcheʼ miʼ mejlel lac mel? Pablo tsiʼ yʌlʌ chaʼan «mach junchajpic jach laj cʼʌjñibal tsaʼ bʌ aqʼuentiyonla». Tsiʼ yʌlʌ chaʼan mi Dios tsiʼ yʌcʼʌ chaʼan miʼ mejlel «laj coltan lac piʼʌlob, laʼ laj coltañob. Jini yujil bʌ cʌntesa, laʼ i chaʼlen cʌntesa. Jini muʼ bʌ i ñuqʼuesʌben i pusicʼal i piʼʌlob, laʼ i ñuqʼuesʌbeñob». Ti wiʼil tsiʼ yʌlʌ: «Jini muʼ bʌ i chaʼlen pʼuntaya laʼ i chaʼlen tiʼ tijicñʌyel i pusicʼal» (Romanos 12:6-8). ¿Chuqui yom i yʌl iliyi? Chaʼan mi Jehová an i pʌsbeyonla i yutslel i pusicʼal, la queʼtelʌch chaʼan mi lac chaʼlen wersa ti subtʼan, mi laj cʌntesan yambʌlob chaʼan Biblia, mi lac ñuqʼuesʌben i pusicʼal la quermañojob yicʼot mi lac ñusʌben i mul yambʌlob.

19. ¿Chuqui mi caj laj qʼuel ti yambʌ temaj?

¹⁹ Cabʌl bendición tajbil lac chaʼan tiʼ yutslel i pusicʼal Jehová, jin chaʼan yom mi lac chaʼlen wersa lac «sub jini wen tʼan chaʼan i yutslel i pusicʼal Dios» (Hechos 20:24). Ti yambʌ temaj mi caj laj qʼuel ili eʼtel am bʌ ti lac wenta.