Suku si Dzraa Mí Ðo ɖe Nusiwo Hiã Wu Ŋuti
1 Amewo dea suku be woaxɔ nufiame siwo akpe ɖe wo ŋu woaɖo woƒe taɖodzinuwo gbɔ le agbe me. Gake taɖodzinu kae gale vevie wu esi ana woakafu Agbenala la ŋutɔ eye woakpe ɖe amewo ŋu be woasrɔ̃ nu tso eƒe tameɖoɖowo kple mɔwo ŋu? Ðeke megali o. Taɖodzinu si le Teokrasi Subɔsubɔ Sukua ŋu enye be wòadzra mí ɖo be míafia míaƒe xɔse ame bubuwo. Eyata zi alesi míedea sukua kwasiɖa sia kwasiɖa ko la, míele ŋutete siwo adzra mí ɖo ɖe agbemedɔ vevitɔ kekeake ŋu la tum ɖo.
2 “Teokrasi Subɔsubɔ Suku ƒe Ðoɖowɔɖi Hena Ƒe 2003” dze le October ƒe Míaƒe Fiaɖuƒe Subɔsubɔdɔ me. Wona mɔfiame ku ɖe alesi woawɔ sukuae ŋu le ɖoɖowɔɖia me. Àkpɔe be anyo be nàtsɔ ɖoɖowɔɖia ade wò nusrɔ̃gbalẽ si nye Na Teokrasi Subɔsubɔ Suku ƒe Hehenana Naɖe Vi na Wò, si wòle be nàlé ɖe asi ava Teokrasi Subɔsubɔ Sukua kwasiɖa ɖesiaɖe, la me. Bu Teokrasi Subɔsubɔ Suku hena ƒe 2003 ƒe akpa aɖewo ŋu kpɔ.
3 Nuƒoƒo ƒe Nudidi: Tso January me la, woadze sukua gɔme kple nuƒo si axɔ miniti atɔ̃ si aku ɖe nuƒoƒo ƒe nudidi aɖe alo nuxexlẽ, nusɔsrɔ̃, alo nufiafia ƒe ŋutete aɖewo ŋu. Sukudzikpɔla alo hamemegã bibi bubu si wòatia aƒo nuƒo gbãtɔ sia. Nuƒolaa adzro nusi nuƒoƒo ƒe nudidi ma fia kple nusita wòle vevie me. Eyome akɔ nyatia me to Ŋɔŋlɔawo me kpɔɖeŋuwo nana eye wòagblɔ alesi woawɔ nudidi ma ŋudɔe, eye wòahe susu ayi alesi esia wɔwɔ ate ŋu ana míabi nyuie le gbeadzisubɔsubɔdɔa mee dzi koŋ.
4 Dɔdasi Gbãtɔ: Wogale aɖaŋu ɖom na nɔviŋutsu siwo woade nufiamenuƒoa asi na be “woahe susu ayi nya si me dzrom wole ƒe vevienyenye dzi koŋ.” Esia fia be woafia hamea alesi woawɔ nyati ma ŋudɔe. Ne wode dɔ sia asi na wò la, kpɔ Subɔsubɔ Suku nusrɔ̃gbalẽ yeyea ƒe axa 48-9 na aɖaŋuɖoɖo le alesi nàdzra ɖo ŋu, eye nàsrɔ̃ axa siwo wofia asii le agbalẽa ƒe nyawo diƒe le “Eŋudɔwɔwɔ ƒe vevienyenye” te.
5 Biblia Xexlẽ ƒe Ðoɖowɔɖi: Ne mète ŋu zɔ ɖe kwasiɖa sia kwasiɖa ƒe Biblia xexlẽ dzi le ɣeyiɣi siwo va yi me o la, nukatae màɖoe wò taɖodzinui be yeazɔ ɖe ɖoɖowɔɖia dzi le ƒe sia me o? Amesiwo awɔ esia ate ŋu awu Kristotɔwo ƒe Hela Ŋɔŋlɔawo nu le ƒea ƒe nuwuwu. Wodzro viɖe siwo le Biblia xexlẽ ƒe ɖoɖo si gɔme woadze tso Kristotɔwo ƒe Hela Ŋɔŋlɔawo dzi la me le Subɔsubɔ Suku gbalẽ yeyea ƒe axa 10, memama 4 lia me.
