“Metsɔ Nye Nyawo Le Nuwò Dem”

1, 2. Nu ka tae nàte ŋu aka ɖe nya siwo nèxlẽna le Biblia me dzi?

“XƆLƆ̃ aɖewo kuna ɖe ame ŋu wu ame nɔvi gɔ̃ hã.” (Lod. 18:24) Ðe Biblia me nya siawo va eme na wò kpɔa? Ele bɔbɔe be nàka ɖe xɔlɔ̃ vavã ƒe nyawo dzi. Ne egblɔ nya nyui aɖe na wò alo ka nane si wòdi be yeawɔ ta na wò la, èxɔnɛ sena. Ne ehe wò susu yi nane si ŋu wòle be nàwɔ asitɔtrɔ le dzi la, ewɔwɔ metena ɖe dziwò o. Tso esime nèdze sii la, ale si wòwɔa nu ɖe ŋuwò, ne aɖaŋu ɖom wòle na wò kura gɔ̃ hã, na nèkpɔe be wò nyui ko dim wòle. Edi be eme nanyo na wò eye wò hã nèdi be eme nanyo nɛ. Miaƒe taɖodzinue nye be tsi nagato yewo dome gbeɖe o.

² Ame siwo Mawu zã woŋlɔ Biblia-gbalẽ vovovoawo ate ŋu anye xɔlɔ̃ mawo ƒomevi na wò. Àte ŋu axɔ woƒe nyawo dzi ase. Èka ɖe edzi be viɖe le nya siwo katã wogblɔ ŋu. Nenemae wòle be blema Israel viwo hã nabu ‘ame siwo gbɔgbɔ kɔkɔe ʋã wogblɔ Mawu ƒe nyawo ɖi’ la hafi. (2 Pet. 1:20, 21) Ame si Mawu zã wòŋlɔ Biblia me nyagblɔɖigbalẽ gãtɔ kekeakee nye Yeremiya. Eya kee ŋlɔ Konyifahawo kple Biblia-gbalẽ eve bubu aɖewo hã.

3, 4. Aleke ame aɖewo bua Yeremiya kple Konyifahawo ƒe agbalẽawoe, gake nu ka tae míate ŋu agblɔ be woƒe nyataƒoƒoa mesɔ o? Gblɔ eƒe kpɔɖeŋu.

³ Gake ànya de dzesii be egbea, Biblia xlẽla aɖewo ƒoa nya ta be Yeremiya ƒe nuŋlɔɖiawo meka yewo o. Wogblɔna be nya vɔ̃wo kple nuxlɔ̃amenya sesẽwo sɔŋ koe le Yeremiya kple Konyifahawo ƒe agbalẽawo me.a Gake nenemae wòle be míabu Biblia-gbalẽ eve siawoea?

⁴ Enye nyateƒe be Yeremiya ŋlɔ nuxlɔ̃amenya sesẽwo ya, gake ɖe xɔlɔ̃ vavãwo mexlɔ̃a nu mí vevie ɣeaɖewoɣi oa? Yesu gɔ̃ hã memia nu ɖe exɔlɔ̃ apostoloawo ƒe nɔnɔme gbegblẽwo dzi o; eɖɔ wo ɖo. (Mar. 9:33-37) Ke hã, míate ŋu anɔ te ɖe ema dzi agblɔ be nya vɔ̃wo sɔŋ koe Yesu tsɔ va anyigba dzi o. Nya nyui si akpe ɖe mía ŋu míawɔ nu wòadze Mawu ŋu eye míakpɔ dzidzɔ le etsɔme koŋue wòtsɔ vae. (Mat. 5:3-10, 43-45) Nenemae Yeremiya ƒe nuŋlɔɖiawo hã le. Wonye “Ŋɔŋlɔ blibo” si nyo na “ɖɔɖɔɖo” la ƒe akpa aɖe. (2 Tim. 3:16) Yeremiya medo kpo ʋɔnu si Mawu adrɔ̃ ame siwo gblɔna be yewole Yehowa subɔm gake woyi edzi le nu gbegblẽwo wɔm la gbɔgblɔ na wo o. Ke hã, mɔkpɔkpɔ kple yayra siwo ate ŋu asu mía si le etsɔme ŋu nyawo hã le Yeremiya kple Konyifahawo ƒe agbalẽawo me. Yeremiya gblɔ ale si Mawu ƒe tameɖoɖo na eƒe amewo ava emee ŋu nya ɖi, eye míawo dzie nya mawo le eme vam ɖo egbea. Azɔ hã, nya tuameɖo kple nya dedziƒoname geɖewo le Biblia-gbalẽ eve siawo me.—Xlẽ Yeremiya 31:13, 33; 33:10, 11; Konyifahawo 3:22, 23.

