Esubɔ ‘Le Ŋkekeawo Ƒe Nuwuɣi’

1, 2. (a) Ŋutega kae Yeremiya kpɔ si do ƒome kple nya si wòagblɔ ɖi? (b) Nu ka tae wòle be nàtsɔ ɖe le Yeremiya ƒe nyagblɔɖinyawo me?

ESI Mawu ɖo Yeremiya nyagblɔɖilae teti ko la, eɖe ŋutega aɖe fiae hebiae be: “Nu ka kpɔm nèle?” Ðekakpui Yeremiya ɖo eŋu be: “Mele ze, si le fiefiẽm la kpɔm, wòtrɔ ŋgɔ dze anyiehe.” Ŋutega sia na Yeremiya kpɔ nya si tɔgbi gblɔ ge wòala ɖi. (Xlẽ Yeremiya 1:13-16.) Kpɔɖeŋuze la le fiefiẽm, si fia be wodo dzo ɖe ete. Yehowa to esia dzi le nya gblɔm ɖi be le Yudatɔwo ƒe nuteƒemawɔmawɔ ta la, afɔku ava dukɔa dzi abe nu si le fiefiẽm wlɔwlɔwlɔ le ze sia mee wotrɔ kɔ ɖe wo dzi ene. Nu ka tae zea trɔ ŋgɔ dze anyiehe? Efia be dziehe gomee afɔkua atso ava. Babilontɔwo aho tso dziehe ava dze wo dzi. Nu ma tututue dzɔ. Esi ƒeawo va nɔ yiyim la, nyagblɔɖila Yeremiya kpɔ nudzɔdzɔ geɖewo teƒe, siwo le ko abe nu si le fiefiẽm le ze sia mee wotrɔ kɔ ɖe dukɔa dzi ene, eye Yerusalem ƒe tsɔtsrɔ̃e va ƒo wo katã ta.

² Babilon megali o, gake anyo be nàtsɔ ɖe le Yeremiya ƒe nyagblɔɖinyawo ya me. Nu ka tae? Elabena ‘ŋkekeawo ƒe nuwuɣi’ aɖe mee nye esia wò hã nèle, esime ame geɖe gblɔna be Kristotɔwoe yewonye, gake Mawu mekpɔa ŋudzedze ɖe woawo ŋutɔ alo sɔleme si dem wole ŋu o. (Yer. 23:20) Gake abe Yeremiya ene la, mia kple nɔviwò Ðasefo bubuawo ya miele gbeƒã ɖem gbedeasi aɖe si xlɔ̃a nu amewo tso ʋɔnudɔdrɔ̃ ŋu evɔ wòganaa mɔkpɔkpɔ ame.

 3. (a) Ðoɖo ka nue Yeremiya ƒe agbalẽa me nyawo le? (b) Taɖodzinu kae le Ta Evelia sia ŋu?

³ Menye ɣeyiɣi si me Yeremiya nɔ nyawo gblɔm ɖi ye wòŋlɔ wo o, ke boŋ eƒe dɔa ƒe nuwuwu lɔƒoe wògbugbɔ gblɔ wo na eƒe agbalẽŋlɔla wòŋlɔ. (Yer. 25:1-3; 36:1, 4, 32) Menye ɖoɖo si nu nuawo dzɔ le nue Yeremiya gbugbɔ gblɔ wo ɖo woŋlɔ o, ke boŋ ema nyawo ƒe akpa gãtɔ ɖe nudzɔdzɔ siwo sɔ kple wo nɔewo ƒe hatsotso me. Eya ta míeka ɖe edzi be adzɔ dzi na wò be nànya ɖoɖo si tututu nu nudzɔdzɔ siwo ŋu woƒo nu tsoe le Yeremiya kple Konyifahawo ƒe agbalẽawo me la dzɔ le. Aɖaka si le axa 19 lia aɖe vi na wò le go sia me. Ne ènya fia si nɔ dzi ɖum le Yuda kple nu siwo nɔ edzi yim le dukɔa me hafi Yeremiya gblɔ nya aɖe alo wɔ nane la, àgase eƒe nyawo kple nuwɔnawo gɔme nyuie wu. Esia akpe ɖe ŋuwò be nya siwo gblɔm Mawu le na eƒe amewo to Yeremiya dzi la naɖe vi na wò.

4-6. Aleke nuwo nɔ na Mawu ƒe blema dukɔa le ƒe siwo do ŋgɔ na Yeremiya ɖoɖo nyagblɔɖilae me?

