“Mawɔ Wo Woazu Dukɔ Ðeka”

1, 2. (a) Nu ka tae aboyomeawo anya tsi dzi? (b) Gake nu ka tae woda ƒu? (d) Nyabiase kawo mee míadzro?

GBƆGBƆ ʋã Ezekiel wòto dzesi siwo wokpɔna kple ŋku dzi gblɔ nya vovovowo ɖi ku ɖe aboyome siwo nɔ Babilon la ŋu. Nyagblɔɖi gbãtɔ si Ezekiel wɔ fia la nye ʋɔnudrɔ̃gbedeasi, nenema kee nye evelia, etɔ̃lia kple esiwo kplɔe ɖo hã. (Eze. 3:24-26; 4:1-7; 5:1; 12:3-6) Le nyateƒe me la, nyagblɔɖi siwo katã wòto dzesiwo dzi wɔ fia la nye ʋɔnudrɔ̃gbedeasi sesẽ siwo ku ɖe Yudatɔwo ŋu.

² Azɔ bu ale si aboyomeawo atsi dzii esi Ezekiel gava tɔ ɖe wo ŋkume eye wòle klalo be yeawɔ dzesi bubu afia la ŋu kpɔ. Woanya nɔ wo ɖokuiwo biam be, ‘nya gbãdziname kae míagase fifia?’ Gake woda ƒu. Nyagblɔɖi si Ezekiel ato dzesiwo dzi awɔ fifia ya to vovo kura. Menye vɔ̃ ŋue wòku ɖo o, ke boŋ nya nyui wònye. (Eze. 37:23) Dzesi kae Ezekiel wɔ fia aboyomeawo? Gɔmesese kae le eŋu? Aleke wòku ɖe mawusubɔlawo ŋu egbea? Na míado afɔ na nya mawo.

3. (a) Nu kae ati si nye ‘Yuda tɔ’ la le tsitre ɖi na? (b) Nu ka tae “Efrayim ƒe ati” la le tsitre ɖi na Israel-to ewo fiaɖuƒea?

³ Yehowa gblɔ na Ezekiel be wòatsɔ ati eve eye wòaŋlɔ ɖe ɖeka ŋu be ‘Yuda tɔ,’ eye wòaŋlɔ ɖe evelia ŋu be ‘Efrayim ƒe ati, si nye Yosef tɔ.’ (Xlẽ Ezekiel 37:15, 16.) Nu kae ati eve siawo fia? Ati si nye ‘Yuda tɔ’ la le tsitre ɖi na to eve fiaɖuƒe si nye Yuda kple Benyamin. Fia siwo tso Yuda-toa me la ɖu to eveawo dzi, azɔ hã woawoe nye nunɔlawo elabe gbedoxɔ si le Yerusalem mee nunɔlawo subɔna le. (2 Kron. 11:13, 14; 34:30) Eya ta Yuda-toa mee fia siwo tso David ƒe ƒomea me kple nunɔla siwo nye Lewi viwo tsona. “Efrayim ƒe ati” la le tsitre ɖi na Israel-to ewo fiaɖuƒea. Nu ka tae wogblɔ be enye Efrayim ƒe ati? To ewo fiaɖuƒea ƒe fia gbãtɔe nye Yeroboam si tso Efrayim-toa me. Le ɣeyiɣi aɖe megbe la, Efrayim va zu to vevitɔ le Israel. (5 Mose 33:17; 1 Fia. 11:26) De dzesii be fia siwo tso David ƒe ƒomea me kple nunɔla siwo nye Lewi viwo, menɔ Israel-to ewo fiaɖuƒea me o.

4. Nu kae nu si Ezekiel tsɔ ati eveawo wɔ la fia? (Kpɔ foto si le nyati sia ƒe gɔmedzedze.)

⁴ Emegbe Mawu gblɔ na Ezekiel be wòatsɔ ati eveawo akpe ale be “woazu ati ɖeka ko.” Esi aboyomeawo tsi dzi nɔ ŋku lém ɖe Ezekiel ŋu la, wobiae be: “Mèle nu si esiawo fia la gblɔ ge na mí oa?” Eɖo ŋu na wo be nu si wɔm yele fia la nye nu si Yehowa ŋutɔ ava wɔ. Yehowa gblɔ tso ati eveawo ŋu be: ‘Woazu ati ɖeka; woawɔ ɖeka le asinye me.’—Eze. 37:17-19.