 5. Aleke Yeremiya ƒe nuŋlɔɖiawo ate ŋu aɖe vi na míi?

⁵ Yeremiya ŋlɔ nu tso ale si míawɔ akpɔ dzidzɔ le Mawu ƒe amewo dome fifia kple mɔkpɔkpɔ nyui siwo ate ŋu asu mía si le etsɔme ŋu. Le kpɔɖeŋu me, eŋlɔ nu tso nɔviwɔwɔ si le mía dome ŋu. Eƒe nuŋlɔɖiawo akpe ɖe mía ŋu míado ŋusẽ nɔviwɔwɔ sia ahawɔ ɖe apostolo Paulo ƒe aɖaŋuɖoɖo sia dzi be: “Nɔviwo, miyi edzi mianɔ dzidzɔ kpɔm, miana woanɔ mia ɖɔm ɖo, woanɔ akɔ fam na mi, miaƒe tamesusu nanɔ ɖeka, mianɔ anyi le ŋutifafa me; eye lɔlɔ̃ kple ŋutifafa ƒe Mawu la anɔ anyi kpli mi.” (2 Kor. 13:11) Yeremiya ŋlɔ nu tso gbedeasi si míeɖea gbeƒãe hã ŋu. Togbɔ be míexlɔ̃a nu amewo be ŋkeke mamlɛawo mee míele eye be nuɖoanyi sia awu enu kpuie hã la, gbedeasi si míeɖea gbeƒãe koŋ la nye esi naa mɔkpɔkpɔ ame. Tsɔ kpe ɖe eŋu la, Yeremiya ƒe nyawo aɖe vi na mí le gbe sia gbe gbenɔnɔ me. Nɔnɔme siwo me míele fifia dometɔ geɖe sɔ kple etɔ, eye egblɔ nya aɖewo siwo míawo hã míate ŋu agblɔ egbea. Be míakpɔ esia adze sii la, nanewo li wòle be míanya tso nyagblɔɖila kpɔɖeŋu nyui ɖola sia si Mawu gblɔ na be, “kpɔ ɖa, metsɔ nye nyawo le nuwò dem” la ŋu gbã. Nu siawoe nye: ƒome si me wòdzɔ tso, ame si ƒomevi wònye, nu siwo me wòto, kple dɔ si Mawu de esi.—Yer. 1:9.

6, 7. Aleke míewɔ nya be susu aɖe nɔ Mawu si ɖe Yeremiya ŋu hafi wodzii, eye aleke nɔnɔmeawo nɔ le ɣeyiɣi si me wodzii?

⁶ Ne nyɔnu fɔ fu la, woa kple srɔ̃a siaa tsia dzi ɖe vi si dzi ge woala ƒe etsɔme ŋu vevie. Ame ka ƒomevie wòanye, nu kae wòava zu le agbe me—si fia be, dɔ kae wòava wɔ, nu kawo mee wòatsɔ ɖe le, taɖodzinu kawo gbɔe wòaɖo? Dziwòlawo hã anya bu nu siawo ŋu ʋuu hafi dzi wò. Ðewohĩ Yeremiya dzilawo hã wɔe nenema. Gake Yeremiya ya tɔ le etɔxɛe. Le mɔ ka nu? Xexea me katã Wɔla la tsɔ ɖe le Yeremiya ƒe agbe kple dɔ siwo wòava wɔ me vevie.—Xlẽ Yeremiya 1:5.

