CɅNTESɅNTEL 15
¿Majqui jiñi Jesús?
Jesús jiñʌch juntiquil wiñic wen cʌmbil bʌ cʼʌlʌl ti wajali. Pero anquese cʌmbilʌch i cʼabaʼ, yonlel lac piʼʌlob mach wen i cʌñʌyobic i mach junlajalic chuqui miʼ ñaʼtʌntel chaʼan majqui Jesús tiʼ sujm. Pero ¿chuqui miʼ yʌl jiñi Biblia tiʼ tojlel?
1. ¿Majqui jiñi Jesús?
Jesús jiñʌch juntiquil espíritu wen pʼʌtʌl bʌ chumul bʌ yaʼ ti panchan. Jiñʌch tsaʼ bʌ ñaxan mejli ti Jehová cheʼ bʌ maxto i mele (pʌtʌ) jiñi yan tac bʌ. Jin chaʼan, miʼ subentel bajcheʼ «jiñi ñaxam bʌ tiʼ pejtelel chuqui melbil» (Colosenses 1:15). Jiñi Biblia miʼ yʌl chaʼan Jesús jiñʌch jiñi «cojim bʌ i Yalobil» Dios come jiñʌch tsaʼ bʌ bajñel mejli ti Jehová (Juan 3:16). Jesús lʌcʼʌl tsiʼ chaʼle eʼtel (troñel) yicʼot i Tat cheʼ bʌ tsiʼ colta i mel pejtelel chuqui tac an (pejcan Proverbios 8:30). I bej i yamigojobʌch i bʌ. Jesús jiñʌch «jiñi Tʼan», yom i yʌl, chaʼan jiñʌch muʼ bʌ i sub chuqui miʼ yʌl jiñi i Tat (Juan 1:14).
2. ¿Chucoch tsajñi Jesús ila ti Lum?
Añix ñumen cheʼ bʌ 2,000 jab, Jehová tsiʼ cʼʌñʌ jiñi chʼujul bʌ i yespíritu chaʼan miʼ mel jumpʼejl milagro. Tsiʼ cʼaxtesʌbe jiñi i cuxtʌlel Jesús am bʌ yaʼ ti panchan tiʼ matriz juntiquil xchʼoc maxto bʌ piʼlebilic i cʼabaʼ María. Jin chaʼan, Jesús tsiʼ yila pañimil (chʼocʼa) bajcheʼ juntiquil alʌl (pejcan Lucas 1:34, 35). Tsaʼ tili ila ti Lum chaʼan miʼ sujtel ti jiñi Cristo, o jiñi Mesías, yicʼot chaʼan miʼ coltañonla.a Pejtelel jiñi profecía tsaʼ bʌ ajli tiʼ tojlel jiñi Mesías ti tsʼʌctiyi tiʼ tojlel. Cheʼ bajcheʼ jiñi, jiñi wiñicob xʼixicob (quixtañujob) tsaʼ mejli i ñaʼtañob chaʼan jiñʌch «jiñi Cristo, i Yalobil jiñi cuxul bʌ Dios» (Mateo 16:16).
3. ¿Baqui an Jesús ili ora?
Cheʼ bʌ Jesús tsaʼ chʌmi (sajti) tsaʼ cuxtesʌnti bajcheʼ juntiquil espíritu i tsaʼ chaʼ majli ti panchan. Yaʼi «Dios tsiʼ yʌqʼue ñumen ñuc bʌ i yeʼtel» (Filipenses 2:9). Ili ora Jesús an ñuc bʌ i yeʼtel, pero cojach Jehová jiñi ñumen pʼʌtʌl bʌ.
LAʼ LAC ÑUMEN ÑAʼTAN
Laʼ lac ñumen qʼuel majqui Jesús tiʼ sujm yicʼot chucoch wen ñuc i cʼʌjñibal cheʼ mi laj cʌn.
4. Jesús mach jiñic jiñi Dios mach bʌ añic i pʼisol i pʼʌtʌlel
Jiñi Biblia miʼ yʌl chaʼan anquese Jesús juntiquil wen pʼʌtʌl bʌ espíritu yaʼ ti panchan miʼ jacʼben i tʼan Jehová come i Dios yicʼot i Tat. ¿Chucoch cheʼ mi la cʌl? Qʼuelela jiñi VIDEO chaʼan maʼ chʼʌmben i sujm chucoch jiñi Biblia miʼ yʌl chaʼan Jesús mach lajalic yicʼot jiñi Dios mach bʌ añic i pʼisol i pʼʌtʌlel.
Ili texto tac mi caj i coltañonla lac chʼʌmben i sujm chuqui i chaʼañob i bʌ Jehová yicʼot Jesús. Pejcanla jiñi texto tac i tem alʌla iliyi:
Pejcanla Lucas 1:30-32.
Cheʼ bajcheʼ tsiʼ yʌlʌ jiñi ángel, ¿chuqui i chaʼañob i bʌ Jesús yicʼot Jehová, «jiñi ñumen ñuc bʌ»?
Pejcanla Mateo 3:16, 17.
¿Chuqui tsiʼ yʌlʌ jiñi tʼan tsaʼ bʌ loqʼui ti panchan cheʼ bʌ Jesús tsiʼ chʼʌmʌ jaʼ?
¿Majqui jiñi tsaʼ bʌ i chaʼle tʼan maʼ wʌl?