5. Gɔmesese kae le nu si Ezekiel wɔ fia la ŋu? (Kpɔ aɖaka si nye “Ati Eve Siwo Wokpe.”)

⁵ Eyome Yehowa ɖe nu si ati eveawo kpekpe fia la me. (Xlẽ Ezekiel 37:21, 22.) Woakplɔ aboyome siwo tso Yuda-to eve fiaɖuƒea me kple aboyome siwo tso Israel-to ewo fiaɖuƒea (Efrayim) me la ava Israel-nyigba dzi, eye woazu “dukɔ ɖeka” le afi ma.—Yer. 30:1-3; 31:2-9; 33:7.

6. Nyagblɔɖi wɔdɔɖeamedzi kae le Ezekiel ta 37?

⁶ Nyagblɔɖi wɔdɔɖeamedzi siwo ku ɖe gbugbɔgaɖɔɖoa ŋu kae nye si woŋlɔ ɖe Ezekiel ta 37 lia me! Yehowa aɖee afia be menye Mawu si nana woɖea asi le yeƒe amewo ŋu le aboyo me ko yenye o (kpukpui 1-14) ke yenana wowɔa ɖeka hã (kpukpui 15-28). Dzidzɔnya si dze le nyagblɔɖi eve siawo mee nye be: Mawu ate ŋu aɖe amewo tso aboyo me eye wòate ŋu ana woawɔ ɖeka.

7. Aleke 1 Kronika 9:2, 3 me nyawo ɖee fia be “Mawu ya tea ŋu wɔa nu sia nu”?

⁷ Le amegbetɔwo gbɔ la, be woaɖe amewo tso aboyo me eye woana woawɔ ɖeka la adze nu si manya wɔ kura o.a Ke hã, “Mawu ya tea ŋu wɔa nu sia nu.” (Mat. 19:26) Yehowa na eƒe nyagblɔɖia va eme. Woɖe asi le aboyomeawo ŋu le Babilon le ƒe 537 D.Y. eye emegbe fiaɖuƒe evea me tɔ aɖewo trɔ va Yerusalem va kpe asi ɖe eŋu wogbugbɔ tadedeagu vavãtɔ ɖo anyi. Nuŋlɔɖi siwo tso Mawu ƒe gbɔgbɔ me ɖo kpe esia dzi be: “Ame aɖewo tso Yuda, Benyamin, Efrayim kple Manase toawo me trɔ va nɔ Yerusalem.” (1 Kron. 9:2, 3; Ezra 6:17) Nyateƒee, abe ale si Yehowa gblɔe ɖi ene la, Israel-to ewo fiaɖuƒea me tɔ aɖewo kple Yuda-to eve fiaɖuƒea me tɔ aɖewo wɔ ɖeka.

8. (a) Nya kae Yesaya gblɔ ɖi? (b) Nu vevi eve kawoe ɖe dzesi le Ezekiel 37:21?

⁸ Ƒe 200 aɖewo do ŋgɔ la, nyagblɔɖila Yesaya gblɔ nu si adzɔ ne Israel-viwo kple Yudatɔwo trɔ gbɔ tso aboyo me la ɖi. Egblɔe ɖi be, Yehowa adze egɔme aƒo “Israel ƒe ame siwo wokaka” kple “Yuda ƒe ame siwo woka hlẽ la nu ƒu tso anyigba ƒe go eneawo dzi,” eye wòaƒo wo nu ƒu “atso Asiria” hã. (Yes. 11:12, 13, 16) Abe ale si Yehowa gblɔe ɖi ene la, ekplɔ “Israel-viwo tso dukɔ siwo me woyi” la gbɔe. (Eze. 37:21) De dzesi nu vevi eve siawo: Fifia, Yehowa megayɔ aboyomeawo be “Yuda” kple “Efrayim” o, ke boŋ eyɔ wo be “Israel-viwo,” si fia ƒuƒoƒo ɖeka. Azɔ hã, wogblɔ tso Israel-viwo ŋu be wotso dukɔ vovovowo me, tso “goawo katã me” ke menye tso dukɔ ɖeka si nye Babilon o.