⁴ Ʋunyaʋunya geɖewo dzɔ le Yeremiya ƒe nyagblɔɖidɔa wɔɣi. Enye ɣeyiɣi si me Asiria, Babilon, kple Egipte nɔ avu wɔm kple wo nɔewo. Ƒe 93 aɖewo hafi Yeremiya nadze eƒe nyagblɔɖidɔa gɔme la, Asiria ɖu Israel to ewo fiaɖuƒe si nɔ dziehe gome la dzi heɖe aboyo dua me tɔ geɖe. Ɣemaɣi la, Yehowa kpɔ Yerusalem kple eƒe fia nyui Xizkiya ya ta ale be Asiriatɔwo medze wo dzi o. Ðikeke mele eme o be èɖo ŋku ale si Mawu to nukumɔ aɖe dzi wu futɔawo ƒe asrafo 185,000 sɔŋ la dzi. (2 Fia. 19:32-36) Xizkiya viŋutsuwo dometɔ ɖekae nye Manase. Manase ɖu Yuda dzi ƒe 55 sɔŋ, eye eƒe dziɖuɣie wodzi Yeremiya. Ɣemaɣi la, Yuda va nɔ Asiria ƒe ŋusẽ te.—2 Kron. 33:10, 11.

⁵ Yeremiya ye ŋlɔ Fiawo Ƒe Agbalẽ Gbãtɔ kple Evelia hã, afi si míexlẽ le be Manase gbugbɔ tu nuxeƒe siwo fofoa gbã. Manase ɖi vɔsamlekpuiwo na Baal kple dziƒonuwo ɖe Yehowa ƒe gbedoxɔa me gɔ̃ hã. Ekɔ ʋu maɖifɔ geɖe ɖi, eye wòdo dzi tɔ dzo eya ŋutɔ via tsɔ wɔ numevɔsae na alakpamawuwo. Kpuie ko la, ewɔ “nu vɔ̃ɖi geɖe le Yehowa ŋku me.” Eƒe vɔ̃ɖivɔ̃ɖia na Mawu gblɔe ɖi be afɔku ava Yerusalem kple Yuda dzi abe ale si wòva Samaria kple Israel dzi ene. (2 Fia. 21:1-6, 12-16) Le Manase ƒe ku megbe la, via Amon xɔ ɖe eteƒe, eye eya hã subɔ trɔ̃ abe fofoa ke ene. Gake eteƒe medidi o, nuwo trɔ. Wowu Amon le ƒe eve megbe, eye via Yosiya si xɔ ƒe enyi la xɔ ɖe eteƒe, le ƒe 659 D.M.Ŋ. me.

⁶ Le ƒe 31 siwo Yosiya tsɔ ɖu fiae me la, Asiria mete ŋu nɔ te ɖe Babilon nu o. Yosiya wɔ mɔnukpɔkpɔa ŋu dɔ tsɔ xɔ ablɔɖe na Yuda dukɔa tso Asiriatɔwo si me. Yosiya mewɔ nu abe fofoa kple tɔgbuia ene o, ke boŋ esubɔ Yehowa nuteƒewɔwɔtɔe heho aʋa ɖe trɔ̃subɔsubɔ ŋu vevie. (2 Fia. 21:19–22:2) Le Yosiya ƒe dziɖuɖu ƒe ƒe 12 lia me la, egbã nuxeƒewo, aserawo, kple legbawo ɖa le eƒe fiaɖuƒea me, eye emegbe wòɖe gbe be woadzra Yehowa ƒe gbedoxɔa ɖo. (Xlẽ 2 Kronika 34:1-8.) Aleke wòsɔe nye esi be Yosiya ƒe dziɖuɖu ƒe ƒe 13 lia (si nye ƒe 647 D.M.Ŋ.) mee Mawu ɖo Yeremiya nyagblɔɖilae!

7, 8. (a) Aleke Fia Yosiya ƒe dziɖuɣi to vovo na fofoa Amon kple tɔgbuia Manase tɔe? (b) Ame ka ƒomevie Yosiya nye? (Kpɔ aɖaka si le axa 20.)

⁷ Esi wogbugbɔ le gbedoxɔa ɖɔm ɖo le fia nyui Yosiya ƒe dziɖuɖu ƒe ƒe 18 lia me la, nunɔlagã la ke ɖe “segbalẽa” ŋu. Fia Yosiya na eƒe agbalẽŋlɔla xlẽe nɛ. Ekpɔe be dukɔa tra mɔ ŋutɔ, eya ta ebia mɔfiame tso Yehowa gbɔ to nyɔnu nyagblɔɖila Xulda dzi, eye wòxlɔ̃ nu eteviwo be woalé Mawu ƒe seawo me ɖe asi. Xulda gblɔ na Yosiya be Yehowa ahe “dzɔgbevɔ̃e” ava Yudatɔwo dzi ɖe woƒe nuteƒemawɔmawɔ ta. Gake le nɔnɔme nyui si Yosiya ɖe fia ɖe tadedeagu vavãtɔ ŋu ta la, vɔ̃ sia mava le eƒe agbenɔɣi o.—2 Fia. 22:8, 14-20.

