¿Bajcheʼ miʼ chaʼleñob coltaya jini ancianojob yaʼ ti congregación?

Joñon lojon maʼanic mic toj lojon jini ancianojob yaʼ ti congregación tac. Lajalʌch cheʼ baʼ ora tsaʼ tejchi jini ñopbalʌl yaʼ ti congregación tac wajali, ili ora jaʼel miʼ yajcʌntelob xñoptʼañob weñoʼ bʌ i melbal chaʼan miʼ «weʼsan jini xñoptʼañob i chaʼañoʼ bʌ Dios» (Hechos 20:28). Jini ancianojob wen añoʼ bʌ i ñaʼtʌbal tiʼ chaʼan bʌ Dios jiñʌch muʼ bʌ i chaʼleñob cʌntesa yaʼ ti congregación yicʼot miʼ cʌntañob jini tiñʌmeʼ tac, ‹miʼ melob tiʼ pejtelel i pusicʼalob cheʼ bajcheʼ yom Dios i mach chaʼanic xicʼbilob. Mach chaʼanic ganar come cheʼ yom i pusicʼalob› (1 Pedro 5:1-3). ¿Chuqui bʌ eʼtel miʼ melob chaʼan lac wenlel?

Miʼ coltañon lojon yicʼot miʼ cʌntañon lojon. Jini ancianojob jiñʌch miʼ chajpañob chuqui yom mic mel lojon yaʼ ti congregación yicʼot mi cʌntañon lojon chaʼan maʼanic mij cʌy c melben lojon i yeʼtel Jehová. Come yujilob chaʼan aqʼuebilob ti Dios jini ñuc bʌ eʼtel, jin chaʼan mach jinic miʼ bajñel acʼob i tʼan, miʼ coltañon lojon chaʼan mic taj lojon c tijicñʌyel (2 Corintios 1:24). Lajal bajcheʼ juntiquil xcʌnta tiñʌmeʼ miʼ coltan ti jujuncojt i tiñʌmeʼ, jini ancianojob miʼ ñop i wen cʌn ti jujuntiquil yaʼ bʌ miʼ tempañob i bʌ yaʼ ti congregación (Proverbios 27:23).

Miʼ cʌntesañon lojon bajcheʼ yom mic mel lojon chuqui miʼ cʼajtin Dios. Ti jujumpʼejl semana, jini ancianojob miʼ chaʼleñob cʌntesa chaʼan bajcheʼ yom mic mel lojon chuqui yom Dios yicʼot miʼ melob jini tempa bʌ chaʼan miʼ ñumen pʼʌtʼan jini ñopol bʌ c chaʼan lojon ti Dios (Hechos 15:32). Cheʼ jaʼel, jini winicob wen añoʼ bʌ i cʼuxbiya ti Dios, jiñʌch miʼ pʌsoʼ bij chaʼan jini subtʼan, miʼ chaʼleñob eʼtel quicʼotob lojon yicʼot miʼ coltañoñob lojon ti yan tac bajcheʼ yom miʼ mejlel jini subtʼan.

Miʼ coltañon lojon ti jujuntiquil. Jini ancianojob ti jujumpʼejl congregación miʼ mejlel i julaʼtañoñobla ti laj cotot o miʼ mejlel lac pejcañob yaʼ ti Yotlel Tempa bʌ chaʼan mi lac taj laj coltʌntel yicʼot tijicñʌyel ti lac pusicʼal, cheʼ bʌ miʼ cʼʌñob chuqui miʼ yʌl jini Biblia, cheʼ jaʼel miʼ pʼʌtʼesañoñobla chaʼan mi laj cajñel ti lʌcʼʌl yicʼot Dios (Santiago 5:14, 15).

Anquese añob yeʼtel yaʼ ti congregación, cabʌl ancianojob añob yambʌ yeʼtel baqui miʼ tojtʌlob yicʼot añob yijñam i yalobil yom bʌ miʼ cʌntan jaʼel. Jini hermanojob wen yujilob eʼtel jin chaʼan yom mi laj qʼuelob ti ñuc (1 Tesalonicenses 5:12, 13).

• ¿Chuqui i yeʼtelob jini ancianojob yaʼ ti congregación?

• ¿Bajcheʼ miʼ pʌsob jini ancianojob chaʼan miʼ qʼueloñobla ti ñuc?