‘Esi Subɔsubɔdɔ Sia Le Mía Si . . . Ta La, Ðeɖi Metea Mía Ŋu O’

ABE ALESI RONALD TAYLOR GBLƆE ENE

Menɔ ʋiʋlim sesĩe be maɖe nye agbe le ƒe 1963 ƒe dzomeŋɔli me. Mege dze ʋe goglo aɖe me esi menɔ tsi fɔm le ƒuta, kasia ehem de tɔ. Esi nyemenya tsiƒuƒu o ta la, tsi lém kloe le afisi anɔ meta ʋee aɖewo ko tso ƒua ta. Menyrɔ̃ vĩ zi etɔ̃ xoxo, eye meno atsiaƒutsi gbogbo aɖe hafi xɔ̃nye aɖe kpɔe be meɖo xaxa me eye wòhem va godzi. Wogbɔ ya ɖe nye dzitodzitowo me enumake si na metsi agbe.

MENYE esiae nye zi gbãtɔ mekpɔ alesi tamanamana le vevie dze sii o​—togbɔ be mɔkpɔkpɔ abu ɖe ame gake. Tso ɖevime ke wòhiã be maʋli nye gbɔgbɔmegbenɔnɔ ta.

Ŋkeke siwo me xexemeʋa evelia fe ati sesĩe mee meke ɖe Kristotɔwo ƒe xɔse ŋu le zi gbãtɔ. Menɔ ɖevi akpe geɖe siwo wokplɔ do le London be woasi le bɔmb dada ƒe afɔkuwo nu dome. Esi wònye ƒe 12 ko mexɔ ɣemaɣi ta la, aʋa la meɖi nya aɖeke le gbɔnye o; dzidzɔdonu koe wònye nam.

Srɔ̃tɔ tsitsi aɖewo siwo nɔ Weston-super-Mare, dzieheɣetoɖoƒe England, woe kpɔ dzinye. Subɔla mɔɖela aɖewo te mía gbɔ vava esi meva ɖo srɔ̃tɔ siawo ƒeme megbe kpuie ko. Hargreaves ƒe ƒomea ye; wo ame eneawo katã—Reg, Mabs, Pamela, kple Valeri—wonye mɔɖela veviwo. Dzila siwo xɔm nyi la xɔ nyateƒea, eye esi mesrɔ̃ agbalẽ si nye The Harp of God vɔ la, nye hã metso nya me be masubɔ Yehowa. Wokpem le kwasiɖa ade ko megbe be makpɔ gome le gbeƒãɖeɖedɔa me.

Megaɖoa ŋku ŋkeke gbãtɔ ma si medo yi gbeadzi la dzi kokoko. Wotsɔ agbalẽvi aɖewo de asi nam dzadzraɖomawɔmawɔe eye wogblɔ nam be: “Wò hã wɔ dɔ le mɔa ƒe akpa keme.” Eye nenemae mewɔ nye gbeƒãɖeɖedɔ le ŋkeke gbãtɔ dzi. Mɔ̃ si wotsɔna ƒoa agba siwo dzi wolé nuƒo wɔdɔɖeamedziwo ɖoe míetsɔ ɖea gbeƒãe zi geɖe ɣemaɣi. Ɣeyiɣi siwo me mekpɔ dzidzɔ le wue nye esime mete ŋu kɔa mɔ̃a tso aƒeme yi aƒeme heƒoa nuƒo siwo wolé ɖi la. Mebui be enye mɔnukpɔkpɔ gã aɖe be woazãm le mɔ ma nu.