Pejcanla Juan 14:28.
¿Majqui jiñi ñumen ñuc bʌ, juntiquil tatʌl o jiñi i yalobil?
¿Chuqui miʼ pʌsbeñonla cheʼ Jesús tsiʼ pejca Jehová tiʼ Tat?
Pejcanla Juan 12:49.
¿Lajal ba tsiʼ yubi i bʌ Jesús cheʼ bajcheʼ i Tat? ¿Chuqui maʼ wʌl jatet?
5. Jesús jiñʌch jiñi Mesías
Yaʼ ti Biblia an cabʌl profecía tac tsaʼ bʌ i colta jiñi wiñicob xʼixicob chaʼan miʼ cʌñob jiñi Mesías, jiñi yajcʌbil bʌ i chaʼan Dios chaʼan miʼ coltañonla. Qʼuelela jiñi VIDEO, yaʼi miʼ tsʼitaʼ tsictesʌntel jiñi profecía tac tsaʼ bʌ tsʼʌctiyi tiʼ tojlel Jesús cheʼ bʌ tsajñi ila ti Pañimil.
Pejcanla ili profecía tac am bʌ ti Biblia i tem alʌla iliyi:
Pejcanla Miqueas 5:2 chaʼan mi laʼ qʼuel baqui tsaʼ ajli chaʼan mi caj i yilan pañimil jiñi Mesías.b
¿Tsaʼ ba tsʼʌctiyi ili profecía cheʼ bʌ tsiʼ yila pañimil Jesús? (Mateo 2:1).
Pejcanla Salmo 34:20 yicʼot Zacarías 12:10 chaʼan mi laʼ qʼuel bajcheʼ tsaʼ ajli chaʼan mi caj i chʌmel jiñi Mesías.
¿Tsaʼ ba tsʼʌctiyi ili profecía tac? (Juan 19:33-37).
¿Am ba chuqui tsiʼ mele Jesús maʼ wʌl chaʼan miʼ tsʼʌctiyel jiñi profecía tac?
Ixcu jatet, ¿chuqui miʼ yʌqʼueñet a ñaʼtan tiʼ tojlel Jesús pejtelel iliyi?
6. Cheʼ mi laj cʌn Jesús miʼ coltañonla
Jiñi Biblia miʼ yʌl chucoch ñuc i cʼʌjñibal mi laj cʌn tiʼ tojlel Jesús yicʼot jiñi eʼtel am bʌ i yʌqʼue Dios. Pejcanla Juan 14:6 yicʼot 17:3, i tem alʌla iliyi:
¿Chucoch ñuc i cʼʌjñibal mi laj cʌn Jesús?
Jesús tiʼ jamʌ jiñi bij chaʼan mi lac mejlel ti sujtel tiʼ yamigo Dios. Tsiʼ yʌcʼʌ ti cʌñol jiñi i sujmlel tiʼ tojlel Jehová. I wocolix i yʌlʌ jiñi tsaʼ bʌ i mele Jesús miʼ mejlel lac taj jiñi cuxtʌlel maʼañic bʌ i jilibal.
AN MUʼ BɅ I YɅLOB: «Jiñi i testigojob Jehová maʼañic miʼ ñopob Jesucristo».
¿Bajcheʼ mi caj a jacʼ?
TSAʼ BɅ LAJ CɅÑɅ
Jesús juntiquil pʼʌtʌl bʌ espíritu, i Yalobil Dios yicʼot jiñʌch jiñi Mesías.
¿Chuqui tsaʼ cʌñʌ?
¿Chucoch miʼ subentel Jesús bajcheʼ «jiñi ñaxam bʌ tiʼ pejtelel chuqui melbil»?
¿Chuqui woliʼ mel Jesús cheʼ bʌ muʼto caj i tilel ila ti Pañimil?
¿Bajcheʼ la cujil chaʼan Jesús jiñʌch jiñi Mesías?
CɅÑɅ YAN TAC BɅ
Ñumen cʌñʌ chuqui tac miʼ pʌs chaʼan Jesús jiñʌch jiñi Mesías.
«¿Muʼ ba i pʌs jiñi profecía tac chaʼan Jesús jiñʌch jiñi Mesías?» (Tema am bʌ ti jw.org)
Qʼuele mi jiñi Biblia miʼ yʌl chaʼan Dios tsaʼ sujti tiʼ tat Jesús cheʼ bajcheʼ juntiquil wiñic yicʼot xʼixic miʼ yʌcʼob i yalobil.
«¿Chucoch miʼ subentel Jesús bajcheʼ i Yalobil Dios?» (Tema am bʌ ti jw.org)
Qʼuele chucoch jiñi cʌntesa chaʼan trinidad mach loqʼuemic ti Biblia.
«¿Dios ba jiñi Jesús?» (Lac Tsictesʌbentel, 1 i chaʼan abril, 2009)
Qʼuele bajcheʼ tsaʼ qʼuextʌyi i pensar juntiquil xʼixic cheʼ bʌ tsiʼ cʌñʌ chuqui miʼ yʌl jiñi Biblia tiʼ tojlel Jesús.
a Yaʼ ti cʌntesʌntel 26 yicʼot 27 miʼ tsictesʌntel chucoch ñuc i cʼʌjñibal lac chaʼan jiñi laj coltʌntel yicʼot bajcheʼ Jesús miʼ coltañonla.