Yeremiya
27 Le Yuda-fia Yehoyakim, Yosiya vi, ƒe fiaɖuɖu ƒe gɔmedzedzea me la, Yehowa ƒe gbe sia va na Yeremiya bena: 2 “Ale Yehowa gblɔ nam ye nye esi, ‘Gbi ka, eye nàwɔ kɔkutiwo atsɔ aku kɔ. 3 Eye nàtsɔ wo ade dɔla siwo va Yuda-fia Zedekiya gbɔ le Yerusalem la si aɖo ɖe Edom-fia,+ Moab-fia,+ Amonitɔwo+ ƒe fia, Tiro-fia+ kple Sidon-fia.+ 4 Eye nàde gbe wo si aɖo ɖe woƒe aƒetɔwo be:
“‘“Ale aʋakɔwo ƒe Yehowa, Israel ƒe Mawu la, gblɔe nye esi; ale miagblɔ na miaƒe aƒetɔwoe nye esi, 5 ‘Nyee tsɔ nye ŋusẽ gã kple nye alɔ si medo ɖa la wɔ anyigba, amegbetɔ kple lã siwo le anyigba dzi; eye ame si melɔ̃* la, eyae metsɔnɛ nana.+ 6 Azɔ metsɔ anyigba siawo katã de asi na nye subɔvi Babilon-fia Nebukadnezar;+ metsɔ gbemelãwo hã nɛ be woasubɔe. 7 Dukɔwo katã asubɔ eya kple via kpakple tɔgbuiyɔvia va se ɖe esime eƒe anyigba ƒe ɣeyiɣi nade,+ esime eya ŋutɔ hã azu kluvi na dukɔ geɖewo kple fia gãwo.’+
8 “‘“‘Eye ne dukɔ alo fiaɖuƒe aɖe gbe be yemasubɔ Babilon-fia Nebukadnezar alo ade kɔ Babilon-fia ƒe kɔkuti te o la, matsɔ yi,+ dɔwuame kple dɔvɔ̃* ahe to na dukɔ ma va se ɖe esime mato eƒe asi dzi atsrɔ̃ wo woavɔ,’ Yehowa ye gblɔe.
9 “‘“‘Eya ta migaɖo to miaƒe nyagblɔɖilawo, afakalawo, drɔ̃ekulawo, akunyawɔlawo kple dzosalawo, ame siwo le gbɔgblɔm na mi be, “Miele Babilon-fia subɔ ge o” la o. 10 Elabena alakpanya gblɔm wole ɖi na mi, ne woana woakplɔ mi adzoe le miaƒe anyigba dzi ayi didiƒe; ne maka mi ahlẽ, eye mia nu nayi.
11 “‘“‘Ke dukɔ si ade kɔ Babilon-fia ƒe kɔkuti te ahasubɔe la, mana wòanɔ* eƒe anyigba dzi, eye wòade agble ɖe edzi ahanɔ edzi,’ Yehowa ye gblɔe.”’”
12 Megblɔ nya siawo ke na Yuda-fia Zedekiya+ hã be: “Mide kɔ Babilon-fia ƒe kɔkuti te, eye misubɔ eya kple eƒe dukɔ la, ne mianɔ agbe.+ 13 Nu ka tae wò kple wò dukɔ la miaku ɖe yi,+ dɔwuame+ kple dɔvɔ̃+ si me, abe ale si Yehowa gblɔe ɖe dukɔ si gbe be yemasubɔ Babilon-fia o la ŋu ene? 14 Migaɖo to nyagblɔɖila siwo le gbɔgblɔm na mi be, ‘Miele Babilon-fia+ subɔ ge o’ la ƒe nyawo o, elabena alakpanya gblɔm wole ɖi na mi.+
15 “Yehowa be: ‘Elabena menye nyee dɔ wo o, ke boŋ alakpanya gblɔm wole ɖi le nye ŋkɔ me, ne maka mi ahlẽ, eye miawo ŋutɔwo kple nyagblɔɖila siwo le nya gblɔm ɖi na mi la siaa nu nayi.’”+
16 Eye megblɔ na nunɔlawo kple dukɔ blibo sia be: “Ale Yehowa gblɔe nye esi, ‘Migaɖo to miaƒe nyagblɔɖila siwo le nya gblɔm ɖi na mi be: “Kpɔ ɖa! Esusɔ vie woatsɔ Yehowa ƒe aƒe la me nuwo tso Babilon agbɔe, la ƒe nyawo o!”+ elabena alakpanya gblɔm wole ɖi na mi.+ 17 Migaɖo to wo o. Misubɔ Babilon-fia, ne mianɔ agbe.+ Nu ka tae du sia nazu aƒedo? 18 Ke ne nyagblɔɖilawoe wonye, eye Yehowa ƒe nya le wo si vavã la, ekema meɖe kuku, mina woaƒo koko na aʋakɔwo ƒe Yehowa, ne woagalɔ nu siwo susɔ ɖe Yehowa ƒe aƒe la me kple Yuda-fia ƒe aƒe* la me kpakple Yerusalem la ayi Babilon o.’
19 “Elabena ale aʋakɔwo ƒe Yehowa gblɔ ɖe sɔtiawo,+ gazɔ*+ gã la, kekeawo+ kple nu mamlɛ siwo susɔ ɖe du sia me la ŋu, 20 nu siwo Babilon-fia Nebukadnezar melɔ dzoe, esime wòɖe aboyo Yuda-fia Yekoniya, Yehoyakim vi, tso Yerusalem yi Babilon hekpe ɖe Yuda kple Yerusalem ƒe bubumewo katã ŋu o;+ 21 ɛ̃, ale aʋakɔwo ƒe Yehowa, Israel ƒe Mawu la, gblɔ ɖe nu siwo susɔ ɖe Yehowa ƒe me kple Yuda-fia ƒe me* kpakple Yerusalem la ŋue nye esi: 22 ‘“Woalɔ wo ayi Babilon,+ eye woanɔ afi ma va se ɖe gbe si gbe matrɔ susu ɖe wo ŋu. Magbugbɔ wo agbɔe, eye magaɖo wo teƒe sia,”’+ Yehowa ye gblɔe.”