4 Mose

22 Azɔ Israel-viwo ho heva ƒu asaɖa anyi ɖe Moab tagba, le Yordan godo le Yeriko gbɔ.+ 2 Ke Zipor vi Balak+ kpɔ nu siwo katã Israel wɔ Amoritɔwo, 3 eye vɔvɔ̃ ɖo Moab ŋutɔ le dukɔ la ŋu, elabena wosɔ gbɔ; eye dzidzi ƒo Moab le Israel-viwo ta.+ 4 Eya ta Moab gblɔ na Midiantɔwo+ ƒe ametsitsiwo be: “Azɔ ameha sia le míaƒe nutoawo ɖu ge abe ale si nyitsu ɖua gbe ene.”

Ɣemaɣi la, Zipor vi Balak ye nye Moab-fia. 5 Eye wòdɔ amewo ɖo ɖe Bileam, Beor vi gbɔ le Petor,+ wo dedu me le Tɔsisi* la nu, be woayɔe vɛ. Eɖo gbe ɖee be: “Kpɔ ɖa! Dukɔ aɖee nye esi ʋu tso Egipte. Wotsyɔ anyigba la ŋkume,+ eye wote tum! 6 Eya ta meɖe kuku, va ƒo fi de dukɔ sia nam,+ elabena wosesẽ wum. Ðewohĩ mate ŋu asi wo ahanya wo ɖa le anyigba la dzi; elabena menyae nyuie be, ame si nèyra la nyea yayratɔ, eye ame si nèƒo fi de la nyea fiƒodeme.”

7 Ale Moabtɔwo kple Midiantɔwo ƒe ametsitsiwo tsɔ afakaho ɖe asi dze mɔ yi Bileam+ gbɔ hegblɔ Balak ƒe nyawo nɛ. 8 Eye wògblɔ na wo be: “Mitsi afi sia dɔ, eye magblɔ nya si tututu Yehowa agblɔ nam la na mi.” Eya ta Moab-megãwo tsi Bileam gbɔ.

9 Eye Mawu va Bileam gbɔ gblɔ be:+ “Ame kawoe nye esiawo le gbɔwò?” 10 Bileam gblɔ na Mawu vavã la be: “Zipor vi Balak, si nye Moab-fia, ye ɖo gbe ɖem be: 11 ‘Kpɔ ɖa! Dukɔ si ʋu tso Egipte gbɔna la tsyɔ anyigba la ŋkume. Eya ta va ƒo fi de wo nam.+ Ðewohĩ mate ŋu awɔ aʋa kpli wo anya wo ɖa.’” 12 Ke Mawu gblɔ na Bileam be: “Mègayi kpli wo o. Mègaƒo fi de dukɔ la o, elabena ame yayrawoe wonye.”+

13 Bileam fɔ ŋdi, eye wògblɔ na Balak ƒe amegãwo be: “Migbugbɔ yi mia de, elabena Yehowa gbe be magayi kpli mi o.” 14 Eye Moab-megãwo trɔ va Balak gbɔ va gblɔ be: “Bileam gbe be yemava kpli mí o.”

15 Ke Balak gadɔ amegãwo ɖa ake, wosɔ gbɔ wu tsã, eye bubu le wo ŋu wu gbãtɔawo. 16 Eye wova Bileam gbɔ hegblɔ nɛ be: “Ale Balak, Zipor vi gblɔe nye esi, ‘Meɖe kuku, mègana naneke naxe mɔ na wò be nàdo kpo gbɔnye vava o, 17 elabena made bubu gã aɖe ŋuwò, eye nu sia nu si nàgblɔ nam la, mawɔe. Eya ta va ƒo fi de dukɔ sia nam dzro.’” 18 Ke Bileam ɖo eŋu na Balak ƒe dɔlawo be: “Ne Balak tsɔ eƒe xɔ si klosalo kple sika yɔ taŋ nam hã la, nyemate ŋu ada Yehowa nye Mawu ƒe se dzi ahayi nu sue alo nu gã aɖeke wɔ ge o.+ 19 Ke meɖe kuku, miawo hã mitsi afi sia dɔ, ne manya nya si Yehowa agagblɔ nam.”+

20 Eye Mawu va Bileam gbɔ le zã me gblɔ nɛ be: “Ne ŋutsu siawo va be yewoayɔ wò kokoko la, ekema tso nàyi kpli wo. Gake nya si magblɔ na wò la koe nàgblɔ.”+ 21 Eya ta Bileam fɔ ŋdi, bla akpa na eƒe tedzi,* eye wòyi kple Moab-megãwo.+

