¿Chuqui miʼ ñaʼtañob jiñi i testigojob Jehová chaʼan jiñi qʼuejun?

Jiñi muʼ bʌ lon c ñaʼtan chaʼan jiñi qʼueljun chucul ti jiñi principio tac am bʌ ti Biblia. Jujuntiquil Testigo miʼ cʼʌn i conciencia cʌntesʌbil bʌ ti Biblia chaʼan miʼ ñaʼtan bajcheʼ yilal mi caj i cʼʌn jiñi principio tac cheʼ bajcheʼ mi caj laj qʼuel ti ili artículo.a

• Jiñi qʼuejun i cʼʌjñibalʌch

• Laʼ laj qʼuel baqui bʌ i wenlel jiñi qʼuejun

• I wocolel mejl bʌ lac taj tiʼ chaʼan bʌ Dios yicʼot ti lac melbal cheʼ mi lac ñumen chaʼlen qʼuejun

• ¿Am ba i bajñel escuela jiñi i testigojob Jehová?

Jiñi escuela miʼ coltañonla chaʼan mi lac taj lac ñaʼtʌbal yicʼot chaʼan wen chuqui mi lac mel, i jiñi Biblia utsʼat chuqui miʼ yʌl chaʼan ili (Proverbios 2:10; 2:11, TNM; 3:21, 22). I cheʼ jaʼel, Jesús tiʼ sube jiñi xcʌntʼañob i chaʼan chaʼan miʼ cʌntesan yañoʼ bʌ ti jiñi tsaʼ bʌ i subeyob (Mateo 28:19, 20). Jin chaʼan, mi lon c suben yicʼot mi lon j coltan jiñi añoʼ bʌ ti lon c ñopbal: Jin chaʼan, mi lon c suben yicʼot mi lon j coltan jiñi lon c piʼʌlob ti lon c ñopbal,b i chaʼan miʼ cʌñob bajcheʼ yilal jiñi ñopbalʌl tac yicʼot yambʌ cultura tac (1 Corintios 9:20-22; 1 Timoteo 4:13).

Cheʼ jaʼel, jiñi yumʌlob yujilob chaʼan wersa yomʌch miʼ yochelob ti clase jiñi xbiʼtalob i miʼ yujtesañob i primaria yicʼot secundaria. Joñon lojon mi lon j qʼuel ti ñuc i mandarob jiñi yumʌlob come mic jacʼ lojon ili mandar: «Tiʼ pejteleletla jacʼbenla i tʼan jini añoʼ bʌ i yeʼtel ti pañimil», yom bʌ i yʌl jiñi yumʌlob (Romanos 13:1). Cheʼ jaʼel, mi lon c suben jiñi xcolelob chaʼan yom wem bʌ alumnojob yicʼot chaʼan yom miʼ chaʼleñob wersa i melob baqui jaxʌl miʼ mejlelob.c Cheʼ bajcheʼ miʼ yʌl jiñi Biblia: «Pejtelel chuqui jach mi laʼ mel chaʼlenla ti jumpʼejl laʼ pusicʼal tiʼ tojlel lac Yum cheʼ bajcheʼ i yeʼtel lac Yum, mach cheʼic bajcheʼ i yeʼtel wiñicob» (Colosenses 3:23).

Jiñi qʼueljun miʼ coltañonla chaʼan mi laj cʌntan lac familia. Jiñi Biblia miʼ yʌl: «Mi an juntiquil mach bʌ anic miʼ cʌntan jini mero i piʼʌlob yicʼot jini añoʼ bʌ tiʼ yotot, tsaʼix i cʌyʌ i ñop. Ñumen lecojʌch bajcheʼ juntiquil mach bʌ anic miʼ ñop Dios» (1 Timoteo 5:8). Cheʼ mi lac chaʼlen qʼueljun miʼ coltañonla lac tsʼʌctesan jiñi la queʼtel am bʌ lac chaʼan tiʼ tojlel lac familia. Cheʼ bajcheʼ mi yʌl jiñi libro The World Book Encyclopedia, chaʼan i cʼʌjñibalʌch jiñi qʼueljun come «miʼ chajpan jiñi lac piʼʌlob chaʼan wen miʼ chumtʌlob». Juntiquil quixtañu pʼipʼ bʌ yicʼot wen chajpʌbil bʌ mach wocolic miʼ taj eʼtel i cheʼ jaʼel, miʼ coltan chaʼan miʼ cʌntan i familia. Pero jiñi maʼan bʌ tiʼ chaʼle qʼuejun ñumen tsʼitaʼ wocol mi caj i yubin (Proverbios 22:29).

