1 Fiawo
17 Eye Eliya*+ Tisbitɔ, si tso Gilead-nyigba+ dzi la, gblɔ na Ahab be: “Zi ale si Yehowa, Israel ƒe Mawu, ame si mesubɔna* le agbe la, zãmu alo tsi madza le ƒe siawo me o, negbe le nye nya nu ko hafi!”+
2 Eye Yehowa ƒe gbe va nɛ be: 3 “Dzo le afi sia, eye nàɖo ta ɣedzeƒe gome aɖabe ɖe Kerit-tɔʋu si le Yordan ƒe ɣedzeƒe la to. 4 Nàno tɔʋu la me tsi, eye made se na akpaviãwo be woana nuɖuɖu wò le afi ma.”+ 5 Enumake eyi ɖawɔ abe ale si Yehowa gblɔ ene; eyi ɖanɔ Kerit-tɔʋu si le Yordan ƒe ɣedzeƒe la to. 6 Eye akpaviãwo tsɔa abolo kple lã vana nɛ le ŋdi kple fiẽ, eye wònoa tɔʋu la me tsi.+ 7 Ke le ŋkeke aɖewo megbe la, tɔʋu la mie,+ elabena tsi megadza ɖe anyigba la dzi kpɔ o.
8 Eye Yehowa ƒe gbe va nɛ be: 9 “Tso nàyi Zarefat, si nye Sidontɔwo ƒe du me, eye nànɔ afi ma. Kpɔ ɖa! Made se na ahosi aɖe le afi ma be wòana nuɖuɖu wò.”+ 10 Ale wòtso yi Zarefat. Esi wòva ɖo dua ƒe agbo nu la, ekpɔ ahosi aɖe wònɔ nake fɔm. Eye wòyɔe gblɔ be: “Meɖe kuku, ku tsi vi aɖe ɖe kplu me vɛ nam mano.”+ 11 Esi wòyina eku ge la, egayɔe gblɔ be: “Meɖe kuku, di abolo kakɛ aɖe hã ɖe asi vɛ nam.” 12 Eɖo eŋu nɛ be: “Zi ale si Yehowa wò Mawu le agbe la, abolo aɖeke mele asinye o, negbe wɔ asiʋlo ɖeka koe le wɔze me, kple ami vi aɖe le amigoe me.+ Eye meva nake fɔ ge, ne mayi aɖaɖa nane nye kple vinyeŋutsu míaɖu hafi aku.”
13 Eye Eliya gblɔ nɛ be: “Mègavɔ̃ o. Heyi nàwɔ abe ale si nègblɔ ene. Gake tsɔ nu si li la ƒe ɖe mè abolo nogoe nam gbã, eye nàtsɔe vɛ nam. Emegbe àte ŋu aɖa nane wò kple viwòa miaɖu. 14 Elabena ale Yehowa, Israel ƒe Mawu la gblɔe nye esi: ‘Wɔze la maɖi gbɔlo o, eye ami mavɔ le amigoe la me o, va se ɖe gbe si gbe Yehowa na tsi dza ɖe anyigba la dzi.’”+ 15 Eya ta eyi ɖawɔ abe ale si Eliya gblɔ ene; eye nyɔnu la kple eƒe ƒomea kpakple Eliya woɖui ŋkeke geɖe.+ 16 Wɔze la meɖi gbɔlo o, eye ami mevɔ le amigoe la hã me o, le Yehowa ƒe nya si wògblɔ to Eliya dzi la nu.
17 Le nu siawo megbe la, aƒenɔ la ƒe vi dze dɔ, eye dɔa nu sẽ ale gbegbe be eƒe gbɔgbɔ nu tso.+ 18 Eye wòbia Eliya be: “Oo, Mawu vavã ƒe ame, nya kae le asiwò ɖe ŋutinye?* Ðe nèva gbɔnye be yeaɖo ŋku nye vodada dzi nam ahawu vinyea?”+ 19 Ke egblɔ nɛ be: “Kɔ viwò la nam.” Eye wòxɔe le eƒe akɔnu hetsɔ yi xɔtaxɔ si me wòle la me, eye wòtsɔe mlɔ eya ŋutɔ ƒe aba dzi.+ 20 Eye wòyɔ Yehowa gblɔ be: “Oo Yehowa nye Mawu,+ ahosi si gbɔ medze la hãe nèbe yeawɔ nu vevii, eye nàwu via?” 21 Eye wòdra ɖe ɖevi la dzi zi etɔ̃ heyɔ Yehowa gblɔ be: “Oo Yehowa nye Mawu, meɖe kuku, na ɖevi sia ƒe agbe* natrɔ ava eme.” 22 Yehowa se Eliya ƒe gbe,+ eye ɖevi la ƒe agbe* trɔ va eme, eye wògbɔ agbe.+ 23 Azɔ Eliya kɔ ɖevi la ɖi tso xɔtaxɔ la me va aƒea me, eye wòtsɔe na dadaa gblɔ be: “Kpɔ ɖa, viwò la le agbe.”+ 24 Eye nyɔnua gblɔ na Eliya be: “Azɔ menyae kɔtɛ be Mawu ƒe amee nènye,+ eye be Yehowa ƒe gbe si le nuwò la nye nyateƒe.”