9. Aleke Yehowa kpe ɖe aboyome siwo trɔ gbɔ la ŋu wowɔ ɖeka?

⁹ Esi aboyomeawo trɔ gbɔ va Israel la, mɔ ka nue Yehowa kpe ɖe wo ŋu wowɔ ɖeka le? Eɖo ame siwo nye gbɔgbɔ me alẽkplɔlawo abe Zerubabel, Nunɔlagã Yosua, Ezra kple Nehemiya ene Israel-viwo nu. Azɔ hã, Mawu ɖo nyagblɔɖila siwo nye Hagai, Zakariya kple Malaki na wo. Ŋutsu nuteƒewɔla siawo ku kutri de dzi ƒo na dukɔa be woawɔ ɖe Mawu ƒe mɔfiamewo dzi. (Neh. 8:2, 3) Tsɔ kpe ɖe eŋu la, Yehowa gblẽ nugbe siwo futɔwo ɖo ɖe eƒe amewo ŋu la me tsɔ kpɔ Israel dukɔa ta.—Esta 9:24, 25; Zak. 4:6.

10. Nu kae Satana te ŋu wɔ mlɔeba?

¹⁰ Togbɔ be Yehowa wɔ ɖoɖo nyui siawo katã na wo hã la, Israel-vi akpa gãtɔ trɔ megbe de tadedeagu dzadzɛa. Woŋlɔ woƒe nuwɔnawo ɖe Biblia-gbalẽ siwo woŋlɔ esi wogbɔ tso aboyo me megbe la me. (Ezra 9:1-3; Neh. 13:1, 2, 15) Le nyateƒe me la, esime Israel-viwo trɔ gbɔ ƒe alafa ɖeka kloe la, wova tra ɖa tso tadedeagu dzadzɛa gbɔ ale gbegbe be wòhiã be Yehowa nàxlɔ̃ nu wo be: “Mitrɔ ɖe ŋunye.” (Mal. 3:7) Kaka Yesu nava anyigba dzi la, Yuda subɔsubɔhaa ma ɖe kɔmama vovovowo me eye alẽkplɔla mawɔnuteƒewoe nɔ wo nu. (Mat. 16:6; Marko 7:5-8) Satana gagblẽ woƒe ɖekawɔwɔ bliboea me. Togbɔ be ele alea hã la, Yehowa ƒe nyagblɔɖi si ku ɖe ɖekawɔwɔ ŋu la ava eme godoo. Le mɔ ka nu?

11. (a) Nu kae Yehowa ɖe fia to eƒe nyagblɔɖi si ku ɖe ɖekawɔwɔ ŋu la dzi? (b) Nu kae Satana gadze agbagba be yeawɔ esi wonyae tso dziƒo vɔ megbe?

¹¹ Xlẽ Ezekiel 37:24. Yehowa ɖee fia be, yeƒe nyagblɔɖi si ku ɖe ɖekawɔwɔa ŋu la ava eme bliboe le yeƒe amewo dome, ne ye “subɔla David,” si le tsitre ɖi na Yesu dze fiaɖuɖu gɔme. Fiaɖuɖu sia dze egɔme tso ƒe 1914 me.b (2 Sam. 7:16; Luka 1:32) Ɣemaɣi la, gbɔgbɔ me Israel, si nye amesiaminawo va xɔ ɖe dzɔdzɔme Israel teƒe. (Yer. 31:33; Gal. 3:29) Esi wonya Satana le dziƒo la, egaho ɖe Mawu ƒe amewo ŋu be yeagblẽ woƒe ɖekawɔwɔa me. (Nyaɖ. 12:7-10) Le kpɔɖeŋu me, esi Nɔviŋutsu Russell ku le ƒe 1916 me la, Satana wɔ mɔnukpɔkpɔa ŋu dɔ be yeade mama amesiaminawo dome to xɔsegbelawo ƒe nuwɔnawo dzi. Gake eteƒe medidi o, xɔsegbela mawo do le habɔbɔa me. Azɔ hã, Satana gakpɔ dzidzedze esi wòna wolé nɔviŋutsu siwo nɔ ŋgɔ xɔm la de gaxɔ me, gake ema gɔ̃ hã mena wobu mo na Yehowa ƒe amewo o. Nɔvi amesiamina siwo yi edzi wɔ nuteƒe na Yehowa la wɔ ɖeka.