Meɖi ɖase le suku ŋutɔ eye meɖo ŋku edzi be metsɔ agbalẽ gbogbo aɖewo siwo ƒo nu tso Biblia me nyatiwo ŋu na míaƒe sukutatɔ. Mexɔ nyɔnyrɔ̃ le takpekpe si wowɔ le Bath si tsɔ mía gbɔ la me esime mexɔ ƒe 13. Aʋaŋɔli me takpekpe bubu si nyemaŋlɔ be akpɔ o ye nye esi wowɔ le Leicester le ƒe 1941 me, le De Montfort Hall me. Meyi nuƒolanɔƒea be maxɔ agbalẽ si nye Children, si me Nɔviŋutsu Rutherford ŋutɔ si nye Gbetakpɔxɔ Habɔbɔa ƒe zimenɔla ɣemaɣi ƒe numegbe nɔ. Nuƒo ʋãme si woƒo na ɖevi siwo katã nɔ afima la gado ŋusẽ nye didi be masubɔ Yehowa ɖaa tegbee.

Eyata menɔ dzila siwo xɔm nyi gbɔ ƒe eve henɔ tsitsim le gbɔgbɔ me dzidzɔtɔe. Gake esi mexɔ ƒe 14 la, ehiã be matrɔ va London adze dɔ gɔme atsɔ akpɔ ɖokuinye dzii. Togbɔ be megava wɔ ɖeka kple nye ƒomea hã la, ele be manɔ ɖokuinye si le gbɔgbɔ me azɔ, elabena aƒea me tɔ aɖeke ƒe dzixɔse mesɔ kple tɔnye o. Eteƒe medidi o Yehowa na kpekpeɖeŋu si mehiã lam. Esi meɖo London kwasiɖa etɔ̃ pɛ ko megbe la, nɔviŋutsu aɖe va mía ƒeme va bia mɔ le fofonye gbɔ be yeakplɔm ayi afima Fiaɖuƒe Akpata mee. Nɔviŋutsu mae nye John Barr si nye Yehowa Ðasefowo ƒe Dziɖuha la me tɔ fifia. Eva zu nye gbɔgbɔ me “fofowo” dometɔ ɖeka le ƒewui sesẽ mawo me.—Mateo 19:29.

Medze nusrɔ̃ƒe dede gɔme le Paddington Hame si kpena le Craven Terrace le London Betel gbɔ la me. Esi menye tsyɔ̃evi le gbɔgbɔ me ta la, wode dɔ asi na “Papa” Humphreys si nye nɔviŋutsu amesiamina tsitsi aɖe be wòalé be nam vevie. Yayra gã ŋutɔe wònye be mete ŋu de ha kple nɔviŋutsu kple nɔvinyɔnu amesiamina gbogbo siwo nɔ hame ma me. Mí amesiwo si anyigba dzi nɔnɔ ƒe mɔkpɔkpɔ le—si woyɔna be Yonadabwo—la míenɔ ʋee. Le nyateƒe me la, nye ɖeka koe nye “Yonadab” le Hame ƒe Agbalẽ me Nusɔsrɔ̃ ƒe ƒuƒoƒo si me menɔ la me. Togbɔ be nyemede ha kple hanyetiwo tututu o hã la, hadede xɔasi ma si nɔ mía kple nɔviŋutsu tsitsiwo dome fia nu nyui geɖewom. Ðewohĩ vevietɔ wue nye be magagblẽ Yehowa ƒe subɔsubɔ ɖi gbeɖe o.

Míetsɔa kwasiɖanuwuwu bliboa ɖoa anyi ɖe gbeƒãɖeɖedɔa ŋu le ŋkeke mawo me. Wode dɔ asi nam be makpɔ “haƒomɔ̃kɔʋu” si nye afɔtietɔ̃ʋu si ŋu wotrɔ asi le be wòatsɔ haƒomɔ̃wo kple ʋu ƒe batri la dzi. Metsɔa afɔtietɔ̃ʋua Memleɖa ɖesiaɖe yia mɔdodowo ƒe dzogoewo dzi, eye míeƒoa ha aɖewo le afima, emegbe míeƒoa Nɔviŋutsu Rutherford ƒe nuƒoawo dometɔ ɖeka. Míetsɔa míaƒe magazinekplowo wɔa ablɔdziɖaseɖiɖidɔa le Memleɖagbewo hã. Kwasiɖagbe ya nye aƒeme yi aƒeme dɔa wɔgbe, eye míenaa agbalẽviwo kple agbalẽ bablawo.