22 Ke Mawu ƒe dziku fla, le esi wòdze mɔ yina ta, eye Yehowa ƒe dɔla va tɔ ɖe mɔa dzi be yeaxe mɔ nɛ. Bileam bɔbɔ nɔ eƒe tedzi la dzi, eye eƒe subɔvi eve le eŋu. 23 Esi tedzia kpɔ Yehowa ƒe dɔla wòtɔ ɖe mɔa dzi heɖe eƒe yi ɖe asi la, tedzia di be yeadze le mɔa dzi ayi gbe me. Ke Bileam de asi tedzi la ƒoƒo me be yeagatrɔe ava mɔa dzi. 24 Eye Yehowa ƒe dɔla la va tɔ ɖe mɔ xaxɛ si le waingble eve dome, si ƒe akpa si kple akpa kemɛ glikpɔ le la dzi. 25 Esi tedzia kpɔ Yehowa ƒe dɔlaa la, emimi ɖe glia ŋu eye wòmimi Bileam ƒe afɔ ɖe glia ŋu; eye Bileam gaƒoe ake.

26 Eye Yehowa ƒe dɔla la gayi ŋgɔ va tɔ ɖe teƒe xaxɛ aɖe, afi si mɔ aɖeke mele ne woadze ɖe ɖusi alo mia me o. 27 Esi tedzia kpɔ Yehowa ƒe dɔlaa la, etsyɔ akɔ anyi esi Bileam kpɔtɔ bɔbɔ nɔ edzi, ale be Bileam do dɔmedzoe, eye wòtsɔ eƒe atia nɔ tedzia ƒom vevie. 28 Mlɔeba Yehowa na tedzia ƒo nu,*+ eye wògblɔ na Bileam be: “Nu kae mewɔ wò hafi nèƒom zi etɔ̃ sɔŋ?”+ 29 Bileam gblɔ na tedzia be: “Esi nèdo lãm tae. Ne ɖe yi le asinye la, ne mewu wò xoxo!” 30 Tedzi la gblɔ na Bileam be: “Menye nyee nye wò tedzi si nèdona le wò agbe me katã va se ɖe egbe sia oa? Ðe mewɔ nu ɖe ŋuwò alea kpɔa?” Eɖo eŋu be: “Ao!” 31 Eye Yehowa ʋu Bileam ƒe ŋku+ wòkpɔ Yehowa ƒe dɔla wòtɔ ɖe mɔa dzi heɖe eƒe yi ɖe asi. Enumake ebɔbɔ hetsyɔ mo anyi.

32 Eye Yehowa ƒe dɔla la gblɔ nɛ be: “Nu ka tae nèƒo wò tedzi la zi etɔ̃ sɔŋ? Kpɔ ɖa! Nyee va be matsi tsitre ɖe ŋuwò, elabena afɔ si dzi nèle la mewɔ ɖeka kple nye lɔlɔ̃nu o.+ 33 Tedzia kpɔm eye wòdze agbagba be yeadze ɖe aga zi etɔ̃ sɔŋ.+ Ðe menye eyae dze ɖe aga o la, ne mewu wò xoxoxo, eye mena tedzia tsi agbe.” 34 Ale Bileam gblɔ na Yehowa ƒe dɔla la be: “Mewɔ nu vɔ̃, elabena nyemenya be wòe tɔ ɖe mɔa dzi be yeado gom o. Ke azɔ ne menyo ŋuwò o la, ekema magbugbɔ.” 35 Ke Yehowa ƒe dɔla la gblɔ na Bileam be: “Yi kple ŋutsuawo, ke nya si magblɔ na wò la koe nàgblɔ.” Eye Bileam yi mɔzɔzɔa dzi kple Balak ƒe amegãwo.

36 Esi Balak se be Bileam gbɔna la, enumake eyi ɖado goe le Moab du si le Arnon-tɔsisia nu le nutoa ƒe liƒo dzi la me. 37 Eye Balak gblɔ na Bileam be: “Menye ɖe medɔ be woayɔ wò vɛ oa? Nu ka ta mèva gbɔnye xoxoxo o? Alo ɖe nèsusu be nyemate ŋu ade bubu gã ye ŋu oa?”+ 38 Bileam gblɔ na Balak be: “Kpɔ ɖa, meva ɖo gbɔwò azɔ. Gake ɖe woaɖe mɔ nam magblɔ nya aɖea? Nya si Mawu ade nu nam la koe magblɔ.”+

39 Eya ta Bileam yi kple Balak, eye wova Kiriat-Huzot. 40 Eye Balak tsɔ nyiwo kple alẽwo sa vɔ heɖo ɖe ɖe Bileam kple amegã siwo le eŋu la. 41 Esi ŋu ke la, Balak kplɔ Bileam yi Bamot-Baal, be wòate ŋu akpɔ dukɔ blibo la tso afi ma.+