⁷ Hafi woadzi Yeremiya la, Mawu ya kpɔe xoxo be ate ŋu ava zu yeƒe nyagblɔɖila. Eya ta etsɔ ɖe le ɖevi sia si woadzi ɖe nunɔlawo ƒe ƒome aɖe me le Yerusalem ƒe dziehe la me vevie. Ƒe alafa adrelia D.M.Ŋ. ƒe domedome lɔƒoe wodzii. Dzidzɔ aɖeke menɔ Yuda ɣemaɣi o, elabena Fia vɔ̃ɖi Manase ye nɔ dzi ɖum. (Kpɔ axa 19.) Le ƒe 55 siwo Manase tsɔ ɖu fiae ƒe akpa gãtɔ me la, nu si nye vɔ̃ le Yehowa ŋkume sɔŋ ko wòwɔ. Via Amon si va xɔ ɖe eteƒe hã to eƒe ʋe me. (2 Fia. 21:1-9, 19-26) Gake Yuda Fia si va xɔ ɖe Amon teƒe ya na nɔnɔmeawo trɔ nukutɔe. Ɛ̃, Fia Yosiya di Yehowa. Kaka ƒe 18 nava yi tso esime wòxɔ zia la, eɖe trɔ̃subɔsubɔ ɖa le dukɔa me keŋkeŋ. Esia anya dzɔ dzi na Yeremiya dzilawo ŋutɔ, elabena Yosiya ƒe dziɖuɣiae Mawu ɖo wo via nyagblɔɖilae.—2 Kron. 34:3-8.

 8. Dɔ kae Mawu de Yeremiya si, eye aleke Yeremiya se le eɖokui me tso dɔ ma ŋu?

⁸ Míenya ƒe si Yeremiya xɔ esime Mawu gblɔ nɛ be, “metsɔ wò ɖo nyagblɔɖilae na dukɔwo” o. Ðewohĩ nu vi aɖe koe susɔ wòaxɔ ƒe 25, elabena ƒe mae Lewi viwo xɔna ɣemaɣi hafi dzea nunɔladɔ gɔme. (4 Mose 8:24) Ƒe ka kee Yeremiya ɖaxɔ o, ale si wòɖo nyaa ŋue nye esi: “Oo, Aƒetɔ Yehowa, kpɔ ɖa, nyemate ŋu aƒo nu o, elabena nyemetsi o.” (Yer. 1:6) Ðewohĩ ese le eɖokui me be ɖevi ko yenye, alo be yemedze awɔ nyagblɔɖila ƒe dɔ, si nye agbanɔamedzi gã si abia nuƒoƒo le amehawo ŋkume zi geɖe la o.

9, 10. Nɔnɔme kawo mee Yeremiya dze eƒe nyagblɔɖidɔa gɔme le, gake nu ka tae míate ŋu agblɔ be dɔ sia meva nɔ bɔbɔe nɛ kura o?

⁹ Ɣeyiɣi si me Fia Yosiya nɔ alakpasubɔsubɔ nuwɔna nyɔŋuwo ɖem ɖa hele tadedeagu vavãtɔ ɖom anyie Mawu ɖo Yeremiya nyagblɔɖilae. Ne kadodo kplikplikpli aɖeke menɔ Yeremiya kple Yosiya dome ɣemaɣi o hã la, míenya be nɔnɔmeawo de nyagblɔɖila vavã sia dzi be wòawɔ eƒe dɔa. Nyagblɔɖila Zefaniya kple Naxum hã nɔ Yuda le Yosiya ƒe dziɖuɖua ƒe gɔmedzedze lɔƒo.b Nyɔnu nyagblɔɖila Xulda hã nɔ agbe le Yosiya ƒe dziɖuɣia, gake egblɔ ɣeyiɣi vɔ̃ siwo ava va emegbe la ŋu nya ɖi. Yeremiya nɔ agbe kpɔ Xulda ƒe nyawo me vava teƒe. (2 Fia. 22:14) Nyateƒee, nɔnɔmeawo va sesẽ ale gbegbe be Yeremiya xɔlɔ̃ aɖewo, abe Ebed-Melex kple Barux ene, ye va xɔe ɖe agbe alo kpɔ eta tso futɔ vɔ̃ɖiwo si me.

¹⁰ Aleke nàse le ɖokuiwò me ne Mawu ŋutɔ gblɔ na wò tẽe be yetia wò be nànye nyagblɔɖila agblɔ yeƒe nuxlɔ̃amenya sesẽwo? (Xlẽ Yeremiya 1:10.) Wò ya se gbe siwo wode Yeremiya si ƒe kpɔɖeŋu ɖeka ɖa. Le ƒe 609 D.M.Ŋ. me la, Babilontɔwo ƒe aʋakɔwo ho ɖe Yerusalem ŋu. Fia Zedekiya nɔ nya nyui aɖe dim be yease tso Mawu gbɔ le Yeremiya nu. Gake nya nyui aɖeke mele Yehowa si nɛ o.—Xlẽ Yeremiya 21:4-7, 10.