⁸ Fia Yosiya gatsɔ dzo ɖe trɔ̃subɔsubɔ ɖeɖe ɖa le anyigbaa dzi ŋu ɖe edzi. Ewɔ esia ʋuu va do ɖe keke Israel ƒe dziehefiaɖuƒea me ke, eye wòmu nuxeƒe kple vɔsamlekpui siwo le Betel. Ena woɖu Ŋutitotoŋkekenyui gã aɖe gɔ̃ hã. (2 Fia. 23:4-25) Kpɔ ale si esia anya dzɔ dzi na Yeremiyae ɖa! Gake kpekpe ɖe dukɔa ŋu be woatrɔ ɖe tadedeagu vavãtɔ ŋu menɔ bɔbɔe o. Esi wònye trɔ̃subɔsubɔe Manase kple Amon tsɔ kpla wo ta la, womegatsɔ ɖeke le tadedeagu vavãtɔ ŋu nyawo me o. Togbɔ be Yosiya ho aʋa ɖe trɔ̃subɔsubɔ ŋu vevie hã la, Mawu ʋã Yeremiya wògblɔ be Yudatɔwo ƒe mawuwo sɔ gbɔ abe woƒe duwo ene. Yeremiya ŋɔlimetɔwo le ko abe nyɔnu ahasitɔ ene—wogblẽ Yehowa ɖi hewɔ gbolo kple dutamawuwo. Yeremiya gblɔ be: “Mieɖi vɔsamlekpuiwo ɖe Yerusalem-blɔwo ƒe xexlẽme nu na ŋukpenamawuwo, ne miado dzudzɔ le vɔsamlekpuiawo dzi na Baal.”—Xlẽ Yeremiya 11:1-3, 13.

 9. Le Yosiya ƒe dziɖuɖu ƒe ƒe mamlɛawo me la, nu kawoe yi edzi le dukɔ siwo ƒo xlã Yuda me si kpɔ ŋusẽ ɖe Yuda dukɔa hã dzi?

⁹ Yeremiya ƒe nuxlɔ̃amea metsɔ fu lãme na Yudatɔwo o, eye dukɔ siwo ƒo xlã wo hã yi edzi le aʋa wɔm kple wo nɔewo be yewoƒe asi nasu nutoa katã dzi. Le ƒe 632 D.M.Ŋ. me la, Babilontɔwo kple Mediatɔwo ƒe aʋakɔwo wɔ ɖeka va dze Asiria ƒe fiadu Niniwe dzi heɖu edzi. Ƒe etɔ̃ megbe la, Farao Nexo kplɔ eƒe aʋakɔa tso Egipte ɖo ta dziehe be yeava xɔ na Asiria si ŋu wɔna vɔ le. Nu kae dzɔ o, nu kae meɖadzɔ o, Yosiya tee kpɔ be yeakpe aʋa kple Egiptetɔawo le Megido ne woatrɔ, gake wote aŋutrɔe wòku. (2 Kron. 35:20-24) Tɔtrɔ kawoe nublanuinya sia he va Yuda? Kuxi yeye kawoe Yeremiya do goe azɔ?

10. (a) Mɔ ka nue ɣeyiɣi siwo kplɔ Yosiya ƒe ku ɖo sɔ kple mía tɔ le? (b) Aleke ale si Yeremiya wɔ nui me dzodzro aɖe vi na wòe?

¹⁰ Wò ya bu ale si gbegbe Yosiya ƒe kua ate ɖe Yeremiya dzii ŋu kpɔ! Exa nu vevie hedzi konyifahawo. (2 Kron. 35:25) Dukɔa lé blanui, eye ʋunyaʋunyawɔwɔ siwo le edzi yim le dukɔ siwo ƒo xlã wo me hã na wogatsi dzodzodzoe ɖe edzi. Egipte, Asiria, kple Babilon nɔ avu wɔm kple wo nɔewo vevie—wo dometɔ ɖe sia ɖe di be yeaxɔ nuto bliboa. Azɔ hã, esi Yosiya nya ku ko la, dukɔa gatrɔ ɖe trɔ̃subɔsubɔ ŋu ake. Ɣeyiɣia megade Yeremiya dzi kura o, nɔnɔme sesẽwo sɔŋ koe le elalam azɔ. Nu sia tɔgbi dzɔ ɖe mía nɔvi geɖewo dzi le míaƒe ɣeyiɣi siawo hã me. Wole subɔsubɔm le ablɔɖe me nyuie ko, kasia woɖo asi dɔa dzi alo yometiti va wo dzi. Ame kae nya ne esia adzɔ ɖe mía dometɔ aɖewo hã dzi kpuie? Ke ne edzɔ ɖe, aleke wòakpɔ ŋusẽ ɖe mía dzii? Nu kae míawɔ be míalé nuteƒewɔwɔ me ɖe asi? Esi biabia siawo le susu me na mí la, nɔnɔme sesẽ siwo me Yeremiya to dzidzedzetɔe me dzodzro ade dzi ƒo na mí ŋutɔ.

