¿Bajcheʼ chajpʌbil jiñi congregación?

Jehová miʼ mulan cheʼ chajpʌbil chuqui miʼ mejlel (1 Corintios 14:​33). Jin chaʼan wen chajpʌbil bajcheʼ an i tejclum. ¿Bajcheʼ chajpʌbil jiñi congregación? ¿Bajcheʼ miʼ mejlel la cʌcʼ laj coltaya chaʼan utsʼat miʼ yajñel?

1. ¿Majqui i jol jiñi congregación?

«Cristo i jolʌch jiñi congregación» (Efesios 5:​23). Jesús woli (choncol) i qʼuel yaʼ ti panchan pejtelel woli (yʌquel) bʌ i mel jiñi i tejclum Jehová tiʼ pejtelel pañimil (mulawil). Tsiʼ waʼchoco jiñi «xucʼul bʌ xyaj eʼtel wen am bʌ i ñaʼtʌbal», jiñi junmojt ancianojob wen añoʼ bʌ i ñaʼtʌbal cʌmbiloʼ bʌ jaʼel bajcheʼ Junmojt muʼ bʌ i pʌsob bij (pejcan Mateo 24:​45-​47). Cheʼ bajcheʼ tsiʼ meleyob jiñi apóstolob yicʼot jiñi ancianojob yaʼ ti Jerusalén cheʼ ti ñaxam bʌ siglo, jiñi Junmojt muʼ bʌ i pʌsob bij añob tiʼ wenta i qʼuel jiñi congregación tac am bʌ tiʼ pejtelel pañimil (Hechos 15:2). Pero ili wiñicob mach yumʌlobic ti jiñi organización. Miʼ pejcañob jiñi Biblia chaʼan miʼ ñaʼtañob chuqui yom Jehová chaʼan miʼ melob, i miʼ melob jiñi muʼ bʌ i subentelob ti Jesús.

2. ¿Chuqui ti eʼtel miʼ melob jiñi ancianojob?

Jiñi ancianojob, wen añobix bʌ i ñaʼtʌbal, miʼ cʼʌñob jiñi Biblia chaʼan miʼ chaʼleñob cʌntesa, miʼ cʌntañob jiñi añoʼ bʌ ti congregación yicʼot miʼ ñuqʼuesʌbeñob i pusicʼal. Ili wiñicob maʼañic miʼ cʼajtiñob i tojol. Miʼ melob jiñi eʼtel (troñel) yicʼotob i tijicñʌyel tiʼ wut Dios, mach chaʼañic an chuqui yomob i taj, miʼ melob tiʼ pejtelelob i pusicʼal (1 Pedro 5:​1, 2). Jiñi siervo ministerialob miʼ coltañob jiñi ancianojob i ti wiʼil miʼ mejlelob ti ochel jaʼel bajcheʼ anciano.

Jiñi Junmojt muʼ bʌ i pʌsob bij miʼ yajcañob chaʼtiqui uxtiquil ancianojob chaʼan miʼ sujtelob bajcheʼ superintendente i chaʼan circuito. Ili hermanojob miʼ julaʼtañob jiñi congregación tac chaʼan miʼ yʌqʼueñob ticʼojel yicʼot miʼ ñuqʼuesʌbeñob i pusicʼal. Cheʼ jaʼel, miʼ qʼuelob mi an yambʌ hermanojob muʼ bʌ i tsʼʌctesañob muʼ bʌ i yʌl jiñi Biblia chaʼan miʼ yochelob bajcheʼ anciano o siervo ministerial (1 Timoteo 3:​1-​10, 12; Tito 1:​5-9).

3. ¿Chuqui miʼ mel jujuntiquil i testigo Jehová?

Pejtelel jiñi añoʼ bʌ ti congregación miʼ yʌqʼueñob i ñuclel lac Yum Jehová cheʼ miʼ yʌcʼob i comentario, miʼ ñusañob discurso o yan tac bʌ yaʼ ti tempa bʌ. Miʼ melob jaʼel cheʼ bʌ miʼ chaʼleñob subtʼan jiñʌch bajcheʼ cʼamel miʼ mejlelob (pejcan Salmo 148:​12, 13).

LAʼ LAC ÑUMEN ÑAʼTAN

4. Jesús juntiquilʌch uts bʌ yumʌl

Jesús an chuqui utsʼatax bʌ miʼ subeñonla. Pejcanla Mateo 11:​28-​30 i tem alʌla iliyi:

• ¿Bajcheʼ yilal bʌ yumʌl jiñi Jesús? ¿I bajcheʼ yom chaʼan mi la cubin lac bʌ?

VIDEO: Jiñi coltaya tsaʼ bʌ i yʌcʼʌ jiñi ancianojob cheʼ tsaʼ ujti jiñi yujquel lum ti Nepal (4:​56)

Jiñi Biblia miʼ tsictesan bajcheʼ yom miʼ melob i yeʼtel jiñi ancianojob.