Hadede kple nɔviŋutsu tsitsi veviedolawo de mɔɖeɖedɔa wɔwɔ ƒe didi menye. Didi sia gasẽna ɖe edzi ne mese mɔɖelawo ƒe nuƒowo le nutome gã takpekpewo me. Takpekpe aɖe si kpɔ ŋusẽ ɖe dzinye vevie nye esi wowɔ le Earl’s Court, London, le ƒe 1947 me. Medze mɔɖeɖedɔa gɔme le ɣleti eve megbe, eye medze agbagba mɔɖeɖedɔa ƒe gbɔgbɔ kpɔtɔ le menye tso ɣemaɣi. Dzidzɔ si mekpɔ le Biblia-nusɔsrɔ̃ siwo mewɔna yia ŋgɔe me la gaɖo kpe edzi nam be nyametsotso nyuitɔe mewɔ.

Spania Nyɔnu Ðeɖe Kple Dɔdasi Xɔxɔ le Spania

Le ƒe 1957 me esi meganɔ mɔɖeɖedɔa wɔm le Paddington Hamea me la, medo go nɔvinyɔnu Spaniatɔ dzetugbe aɖe si ŋkɔe nye Rafaela. Míeɖe mía nɔewo le ɣleti ʋee aɖewo megbe. Míaƒe taɖodzinue nye be míawɔ mɔɖeɖedɔa ɖekae, gake míeyi Madrid be mava kpɔ Rafaela dzilawo ɖa gbã. Enye sasrãkpɔ si trɔ nye agbenɔnɔ. Esi míenɔ Madrid la, Nɔviŋutsu Ray Dusinberre, Spania-lɔdzedɔwɔƒea dzikpɔla, bia ne míalɔ̃ asubɔ le Spania, afisi wohiã nɔviŋutsu kpɔnuteƒewo le vevie.

Aleke wɔ míagbe amekpekpe sia? Eyata míedze míaƒe ɣeyiɣiawo katã ƒe subɔsubɔdɔa gɔme ɖekae le ƒe 1958 me le Spania. Franco ye nɔ dukɔa dzi ɖum ɣemaɣi, eye womeɖe mɔ ɖe míaƒe dɔa ŋu le se nu o, si na gbeƒãɖeɖedɔa sesẽ ŋutɔ. Hekpe ɖe eŋu la, avu kple kɔ metsɔ srɔ̃ Spaniagbe le ƒe ʋee gbãtɔwo me. Togbɔ be mefa avi ɣeaɖewoɣi le esi dzi ɖe le ƒonye be nyemete ŋu ɖoa dze kple nɔviawo le hamea me o ta hã la, egahiã ake be magana ta o.

Dzikpɔlawo hiã ale gbegbe be togbɔ be nyemete ŋu doa Spaniagbe kura o hã la, le ɣleti ɖeka ko megbe la, mekpɔa ƒuƒoƒo sue aɖe dzi. Esi míaƒe dɔa zu adzamedɔ ta la, womã mí ɖe ƒuƒoƒo suesue siwo me gbeƒãɖela 15 vaseɖe 20 nɔ me, eye wowɔ dɔ abe hame sue aɖe ene. Nusɔsrɔ̃ dzi kpɔkpɔ na vɔvɔ̃ ɖom gbã elabena nyemete ŋu sea nyaselawo ƒe ŋuɖoɖowo katã gɔme ɣesiaɣi o. Gake srɔ̃nye nɔa megbe eye ne ekpɔ be metɔtɔ la, elɔ̃a ta aɖaŋutɔe tsɔ ɖoa kpe edzi nam be ŋuɖoɖoa de.

Gbe bubu menya sena nam kaba o, eye edzrom ɣeaɖewoɣi be matrɔ ayi England, afisi mate ŋu awɔ nusianu le bɔbɔe. Gake lɔlɔ̃ kple xɔlɔ̃wɔwɔ si mía nɔviŋutsu kple nɔvinyɔnu Spaniatɔ lɔlɔ̃tɔwo ɖe fia mí tso gɔmedzedzea la xɔ ɖe gbea masemase ƒe dziɖeleameƒo teƒe. Eye Yehowa tsɔ mɔnukpɔkpɔ tɔxɛwo yram si na wòdze nam be viɖe le agbagbadzedze siawo katã ŋu. Wokpem le ƒe 1958 me be manye amedɔdɔ tso Spania ade dukɔwo dome takpekpe le New York. Emegbe le ƒe 1962 me la, wona hehe xɔasi aɖem le Fiaɖuƒe Subɔsubɔ Suku si woɖo na mí le Tangier, Morocco, me.

Dzitsitsi ɣesiaɣi be kpovitɔwo além ye ganye kuxi bubu si dze ŋgɔm kpe ɖe gbea sɔsrɔ̃ ŋu. Esi menye amedzro ta la, menya be woanyãm godoo ne wolém. Míewɔa dɔ eveve be míatsɔ aɖe afɔkua dzi akpɔtɔ. Ne ame ɖeka le ɖase ɖim la, evelia nɔa to dzi ɖe dzɔgbevɔ̃e ƒe dzɔdzɔ ŋu. Ne míeyi aƒe ɖeka alo eve siwo nɔa dziƒoxɔ dzi zi geɖe me vɔ la, míeɖea aƒe eve alo etɔ̃ ɖi heyia aƒe eve alo etɔ̃ bubu me. Míezã Biblia vevie, eye agbalẽvi ʋee aɖewo ko míetsɔ dea míaƒe awu ʋlayawo me be míana ɖetsɔlemetɔwo.

Esi míenɔ Madrid ƒe ɖeka la, woɖe mí yi Vigo si nye dugã aɖe le anyieheɣetoɖoƒe Spania, afisi Ðasefo ɖeka pɛ hã menɔ o. Habɔbɔa kafui anye le ɣleti gbãtɔ me be srɔ̃nye nawɔ ɖaseɖiɖidɔa akpa gãtɔ—be amewo nasusu be tsaɖilawo koe míenye. Togbɔ be míewɔ míaƒe gbeƒãɖeɖedɔa bɔbɔe be woagade dzesi mí o hã la, eva dze go. Le ɣleti ɖeka ko me, Katoliko-nunɔlawo dze mía nu tsotso gɔme le radio dzi. Woxlɔ̃ nu woƒe hameviwo be ŋutsu aɖe kple srɔ̃a le nu ƒom tso Biblia ŋu tso aƒeme yi aƒeme—enye agbalẽ si nu wode se ɖo keŋkeŋ kloe ɣemaɣi. “Srɔ̃tɔ siwo dim wole” lae nye amedzro aɖe kple srɔ̃anyɔnu Spaniatɔ, si ɖeka koe ƒoa nuƒoawo katã kloe!

Nunɔlaawo de se be nuƒoƒo kple srɔ̃tɔ vɔ̃ɖi siawo gɔ̃ hã nye nuvɔ̃ si womatsɔ ake o, dzaa ɖe woʋu eme na nunɔla aɖe enumake hafi. Nenemae wòdzɔe hã be esi míeɖo dze vivi aɖe kple nyɔnu aɖe vɔ la, eɖe kuku gblɔ na mí be ele be yeava ʋu eme. Esi míedo le eƒeme la, míekpɔe wòtsɔ du ɖo ta sɔlemexɔa gbɔ.

Wonyã Mí

Kpovitɔwo ƒe asi tu mí esi míeva ɖo Vigo ɣleti eve ko megbe. Kpovitɔ si lé mí la ve mía nu be mede ga alɔnu na mí hafi kplɔ yi kpovitɔwo ƒe dɔwɔƒeae o. Míekpɔ ame nyanyɛ aɖe le afima, eyae nye nuŋlɔmɔ̃ƒola si míeɖi ɖase na eteƒe medidi o. Nyɔnu sia tɔtɔ ŋutɔ esi wòkpɔe wonɔ nu wɔm ɖe mía ŋu abe nuvlowɔlawo ene, eye ewɔ kaba va gblɔ na mí be yemedee agbalẽ me be nuvlowɔlawoe míenye o. Ke hã la, wobu fɔ mí be míele “Spania ƒe gbɔgbɔmeɖekawɔwɔ” dem afɔku me, eye wonyã mí le kwasiɖa ade megbe.

