Mɔɖela Si Da Sɔe Nènyea?

DZIDZƆKPƆKPƆ dze le vifofoa ƒe mo esi wòke abɔ me hele vianyɔnu si le afɔ ɖem ɖekaɖeka zi gbãtɔ la lalam. Esi wòdze anyi enumake hemli to me la, ede dzi ƒo nɛ be wòagatee akpɔ. Enyae be esusɔ vie ko nyɔnuvia asɔ anyi eye ŋusẽ aɖo eŋu.

Nenema ke subɔla mɔɖela yeye ahiã ɣeyiɣi kple dzideƒo hafi wòate ŋu ada sɔ alesi dze ahanye ɣeyiɣiawo katã ƒe Fiaɖuƒe gbeƒãɖela si kpɔa dzidzedze. Mɔɖela geɖe yi edzi le subɔsubɔm dzidzɔtɔe ƒe gbogbo aɖewo. Tɔtrɔ ɖiɖeame siwo va wo dometɔ ʋee aɖewo ƒe agbe me la na be womegale te o. Dzidzɔkpɔkpɔ bu ɖe wo dometɔ aɖewo gɔ̃ hã. Le dukɔ ɖeka aɖe me la, amesiwo dze mɔɖeɖedɔa wɔwɔ gɔme ƒe memamã 20 le alafa me dzudzɔ ewɔwɔ le ƒe eve gbãtɔ si me wodze woƒe ɣeyiɣiawo katã ƒe subɔsubɔa gɔme la me. Nukae ana mɔɖela nadzudzɔ subɔsubɔ dodzidzɔname kekeake sia wɔwɔ? Ðe nane li woate ŋu awɔ atsɔ aƒo asa na mɔxenu siawoa?

Togbɔ be lãmegbegblẽ, gakuxiwo, kple ƒomegbanɔamedziwo ate ŋu ana ame aɖewo naɖe asi le ɣeyiɣiawo katã ƒe subɔsubɔdɔa ŋu hã la, nusi xea mɔ na ame bubuwoe nye alesi wodo kpo dadasɔ nyuie le Kristotɔwo ƒe agbanɔamedzi vovovoawo tsɔtsɔ me. Dadasɔ fia “nɔnɔme si me akpa ɖeka, nuwo dometɔ ɖeka, nu vevi ɖeka, alo ŋusẽkpɔɖeamedzi ɖeka aɖeke manɔ kpekpem alo alolo akpa wu nu bubuawo o.”

Yesu Kristo fia eƒe nusrɔ̃lawo alesi woawɔ gbeƒãɖeɖe kple nusrɔ̃lawo wɔwɔ dɔ lae. Ewɔ alesi woawɔ ada sɔ ŋuti kpɔɖeŋu hã fia le eya ŋutɔ ƒe subɔsubɔdɔa me. Yesu fia be Yudatɔ subɔsubɔhaŋgɔnɔlawo meda sɔ o esi wògblɔ na wo be: “Miena ahame, sikɔni kple tsyo ƒe memamã ewolia, eye miegblẽ nusiwo le kpekpem wu le sedede la me: ʋɔnudɔdrɔ̃ kple nublanuikpɔkpɔ kple xɔse la ɖi; ke esiawo le bena, miawɔ, eye miagagblẽ ekemeawo ɖi mawɔmawɔ o.”—Mateo 23:23.

Gɔmeɖose sia wɔa dɔ egbea hã nenema ke, vevietɔ le mɔɖeɖedɔa me. Esi dzonɔameme kple tameɖoɖo nyui ʋã ame aɖewo la, wodze mɔɖeɖedɔa wɔwɔ gɔme, esi womedzra ɖo alo de ŋugble le nusiwo esia abia ŋu bliboe o. (Luka 14:27, 28) Ame aɖewo ƒo wo ɖokui ɖe gbeadzisubɔsubɔdɔa me ale gbegbe be woŋe aɖaba ƒu Kristotɔnyenye ƒe akpa vevi bubuwo dzi. Aleke woate ŋu ada asɔ ahayi edzi nenemae?