6 Biblia Xexlẽ Me Nya Veviwo: Wona akpa sia ƒe gamea didi ɖe edzi va ɖo miniti ewo be wòana nyaselawo nate ŋu aƒo nu tso kwasiɖaa ƒe Biblia xexlẽ ŋu. Amesiwo woade dɔ sia asi na nanɔ ŋudzɔ ɖe gamedzinɔnɔ ŋu. Woawɔ dɔdasi sia kwasiɖa ɖesiaɖe, le kwasiɖa si me woawɔ numetotobiabia hã me. Ne èle ta siwo wona xlẽm la, di nya vevi siwo aɖe vi na wò le miaƒe ƒomenusɔsrɔ̃ me, le gbeadzisubɔsubɔdɔa me, kple le wò ŋutɔ wò agbenɔnɔ me. Yehowa ƒe nɔnɔme kawoe dze le alesi wòwɔ nu kple amewo kpakple dukɔwoe me? Nukae nèsrɔ̃ si do ŋusẽ wò xɔse eye wòdzi wò ŋudzedzekpɔkpɔ ɖe Yehowa ŋu ɖe edzi? Vo le ɖokuiwò me nàƒo nu tso nya vevi ɖesiaɖe si dze le ta siwo wona me ŋu faa, tsɔ kpe ɖe ta si woaxlẽ le Dɔdasi 2 lia me gɔ̃ hã ŋu, le esi nɔviŋutsu si woade exexlẽ asi na mana numeɖeɖe aɖeke kpe ɖe kpukpuiawo ŋu o ta.
7 Dɔdasi 2 Lia: Sukuvi gbãtɔ ƒe dɔ si woawɔ kwasiɖa sia kwasiɖa anye hehexɔxɔ si ku ɖe dutoƒonuxexlẽ ŋu. Dɔdasiawo katã atso kwasiɖaa ƒe Biblia xexlẽ me, negbe mamlɛtɔ si woawɔ le ɣletia me ko. Nuxexlẽ mamlɛtɔ le ɣletia me atso Gbetakpɔxɔ me. Sukuvia axlẽ akpa si wode asi nɛ la tẽ eye magblɔ ŋgɔdonya alo nyataƒonya aɖeke o. Esia ate ŋu ana wòalé fɔ ɖe eƒe nuxexlẽ ŋutete ƒe nyonyome koŋ ŋu.—Tim. I, 4:13.
8 Dɔdasi 3 Lia Kple 4 Lia: Dɔdasi siawo ƒe akpa gãtɔ atso Reasoning-gbalẽa me eye woate ŋu akpɔ nya geɖe le dɔ aɖewo ƒe axa si wofia asii me wu bubuwo; ɖewo hã ɖeko wotia tanya si ŋu woawɔ dɔ tsoe ko. Le amesiwo awɔ dɔdasi siwo womekpɔ nya geɖe le nyawo tsoƒe o alo amesiwo wotia tanya ko na gome la, anye mɔnukpɔkpɔ na wo be woawɔ numekuku le míaƒe Kristotɔwo ƒe agbalẽwo me atsɔ adzra woƒe dɔdasiwo ɖoe. Esia ate ŋu ana wòanɔ bɔbɔe na nɔvinyɔnuwo be woatrɔ asi le woƒe nyawo ŋu wòasɔ na woƒe aƒemenɔlawo.
9 Ðaseɖiɖimɔnu Siwo Woazã: Abe alesi wòdze le Subɔsubɔ Suku gbalẽa ƒe axa 45 ene la, sukudzikpɔla ate ŋu atia ɖaseɖiɖimɔnu aɖe na sukuviawo. Ne wometia ɖeke na wo o la, ke nɔvinyɔnuwo ate ŋu atia esiwo le axa 82 dometɔ aɖe. Ne nɔvinyɔnu aɖe axɔ dɔdasi ɖeka le ɣleti eve ɖesiaɖe me gɔ̃ hã la, ɖaseɖiɖimɔnu vovovo 30 siwo woŋlɔ ɖi la sɔ gbɔ be wòaxɔ ƒe atɔ̃ hafi woakpe wo katã ɖo. Nɔvinyɔnu siwo atia ɖaseɖiɖimɔnu 30 lia, si nye “Ðaseɖiɖimɔnu bubu si sɔ na afisi miele,” naŋlɔ alesi tututu woawɔe ɖe woƒe dɔdasigbalẽvi (S-89) la te alo ɖe egodo. Sukudzikpɔla aŋlɔ ɣletiŋkeke si dzi sukuvia wɔ eƒe dɔdasia ɖe ɖaseɖiɖimɔnu si wòzã la xa ɖe eƒe nusrɔ̃gbalẽa ƒe axa 82 lia. Ate ŋu awɔ esia le ɣeyiɣi si me wòle sukuvia ƒe aɖaŋuɖogbalẽa hã kpem ɖo.