12. Nu ka tae agbagba si Satana dze be yeade mama gbɔgbɔ me Israel me la medze edzi o?

¹² Eya ta nu si dzɔ ɖe dzɔdzɔme Israel dzi la medzɔ ɖe gbɔgbɔ me Israel dzi o, elabe wote ŋu nɔ te ɖe tame vɔ̃ si Satana ɖo be yeade mama wo me la nu. Nu ka tae Satana do kpo nu? Elabena amesiaminawo wɔ wotɔ sinua be yewoawɔ ɖe Yehowa ƒe mɔfiamewo dzi. Esia wɔe be woƒe Fia Yesu Kristo, ame si yi edzi le aʋa wɔm kple Satana la le wo ta kpɔm.—Nyaɖ. 6:2.

13. Nu vevi kae nyagblɔɖi si ƒo nu tso ati eve si wokpe wòzu ɖeka ŋu la fia mí?

¹³ Nu kae nyagblɔɖi si ƒo nu tso ati eve si wokpe wòzu ɖeka ŋu la fia le míaƒe ŋkekea me? Nenɔ susu me na wò be nya si koŋ gblɔm nyagblɔɖia le la ku ɖe ale si ƒuƒoƒo eve aɖewo awɔ ɖeka la ŋu. Vevietɔ wu la, nyagblɔɖia te gbe ɖe edzi be Yehowae ana woawɔ ɖeka. Eya ta nyateƒenya si ku ɖe tadedeagu dzadzɛa ŋu ka dzie nyagblɔɖi si ƒo nu tso ati eve siwo wokpe ŋu te gbe ɖo? Kpuie ko la, eyae nye: Yehowa ŋutɔ ana esubɔlawo ‘nawɔ ɖeka.’—Eze. 37:19.

14. Aleke nyagblɔɖi si ku ɖe ati eve siwo wokpe ŋu la va eme le mɔ si lolo wu nu tso ƒe 1919 me?

¹⁴ Tso ƒe 1919 me, esime wokɔ Mawu ƒe amewo ŋu le gbɔgbɔ me eye wova le gbɔgbɔmeparadiso me la, nyagblɔɖi si ku ɖe ati eve siwo wokpe ŋu la te emevava le mɔ si lolo wu nu. Ɣemaɣi la, ame siwo va wɔ ɖeka la dometɔ akpa gãtɔ nɔ mɔ kpɔm be yewoava zu fiawo kple nunɔlawo le dziƒo. (Nyaɖ. 20:6) Le kpɔɖeŋumɔ aɖe nu la, amesiamina siawo le abe ati si nye ‘Yuda tɔ’ ene, wonye dukɔ si me fia siwo tso David ƒe ƒomea me kple nunɔla siwo nye Lewi viwo le. Ke hã, esi ɣeyiɣiawo va nɔ yiyim la, ame geɖe siwo nɔ mɔ kpɔm be yewoava nɔ agbe le anyigba dzi la va nɔ ɖeka wɔm kple gbɔgbɔ me Yudatɔwo. Ame siawo le abe “Efrayim ƒe ati” ene, fia siwo tso David ƒe ƒomea me kple nunɔla siwo nye Lewi viwo metso dukɔ sia ya me o. Ƒuƒoƒo evea siaa wɔ ɖeka nye Yehowa ƒe amewo le woƒe Fia ɖeka Yesu Kristo te.—Eze. 37:24.

