CɅNTESɅNTEL 57
¿Chuqui mi caj i yujtel mi tsaʼ chaʼle tsʌts bʌ mulil?
Anquese maʼ wen cʼuxbin Jehová i maʼ chaʼlen wersa chaʼan maʼañic maʼ low, an i tajol mi caj a mel mach bʌ weñic. Pero an mulil ñumen tsʌts bʌ bajcheʼ yan tac bʌ (1 Corintios 6:9, 10). Mi tsaʼ mele jumpʼejl tsʌts bʌ mulil, cʼajtesan chaʼan Jehová maʼañic mi caj i cʌy i cʼuxbiñet tiʼ caj jiñi. Yom i ñusʌbeñet a mul yicʼot yom i coltañet.
1. ¿Chuqui yom mi lac mel chaʼan Jehová miʼ ñusʌbeñonla lac mul?
Cheʼ bʌ juntiquil muʼ bʌ i cʼuxbin Jehová miʼ mel jumpʼejl tsʌts bʌ mulil, wen chʼijyem miʼ yubin i bʌ. Pero Jehová miʼ ñuqʼuesʌben i pusicʼal yicʼot ili tʼan tsaʼ bʌ i sube i tejclum: «Anquese wen chʌctsʼeran jini laʼ mul, lajal mi caj i sujtel bajcheʼ ñaʼal tsʌñal» (Isaías 1:18). Mi mucʼʌch lac chaʼ ñaʼtan jiñi tsaʼ bʌ lac mele, Jehová miʼ ñusʌbeñonla jiñi lac mul. ¿I chuqui yom i yʌl cheʼ mi lac chaʼ ñaʼtan lac bʌ? Chaʼan cʼux ti lac pusicʼal mi la cubin jiñi tsaʼ bʌ lac mele, chaʼan maʼañix mi caj lac chʌn mel yicʼot chaʼan mi laj cʼajtiben Jehová ti wocol tʼan chaʼan miʼ ñusʌbeñonla lac mul. Cheʼ jiñi, mi lac chaʼlen wersa chaʼan mi laj qʼuextan jiñi lac pensar o chaʼan mi laj cʌy lac mel jiñi tsaʼ bʌ i yʌcʼʌyonla ti mulil, i mi lac chaʼlen wersa chaʼan mi lac jacʼ jiñi i mandar Jehová (pejcan Isaías 55:6, 7).
2. Mi tsaʼ lac chaʼle mulil, ¿bajcheʼ miʼ cʼʌn Jehová jiñi ancianojob chaʼan miʼ coltañonla?
Jiñi muʼ bʌ i mel jumpʼejl tsʌts bʌ mulil, Jehová miʼ yʌqʼuen ili ticʼojel: «Laʼ i pʌy jiñi ancianojob añoʼ bʌ yaʼ ti congregación» (pejcan Santiago 5:14, 15). Ili wiñicob waʼchocobiloʼ bʌ ti chʼujul bʌ espíritu miʼ cʼuxbiñob Jehová yicʼot jiñi i tiñʌmeʼob, i cʌntesʌbilob chaʼan miʼ coltañoñobla chaʼan mi lac chaʼ sujtel tiʼ yamigo Dios (Gálatas 6:1).
¿Bajcheʼ miʼ coltañonla jiñi ancianojob mi tsaʼ lac mele jumpʼejl tsʌts bʌ mulil? Chaʼtiquil o uxtiquil ancianojob mi caj i cʼʌñob jiñi Biblia chaʼan miʼ coltañoñobla lac chʼʌmben i sujm chucoch mach weñic jiñi tsaʼ bʌ lac mele. Cheʼ jaʼel, mi caj i yʌqʼueñoñobla wem bʌ ticʼojel tac yicʼot mi caj i subeñoñobla chuqui tac miʼ mejlel lac mel chaʼan maʼañix mi lac chʌn chaʼlen mulil. Tajol jiñi ancianojob an chuqui tac maʼañic mi caj i jumucʼ aqʼueñoñobla lac mel yaʼ ti congregación, jinto cheʼ mi lac chaʼ pʼʌtʼan tiʼ chaʼan bʌ Dios. Mi an majqui miʼ mel jumpʼejl tsʌts bʌ mulil i maʼañic miʼ cʌy i mul, jiñi ancianojob mi caj i chocob loqʼuel ti congregación chaʼan miʼ cʌntañob jiñi yambʌ hermanojob.
LAʼ LAC ÑUMEN ÑAʼTAN
Wen chʼʌmben i sujm yicʼot qʼuele ti ñuc muʼ bʌ i mel Jehová chaʼan miʼ coltañonla cheʼ bʌ mi lac mel jumpʼejl tsʌts bʌ mulil.
3. Cheʼ bʌ mi lac sub lac mul miʼ coltañonla
Baqui jach bʌ mulil mi lac mel miʼ ticʼlan Jehová, jin chaʼan yomʌch mi lac suben jiñi lac mul. Pejcanla Salmo 32:1-5 i tem alʌla iliyi:
¿Chucoch weñʌch cheʼ mi lac suben Jehová jiñi lac mul i maʼañic mi lac mucben?
Cheʼ bʌ tsaʼix lac sube Jehová jiñi lac mul, tijicña mi la cubin lac bʌ cheʼ bʌ mi laj cʼajtibeñob jaʼel jiñi ancianojob chaʼan miʼ coltañoñobla. Qʼuelela jiñi VIDEO i tem alʌla iliyi:
Chaʼan Canon miʼ chaʼ sujtel baʼan Jehová, ¿bajcheʼ tsaʼ coltʌnti ti jiñi ancianojob?