11. Nu kae na Yeremiya anya kpɔe be dɔ sesẽ aɖee wode ye si, gake nu kae na dzi nɔ eƒo?

¹¹ Wò ya bu ale si wòanɔ ne wodɔ mí be míagblɔ fɔbuame kple ʋɔnudrɔ̃gbedeasi sesẽwo na fia vɔ̃ɖiwo, nunɔla nu fitifiti wɔlawo, kple alakpanyagblɔɖilawo la ŋu kpɔ. Dɔ ma tututue wodɔ Yeremiya. Gake Mawu nɔ megbe na Yeremiya, eye míenya be ele megbe na míawo hã. (Yer. 1:7-9) Esi Mawu ka ɖe ɖekakpui Yeremiya dzi ta la, egblɔ nya siwo gbɔna tsɔ do ŋusẽe: “Matsɔ wò awɔ du sesẽ, gasɔti kple akɔbligli egbea ɖe anyigba blibo la nu, ɖe Yuda fiawo, eƒe amegãwo, eƒe nunɔlawo kple dukɔ hahoo la ŋuti. Woawɔ avu kpli wò, ke woado kpoe, elabena meli kpli wò, be maɖe wò, Yehowa ye gblɔe!”—Yer. 1:18, 19.

12. Nu ka tae míate ŋu agblɔ be amegbetɔ si ƒe seselelãmewo sɔ kple mía tɔ koe Yeremiya hã nye?

¹² Mele be míasusui be dziƒoe Yeremiya ɖi tso va o. Amegbetɔ ko wònye abe míawo ke ene. Azɔ hã, anyo be míade dzesii be togbɔ be Yeremiya nɔ agbe ƒe akpeakpewoe nye esi va yi hã la, nɔnɔme siwo me wòto sɔ kple esiwo me tom míele egbea. Ale si ko míedoa go ame vovovowo le míaƒe gbe sia gbe gbenɔnɔ kple hamea me dɔwɔnawo mee la, nenema koe wònɔ le Yeremiya hã gome. Esiawo katã na míekpɔe be míate ŋu asrɔ̃ nu geɖe tso Yeremiya gbɔ, elabena abe nyagblɔɖila Eliya ene la, “amegbetɔ si ƒe seselelãmewo sɔ kple mía tɔwo” koe eya hã nye. (Yak. 5:17) Na míadzro nu siwo míate ŋu asrɔ̃ tso Yeremiya gbɔ dometɔ aɖewo me kpɔ.

13, 14. Nu ka tae míate ŋu agblɔ be Kristotɔ aɖewo hã to nɔnɔme siwo me Yeremiya to le Pasxur si me la me kpɔ? (Kpɔ nɔnɔmetata si le axa 10.)

¹³ Ðe agbemenyawo metena ɖe dziwò ɣeaɖewoɣi nèɖea hũu oa? Nenema koe wònɔ le Yeremiya hã gome. Gbe ɖeka la, nunɔla xɔŋkɔ Pasxur ƒo Yeremiya hena wobɔ pãe. Yeremiya nɔ pã sia si nye ati si me womimi eƒe kɔ, asiwo, kple afɔwo ɖo ale be eƒe ameti bliboa xa gobaa la me gaƒoƒo geɖe. Tsɔ kpe ɖe veve si sem wònɔ ŋu la, eƒe futɔwo nɔ fewu ɖum le eŋu eteƒe mekɔ o. Ne woɖu fewu le ŋuwò, alo wɔ funyafunya wò gɔ̃ hã ɖe, ɖe wòanɔ bɔbɔe be nàdo dzi atsɔea?—Yer. 20:1-4.

¹⁴ Mewɔ nuku o be nɔnɔme siawo ƒoe ɖe Yeremiya nu wògblɔ be: “Aɖi ŋkeke, si dzi wodzim la ŋu kpekpekpe! . . . Nu ka ta medo tso danye ƒe dɔ me ɖo, ne manɔ fukpekpe kple nuxaxa kpɔm, eye nye ŋkekewo nayi le ŋukpe me?” (Yer. 20:14-17) Edze ƒãa be nɔnɔmeawo ɖe dzi le Yeremiya ƒo. Ðe nu te ɖe dziwò kpɔ ale gbegbe be nèse le ɖokuiwò me be yemele bo aɖeke nu o, be viɖe aɖeke mele ye ŋu o, alo be ne yeku kura enyo na ye wua? Nusɔsrɔ̃ tso nu siwo me Yeremiya to kple ale si nuwo va yi nɛ ŋu aɖe vi na ame siwo katã se le wo ɖokui me alea kpɔ.