Ehe mí ɖe megbe, gake míeɖoe be míana ta o. Dɔ geɖe nɔ anyi míawɔ le Iberia Ƒukpo la dzi. Esi míenɔ Tangier ɣleti etɔ̃ megbe la, wode dɔ asi na mí yi Gibraltar—anyigbamamã bubu si me womewɔ dɔ le ɣemaɣi o. Abe alesi apostolo Paulo gblɔe ene la, ne míebu míaƒe subɔsubɔdɔ nu xɔasii la, míayi dɔa dzi eye woaɖo eteƒe na mí. (Korintotɔwo II, 4:1, 7, 8) Aleae wònɔ le mía gome. Míedze Biblia-nusɔsrɔ̃ gɔme kple ƒome blibo ɖeka le aƒe gbãtɔ si me míege ɖo le Gibraltar. Eteƒe medidi o mía dometɔ ɖesiaɖe nɔ nusɔsrɔ̃ 17 wɔm. Amesiwo míesrɔ̃ nu kpli la dometɔ geɖe va zu Ðasefowo, eye le ƒe eve megbe míeɖo hame si me gbeƒãɖela 25 nɔ.

Gake nunɔlawo te nuƒoƒo tsi tre ɖe mía ŋu abe alesi wowɔ le Vigo ene. Anglikantɔwo ƒe bisiɔp si le Gibraltar gblɔ na kpovitɔwo ƒe amegã be “ame vɔ̃ɖiwo” míenye, eye mlɔeba eƒe nyaƒoɖeamenuwo dze edzi. Wonyã mí le Gibraltar le January 1962 me. Afikae míagaɖo tae? Hiahiã galolo le Spania, eyata míegatrɔ yi hesusu be kpovitɔwo ƒe susu adzo le míaƒe nuŋlɔɖi xoxowo dzi azɔ.

Seville si nye du si me ŋdɔ ʋuna le sesĩe lae nye teƒe yeye si míeva nɔ. Dɔwɔwɔ kplikplikpli kple srɔ̃tɔ mɔɖela bubu siwo nye Ray kple Pat Kirkup le afima vivi mía nu ŋutɔ. Togbɔ be ame miliɔn afã ye nɔ Seville ɣemaɣi hã la, gbeƒãɖela 21 koe nɔ anyi, eyata dɔ geɖe nɔ anyi míawɔ. Hame 15 siwo me gbeƒãɖela 1,500 le ye le afima fifia. Nu wɔnuku dodzidzɔname aɖe dzɔ le ƒe ɖeka megbe; wokpe mí be míawɔ mɔzɔzɔdɔa le Barcelona-nutowo me.

Nutome sue dzikpɔdɔa wɔwɔ le dukɔ si me womeɖe mɔ ɖe míaƒe dɔa ŋu le o la to vovo vie. Míesrãa ƒuƒoƒo sue siwo ƒe akpa gãtɔ me nɔviŋutsu bibi ʋee aɖewo ko nɔ la kpɔ kwasiɖa ɖesiaɖe. Nɔviŋutsu veviedola siawo hiã hehe kple kpekpeɖeŋu ɖesiaɖe si míate ŋu ana wo la vevie. Dɔdasi sia dze eme na mí ŋutɔ! Esi míenɔ afisiwo Ðasefo ʋee aɖewo ko nɔ ƒe geɖe megbe la, dzi dzɔ mí be míele nɔviŋutsu kple nɔvinyɔnu vovovo geɖe srãm kpɔ. Hekpe ɖe eŋu la, gbeƒãɖeɖedɔa wɔwɔ le Barcelona nɔ bɔbɔe, eye ame geɖe di be yewoasrɔ̃ Biblia la.