10 Aɖaŋuɖogbalẽ: Wowɔ wò aɖaŋuɖogbalẽ de wò nusrɔ̃gbalẽa me. Edze le eƒe axa 79-81 me. Esia fia be ele be nàtsɔ wò agbalẽa va sukua eye nàtsɔe ana sukudzikpɔla le dɔdasi ɖesiaɖe si nàwɔ megbe. Ele be sukudzikpɔla nakpe nudidi si ŋu sukuvia le dɔ wɔm le la ɖo ɣesiaɣi.
11 Numetotobiabia: Woawɔ Teokrasi Subɔsubɔ Sukua ƒe numetoto si me woana woagblɔ ŋuɖoɖowo tẽ. Woawɔ esia le ɣleti eve ɖesiaɖe me, eye axɔ miniti 30. Nyabiabia siwo me woadzro le numetotoa me la ayi edzi adze le Míaƒe Fiaɖuƒe Subɔsubɔdɔ me. Ne kwasiɖa si me woawɔ numetotoa dze kwasiɖa si miawɔ miaƒe nutome sue takpekpe alo dze nutome sue dzikpɔla ƒe sasrãkpɔ dzi la, ke woaɖɔlii awɔ kwasiɖa si kplɔe ɖo ƒe dɔdasiwo eye woahe numetotoa ayi kwasiɖa si akplɔe ɖo me.
12 Sukuxɔ Bubuwo: Le hame siwo me sukuviawo sɔ gbɔ wu 50 le la, hamemegãwo ate ŋu abu eŋu kpɔ ne anya wɔ be woama wo me ɖe xɔ bubuwo me. “Miate ŋu awɔ ɖoɖo sia na sukuviwo ƒe dɔdasiawo katã loo alo na dɔdasi mamlɛtɔ eveawo ko.” (Subɔsubɔ Suku, axa 285) Aɖaŋuɖoɖo mamlɛtɔ sia ate ŋu asɔ na hame siwo me nɔvinyɔnuwo sɔ gbɔ le evɔ nɔviŋutsu siwo awɔ nuxexlẽ ƒe dɔdasiwo mesɔ gbɔ o. Ele be hamemegãwo natia nɔviŋutsu bibi siwo dze be woakpɔ sukuawo dzi.
13 Aɖaŋuɖola Kpeɖeŋutɔ: Abe alesi wòdze le Teokrasi Subɔsubɔ Suku ƒe ɖoɖowɔɖia me ene la, ele be hamemegãwo ƒe hawo natia nɔviŋutsu si anye aɖaŋuɖola kpeɖeŋutɔ be wòaɖo aɖaŋu na hamemegã kple subɔsubɔdɔwɔla siwo wodea Biblia xexlẽ me nya veviwo kple nufiamenuƒowo asi na ɖeɖe dzaa le adzame. Nɔviŋutsu si woatsɔ dɔ sia ade asi na nanye nɔviŋutsu bibi, amesi ƒe aɖaŋuɖoɖo asɔ eye wòanya xɔ na hamemegã bubuawo. Ele be eƒe aɖaŋuɖoɖo natu ame ɖo, wòakafu wo ɖe woƒe nuƒoƒo kple nufiafia mɔnu nyuiwo ta eye wòakafu akpa vevi ɖeka alo eve aɖewo siwo me woate ŋu awɔ ŋgɔyiyi le la na wo. Mehiã be wòana aɖaŋuɖoɖo ɣesiaɣi ne nɔviŋutsu aɖe wɔ eƒe dɔa memie gɔ̃ hã o. Gake ele be nɔviŋutsu si wotia be wòana aɖaŋuɖoɖo sia nanye nugɔmesenamela eye wòakpɔe adze sii be le nɔviŋutsu siwo naa dutoƒonuƒo fifia gɔ̃ hã gome la, woate ŋu akpe ɖe wo ŋu be woagawɔ ŋgɔyiyi geɖe.—Tim. I, 4:15.