Yi Edzi Nàsẽ Ŋu le Gbɔgbɔ Me!

Yesu megblẽ eƒe gbɔgbɔmemenyenye ɖi gbeɖe o. Togbɔ be ameha siwo vaa egbɔ be woase eƒe nyawo eye be wòayɔ dɔ wo la xɔa eƒe ɣeyiɣi gbogbo aɖe hã la, ewɔ ɖoɖo ɖe gbedodoɖa ŋugblededetɔe ŋu. (Marko 1:35; Luka 6:12) Dadasɔ le mɔɖeɖedɔa wɔwɔ me egbea hã bia be ame nawɔ mɔnuɖoɖowo katã ŋudɔ be woasẽ ŋu le gbɔgbɔ me. Paulo gblɔ be: “Ekem wò amesi fia nu ame bubuwo la, ɖe mèfia nu ɖokuiwò oa?” (Romatɔwo 2:21) Ðikekemanɔmee la, enye vodada be woatsɔ ame ƒe ɣeyiɣiwo katã anɔ gbeƒã ɖem na amewo gake womaɖo ɣeyiɣi si asu hena ɖokuisinusɔsrɔ̃ kple gbedodoɖa edziedzi ya ɖi o.

Kumiko nye mɔɖela ƒe blaevee nye sia. Togbɔ be vi etɔ̃ kple srɔ̃ŋutsu dzimaxɔsetɔ le esi hã la, nuteƒekpɔkpɔ fiae be ɣeyiɣi nyuitɔ si wòatsɔ axlẽ Biblia ahasrɔ̃e enye esi do ŋgɔ teti na eƒe anyimlɔɣi. Ne ele nua srɔ̃m la, nusi wòdea dzesi etɔxɛe nye nusiwo ŋudɔ wòawɔ le gbeadzisubɔsubɔdɔa me ale be wòate ŋu ana eƒe gbesiagbe subɔsubɔdɔa nanɔ yeye eye wòanyɔ ɖetsɔleme. Mɔɖela dzidzedzekpɔla bubuwo fɔna kaba do ŋgɔ na ƒometɔ bubuwo be woagaxɔ gbɔgbɔmeŋusẽdodo le ŋdi ɣeyiɣi siwo ɖoɖoe zi la me. Àte ŋu aɖo ɣeyiɣi bubu siwo sɔ la ɖi hena dzadzraɖo ɖe kpekpewo ŋu kple Kristotɔwo ƒe agbalẽ yeyewo xexlẽ ɖe ɣeyiɣi dzi. Ne èdi be yèayi edzi anɔ dzidzɔ kpɔm le subɔsubɔdɔa me la, ɖokuisinusɔsrɔ̃ menye nusi nàwɔ dzradzradzra ko alo agblẽ ɖi o.

Dadasɔ le Ƒomegbanɔamedziwo Tsɔtsɔ Me

Ele be wòanɔ susu me na dzila siwo nye mɔɖelawo be nusi nye ‘Yehowa ƒe lɔlɔ̃nu’ na wo ƒe akpa gã aɖee nye be yewoakpɔ yewo ŋutɔwo ƒe ƒometɔwo ƒe ŋutilã, seselelãme, kple gbɔgbɔ me nuhiahiãwo gbɔ. (Efesotɔwo 5:17; 6:1-4; Timoteo I, 5:8) Ɣeaɖewoɣi la, srɔ̃tɔ xɔsetɔ kpakple ƒometɔwo gɔ̃ hã vɔ̃na be ne srɔ̃nyɔnua alo yewo dada dze mɔɖeɖedɔa gɔme ko la, yewomagakpɔ akɔfafa kple kpekpeɖeŋu tso egbɔ o. Seselelãme mawo ƒe emetsonue nye be woƒe lãme fana ɖe eƒe didi be yeawɔ mɔɖeɖedɔa ŋu. Gake ɖoɖowɔwɔ kple nuŋububu yi ŋgɔ nyuie ate ŋu ana woada asɔ.

