Athos-to La “To Kɔkɔe” Wònyea?

LE Orthodɔks hamevi siwo wu miliɔn 220 gome la, Athos-to, si nye to gã klitsaklitsa aɖe si le Greece ƒe dziehekpa dzi la nye “to kɔkɔetɔ kekeake na Orthodɔks Kristotɔwo.” Le wo dometɔ geɖe gome la, mɔzɔzɔ ayi Athos “to kɔkɔe” la dzi nye wɔna si dzroa wo vevie. Nukae “to kɔkɔe” sia nye? Aleke wòwɔ va xɔ ŋkɔ alea gbegbe? Eye “to” si gbɔ mawuvɔ̃lawo atrɔ ɖo hena gbɔgbɔ me mɔfiame xɔxɔ kple tadedeagu vavãtɔ lae wònyea?

Nyagbɔgblɔ “to kɔkɔe” dze le Biblia me. Eku ɖe Yehowa, nyateