Josephus Ƒe Ŋutinyagbalẽ Dodzidzɔnamewo

TSO gbaɖegbe ke la, ŋutinyasrɔ̃lawo de ŋugble le Josephus ƒe agbalẽ dodzidzɔnamewo ŋu. Esi wodzii ƒe ene le Kristo ƒe ku megbe ta la, ekpɔ Yesu ƒe nyagblɔɖi si ŋu ŋɔdzi le si ku ɖe ƒe alafa gbãtɔ me Yuda-dukɔa ŋu la teƒe. Josephus nye asrafomegã, dukɔwo domevuléla, Farisitɔ, kple agbalẽnyalagã.

Numeɖeɖe deto ʋãdzinamewo le Josephus ƒe agbalẽwo me. Wokɔa Biblia-gbalẽwo ƒe nuŋlɔɖiwo me eye wofiaa alesi Palestina-nyigba kple anyigba la ƒe nɔnɔme le. Eyata mewɔ nuku be ame geɖe bua eƒe agbalẽwo be wonye agbalẽ veviwo le yewoƒe agbalẽdzraɖoƒewo o!

Eƒe Ðevimenɔɣi

Wodzi Joseph ben Matthias, alo Josephus, le ƒe 37 M.Ŋ. si nye Roma-fiagã Caligula ƒe dziɖuɖu ƒe ƒe gbãtɔ me. Josephus fofo nye nunɔlawo ƒe ƒome aɖe me tɔ. Egblɔ be ye dada nye Hasmontɔwo ƒe nunɔla Jonathan ƒe dzidzimevi.

Esime Josephus nye ƒewuivi la, esrɔ̃ Mose ƒe Sea veviedodotɔe. Edzro Yudatɔnyenye ƒe kɔmamã etɔ̃ me nyuie—esiwo nye Farisitɔwo, Zadukitɔwo, kple Essenetɔwo. Eda asi ɖe kɔmamã mlɔetɔ sia dzi eye wòɖoe be yeanɔ anyi kple saɖagatɔ Bannus si anye Essenetɔ la ƒe etɔ̃. Esime Josephus dzo le amesia gbɔ le eƒe ƒe 19 xɔxɔ me la, etrɔ yi Yerusalem eye wògava wɔ ɖeka kple Farisitɔwo.

Eyi Roma Gatrɔ Gbɔ

Josephus zɔ mɔ yi Roma le ƒe 64 M.Ŋ. me be yeava dzra Yudatɔ siwo nye nunɔla siwo Yuda-nutome dzikpɔla Felix ɖo ɖe Fiagã Nero be wòadrɔ̃ ʋɔnu wo la ƒe nya ɖo. Josephus ku kloe esime ʋu gbã ɖee le mɔ dzi. Ame 80 koe wote ŋu ɖe le mɔzɔla 600 siwo nɔ melia me la dome.

Esime Josephus yi Roma la, fefewɔla aɖe si nye Yudatɔ la ɖee fia Nero srɔ̃, fianyɔnu Poppaea. Nyɔnua wɔ akpa vevi aɖe le nusita wòyi afima ƒe dzidzedzekpɔkpɔ me. Alesi dua nya kpɔe la wɔ dɔ ɖe Josephus dzi ale gbegbe be meŋlɔe be o.

Esime Josephus trɔ yi Yudea la, Yudatɔwo ɖoe kplikpaa be yeawoadze aglã ɖe Roma ŋu. Ete kpɔ be yeatsɔ alesi yewoado kpo nu le aʋawɔwɔ kple Romatɔwo mee ana yewo dedukɔmetɔwo nadzudzɔ. Esi mete ŋu xe mɔ na wo o eye ɖewohĩ esi wònɔ vɔvɔ̃m be woava bu ye be yenye yewo gɔmezɔla ta la, elɔ̃ ɖe etiatia be wòanye Yuda-srafowo kplɔla le Galilea dzi. Josephus do ŋusẽ eƒe amewo hena hehe wo eye wòƒo nuhiahiãwo nu ƒu tsɔ dzra ɖo ɖe aʋawɔwɔ kple Roma-srafowo ŋu—gake mekpɔ dzidzedze o. Vespasian ƒe asrafowo ɖu Galilea dzi. Esime woɖe to ɖe Josephus ƒe mɔ̃ sesẽ si le Jotapata ŋkeke 47 megbe la, woɖu edzi.