Mɔɖela geɖe dzea agbagba be yewoawɔ yewoƒe gbeƒãɖeɖedɔa nenye be ƒometɔwo dzo le aƒeme. Kumiko si míeyɔ do ŋgɔ la nɔa anyi kple eƒe ƒomea le ŋdinuɖuɣi, ekpɔa srɔ̃a kple viawo ƒe dzodzo le ŋdi me, eye wòtrɔ vaa aƒeme hafi wogbɔna. Dzoɖagbee wòɖaa nu geɖe dana ɖi ale be wòate ŋu aɖe dzi ɖi aɖu nu kple eƒe ƒomea le esi teƒe be wòanɔ dɔ dzi le dzodoƒe. Dɔ geɖe wɔwɔ le ɣeyiɣi ɖeka me, abe aƒemedɔ bubuwo wɔwɔ esime wòle nu ɖam hã kpena ɖe eŋu. To mɔ ma dzi la, Kumiko te ŋu kpɔa ɣeyiɣi kpea viawo ƒe xɔlɔ̃wo eye wòwɔa dzidzɔdonu tɔxɛ aɖewo na wo.

Ne ɖeviwo le tsitsim ɖo woƒe ƒewuiwo me la, zi geɖe la, wohiãa wo dzilawo ƒe ŋkuléleɖeŋu be woate ŋu anɔ te ɖe seselelãme, didi, dzodzodzoetsitsi, kple dzimaɖitsitsi siwo ɖoa wo me la nu. Esia biaa ŋudzɔnɔnɔ kple tɔtrɔwɔwɔ le dzila si nye mɔɖela ƒe ɖoɖowɔɖiwo me. De ŋugble le Hisako, vinɔ mɔɖela si si vi etɔ̃ le la ŋu kpɔ. Nukae wòwɔ esime dzidzɔ kple dzo meganɔ vianyɔnu tsitsitɔ me ɖe Kristotɔwo ƒe kpekpewo kple gbeadzisubɔsubɔdɔ ŋu o le sukuxɔlɔ̃ siwo nye xexemetɔwo ƒe ŋusẽkpɔɖeamedzi ta? Nu vevi si hiã na vianyɔnua enye be wòawɔ nyateƒea eɖokui tɔe eye wòaka ɖe edzi bliboe be ameɖokuiɖeɖeɖa tso xexeame gbɔe nye afɔɖeɖe nyuitɔ kekeake.—Yakobo 4:4.

Hisako gblɔ be: “Meva ɖoe be masrɔ̃ gɔmedzenufiafiawo le Agbe Tegbee-gbalẽa me kplii ake gbesiagbe. Gbã la, aɖabaƒoƒo ʋee aɖewo koe míesrɔ̃a nu, le esi ne nusrɔ̃ɣia ɖo la, vinyenyɔnua nɔa gbɔgblɔm be dɔme kple ta le ye ɖum vevie ta. Gake mena míesrɔ̃a nua gbesiagbe. Le dzinu ʋee aɖewo megbe la, eƒe nuwɔna ɖɔ ɖo geɖe ŋutɔ, esi na eteƒe medidi kura o la, wòɖe adzɔgbe hexɔ nyɔnyrɔ̃.” Fifia Hisako kple vianyɔnua wole gome kpɔm le ɣeyiɣiawo katã ƒe subɔsubɔdɔa me.

Ele be vifofo mɔɖelawo hã nakpɔ nyuie be beléle na ɖetsɔlemetɔwo le gbeadzi kple woƒe hamea me dɔdasiwo wɔwɔ nagaxɔ woƒe susu ale gbegbe be woado kpo seselelãme ŋuti kpekpeɖeŋu sẽŋu kple mɔfiafia si hiã na wo vi siwo le tsitsim la nana wo o. Esia menye nusi ŋutsu agblẽ ɖe srɔ̃a si me o. Kristotɔ hamemegã aɖe si ŋu vovo menɔna o si nye mɔɖela ɣeyiɣi didi aɖee nye sia eye wòkpɔa dɔwɔƒe sue aɖe hã dzi la wɔa ɖoɖo srɔ̃a nu kple via ene dometɔ ɖesiaɖe ɖekaɖekae. (Efesotɔwo 6:4) Gakpe ɖe eŋu la, eya kple eƒe ƒomea dzrana ɖo ɖe kwasiɖa sia kwasiɖa ƒe kpekpewo ŋu. Mɔɖela siwo da sɔ la megblẽa woƒe ƒomewo ɖi le ŋutilã kple gbɔgbɔ me gome o.