Pejcanla Isaías 32:2 yicʼot 1 Pedro 5:​1-3, i tem alʌla iliyi:

• Jesús tsiʼ ñuqʼuesʌbe i pusicʼal yambʌlob, i jiñi ancianojob miʼ chaʼleñob wersa chaʼan cheʼʌch miʼ melob jaʼel. ¿Bajcheʼ yubil maʼ wubin a bʌ cheʼ a wujil iliyi?

• ¿Bajcheʼ tac yambʌ miʼ lajiñob Jesús jiñi ancianojob?

5. Jiñi ancianojob miʼ yʌcʼob jiñi ejemplo ti subtʼan

VIDEO: Ancianojob, ¡acʼʌla jiñi ejemplo! (7:​39)

Jesús tsiʼ jamʌ alʌ bajcheʼ yilal yom i melbalob jiñi hermanojob añoʼ bʌ tiʼ wenta i qʼuel jiñi congregación. Pejcanla Mateo 23:​8-​12 i tem alʌla iliyi:

• ¿Chuqui miʼ yʌl jiñi Biblia chaʼan bajcheʼ yilal yomob i melbalob jiñi ancianojob? ¿Muʼ ba i tsʼʌctesañob maʼ wʌl jiñi añoʼ bʌ i yeʼtel ti yambʌ ñopbalʌl tac?

1. Jiñi ancianojob miʼ pʼʌtʼesañob i ñopoñel i miʼ coltañob i familia chaʼan cheʼʌch miʼ melob jaʼel.

2. Jiñi ancianojob miʼ chʼʌmob ti ñuc jiñi añoʼ bʌ ti congregación.

3. Jiñi ancianojob ti beleʼ ora miʼ chaʼleñob subtʼan.

4. Jiñi ancianojob miʼ chaʼleñob cʌntesa yicʼot miʼ melob yan tac bʌ eʼtel yaʼ ti congregación.

6. Mi laj coltañob jiñi ancianojob

Jiñi Biblia miʼ subeñonla chucoch yom mi laj coltañob jiñi ancianojob. Pejcanla Hebreos 13:​17 i tem alʌla iliyi:

• ¿Chucoch miʼ yʌl jiñi Biblia chaʼan yom ti jumpʼejl lac pusicʼal mi lac jacʼbeñob i tʼan jiñi waʼchocobiloʼ bʌ? ¿Añʌch ba i sujmlel maʼ wʌl jiñi? ¿Chucoch?

Pejcanla Lucas 16:​10 i tem alʌla iliyi:

• ¿Chucoch yomʌch mi lac jacʼbeñob i tʼan jiñi ancianojob anquese tajol mach wen ñuquic i cʼʌjñibal mi laj qʼuel?

TSAʼ BɅ LAJ CɅÑɅ

Jesús jiñʌch i jol jiñi congregación. Jiñi ancianojob miʼ melob muʼ bʌ i yʌl Jesús, i joñonla ti jumpʼejl lac pusicʼal mi lac jacʼbeñob i tʼan come miʼ cʌntañoñobla yicʼot miʼ cʌntesañoñobla.

¿Chuqui tsaʼ cʌñʌ?

• ¿Majqui i jol jiñi congregación?

• ¿Bajcheʼ miʼ chaʼleñob coltaya jiñi ancianojob yaʼ ti congregación?

• ¿Chuqui miʼ mel jujuntiquil i testigo Jehová?

CɅÑɅ YAN TAC BɅ

Qʼuele bajcheʼ jiñi Junmojt muʼ bʌ i pʌsob bij yicʼot jiñi yambʌ ancianojob miʼ chaʼleñob wersa i coltañob jiñi yermañujob.

Miʼ ñuqʼuesʌbeñob i pusicʼal jiñi hermanojob cheʼ bʌ an ticʼlʌntel (4:​22)

Qʼuele chuqui ti eʼtel miʼ melob jiñi superintendentejob i chaʼan circuito.

¿Bajcheʼ yilal miʼ ñusan juntiquil superintendente ti ñajt bʌ territorio? (4:​51)

Pejcan chuqui ti eʼtel miʼ melob jiñi xʼixicob yaʼ ti congregación.

«¿Muʼ ba i chaʼleñob cʌntesa jiñi xʼixicob i testigojoʼ bʌ Jehová?» (Lac Tsictesʌbentel, 1 i chaʼan septiembre, 2012)

Qʼuele bajcheʼ mi, chaʼleñob wersa jiñi ancianojob chaʼan miʼ ñuqʼuesʌbeñob i pusicʼal i yermañujob.

«Jiñi ancianojob xcoltayajob chaʼan tijicña mi la cajñel» (Lac Tsictesʌbentel, 15 i chaʼan enero, 2013)