Akɔkpekpe Kple Blanuiléle

Gake nye agbenɔnɔ trɔ kpata le ɣleti ade megbe. Mɔkeke gbãtɔ si míeɖu le ƒuta zu dzɔgbevɔ̃e kloe, ɣemaɣie afɔku si ŋu meƒo nu tsoe do ŋgɔ dzɔ ɖe dzinye. Dzidzi si ƒom esi mede tɔme tsi ge la nu fa kaba ya, gake nudzɔdzɔa gblẽ nu le nye lãmenusese ƒe sidzenuwo ŋu ɖikaa.

Mesẽ ŋkume yi mɔzɔzɔdɔa dzi ɣleti ʋee aɖewo, gake mlɔeba eva hiã be matrɔ ayi England ne woawɔ atike nam. Nye lãme sẽ nyuie le ƒe eve megbe be míetrɔ yi Spania gayi nutome sue dzikpɔdɔa dzi. Gake ɣeyiɣi kpui aɖe koe míewɔe. Srɔ̃nye dzilawo dze dɔ vevie, eye ete ɖe mía dzi be míedzudzɔ ɣeyiɣiawo katã ƒe subɔsubɔdɔa be míava kpɔ wo dzi.

Agbenɔnɔ va sesẽ ɖe edzi esime nye lãmenusese ƒe sidzenuwo megava nɔ dɔ wɔm kura o le ƒe 1968 me. Mía kple Rafaela míebui be nyemahaya gbeɖe o. Ðeko wònɔ abe ke tɔme tsim megale le mɔ bubu nu ene! Blanuilélea na seselelãme gbegblẽwo va yɔ menye fũ eye exɔ ŋusẽ katã le asinye hã. Ðeɖi tea ŋunye vevie zi geɖe, si zi dzinye be magbɔ ɖe eme ɣesiaɣi. Menye nɔviawo katãe se kuxi sia gɔme nam ɣemaɣi o; gake menya be Yehowa ya se egɔme nam. Gbetakpɔxɔ kple Nyɔ! magazineawo me nyati nyui siwo me nugɔmesese kple kpekpeɖeŋu geɖe le na blanuilélawo la xexlẽ na dzinye dzea eme ŋutɔ.

Srɔ̃nye nye dzideƒotsoƒe nam ɣesiaɣi le ɣeyiɣi sesẽ siawo katã me. Tenɔnɔ ɖe kuxiwo nu ɖekae na srɔ̃ɖeɖea me sẽ ɖe edzi. Rafaela dzilawo ku, eye meva haya nyuie le ƒe 12 megbe ale gbegbe be míekpɔe be míagate ŋu atrɔ ayi ɣeyiɣiawo katã ƒe subɔsubɔdɔa me. Ewɔ nuku heganye dzidzɔ na mí be wokpe mí le ƒe 1981 me be míagava wɔ nutome sue dzikpɔdɔa.

Wowɔ tɔtrɔ gãwo le teokrasiɖoɖowo me le Spania tso esime míewɔ mɔzɔzɔ ƒe subɔsubɔdɔa va yi. Woɖe mɔ ɖe gbeƒãɖeɖedɔa ŋu azɔ, eyata ehiã be matrɔ ɖe nɔnɔme yeyeawo ŋu. Gake mɔnukpɔkpɔ gã ŋutɔe wònye nam be megazu nutome sue dzikpɔla. Míaƒe mɔɖeɖedɔa wɔwɔ togbɔ be míeto nɔnɔme sesẽwo me hã kpe ɖe mía ŋu míete ŋu de dzi ƒo na mɔɖela siwo ŋu kuxiwo nɔ. Eye zi geɖe la, míekpe ɖe ame bubuwo ŋu wozu mɔɖelawo.