11. Nu kawoe dzɔ le Yuda le Yosiya ƒe ku megbe?

¹¹ Yudatɔwo tsɔ Yosiya viŋutsu Yoaxaz ɖo fiae ɖe fofoa teƒe. Yoaxaz kee wogayɔna be Salum, eye ɣleti etɔ̃ pɛ koe wòɖu fia. Esi Farao Nexo wɔ aʋa kple Babilontɔwo vɔ hetrɔ gbɔna anyiehe gome ye wòɖe fia yeye sia le zia dzi hekplɔe yi Egipte. Yeremiya gblɔe ɖi be Yoaxaz “megale tɔtrɔ ge agbɔ o.” (Yer. 22:10-12; 2 Kron. 36:1-4) Nexo tsɔ Yosiya viŋutsu bubu, si woyɔna be Yoyakim, ɖo fiae ɖe Yoaxaz teƒe. Yoyakim mesrɔ̃ fofoa ƒe kpɔɖeŋu nyuia o. Le esi teƒe be wòado tadedeagu vavãtɔ si fofoa gbugbɔ ɖo te ɖe ŋgɔ la, ɖe wòna trɔ̃subɔsubɔ va xɔ anyi nɔ boŋ.—Xlẽ 2 Fiawo 23:36, 37.

12, 13. (a) Nɔnɔme kae amewo ɖe fia ɖe tadedeagu vavãtɔ ŋu le Yoyakim ƒe dziɖuɣia ƒe gɔmedzedze? (b) Aleke Yuda subɔsubɔhakplɔlawo wɔ nu ɖe Yeremiya ŋui?

¹² Le Yoyakim ƒe dziɖuɣia ƒe gɔmedzedze la, Yehowa gblɔ na Yeremiya be wòayi gbedoxɔa me ne wòabu fɔ Yudatɔwo gaglã ɖe woƒe vɔ̃ɖinyenye ta. Wobua Yehowa ƒe gbedoxɔa abe gbesae wònye akpɔ yewo ta ene. Gake ne woyi edzi le “fi fim, le ame wum, le ahasi wɔm, le atam dzodzro kam, eye [wodoa] dzudzɔ na mawu [tutɔwo]” la, Yehowa agblẽ gbedoxɔa ɖi abe ale si wògblẽ avɔgbadɔ si nɔ Silo la ɖi le Nunɔlagã Eli ŋɔli ene. Matɔ na alakpanuwɔla siwo dea ta agu le eme o. Yuda-nyigbaa “azu gbegbe.” (Yer. 7:1-15, 34; 26:1-6)a Wò ya kpɔ dzinɔameƒo si gbegbe Yeremiya hiã hafi wòagblɔ gbedeasi sesẽ siae ɖa! Anɔ eme be dutoƒoe wògblɔ nya mawo le, le amegãwo kple ame ŋkutawo ŋkume. Egbea, nɔviŋutsu kple nɔvinyɔnu aɖewo hã kpɔe be yewohiã dzinɔameƒo hafi ate ŋu aɖi ɖase le ablɔwo dzi alo aɖe gbeƒã na kesinɔtɔwo kple ame ŋkutawo. Gake ele be míaka ɖe edzi be Mawu li kpli mí, abe ale si wònɔ kple Yeremiya ene.—Heb. 10:39; 13:6.

¹³ Esi wònye fia vɔ̃ɖie le Yuda dzi ɖum azɔ, eye dukɔa megatsɔ ɖeke le tadedeagu vavãtɔ me o ɖe, aleke ame siwo xɔ ŋgɔ le subɔsubɔnyawo me awɔ nu ɖe Yeremiya ƒe nyawo ŋui? Nyagblɔɖilaa ŋutɔ gblɔ be: “Nunɔlawo kple nyagblɔɖilawo kpakple dukɔ blibo la [lém] gblɔ bena: Àku kokoko!” Ɛ̃, wodo dziku helĩhelĩ le gbɔgblɔm be: “Ŋutsu sia dze ku.” (Xlẽ Yeremiya 26:8-11.) Gake Yeremiya ƒe futɔawo mete ŋu kpe edzi o. Yehowa li kple eƒe nyagblɔɖila la, eye wòɖee. Yeremiya ŋutɔ hã mena futɔawo ƒe agbɔsɔsɔ alo woƒe ŋɔdzidonamenyawo do dzikatsoƒoe nɛ o. Nenemae wòle be wòanɔ le wò hã gowòme.

14, 15. (a) Dɔ ka gɔmee Yeremiya kple eƒe agbalẽŋlɔla Barux wodze le Yoyakim ƒe fiaɖuɖu ƒe ƒe enelia me? (b) Ame ka ƒomevie Yoyakim nye? (Kpɔ aɖaka si le axa 25.)