Esime Josephus na ta la, etsɔ ayedzedze gblɔ ɖi be madidi o Vespasian ava zu fiagã. Wode Josephus gaxɔ me gake womehe to nɛ o le nya si wògblɔ ɖi la ta, eye woɖe asi le eŋu esime eƒe nyawo va eme. Ema nye ƒe ɖedzesi aɖe le eƒe agbe me. Esubɔ abe nyagɔmeɖela kple domenɔla ene na Romatɔwo le aʋa la ƒe akpa mamlea me. Josephus ɖe alesi Vespasian kple viaŋutsu siwo nye Tito kple Domitian na kpekpeɖeŋui fia esime wòtsɔ woƒe ƒomeŋkɔ Flavius kpe ɖe eya ŋutɔ tɔ ŋuti.

Flavius Josephus ƒe Agbalẽwo

Josephus ƒe agbalẽ xoxotɔ kekeakee nye The Jewish War. Woxɔe se be eŋlɔ agbalẽ sia si le babla adre me tsɔ ɖe Romatɔwo ƒe ŋusẽ triakɔ fia Yudatɔwo eye be wòatsɔ axe mɔ na wo be woagadze aglã ɖe wo ŋu ɣebubuɣi o. Eƒe nuŋɔŋlɔ siawo dzro Yudatɔwo ƒe ŋutinya me tsitotsito tso esime Antiochus Epiphanes ɖu Yerusalem dzi (le ƒe alafa evelia D.M.Ŋ. me) vaseɖe zitɔtɔ si dzɔ le ƒe 67 M.Ŋ. me. Emegbe Josephus dzro aʋa si wu enu le ƒe 73 M.Ŋ. me, si teƒe eya ŋutɔ kpɔ la me.

Josephus ƒe agbalẽ bubu hãe nye The Jewish Antiquities si nye babla 20 si me Yudatɔwo ƒe ŋutinya le. Edze egɔme tso Mose ƒe agbalẽ Gbãtɔ kple xexeamewɔwɔ dzi eye wòyi edzi vaseɖe esime wowɔ aʋa kple Romatɔwo. Josephus kplɔ ɖoɖo si nu Biblia gblɔ nudzɔdzɔwo le la ɖo nyuie eye wòtsɔ alesi woɖe nudzɔdzɔawo mee ɣemaɣi kple nya bubu siwo ku ɖe ŋutinyaawo ŋu kpe ɖe wo ŋu.

Josephus ŋlɔ eya ŋutɔ ƒe ŋutinya si wòtsɔ ŋkɔ si nye Life ko na. Le agbalẽa me la, eɖe akpa si dzi wònɔ le aʋa la me eye wòdze agbagba be yeaɖe alesi Justus si tso Tiberias tso enui la nu. Eƒe agbalẽ enelia—agbalẽ babla eve si nye numeɖenya si ƒe tanyae nye Against Apion—hã ʋli Yudatɔwo ta tso nya siwo amewo gblɔna le wo ŋu siwo mesɔ o me.

Ekɔ Mawu ƒe Nya la Me

Ðikeke mele eme o be ŋutinya siwo Josephus ŋlɔ dometɔ geɖe nye nyateƒe. Le eƒe agbalẽ si nye Against Apion me la, eɖee fia be Yudatɔwo mebu agbalẽ siwo ŋu kakaɖedzi mele o be wonye Ŋɔŋlɔawo ƒe akpa aɖe o. Eɖi ɖase le Mawu ƒe ŋɔŋlɔawo ƒe nyateƒenyenye kple woƒe ɖekawɔwɔ ŋu. Josephus ŋlɔ bena: “Agbalẽ geɖe siwo ŋu xexlẽme mele o siwo mesɔ kple wo nɔewo o eye wotsi tre ɖe wo nɔewo ŋu mele mía si o, . . . ke boŋ agbalẽ blaeve vɔ eve [siwo nye Ŋɔŋlɔ siwo me womã wòva zu agbalẽ 39 le míaƒe ɣeyiɣia me] koe le mía si, esiwo me ɣeyiɣi siwo katã va yi ƒe ŋutinya le; siwo woxɔ se nyuie be wotso Mawu gbɔ.”

Josephus gblɔ numeɖeɖe deto dodzidzɔname bubuwo kpe ɖe Biblia ƒe nuŋlɔɖiwo ŋu le agbalẽ si nye The Jewish Antiquities me. Egblɔ be “Isak xɔ ƒe blaeve vɔ atɔ̃” esime Abraham bla asi kple afɔ nɛ be yeatsɔe asa vɔe. Josephus gblɔ be esime Isak kpe ɖe fofoa ŋu woɖi vɔsamlekpui vɔ la, Isak gblɔ be “‘ne yegbe tame si Mawu kple ye fofo ɖo la, ekema yemedze be woadzi ye hafi o’ . . . Eyata eyi ɖe vɔsamlekpuia dzi enumake be woatsɔ ye asa vɔe.”

Josephus gblɔ nya deto bubu siawo kpe ɖe Ŋɔŋlɔawo ƒe nuŋlɔɖi si ku ɖe Israel-viwo ƒe dzodzo le blema Egipte ŋu: “Ame agbɔsɔsɔ siwo ti wo yomee nye tasiaɖam alafa ade siwo ŋu sɔdola akpe blaatɔ̃, ame akpe alafa eve siwo nye afɔzɔla siwo katã bla aʋakpa kpe ɖo. Josephus gblɔ hã be “esime Samuel xɔ ƒe wuieve la, edze nyagbɔgblɔɖi gɔme: eye gbeɖeka esime wòdɔ alɔ̃ la, Mawu yɔ eƒe ŋkɔ.”—Tsɔe sɔ kple Samuel I, 3:2-21.

Josephus ƒe agbalẽ bubuwo kɔ nu me le adzɔwo, sewo, kple nudzɔdzɔwo ŋu. Egblɔ be nyɔnu si ɖu ɣe le Herodes ƒe kplɔ̃ɖoƒe la ŋkɔe nye Salome eye eyae bia be woatsɔ Yohanes ƒe ta na ye. (Marko 6:17-26) Josephus ye ŋlɔ nusiwo míenya le Herodes ŋu dometɔ akpa gãtɔ. Egblɔ gɔ̃ hã be “[Herodes] dea ami ɖa me be amewo nagadze sii be yeku amegã o.”

Aglãdzedze Gã Ðe Roma Ŋu

Ƒe 33 tso esime Yesu gblɔ nya ɖi le Yerusalem kple eƒe gbedoxɔ ŋu me tututu la, eƒe nyagblɔɖia dze emevava gɔme. Yudatɔ siwo le Yerusalem ƒe dunyahela siwo di be yewoawɔ tɔtrɔ kpatawo ɖoe kplikpaa be yewoado le Romatɔwo ƒe kɔkuti te. Le ƒe 66 M.Ŋ. me la, esia ŋuti nya na woƒo Roma-srafowo nu ƒu ɖe Siria-dziɖula Cestius Gallus ƒe kpɔkplɔ te eye woɖo wo ɖe wo gbɔ. Nusita woyi afimae nye be woava tsi aglãdzedzea nu eye woahe to na vodalawo. Esime Cestius ƒe amewo tsrɔ̃ du siwo ƒo xlã Yerusalem vɔ la, woƒu asaɖa anyi ɖe du si ŋu woɖo gli ɖo la ŋu. Romatɔwo zã aʋawɔmɔnu aɖe si me wokpɔ dzidzedze le esime wotsɔ woƒe akpoxɔnuwo wɔ ɖeka wòzu abe klogo ene tsɔ kpɔ wo ɖokui tae tso futɔwo si me. Josephus ɖo kpe alesi aʋawɔmɔnu sia kpɔ dzidzedzee dzi be: “Aŋutrɔ siwo woda la dze wo dzi heɖiɖi dze anyigba eye mewɔ nuvevi aɖeke wo o; eyata asrafoawo ku glia gɔme eye nusianu sɔ gbe be woatɔ dzo gbedoxɔa ƒe agbo la.”

Josephus gblɔ be: “Emegbe Cestius . . . yɔ eƒe asrafowo be woagbugbɔ va . . . Etrɔ dzo le dua me, eye menye le susu gobii aɖeke ta o.” Edze ƒã be togbɔ be Josephus meɖoe be yeado Mawu ƒe Vi la ɖe dzi o hã la, eŋlɔ nudzɔdzɔ si tututu Kristotɔ siwo nɔ Yerusalem la nɔ lalam la ɖi. Enye Yesu Kristo ƒe nyagblɔɖia me vava! Le ƒe aɖewo siwo va yi me la, Mawu ƒe Vi la xlɔ̃ nu be: “Ne miekpɔ aʋakɔwo ɖe to ɖe Yerusalem ŋu la, ekema midze sii bena, eƒe aƒedozuɣi ɖo vɔ. Ekema amesiwo le Yudea la, nasi ayi towo dzi, eye amesiwo le etitina la, nadzo ayi, eye amesiwo le agbletawo la, nagayi ɖe eme o. Elabena ŋkeke siawo nye hlɔ̃biabiaŋkekewo, bena woawu nusiwo katã woŋlɔ ɖi la nu.” (Luka 21:20-22) Yesu yomedzela anukwaretɔwo si le dua me kaba va nɔ adzɔge abe alesi wòfia woe ene, eye wovo tso fukpekpe si va dua me tɔwo dzi la me.

