1 Mose
4 Azɔ Adam dɔ kple srɔ̃a Xawa, eye wòfɔ fu.+ Esi wòdzi Kain+ la, egblɔ be: “Yehowa kpe ɖe ŋunye medzi ŋutsuvi.” 2 Emegbe la, edzi nɔvia Abel.+
Abel va zu lãnyila, ke Kain ya zu agbledela. 3 Le ɣeyiɣi aɖe megbe la, Kain tsɔ anyigbadzikutsetse aɖewo sa vɔe na Yehowa. 4 Abel hã tsɔ eƒe lãwo ƒe ŋgɔgbevi aɖewo vɛ+ hekpe ɖe woƒe amiteƒewo ŋu. Abel kple eƒe vɔsa la dze Yehowa ŋu,+ 5 ke Kain kple eƒe vɔsa ya medze eŋu o. Eye Kain do dɔmedzoe helĩhelĩ heyɔ mo. 6 Ale Yehowa gblɔ na Kain be: “Nu ka tae nèdo dɔmedzoe heyɔ mo? 7 Ne ètrɔ hewɔ nyui la, ɖe womakpɔ ŋudzedze ɖe ŋuwò oa?* Ke ne mètrɔ hewɔ nyui o la, ekema nu vɔ̃ de xa ɖe mɔnu na wò, eye wòdi vevie be yeakpɔ ŋusẽ ɖe dziwò; gake ɖe màɖu edzi oa?”
8 Emegbe Kain gblɔ na nɔvia Abel be: “Na míayi gbe me.” Esi wole gbea me la, Kain dze nɔvia Abel dzi hewui.+ 9 Emegbe Yehowa bia Kain be: “Afi kae nɔviwò Abel le?” Eye wòɖo eŋu be: “Nyemenya o. Nɔvinye dzi kpɔlae menyea?” 10 Eye Mawu gblɔ be: “Nu kae nye esi nèwɔ? Se ɖa! Nɔviwò ƒe ʋu le ɣli dom nam tso anyigba dzi.+ 11 Azɔ woƒo fi de wò henya wò ɖa le anyigba si ke nu xɔ nɔviwò ƒe ʋu tso asiwò me la dzi.+ 12 Ne ède agble ɖe anyigbaa dzi la, mawɔ nu na wò o.* Tsatsala kple sisilae nàzu le anyigba dzi.” 13 Ale Kain gblɔ na Yehowa be: “Nye vodada ŋuti tohehe la kpe wu tsɔtsɔ.” 14 Ènyam ɖa le anyigba la dzi egbea, eye madzo le wò ŋkuta; mazu tsatsala kple sisila le anyigba dzi, eye ame sia ame si akpɔm la, awum kokoko.” 15 Yehowa gblɔ nɛ be: “Esia ta ame sia ame si awu Kain la, woabia hlɔ̃e zi adre.”
Eye Yehowa de dzesi Kain, be ame sia ame si akpɔ Kain la nagawui o. 16 Ale Kain dzo le Yehowa ŋkume heva nɔ Aboyonyigba* dzi le Eden ƒe ɣedzeƒe gome.+
17 Emegbe Kain dɔ kple srɔ̃a,+ eye wòfɔ fu dzi Enok. Eye wòtso du hetsɔ via Enok ƒe ŋkɔ na dua. 18 Emegbe wodzi Irad na Enok. Irad dzi Mehuyael, Mehuyael dzi Metusael, eye Metusael dzi Lamek.
19 Lamek ɖe srɔ̃ eve. Gbãtɔ ŋkɔe nye Ada, eye evelia ŋkɔe nye Zila. 20 Emegbe Ada dzi Yabal. Eyae nye ame siwo nɔa agbadɔwo me henye lãnyilawo dometɔ gbãtɔ. 21 Nɔvia ŋkɔe nye Yubal. Eyae nye ame siwo katã ƒoa saŋku hekua dze la dometɔ gbãtɔ. 22 Zila hã dzi Tubal-Kain, eye eyae nye akɔbli kple gayibɔ nuwo katã ƒomevi tula. Tubal-Kain nɔvinyɔnue nye Naama. 23 Eye Lamek kpa ha sia na srɔ̃a Ada kple Zila:
“Mi Lamek srɔ̃wo, mise nye gbe;
Milé to ɖe nye nyawo ŋu:
Mewu ŋutsu aɖe, elabena ede abi ŋunye,
Ɛ̃, mewu ɖekakpui aɖe, elabena eƒom.
24 Ne zi adree woabia hlɔ̃ ame si awu Kain la,+
Ekema woabia hlɔ̃ ame si awu Lamek ya zi blaadre vɔ adre.”
25 Adam gadɔ kple srɔ̃a, eye wòdzi ŋutsuvi. Ena ŋkɔe be Set,*+ elabena egblɔ be: “Mawu gaɖo dzidzimevi bubu Abel teƒe nam, elabena Kain wui.”+ 26 Wodzi ŋutsuvi na Set hã, eye wòna ŋkɔe be Enos.+ Ɣemaɣie amewo de asi Yehowa ƒe ŋkɔ yɔyɔ me.