Ñucʌch i cʼʌjñibal cheʼ bʌ mucʼʌch lac suben jiñi ancianojob jiñi lac mul come yomob i coltañonla. Pejcanla Santiago 5:16 i tem alʌla iliyi:
Mi mucʼʌch lac suben lac mul jiñi ancianojob, ¿muʼ ba caj i mejlel i ñumen coltañoñobla maʼ wʌl? ¿Chucoch?
Suben Jehová jiñi a mul, yicʼot jaʼel jiñi ancianojob, i jacʼʌ i coltaya Jehová.
4. Jehová miʼ pʌsben i pʼuntaya jiñi muʼ bʌ i chaʼlen mulil
Cheʼ bʌ an majqui miʼ mel jumpʼejl tsʌts bʌ mulil i mach yomic i jacʼben i mandar Jehová, yom miʼ chojquel loqʼuel yaʼ ti congregación. Jin chaʼan, mi laj cʌy lac ñochtan, i cheʼ jaʼel, maʼañix mi lac pejcan. Pejcanla 1 Corintios 5:6, 11, i tem alʌla iliyi:
Cheʼ bajcheʼ jiñi levadura miʼ pajʼesan pejtelel jiñi xʌcʼbil bʌ harina, ¿muʼ ba caj i ticʼlan maʼ wʌl jiñi congregación mi tsaʼ lac ñochta juntiquil mach bʌ yomic i cʌy i mul? ¿Chucoch?
Jehová miʼ pʌs i pʼuntaya tiʼ tojlel jiñi muʼ bʌ i chaʼleñob mulil, jin chaʼan jiñi ancianojob miʼ coltañob jaʼel jiñi muʼ bʌ i chojquelob loqʼuel ti congregación, ¿chucoch? Come cheʼ bʌ tsaʼ chojquiyob loqʼuel coltayob chaʼan miʼ chaʼ ñaʼtañob i bʌ, anquese ti ñaxan cʼuxʌch tsiʼ yubiyob (Salmo 141:5).
¿Bajcheʼ miʼ pʌs iliyi chaʼan Jehová mucʼʌch i chʼʌmben i sujm, miʼ pʼuntan yicʼot miʼ cʼuxbin jiñi muʼ bʌ i chaʼleñob mulil?
5. Mi mucʼʌch laj cʌy lac mul Jehová miʼ ñusʌbeñonla
Jesús tsiʼ yʌlʌ jumpʼejl lajiya muʼ bʌ i coltañonla lac chʼʌmben i sujm bajcheʼ yubil miʼ yubin i bʌ Jehová cheʼ bʌ an majqui miʼ cʌy i mul. Pejcanla Lucas 15:1-7 i tem alʌla iliyi:
¿Chuqui miʼ cʌntesañonla tiʼ tojlel Jehová ili lajiya?
Pejcanla Ezequiel 33:11 i tem alʌla iliyi:
¿Chuqui yom mi lac mel chaʼan mi lac pʌs chaʼan tsaʼix lac chaʼ ñaʼta jiñi tsaʼ bʌ lac mele?
Jehová lajal bajcheʼ juntiquil xcʌnta tiñʌmeʼ, miʼ wen pensarin jiñi i tiñʌmeʼob.
AN MUʼ BɅ I YɅLOB: «Mic bʌcʼñan c pejcan jiñi ancianojob. Mi tsaʼ c subeyob jiñi tsaʼ bʌ c mele, mi caj c chojquel loqʼuel ti congregación».
¿Chuqui mi caj a suben jiñi cheʼ bʌ miʼ ñaʼtan bajcheʼ jiñi?
TSAʼ BɅ LAJ CɅÑɅ
Mi tsaʼ lac mele jumpʼejl tsʌts bʌ mulil, Jehová mi caj i ñusʌbeñonla mi mucʼʌch lac chaʼ ñaʼtan jiñi tsaʼ bʌ lac mele i maʼañix mi lac chʌn mel.
¿Chuqui tsaʼ cʌñʌ?
¿Chucoch weñʌch cheʼ mi lac suben Jehová jiñi lac mul?
¿Chuqui yom mi lac mel chaʼan Jehová miʼ ñusʌbeñonla lac mul?
Mi tsaʼ lac mele jumpʼejl tsʌts bʌ mulil, ¿chucoch yomʌch mi laj cʼajtiben jiñi ancianojob chaʼan miʼ coltañoñobla?
CɅÑɅ YAN TAC BɅ
Qʼuele bajcheʼ juntiquil wiñic tsiʼ colta muʼ bʌ i yʌl Isaías 1:18.
Mach lac ñaʼtan chaʼan Jehová maʼañic mi caj i pʼuntañonla (5:02)
Chuqui miʼ melob jiñi ancianojob chaʼan miʼ ñop i coltañob juntiquil muʼ bʌ i chaʼlen tsʌts bʌ mulil.
Qʼuele bajcheʼ miʼ pʌsbentel cʼuxbiya yicʼot pʼuntaya jiñi maʼañic bʌ miʼ chaʼ ñaʼtañob i bʌ.
Qʼuele bajcheʼ juntiquil wiñic tsaʼ cʼoti i ñaʼtan chaʼan Jehová woliʼ chaʼ pʌy ochel tiʼ sujmlel. Pejcan jiñi tema «Chaʼ com sujtel ti Jehová tsaʼ cubi».
«Jiñi Biblia tsiʼ qʼuextʌbeyob i pensar» (Lac Tsictesʌbentel, 1 i chaʼan abril, 2012)