15. Nu ka tae nyanya be Yeremiya ƒe seselelãme va trɔ kpata ɣeaɖeɣi aɖe vi na mí?

¹⁵ De dzesii be ɖeko nyagblɔɖila Yeremiya ƒo nu tso kafukafuhawo dzidzi na Yehowa ŋu vɔ teti koe nye ema wògagblɔ dziɖeleameƒonya siwo míexlẽ le Yeremiya 20:14-17. (Xlẽ Yeremiya 20:12, 13.) Ðe wò hã wò seselelãmewo va trɔna kpata ɣeaɖewoɣia? Dzi nɔ dzɔwòm nyuie ko, kasia nègalé blanui. Nyateƒee, nu siwo me Yeremiya to me dzodzro aɖe vi na mí katã. Eme kɔ ƒãa be amegbetɔ si ƒe seselelãmewo sɔ kple mía tɔ ko wònye. Eya ta ŋkuléle ɖe ale si wòwɔ nui le nɔnɔme vovovowo me ŋu aɖe vi na mí ŋutɔ, elabena Wɔla la zãe abe nyanuɖela ene ƒe geɖe.—2 Kron. 36:12, 21, 22; Ezra 1:1.

16. Ame kawoe nyateƒe si wònye be Yeremiya meɖe srɔ̃ kpɔ o ate ŋu aɖe vi na?

¹⁶ Nu bubu si me ame geɖe ƒe nɔnɔme sɔ kple Yeremiya tɔ lee nye be meɖe srɔ̃ kpɔ o. Nu ka tae meɖe srɔ̃ o? Mawu de se tɔxɛ aɖe si dzi wɔwɔ anya sesẽ na Yeremiya la nɛ be: “Mègaɖe srɔ̃ o.” (Xlẽ Yeremiya 16:2.) Nu ka tae Yehowa de se sia na Yeremiya, eye ŋusẽ kae wòkpɔ ɖe edzii? Nufiame kae le nya sia me na nɔviŋutsu kple nɔvinyɔnu siwo si srɔ̃ mele o, ɖewohĩ le esi woawo ŋutɔ wotiae nenema, alo nɔnɔmeawo va bia nenema ta? Ðe se si Mawu de na Yeremiya la ka Ðasefo siwo si srɔ̃ le fifia hã le mɔ aɖe nua? Ke ame siwo ɖe srɔ̃ gake ‘viŋutsuwo kple vinyɔnuwo’ mele wo si o ya ɖe? Ke wò hã ɖe, aleke Yeremiya ŋu nya sia aɖe vi na wòe?

17. Nu kawoe míate ŋu asrɔ̃ tso nya siwo le Yeremiya 38:20 me?

¹⁷ Eva hiã ɣeaɖeɣi be Yeremiya naxlɔ̃ nu Yuda fia aɖe. Egblɔ nɛ be: “Ðo to Yehowa ƒe gbe ko, abe ale si megblɔ na wò ene, ne eme nanyo na wò, eye nàtsi agbe.” (Yer. 38:20) Nufiame nyui aɖe le nudzɔdzɔ sia me na mí ku ɖe ale si míawɔ nu ɖe amewo ŋui ŋu, ame siwo mezu Yehowa subɔlawo haɖe o hã le eme, elabena ɖewohĩ míate ŋu akpe ɖe wo ŋu woava zɔ Yehowa ƒe mɔwo dzi. Ale si Yeremiya wɔ nu ɖe ame siwo vɔ̃a Mawu ŋui hã nye kpɔɖeŋu nyui aɖe na mí míasrɔ̃. Ɛ̃, nu siwo míate ŋu asrɔ̃ tso Yeremiya gbɔ mele xexlẽ me o.

18, 19. Mɔ siwo dzi míate ŋu ato adzro Yeremiya kple Konyifahawo ƒe agbalẽawo me la dometɔ aɖewo ɖe?