14 Nusiwo Ŋu Woalé Ŋku Ðo: Nukae ate ŋu akpe ɖe aɖaŋuɖola ŋu le ŋkuléle ɖe dɔdasi ŋu me? Le Subɔsubɔ Suku gbalẽa ƒe ta ɖekaɖeka 53 siwo katã wona xexlẽmee dometɔ akpa gãtɔ ƒe aɖaka etɔ̃lia me la, wogblɔ nusiwo wòle be woawɔ ŋu nya veviwo kpuie. Ele be sukudzikpɔla nade dzesi ŋkuɖodzinya alo aɖaŋuɖoɖo bubu siwo me wodzro le agbalẽa me siwo akpe ɖe eŋu kaba be wòate ŋu alé ŋku ɖe alesi wotrɔ asi le dɔa ŋu wòzɔ nyuie kple alesi woƒo nuƒoae ƒe nyonyome ŋu. Le kpɔɖeŋu me, de dzesi nyabiase vovovo siwo le memamaa me le axa 55 lia ƒe etame kple numeɖeɖe siwo le axa 163 lia ƒe memama mamlɛtɔ me.
15 De Dzesi Nuwo ɖe Axawo ƒe Akpa Siwo Nuŋɔŋlɔ Mele O: Hekpe ɖe teƒe gã siwo wogblẽ ɖi le Subɔsubɔ Suku gbalẽa ƒe axawo ƒe mia alo ɖusi kpa dzi siwo dzi nuŋɔŋlɔ mele o ŋu la, wogagblẽ teƒe aɖewo hã ɖi ƒuƒlu le ta aɖewo ƒe nuwuwu be nàte ŋu aŋlɔ wò ŋutɔ wò dzesidenya aɖewo siwo ŋu nèke ɖo le ɖokuisinusɔsrɔ̃ alo le Teokrasi Subɔsubɔ Suku me la ɖo. (Kpɔ axa 77, 92, 165, 243, 246, kple 250.) Ðo ŋku edzi nàtsɔ wò agbalẽa ɖe asi ava sukua kwasiɖa ɖesiaɖe. Nɔ edzi kpɔm ne wole nuƒo gbãtɔawo ƒom. Na wò agbalẽa nanɔ ʋuʋu ɖi le sukua ƒe akpa susɔewo katã me. De dzesi aɖaŋuɖoɖo siwo sukudzikpɔlaa ana. Lé to ɖe nufiafiamɔnuwo, biabiawo, kpɔɖeŋuwo, nuwo ɖɔɖɔ ƒe mɔnuwo, kpɔɖeŋunyagbɔgblɔwo, nusiwo wokpɔna alo nɔnɔmetatawo, kple nuwo tsɔtsɔ sɔ kple wo nɔewo ƒe mɔnu siwo ŋudɔ nuƒolaa awɔ ŋuti. Ne èwɔ nuŋlɔɖi nyuiwo la, àte ŋu aɖo ŋku nya vevi geɖe siwo ŋu nàke ɖo le sukua me dzi bɔbɔe ahazãe.
16 Yesu Kristo nyae be gbeƒãɖeɖe tso Mawu ƒe Fiaɖuƒea ŋu nye mɔnukpɔkpɔ gãtɔ kekeake si ate ŋu asu ame si. Emae nye dɔ vevitɔ si wode asi nɛ. (Mar. 1:38) Egblɔ be: “Ele nam be, magblɔ mawufiaɖuƒe la ŋu nyanyui afia du bubuawo hã; elabena eyata wodɔm ɖo.” (Luka 4:43) Abe alesi amewo wɔ ɖe amekpekpe ma dzi hedze eyomee ene la, míawo hã míeƒo mía ɖokui ɖe gbeƒãɖeɖe nyanyuia me vevie, eye míele ʋiʋlim ɣesiaɣi be míabi ɖe edzi le míaƒe “kafukafuvɔsa” tsɔtsɔna me. (Heb. 13:15) Bene míate ŋu abi ɖe edzi geɖe la, neva eme be míaɖoe kplikpaa be míakpɔ gome le Teokrasi Subɔsubɔ Sukua me, si nye suku si akpe ɖe mía ŋu be míadzra ɖo ɖe nusiwo hiã wu le agbe me la ŋu.