¹⁴ Le Yoyakim ƒe fiaɖuɖu ƒe ƒe enelia me la, Yehowa gblɔ na Yeremiya be wòaŋlɔ nya siwo katã yegblɔ nɛ tso Yosiya ŋɔli ke la ɖi. Eya ta Yeremiya gbugbɔ gblɔ nya siwo katã Mawu gblɔ nɛ le ƒe 23 siwo va yi me la na eƒe agbalẽŋlɔla Barux wòŋlɔ ɖe agbalẽ xatsaxatsa me. Ʋɔnudrɔ̃gbedeasi siwo wògblɔ la ku ɖe fia kple fiaɖuƒe 20 aɖewo ŋu. Emegbe Yeremiya gblɔ na Barux be wòakɔ gbe dzi axlẽ agbalẽ xatsaxatsaa me nyawo le Yehowa ƒe aƒe la me. Ðe susu ka ta? Yehowa ŋutɔ ɖe eme be: “Ame aɖe menya nu o, Yuda ƒe aƒe la ase vɔ̃ siwo katã meɖo be mawɔ wo la, eye ame sia ame atrɔ tso eƒe mɔ vɔ̃wo dzi, eye matsɔ woƒe vodadawo kple woƒe nu vɔ̃wo ake wo.”—Yer. 25:1-3; 36:1-3.

¹⁵ Esi Fia Yoyakim na fiasãa me amegã aɖe xlẽ agbalẽ xatsaxatsaa me nyawo nɛ vɔ la, evuvui de dzo me. Azɔ eɖe gbe be woakplɔ Yeremiya kple Barux vae na ye. Gake “Yehowa tsɔ wo ɣla.” (Xlẽ Yeremiya 36:21-26.) Le Fia Yoyakim ƒe vɔ̃ɖivɔ̃ɖi ta la, Yehowa gblɔ to eƒe nyagblɔɖilaa dzi be: “Woaɖii abe tedzi ene, woatee le anyigba atsɔ aƒu gbe ɖe adzɔge tso Yerusalem ƒe agbowo gbɔ.” (Yer. 22:13-19) Menye ɖe Yeremiya ɖe ami ɖe nya siawo kura o. Yehowa ƒe nyagblɔɖie!

16. Nya nyui kawoe Yeremiya gblɔ ɖi?

¹⁶ Togbɔ be Yeremiya gblɔ ʋɔnudrɔ̃gbedeasi mawo hã la, mele be míagblɔ be nya vɔ̃wo koe wògblɔ ɖi o. Egblɔ nya nyuiwo hã ɖi. Ena míenya be Yehowa aɖe Israel viwo ƒe ame susɔe aɖewo tso woƒe futɔwo si me woatrɔ ava wo de, afi si woaɖe dzi ɖi le bɔkɔɔ. Mawu abla nu “yeye” kple eƒe dukɔa, wòanye nubabla “mavɔ,” eye wòaŋlɔ eƒe sewo ɖe woƒe dziwo me. Atsɔ woƒe vodadawo ake wo, eye magaɖo ŋku woƒe nu vɔ̃wo dzi azɔ o. Gawu la, David ƒe dzidzimevi aɖe ava drɔ̃ ʋɔnu “dzɔdzɔe, si le eteƒe le anyigba dzi.” (Yer. 31:7-9; 32:37-41; 33:15) Nyagblɔɖi siawo dometɔ aɖewo va eme ƒe ʋɛ aɖewo megbe, bubuwo hã va eme ƒe alafa geɖewo megbe. Wo me vava ka mí egbea, eye woana agbe tegbee nɔnɔ le etsɔme ƒe mɔkpɔkpɔ mí. Gake mina míagatrɔ ɖe Yeremiya ƒe ŋkekeawo me ŋu. Yudatɔwo ƒe futɔwo medzudzɔ fuɖeɖe na wo o.—Xlẽ Yeremiya 31:31, 33, 34; Hebritɔwo 8:7-9; 10:14-18.

17, 18. Tɔtrɔ kawoe dukɔ bubuwo he va Yuda tso Yoyakim ƒe dziɖuɖu ƒe ƒe mamlɛawo me va se ɖe Zedekiya ƒe dziɖuɣi?

¹⁷ Le ƒe 625 D.M.Ŋ. me la, Babilon kple Egipte wokpe aʋa sesẽ aɖe le Karkemis, afi si te ɖe Frat Tɔsisia ŋu eye wòdidi tso Yerusalem gbɔ abe kilometa 600 ene le dziehe gome. Fia Nebukadnezar ɖu Farao Nexo dzi, ale wòxɔ nuto si ta wole dzrea wɔm ɖo la le Egipte si. (Yer. 46:2) Eya ta Nebukadnezar ye va kpɔ ŋusẽ ɖe Yuda dzi azɔ, eye esia zi Yoyakim dzi be wòabɔbɔ ɖe ete. Gake le ƒe etɔ̃ megbe la, Yoyakim dze aglã. (2 Fia. 24:1, 2) Esia wɔe be Nebukadnezar kplɔ eƒe aʋakɔa woho ɖe Yuda ŋu le ƒe 618 D.M.Ŋ. me, eye wova ɖe to ɖe Yerusalem. Bu ale si nɔnɔmeawo asesẽ ɣemaɣii ŋu kpɔ. Nuwo menɔ bɔbɔe na Mawu ƒe nyagblɔɖila Yeremiya gɔ̃ hã o. Anɔ eme be ɣemaɣie Yoyakim ku.b Esi via Yoyaxin xɔ Yuda fiazikpuia ɣleti etɔ̃ pɛ ko megbe la, ena ta Babilontɔwo. Nebukadnezar ha Yerusalem ƒe kesinɔnuwo eye wòɖe aboyo Yoyaxin, eƒe ƒomea, Yuda bubumewo ƒe ƒomewo, kpakple dukɔa ƒe aʋawɔlawo kple aɖaŋudɔwɔlawo katã. Daniel, Xananya, Misael, kple Azarya hã nɔ aboyomeawo dome.—2 Fia. 24:10-16; Dan. 1:1-7.