Yambʌ bajcheʼ miʼ cʌntañob i yalobilob jiñi tatʌlob jiñʌch cheʼ miʼ cʌntesañob ti wen yom bʌ miʼ melob cheʼ miʼ tajob i jabilel, i mi caj i tsʼitaʼ coltañob jaʼel cheʼ miʼ chaʼleñob qʼuejun (2 Corintios 12:14). Mic suben lojon jiñi tatʌlob chaʼan yomʌch miʼ yotsañob jiñi i yalobilob ti qʼueljun anquese tojbil, wocol ti melol o mach weñic miʼ qʼuejlel ti jiñi cultura.d Cheʼ jaʼel, mi lon suben jiñi tatʌlob chaʼan miʼ chaʼleñob wersa i cʌntesañob jaʼel jiñi i yalobilob.e

Mi lac wen qʼuel baqui tac bʌ cʌntesa miʼ mejlel lac taj. Jiñi Biblia miʼ yʌl: «Jini mach bʌ cʌntesʌbilic miʼ ñop pejtel chuqui miʼ yʌlob winicob. Jini cʌntesʌbil bʌ miʼ wen tsajin i bijlel» (Proverbios 14:15). Ili principio miʼ coltañon lojon chaʼan ñaxan mi lon c wen tsajiben i tojol yicʼot chuqui tac mi caj ti cʼʌjñel cheʼ mi yujtel jiñi secundaria i yom miʼ bej chaʼlen majlel qʼueljun. Jumpʼejl ejemplo, an tac qʼueljun baqui an chuqui mi laj cʌntesʌntel i mach wen jalic.

Ñumen ñuc i cʼʌjñibal jiñi cʌntesa loqʼuem bʌ ti Biblia cheʼ bajcheʼ jiñi qʼuejun ti jumpʼejl escuela. Jiñi cʌntesa muʼ bʌ i yʌc jiñi Biblia miʼ yʌqʼueñonla lac taj lac ñaʼtʌbal ti Dios. Ili ñaʼtʌbalʌl miʼ yʌqʼueñonla lac taj laj cuxtʌlel mach bʌ añic miʼ jilel, i jiñi qʼueljun ti escuela mach mejlic laj taj bajcheʼ ili (Juan 17:3). Cheʼ jaʼel, jiñi Biblia miʼ cʌntesañonla lac taj ‹toj bʌ lac pusicʼal, toj bʌ lac tʼan yicʼot toj bʌ lac melbal›, yom bʌ i yʌl wem bʌ lac bijlel (Proverbios 2:9). Jiñi apóstol Pablo tsiʼ chʼʌmʌ ñuc bʌ i cʌntesʌntel muʼ bʌ i mejlel lac lajin ili ora bajcheʼ jiñi universidad, pero tsaʼ cʼoti i qʼuel chaʼan «ñumen ñuc i cʌñol Cristo Jesús» (Filipenses 3:8; Hechos 22:3). Ili ora jaʼel, cabʌl i testigojob Jehová an chaʼleyob clase ti universidad, pero an yʌlʌyob chaʼan jiñi cʌntesa tilem bʌ ti Dios jiñʌch ñumen ñuc bʌ i cʼʌjñibal.f

Jiñi Biblia miʼ yʌl: «Jini cʌntesʌbil bʌ miʼ wʌn ñaʼtan chuqui bʌbʌqʼuen miʼ yujtel. Miʼ chajpan i bʌ» (Proverbios 22:3). Jiñi i testigojonbʌlon Jehová mi lon c ñop chaʼan ti jiñi universidad yicʼot ti yan tac bʌ escuela ñumen ñuc bʌ, miʼ mejlel i yʌqʼueñonla wocol ti lac melbal yicʼot tiʼ chaʼan bʌ Dios. Jin chaʼan, cabʌl i testigojob Jehová maʼañix miʼ yotsañob i yalobil ti jiñi universidad come an i qʼueleyob chaʼan ti jiñi escuela tac miʼ pʌstʌl mach bʌ i sujmlelic cʌntesa, cheʼ bajcheʼ ili:

• Jiñi taqʼuin miʼ yʌqʼueñonla lac tijicñʌyel yicʼot wen mi la cajñel:

  Cabʌl miʼ pʌstʌl chaʼan jiñi estudio ti universidad jiñʌch junchajp bajcheʼ miʼ mejlel lac taj eʼtel baqui mi lac wen tojtʌl. Jin mecu chaʼan cabʌl xcolelob miʼ majlelob ti universidad. Cabʌl miʼ pijtañob chaʼan jiñi taqʼuin miʼ yʌqʼueñob i tijicñʌyel yicʼot chaʼan wen miʼ yajñelob, pero jiñi Biblia miʼ pʌs chaʼan mach weñic jiñi ñaʼtʌbalʌl (Eclesiastés 5:10). I yom mi lac chʌn ñaʼtan jaʼel chaʼan jiñi Biblia miʼ subeñonla chaʼan jiñi «i mulʌntel taqʼuin miʼ tech pejtelel jontolil», i miʼ yʌqʼueñonla lac sʌt lac ñopoñel (1 Timoteo 6:10). Jin chaʼan, mi lon chaʼlen wersa chaʼan maʼañic mi lon c yajlel ti jiñi yac chaʼan bʌ chubʌʼañʌl (Mateo 13:22).