Esime Roma-srafowo gatrɔ va le ƒe 70 M.Ŋ. me la, Josephus ŋlɔ alesi wòdzɔe la ɖi tsitotsito. Vespasian ƒe viŋutsu tsitsitɔ Aʋafia Tito va ɖu Yerusalem dzi eye wòxɔ eƒe gbedoxɔ dzeani la. Le dua me la, asrafo siwo nɔ aʋa wɔm le akpa evea siaa te kpɔ be yewoaɖu yewo nɔewo dzi. Wowɔ nusianu si woate ŋui eye wokɔ ʋu geɖe ŋutɔ ɖi. Josephus gblɔ be ame aɖewo “xaxa ŋutɔ le afɔku siwo nɔ dua me la ta ale gbegbe be wodi be Romatɔwo nage ɖe dua me” kple susu be “yewoavo tso xaxa si me yewonɔ le dua me la me.” Eyɔ aglãdzela siwo nɔ dua me la be “adzodalawo,” eye amesiawo gblẽ kesinɔtɔwo ƒe nunɔamesiwo dome hewu ame ŋkuta siwo wobu be woalɔ̃ ana ta Romatɔwo la.

Le dukɔmeviʋaa me la, agbenɔnɔ le Yerusalem va sesẽ wu gbɔgblɔ eye womeɖi ame kukuwo o. Aglãdzelawo ŋutɔ “wɔ aʋa kple wo nɔewo, eye wozɔ ame kuku siwo mlɔ wo nɔewo dzi la dzi.” Wodze duamenɔlawo dzi hewu wo xɔ nuɖuɖu kple kesinɔnuwo le wo si. Amesiwo nɔ fu kpem la ƒe ɣlidodo yi edzi atraɖii.

Tito xlɔ̃ nu Yudatɔwo be woana ta ahatsɔ dua ana ale be woaxɔ wo ɖokui ɖe agbe. “Edɔ Josephus be wòaƒo nu na wo le woawo ŋutɔ degbe me; elabena ebu be woalɔ̃ ɖe wo devi ƒe nyawo dzi.” Gake wodo vlo Josephus. Emegbe Tito tsɔ ati tsutsuewo tɔ kpɔ ɖe gli ŋu godoo va kpe. (Luka 19:43) Esi mɔ aɖeke megali si dzi woato asi eye woxe mɔ na wo be woagado le dua me o ta la, dɔwuame “tsrɔ̃ ameawo le aƒewo kple ƒome blibowo me.” Aʋawɔwɔ si yi edzi la dzi amesiwo ku ƒe agbɔsɔsɔ ɖe edzi. Tito ɖu Yerusalem dzi eye wòna Biblia ƒe nyagblɔɖi va eme esi mele nyanya na eya ŋutɔ o. Emegbe esi wòkpɔ dua ƒe gli triakɔawo kple xɔ sesẽwo la, edo ɣli gblɔ be: “Mawu kokokoe nyã Yudatɔwo tso du sesẽ sia me.” Yudatɔ siwo wu miliɔn ɖekae tsrɔ̃ le eme.—Luka 21:5, 6, 23, 24.

Le Aʋa la Megbe

Le aʋa la megbe la, Josephus yi Roma. Flavius-ƒomea kpe ɖe eŋu wònɔ afima abe Romatɔ ene le afisi nye Vespasian ƒe fiasã tsã me eye wòxɔ dzudzɔ tso dziɖuɖua gbɔ eye Tito na nu geɖe eyama. Emegbe Josephus wɔ agbalẽŋɔŋlɔdɔ.

Enye dzidzɔ be míanya be ɖaseɖiɖiwo ɖee fia be Josephus ye to nya si nye “Teokrasi” vɛ. Eŋlɔ le Yuda-dukɔa ŋu be: “Miayɔ . . . míaƒe dziɖuɖua be Teokrasi, ale be dziɖuɖu kple ŋusẽ nanye Mawu tɔ.”

Josephus megblɔ kpɔ be yenye Kristotɔ o. Menye Mawu ƒe gbɔgbɔe ʋãe wòŋlɔ eƒe nyawo o. Gake Josephus ƒe ŋutinyaŋɔŋlɔ dodzidzɔnamewo nye nu xɔasi le blemanudzɔdzɔwo me kɔkɔ me.

[Nɔnɔmetata si le axa 31]

Josephus le Yerusalem gliwo gbɔ