¹⁸ Nebukadnezar tsɔ Zedekiya, si nye Yosiya viŋutsu bubu, ɖo fiae ɖe Yuda nu. Eyae va nye David ƒe dzidzimevi mamlɛtɔ si nɔ fiazikpuia dzi le anyigba dzi. Eƒe fiaɖuɖua wu enu esi wotsrɔ̃ Yerusalem kple eƒe gbedoxɔa le ƒe 607 D.M.Ŋ. me. (2 Fia. 24:17) Ʋunyaʋunyawɔwɔ geɖe nɔ Yuda le ƒe 11 siwo Zedekiya nɔ zia dzi me. Edze ƒãa be ehiã be Yeremiya naɖo ŋu ɖe Ame si ɖoe nyagblɔɖilae ŋu bliboe le ɣeyiɣi sesẽ mawo me.

19. Aleke Yeremiya ŋɔlimetɔwo wɔ nu ɖe eƒe gbedeasia ŋui, eye aleke esia ka wòe?

¹⁹ Tsɔe be wòe nye Yeremiya. Tso esime Yosiya ku la, Yeremiya kpɔ ale si Mawu ƒe amewo kpɔ gome le ʋunyaʋunyawɔwɔ kple trɔ̃subɔsubɔ nuwɔnawo mee la teƒe. Yeremiya nya hã be nuwo gbɔna sesẽ ge ɖe edzi wu ema. Wo deviwo klẽ ŋku dee be: “Mègagblɔ nya ɖi le Yehowa ƒe ŋkɔ me, ne míaƒe asi magawu wò o.” (Yer. 11:21) Esi Yeremiya ƒe nyagblɔɖiawo va eme gɔ̃ hã la, Yudatɔawo gblɔ nɛ be: “Nya, si nègblɔ na mí le Yehowa ƒe ŋkɔ me la, míele to ɖo ge wò o.” (Yer. 44:16) Gake amewo ƒe agbe ɖo afɔku me, abe ale si ko wòle egbea hã ene. Abe Yeremiya ene la, Yehowa ƒe nyae wò hã nèɖea gbeƒãe egbea. Eya ta dzo agate ŋu aɖo mewò ɖe subɔsubɔdɔa ŋu ne èdzro ale si Yehowa kpɔ eƒe nyagblɔɖilaa ta le Yerusalem tsrɔ̃ɣi kple ɣeyiɣi siwo do ŋgɔ nɛ me la me.

20. Nu ka tae nuwo menɔ bɔbɔe na Yeremiya le Zedekiya ƒe dziɖuɣia o? (Kpɔ aɖaka si le axa 29.)

²⁰ Ðewohĩ Zedekiya ƒe dziɖuɣie nɔnɔmeawo sesẽ na nyagblɔɖila Yeremiya le wu. Abe fia siwo do ŋgɔ nɛ dometɔ geɖe ene la, Zedekiya wɔ “nu si nye vɔ̃ le Yehowa ŋku me.” (Yer. 52:1, 2) Babilon ƒe ŋusẽ tee wòle, eye Nebukadnezar na wòka atam le Yehowa ƒe ŋkɔ me be yeayi edzi abɔbɔ ɖe Babilon te. Gake Zedekiya va dze aglã. Futɔwo ƒoe ɖe Yeremiya nu vevie be eya hã nawɔ ɖeka kpli yewo le aglãdzedzea me.—2 Kron. 36:13; Eze. 17:12, 13.

21-23. (a) Akpa eve kawo mee Yuda dukɔa ma ɖo le Zedekiya ƒe fiaɖuɣi? (b) Nu kae wotu kple Yeremiya le esi mede aglãdzelawo dzi o ta?