15. Aleke nyagblɔɖi si dze le Ezekiel 37:26, 27 le eme vam egbea?

¹⁵ Ezekiel ƒe nyagblɔɖia ɖee fia be, ame geɖewo ava wɔ ɖeka kple amesiaminawo le tadedeagu dzadzɛa me. Yehowa gblɔ tso eƒe amewo ŋu be: “mana woadzi ɖe edzi” eye “woanɔ nye agbadɔ te.” (Eze. 37:26, 27; etenuŋɔŋlɔ) Nya siawo na míeɖo ŋku nyagblɔɖi si woɖe fia apostolo Yohanes ƒe 700 le Ezekiel ƒe ŋkekea megbe la dzi, be “ame si bɔbɔ nɔ fiazikpuia dzi la akeke eƒe agbadɔ” ɖe “ameha gã aɖe” dzi. (Nyaɖ. 7:9, 15) Egbea, amesiaminawo kple ameha gã la wɔ ɖeka nye Mawu ƒe amewo le eƒe agbadɔ te wòle wo ta kpɔm.

16. Nya kae Zakariya gblɔ ɖi ku ɖe ale si gbɔgbɔ me Israel kple ame siwo le mɔ kpɔm be yewoanɔ agbe le anyigba dzi awɔ ɖekae ŋu?

¹⁶ Zakariya si ŋutɔ nye aboyome si trɔ gbɔ, hã gblɔ nya ɖi tso ale si gbɔgbɔ me Yudatɔwo kple ame siwo le mɔ kpɔm be yewoanɔ agbe le anyigba dzi la awɔ ɖeka la ŋu. Egblɔ be “ame ewo atso dukɔwo . . . me alé Yudatɔ ɖeka ƒe awu toga” eye woagblɔ be: “Míayi kpli mi, elabena míese be Mawu li kpli mi.” (Zak. 8:23) “Yudatɔ ɖeka” la mefia ame ɖeka aɖe o, ke boŋ efia amewo ƒe ƒuƒoƒo aɖe, “mi,” si le tsitre ɖi na amesiamina susɔeawo alo gbɔgbɔ me Yudatɔ siwo li egbea. (Rom. 2:28, 29) “Ame ewo” la le tsitre ɖi na ame siwo le mɔ kpɔm be yewoava nɔ agbe le anyigba dzi. Woawoe ‘léa’ amesiaminawo eye ‘woyina’ kpli wo. (Yes. 2:2, 3; Mat. 25:40) Nyagbɔgblɔ si nye “alé” eye “míayi kpli mi” la te gbe ɖe ale si ƒuƒoƒo eve siawo wɔ ɖeka bliboe la dzi.

17. Aleke Yesu ɖɔ ɖekawɔwɔ si le mía dome egbea lae?

¹⁷ Anye be Ezekiel ƒe nyagblɔɖi si ku ɖe ɖekawɔwɔ ŋu lae nɔ susu me na Yesu esi wòɖɔ eɖokui be yenye alẽkplɔla si ƒe mɔfiafia te yeƒe alẽwo (amesiaminawo) kple “alẽ bubuwo” (ame siwo le mɔ kpɔm be yewoava nɔ agbe le anyigba dzi) nava zu “alẽha ɖeka” le. (Yoh. 10:16; Eze. 34:23; 37:24, 25) Yesu ƒe nya siawo kple esiwo nyagblɔɖila siwo nɔ anyi le blema gblɔ la, ɖɔ ale si amewo awɔ ɖeka le gbɔgbɔ me nukutɔe egbea nyuie, mɔkpɔkpɔ ka kee ɖale mía si o! Esi alakpasubɔsubɔhawo yi edzi le mamam ɖe ƒuƒoƒo vovovowo me la, míawo ya míewɔ ɖeka nukutɔe.