• Jiñi universidad mi yʌqʼuet ti qʼuejlel ti ñuc

  Nika Gilauri, juntiquil cʌn am bʌ bajcheʼ yumʌl ti Georgia, tsiʼ yʌlʌ chuqui miʼ ñaʼtʌntel tiʼ país chaʼan jiñi universidad: «Ti Georgia, miʼ tsʼitaʼ xicʼbentelob chaʼan miʼ majlelob ti universidad, come miʼ ñaʼtʌntel chaʼan jiñʌch muʼ bʌ caj i yʌcʼ chaʼan mi qʼuejlelob ti ñuc». I tsiʼ bej alʌ chaʼan ti wajali, «jiñi xcolelob maʼañic bʌ i título chaʼan universidad miʼ yʌc ti quisin i familia».g Pero jiñi Biblia mi subeñonla chaʼan maʼañic mi lac sʌclan lac ñuclel ti ili pañimil. Jesús ti sube jiñi ñaxam bʌ miʼ yʌcʼob i bʌ ti ñopbalʌl chaʼan woli jach bʌ i sʌclañob chaʼan miʼ qʼuejlelob ti ñuc. Jesús tsiʼ subeyob: «¿Bajcheʼ mi mejlel laʼ ñop? Mi laʼ taj laʼ ñuclel ti winicob» (Juan 5:44). Jiñi universidad miʼ mejlel i yʌcʼ chaʼan maʼ tech a bajñel qʼuel a bʌ ti ñuc, ili jiñʌch jumpʼejl melbalʌl muʼ bʌ i tsʼaʼlen Dios (Proverbios 6:16, 17; 1 Pedro 5:5).

• Ti jujuntiquil an tiʼ wenta miʼ yajcan chuqui wem bʌ yicʼot mach bʌ weñic

  Jiñi i testigojonbʌlon Jehová mi lon c chʼʌm ti ñuc muʼ bʌ i yʌl Dios chaʼan baqui bʌ jiñi wem bʌ yicʼot mach bʌ weñic (Isaías 5:20). Jumpʼejl revista am bʌ i cʼabaʼ Journal of Alcohol and Drug Education tsiʼ yʌlʌ chaʼan yaʼ ti universidad cabʌl xcolelob añob i xicʼol «chaʼan miʼ contrajiñob muʼ bʌ i ñaʼtañob chaʼan baqui bʌ jiñi wem bʌ yicʼot mach bʌ weñic».h Ili tʼan miʼ taj i bʌ yicʼot jiñi principio am bʌ ti Biblia muʼ bʌ i yʌl: «Jini jontoloʼ bʌ lac piʼʌlob miʼ bibʼesañob lac pusicʼal» (1Corintios 15:33). Yaʼ ti universidad miʼ wen pʌstʌl melbalʌl tac muʼ bʌ i tsʼaʼlen Dios cheʼ bajcheʼ jiñi yʌcʼʌjel, i ñucʼol cʼujts yicʼot tsʼiʼlel tac (1 Corintios 6:9, 10; 2 Corintios 7:1).

• Chaʼan mi lac tojʼesan ili pañimil, yom mi lac majlel ti jiñi universidad

  Mach tiʼ pejtelelobic muʼ bʌ i majlelob ti universidad yom sujtelob ti rico, chaʼan miʼ qʼuejlelob ti ñuc o chaʼan mi wen ñusañob i bʌ. Cabʌl yomob sujtel ti wem bʌ quixtañu yicʼot yomob i tojʼesan ili pañimil. Utsʼat cheʼ mi lac ñaʼtan bajcheʼ jiñi, pero jiñi i testigojonbʌlon Jehová yambʌ chuqui tsaʼ lon c ñaʼta lon c mel. Jesús tsiʼ ñaʼta chaʼan jiñi i Yumʌntel Dios cojach jin miʼ yʌqʼueñonla lac pijtaya chaʼan wem bʌ lac chumlib, i cheʼʌch mi lon c ñaʼtan jaʼel (Mateo 6:9, 10). Ili ora añʌch chuqui woli lon c mel cheʼ bʌ wolito lon c pijtan chaʼan jiñi i Yumʌntel Dios miʼ tojʼesan jiñi wocol am bʌ ti ili Pañimil. Cheʼʌch bajcheʼ tsiʼ mele Jesús, woli lon c sub jiñi «wen tʼan chaʼan i yumʌntel Dios» tiʼ pejtelel pañimil, i ti jujumpʼejl jab mi lon j coltan yonlel lac piʼʌlob chaʼan miʼ tojʼesañob i cuxtʌlel (Mateo 24:14).i