²¹ Le Zedekiya ƒe fiaɖuɣia ƒe gɔmedzedze lɔƒo la, amedɔdɔwo tso Edom, Moab, Amon, Tiro, kple Zidon fiawo gbɔ va Yerusalem. Ðewohĩ susuae nye be yewoabia Zedekiya wòawɔ ɖeka kple yewo yewoawɔ aʋa kple Nebukadnezar. Ke hã, Yeremiya xlɔ̃ nu Zedekiya xoxo be wòabɔbɔ ɖe Babilon te. Eya ta Yeremiya wɔ kɔkutiwo hetsɔ wo na amedɔdɔawo wònye dzesi be ele be woƒe dukɔawo hã nabɔbɔ ɖe Babilontɔwo te. (Yer. 27:1-3, 14)c Nya sia mesɔ to me na ameawo kura o, eye Xananya na woƒe dziku gafla ɖe Yeremiya ŋu ɖe edzi. Aʋatsonyagblɔɖilae Xananya nye, eye wòble amehawo le Mawu ƒe ŋkɔ me be Babilontɔwo ƒe kɔkutia aŋe yewoado le ete. Gake Yehowa gblɔ to Yeremiya dzi be ameblela sia aku hafi ƒea nawu enu. Nenema tututue wòva dzɔ hã.—Yer. 28:1-3, 16, 17.

²² Azɔ Yuda dukɔa ma ɖe akpa eve: ame aɖewo lɔ̃ be yewoabɔbɔ ɖe Babilon te, bubuwo ya be yewoadze aglã. Eva dzɔ be le ƒe 609 D.M.Ŋ. me la, Zedekiya dze aglã hebia Egipte be wòana kpekpeɖeŋu ye yeawɔ aʋa. Ame siwo de aglãdzedzea dzi la do dziku vevie hele ʋunyaʋunya wɔm, eye ele be Yeremiya nanɔ te ɖe esiawo katã nu. (Yer. 52:3; Eze. 17:15) Nebukadnezar kple eƒe aʋakɔa trɔ va Yuda. Woxɔ Yuda duwo katã, eye wogava ɖe to ɖe Yerusalem ake, ale ɖoɖoe zi le aglãdzelaawo nu klẽnee. Nublanuinya si le Yeremiya si na Zedekiya kple eteviwo le ɣeyiɣi sesẽ ma me koe nye be, Babilontɔwo le Yerusalem tsrɔ̃ ge. Kue le ame siwo atsi dua me lalam. Ame siwo atsɔ wo ɖokuiwo ana Kaldeatɔawo ya atsi agbe.—Xlẽ Yeremiya 21:8-10; 52:4.

²³ Yudatɔwo ƒe amegãwo gblɔ be ɖe Yeremiya le Babilontɔwo dzi dem ɖe yewo ŋu. Nyateƒe ko tom Yeremiya le hafi, gake woƒoe helée de gaxɔ me. (Yer. 37:13-15) Le esiawo katã me hã la, Yeremiya metɔ tsi Yehowa ƒe gbedeasia o. Eya ta amegãwo ƒoe ɖe Zedekiya nu be wòawu Yeremiya. Wolé nyagblɔɖilaa de vudo si me tsi mele o me be wòaɖo to ɖe ba me aku. Gake Etiopiatɔ Ebed-Melex si subɔna le fiaa ƒe aƒe me la va xɔ nɛ. (Yer. 38:4-13) Ðe mebɔ egbea be Yehowa ƒe amewo dzea ŋgɔ ku le esi wogbe gomekpɔkpɔ le dunyahehe nuwɔnawo me ta oa? Ðikeke mele eme o be nu siwo me Yeremiya to ado ŋusẽ wò be nànɔ te ɖe nɔnɔme sesẽwo nu dzidzedzetɔe.

24. Nu kawoe dzɔ le ƒe 607 D.M.Ŋ. me?

²⁴ Le ƒe 607 D.M.Ŋ. me la, Babilontɔwo ge ɖe Yerusalem dua me mlɔeba eye wotsrɔ̃e. Nebukadnezar ƒe aʋakɔa tɔ dzo Yehowa ƒe gbedoxɔa, wogbã dua ƒe gliwo, eye wowu Yuda bubumewo. Zedekiya dze agbagba be yeasi, gake asi tui, eye wokplɔe va de eƒe futɔa si me. Wowu Zedekiya viŋutsuwo le eya ŋutɔ ŋkume. Emegbe Nebukadnezar na wogbã ŋku nɛ, blae, hekplɔe yi Babilon. (Yer. 39:1-7) Ɛ̃, nya siwo Yeremiya gblɔ ɖi tso Yuda kple Yerusalem ŋu la va eme. Gake esia mena Mawu ƒe nyagblɔɖilaa kpɔ dzidzɔ o, ke boŋ efa konyi ɖe afɔku si dzɔ ɖe dukɔa dzi ta. Àte ŋu axlẽ ale si gbegbe wòxa nui la le Konyifahawo ƒe agbalẽa me. Biblia-gbalẽ sia xexlẽ awɔ dɔ ɖe dziwò godoo.