18. Abe ale si wòdze le Ezekiel 37:28 ene la, nu ka tae wòle vevie be Mawu ƒe amewo naganye “xexea ƒe akpa aɖeke o”?

¹⁸ Nya mamlɛ siwo dze le Ezekiel ƒe nyagblɔɖi si ku ɖe ɖekawɔwɔ ŋu me la te gbe ɖe edzi be míaƒe ɖekawɔwɔa me magblẽ gbeɖe o. (Xlẽ Ezekiel 37:28.) Yehowa ƒe amewo wɔ ɖeka elabena eƒe kɔkɔeƒea, alo tadedeagu dzadzɛa “le wo dome.” Eye eƒe kɔkɔeƒea anɔ wo dome ɖaa zi ale si woyi edzi le kɔkɔe alo ɖe wo ɖokuiwo ɖe vovo le Satana ƒe xexea me. (1 Kor. 6:11; Nyaɖ. 7:14) Yesu te gbe ɖe ale si wòle vevie be míaganye xexea ƒe akpa aɖeke o la dzi. Esi wònɔ gbe dom ɖa tso dzi me ɖe eƒe nusrɔ̃lawo ta la, egblɔ be: “Fofo kɔkɔe, kpɔ wo ta . . . ne woawɔ ɖeka . . . Womenye xexea ƒe akpa aɖeke o . . . Kɔ wo ŋu to nyateƒe la me.” (Yoh. 17:11, 16, 17) De dzesii be Yesu ƒe nyawo fia be hafi míawɔ “ɖeka” la mele be míanye “xexea ƒe akpa aɖeke o.”

19. (a) Nu kae aɖee afia be míenye “Mawu srɔ̃lawo”? (b) Le zã mamlɛtɔ si do ŋgɔ na Yesu ƒe ku la, nyateƒenya vevi ka dzie wòte gbe ɖo ku ɖe ɖekawɔwɔ ŋu?

¹⁹ Teƒe sia koe Yesu yɔ Mawu le le Ŋɔŋlɔawo me be “Fofo kɔkɔe.” Yehowa le kɔkɔe eye wòle dzɔdzɔe le go sia go me. Yehowa gblɔ na blema Israel-viwo be: “Minɔ kɔkɔe, elabena mele kɔkɔe.” (3 Mose 11:45) Esi míenye “Mawu srɔ̃lawo” ta la, míedi be míawɔ ɖe sedede ma dzi le míaƒe nuwɔna ɖe sia ɖe me. (Ef. 5:1; 1 Pet. 1:14, 15) Ne wozã nya “kɔkɔe” na amegbetɔwo la, efia nu si “woɖe ɖe vovo.” Eya ta le zã mamlɛ si do ŋgɔ na Yesu ƒe ku me la, ete gbe ɖe edzi be yeƒe nusrɔ̃lawo ayi edzi awɔ ɖeka ne woyi edzi ɖe wo ɖokuiwo ɖe vovo tso xexe sia si ma la gbɔ.

20, 21. (a) Nu kae nana míegakana ɖe edzi be Yehowa le mía ta kpɔm? (b) Nu kae nèɖo kplikpaa be yeawɔ?

²⁰ Ale si Yehowa Ðasefowo wɔ ɖeka le xexea me godoo wòɖe dzesi la ɖo kpe edzi be Yehowa ɖo gbe si Yesu do ɖa be: ‘Kpɔ wo ta le vɔ̃ɖitɔ la ta’ la ŋu. (Xlẽ Yohanes 17:14, 15.) Esia na míegakana ɖe edzi be Mawu le mía ta kpɔm eye be Satana mete ŋu gblẽ Mawu ƒe amewo ƒe ɖekawɔwɔ me o. Le Ezekiel ƒe nyagblɔɖia me la, Yehowa gblɔ be ati eveawo azu ɖeka le yeƒe asi me. Eya ta Yehowa ŋutɔe na eƒe amewo wɔ ɖeka nukutɔe eye wòle wo ta kpɔm be Satana ƒe asi nagasu wo dzi o.

²¹ Ke nu kae wòle be míaɖo kplikpaa be míawɔ? Ele be míayi edzi aku kutri awɔ mía tɔ sinua be míakpe asi ɖe ɖekawɔwɔ si le mía dome fifia la ŋu. Mɔ vevi ka nue mía dometɔ ɖe sia ɖe ate ŋu awɔ esia le? Eyae nye be míayi edzi atsɔ tadedeagu dzadzɛ anɔ Yehowa nam le eƒe gbɔgbɔmegbedoxɔa me. Míadzro nu si esia bia la me le ta siwo kplɔe ɖo me.