Míaƒe lãmegbegblẽ na wògahiã be woade dɔ bubu asi na mí esi míetsɔ ƒe 11 wɔ mɔzɔzɔdɔ lae le Madrid kple Barcelona. Wode dɔ asi na mí be míanye mɔɖela veviwo le Salamanca, afisi woate ŋu azãm le abe hamemegã ene. Nɔvi siwo le Salamanca xɔ mí atuu enumake. Kuxi bubu si ado míaƒe dzidodo kpɔ la gado mo ɖa le ƒe ɖeka megbe.

Ʋu vɔ le Rafaela ƒe lãme ŋutɔ, eye míese nusi gbɔ wòtso gɔme o, dodokpɔ ɖee fia be dɔgbo gã me dɔdzẽ nɔ eŋu. Azɔ nyee wòle be manɔ ŋusẽ me akpe ɖe srɔ̃nye ŋu alesi mate ŋui. Míeka ɖe edzi gbã o, eye emegbe míevɔ̃. Ðe Rafaela atsi agbea? Ŋuɖoɖo ɖe Yehowa ŋu bliboe le ɣeyiɣi siawo tɔgbe me ye kpe ɖe mía ŋu míete ŋu yi dɔ dzi. Magblɔ kple dzidzɔ be wowɔ dɔ na Rafaela dedie eye míekpɔ mɔ be dɔdzẽa magado ake o.

Togbɔ be nuwo mezɔ tẽ na mí le ƒe 36 siwo míetsɔ nɔ Spania me o hã la, enye dzidzɔ be míenɔ anyi kpɔ gbɔgbɔmetsitsi ƒe ɣeyiɣi sia teƒe. Míekpɔe gbeƒãɖela ʋee siwo anye 800 le ƒe 1958 me sɔ gbɔ va zu gbeƒãɖela siwo wu 100,000 ƒe aʋakɔ gã egbea. Dzidzɔ gbogbo siwo míekpɔ la tsyɔ nɔnɔme sesẽawo dzi—kpekpe ɖe ame bubuwo ŋu be woxɔ nyateƒea hetsi le gbɔgbɔ me, dɔwɔwɔ ɖekae abe ŋutsu kple srɔ̃a ene, kple sese le mía ɖokui me be míezã míaƒe agbe le mɔ nyuitɔ kekeake nu.

Paulo gblɔ le eƒe lɛta evelia si wòŋlɔ na Korintotɔwo me be: “Esi subɔsubɔdɔ sia le mía si, abe alesi míekpɔ nublanuikpɔkpɔ ene la, ɖeɖi mete mía ŋu o.” (Korintotɔwo II, 4:1) Ne metrɔ kpɔ megbe la, mexɔe se be nu geɖe le nye agbe me siwo wɔe be nyemena ta o. Nɔvi amesiamina wɔnuteƒe siwo tsɔ ɖe le eme nam le nye ɖekakpuiŋkekewo me ƒe kpɔɖeŋu ɖo gɔmeɖoanyi nyui aɖe nam. Kpeɖeŋutɔ si ƒe gbɔgbɔmetaɖodzinuwo sɔ kple tɔnye nye kpekpeɖeŋu nyui aɖe; ne melé blanui la, Rafaela dea dzi ƒo nam, eye nye hã mewɔa nenema ke nɛ. Nukokoe dodo na mía nɔewo hã nye viɖenu gã aɖe na mí. Nukoko kple nɔviawo—kple mía ɖokui koko—na kuxiwo dze abe ɖe womesesẽ tututu o ene.

Gake ƒo ye katã ta la, dzidodo le dodokpɔwo me bia ŋusẽ si tso Yehowa gbɔ. Meɖoa ŋku Paulo ƒe nyawo dzi be: “Mete ŋu wɔa nuwo katã le . . . amesi doa ŋusẽm la me.” Esi Yehowa le megbe na mí ta la, mele be míana ta gbeɖe o.—Filipitɔwo 4:13.

[Nɔnɔmetata siwo le axa 23]

Ronald kple Rafaela Taylor le ƒe 1958 me

[Nɔnɔmetata siwo le axa 24, 25]

Kpekpe wɔwɔ le asiɖoamedzi te le Spania (ƒe 1969)