Dadasɔ le Ganyawo Me

Gbesiagbenuhiahiãwo ŋuti nukpɔsusu si sɔ nye go bubu si me wòle be mɔɖelawo nadze agbagba be woayi edzi ada sɔ nyuie le. Le esia hã me la, míate ŋu asrɔ̃ nu geɖe tso Yesu ƒe kpɔɖeŋu kple aɖaŋuɖoɖo nyui me. Exlɔ̃ nu le dzitsitsi akpa ɖe ŋutilãmenuhiahiãwo ŋu la ŋuti. Ke boŋ ede dzi ƒo na eƒe nusrɔ̃lawo be woatsɔ Fiaɖuƒea aɖo nɔƒe gbãtɔ, hedo ŋugbe be Mawu alé be na wo abe alesi wòwɔna na eƒe nuwɔwɔ bubuwo ene. (Mateo 6:25-34) To aɖaŋuɖoɖo nyui sia dzi wɔwɔ me la, mɔɖela geɖe te ŋu wɔ ɣeyiɣiawo katã ƒe subɔsubɔdɔa ƒe geɖe, eye Yehowa yra ɖe woƒe agbagbadzedzewo dzi be wokpɔa woƒe ‘gbesiagbe nuɖuɖu.’—Mateo 6:11.

Apostolo Paulo ɖo aɖaŋu na hati Kristotɔwo be ‘woana amewo nanya woƒe nugɔmesese.’ (Filipitɔwo 4:5) Vavãe, nugɔmesese abia be míalé be na míaƒe lãmesẽ alesi dze. Mɔɖela siwo da sɔ la dzea agbagba be yewoaɖe nugɔmesese afia le alesi wonɔa agbee kple woƒe nɔnɔme ɖe ŋutilãmenuwo ŋu me, elabena wonya be ame bubuwo léa ŋku ɖe yewoƒe agbenɔnɔ ŋu.—Tsɔe sɔ kple Korintotɔwo I, 4:9.

Sɔhɛ siwo le mɔɖeɖedɔa wɔm la natsri wo dzilawo ƒe dɔmenyowɔwɔ xɔxɔ dzodzro. Ne wo dzilawo ƒe aƒemee wole la, anye dadasɔ kple ŋudzedzekpɔkpɔ nyui ɖeɖefia be woakpɔ gome le aƒemedɔwo wɔwɔ me eye woadi ɣeyiɣi aɖe ƒe dɔ awɔ be woate ŋu ana gakpekpeɖeŋu le aƒea dzi kpɔkpɔ me.—Tesalonikatɔwo II, 3:10.

Mɔɖela Siwo Da Sɔ Nye Yayra Ŋutɔŋutɔ

Ðewohĩ ènye mɔɖela si le kutri kum be yeada asɔ alesi dze. Lé dzi ɖe ƒo. Abe alesi ko ɖevi sue hiã ɣeyiɣi be wòate ŋu asɔ anyi ahazɔ ene la, nenema ke mɔɖela bibiwo gblɔna be exɔ ɣeyiɣi hafi yewote ŋu da sɔ le yewoƒe dɔwo wɔwɔ me.

Ðokuisinusɔsrɔ̃ wɔwɔ, beléle na ƒomea me tɔwo, kple woawo ŋutɔwo ƒe ŋutilãmenuhiahiãwo gbɔ kpɔkpɔ nye go siwo me mɔɖelawo dzea agbagba be woada sɔ le. Nyatakakawo fia be mɔɖela geɖe kpɔa woƒe agbanɔamedziwo gbɔ le mɔ wɔnukuwo nu. Wonye yayra na nutoa me tɔwo kple kafukafu na Yehowa kple eƒe habɔbɔa vavã.