¹⁸ Agbalẽ sia akpe ɖe mía ŋu míadzro Biblia-gbalẽ siwo nye Yeremiya kple Konyifahawo me ahasrɔ̃ nu tso wo me. Le mɔ ka nu? Gbɔgbɔ ʋã apostolo Paulo wògblɔ be: “Ŋɔŋlɔ blibo la tso Mawu ƒe gbɔgbɔ me, eye wònyo na nufiafia, na nyagbename, na ɖɔɖɔɖo, na amehehe le dzɔdzɔenyenye me.” (2 Tim. 3:16) Yeremiya kple Konyifahawo ƒe agbalẽawo hã nye Ŋɔŋlɔ blibo la ƒe akpa aɖe.

¹⁹ Míate ŋu ato mɔ vovovo dzi adzro Yeremiya kple Konyifahawo ƒe agbalẽawo me wòaɖe vi. Le kpɔɖeŋu me, míate ŋu atiae be míadzro wo me tso kpukpui gbãtɔ dzi va se ɖe mamlɛtɔ dzi, ne míase kpukpui ɖe sia ɖe gɔme tsitotsito. Alo míate ŋu atiae be míadzro ale si agbalẽ eve siawo de nu wo nɔewo me, alo ale si wo me nyawo wɔ ɖeka kple egbegbe nudzɔdzɔ aɖewoe la me. (Tsɔe sɔ kple Yeremiya 24:6, 7; 1 Korintotɔwo 3:6.) Mɔ bubu hãe nye be míasrɔ̃ nu tso ŋutinyamenudzɔdzɔ siwo ŋu agbalẽ eve siawo ƒo nu tsoe la ŋu. (Yer. 39:1-9) Nyateƒee, nu siawo dometɔ aɖewo nyanya le vevie hafi míate ŋu ase Yeremiya kple Konyifahawo ƒe agbalẽawo gɔme nyuie. Susu ma tae agbalẽ sia ƒe Ta Evelia, si nye “Esubɔ ‘Le Ŋkekeawo Ƒe Nuwuɣi,’” akpe ɖe mía ŋu míanya nu siwo dzɔ le Yeremiya ŋɔli kple ale si Mawu de nu nyawo mee.

20. Aleke míadzro Yeremiya kple Konyifahawo ƒe agbalẽawo mee le nusrɔ̃gbalẽ sia me?

²⁰ Gake mɔnu si míazã le agbalẽ sia me ya to vovo. Míadzro Yeremiya kple Konyifahawo ƒe agbalẽawo me le mɔ aɖe nu be wòana míakpɔe be Mawue to wo dzi le nu ƒom na mí Kristotɔ siwo li egbea be míanya ale si wòle be míanɔ agbee. (Tito 2:12) Míava kpɔe be nya geɖewo le Biblia-gbalẽ eve siawo me, siwo nyo “na nufiafia” wu ale si míesusui. Aɖaŋuɖoɖo kple kpɔɖeŋu nyui geɖewo le wo me, siwo akpe ɖe mía ŋu míanɔ te ɖe agbemekuxiwo nu dzidzedzetɔe. Míeɖanye trewo, srɔ̃tɔwo, hamemetsitsiwo, mɔɖelawo, vifofowo, vidadawo, alo sukuviwo o, numedzodzro sia aɖe vi na mí katã. Mía dometɔ ɖe sia ɖe akpɔe be Mawu to Biblia-gbalẽ eve siawo dzi le kpekpem ɖe mía ŋu be míanɔ “dzadzraɖoɖi keŋkeŋ na dɔ nyui sia dɔ nyui wɔwɔ.”—2 Tim. 3:17.

21. Nu kawoe nèle mɔ kpɔm be yeasrɔ̃ le agbalẽ sia me?

²¹ Ne èle agbalẽ sia ƒe ta ɖe sia ɖe srɔ̃m la, kpɔe ɖa be nufiame kawoe le eme na ye hã. Ðikeke mele eme o be àkpɔe be Yeremiya kple Konyifahawo ƒe agbalẽawo me nyawo wɔ ɖeka kple nya si Paulo gblɔ be: “Nu siwo katã woŋlɔ ɖi tsã la, woŋlɔ wo ɖi le míaƒe nufiafia ta, bene to míaƒe dzidodo kple akɔfafa si míekpɔna le Ŋɔŋlɔawo me dzi la, mɔkpɔkpɔ nasu mía si.”—Rom. 15:4.