25, 26. (a) Nu kawoe dzɔ le Yerusalem tsɔtsrɔ̃ megbe? (b) Aleke Yeremiya ŋɔlimetɔwo wɔ nu ɖe eƒe gbedeasia ŋu le tsɔtsrɔ̃ sia megbe?

²⁵ Afi kae Yeremiya nɔ esime nu siawo katã nɔ dzɔdzɔm? Yerusalem-megãwo lée de ga, gake Babilontɔwo va ve enu heɖee le gaxɔa me. Emegbe Yeremiya va kpɔ eɖokui le Yudatɔ siwo wokplɔ yina aboyo me la dome, gake woɖe asi le eŋu wòtsi dua me. Dɔ geɖe gale Mawu si nɛ wòawɔ le ame siwo susɔ ɖi la dome. Babilon fia Nebukadnezar tsɔ Gedalya ɖo Yuda-nyigbaa dzikpɔlae hedo ŋugbe na ame siwo susɔ ɖe dua me be ne wonya bɔbɔ ɖe ye te ko la, woanɔ anyi le tomefafa me. Ke hã, esia medze Yudatɔ aɖewo ŋu o, eye woɖo nugbe hewu Gedalya. (Yer. 39:13, 14; 40:1-7; 41:2) Yeremiya xlɔ̃ nu dua me tɔwo be woagavɔ̃ Babilon fia agblɔ be yewoasi le dua me o. Gake wo ŋgɔnɔlawo gblɔ na wo be ɖe Yeremiya le yewo blem, eya ta wosi yi Egipte hekplɔ Yeremiya kple Barux hã yii akpasesẽ. Ke hã, Yeremiya gblɔ nya ɖi be Nebukadnezar ava dze du ma hã dzi, eye wòatu nu kple Yudatɔ siwo si va be ɖe afi ma.—Yer. 42:9-11; 43:1-11; 44:11-13.

²⁶ Yeremiya detɔwo gagbe toɖoɖo Mawu ƒe nyagblɔɖila vavã sia kokoko. Nu ka tae? Wogblɔ be: “Esi míedzudzɔ dzudzɔdodo na dziƒo fianyɔnu kple tsi ƒoƒoɖeanyi nɛ la, nu sia nu ƒe hiã tu mí, eye yi kple dɔwuame tsrɔ̃ mí.” (Yer. 44:16, 18) Ewɔ nublanui loo! Efia be Yeremiya ŋɔlimetɔwo megatsɔ ɖeke le tadedeagu vavãtɔ me kura o. Gake Yeremiya ƒe kpɔɖeŋua de dzi ƒo na mí ŋutɔ! Ena míekpɔe be amegbetɔ madeblibo ate ŋu ayi edzi awɔ nuteƒe na Yehowa ne eya ɖeka va tsi xɔsemanɔsitɔwo dome gɔ̃ hã.

27. Nu kawoe míenya tso Yeremiya ƒe nyagblɔɖidɔa wɔwɔ ƒe ƒe mamlɛawo ŋu?

²⁷ Nu mamlɛtɔ si ŋu Yeremiya ƒo nu tsoe ye nye ale si Evil-Merodax, si va xɔ ɖe Nebukadnezar teƒe la, ɖe Yoyaxin le gaxɔ me. Ƒe 580 D.M.Ŋ. mee nu ma dzɔ. (Yer. 52:31-34) Yeremiya axɔ abe ƒe 90 ene ɣemaɣi. Míenya ale si tututu Yeremiya ƒe agbe va wu enui o. Anɔ eme be Egipte ye wòku ɖo le subɔsubɔdɔ kɔkɔe wɔwɔ na Yehowa nuteƒewɔwɔtɔe ƒe 67 aɖewo megbe. Esubɔ le ƒe siwo me wodo tadedeagu vavãtɔ ɖe dzi kple ƒe geɖe siwo me alakpasubɔsubɔ xɔ anyi nɔ siaa me. Mawuvɔ̃la ʋɛ aɖewo ɖo toe. Gake ame akpa gãtɔ do toku eƒe nyawo, wolé fui vevie gɔ̃ hã. Ðe ema fia be Yeremiya mekpɔ dzidzedze le eƒe dɔa me oa? Ao, mefia nenema o. Tso esime Yehowa nya de dɔa asi nɛ ko la, egblɔ nɛ be: “Woawɔ avu kpli wò, ke woado kpoe, elabena meli kpli wò, be maɖe wò.” (Yer. 1:19) Dɔ si wode mí Yehowa Ðasefo siwo li egbea si hã sɔ kple Yeremiya tɔ. Eya ta míekpɔa mɔ be amewo ate ŋu awɔ nu ɖe mía ŋu abe ale si wowɔe ɖe Yeremiya ŋui ene. (Xlẽ Mateo 10:16-22.) Esi wòle alea ɖe, nu kawoe míate ŋu asrɔ̃ tso Yeremiya gbɔ, eye aleke wòle be míawɔ míaƒe subɔsubɔdɔae? Mina míadzro nya siawo me kpɔ.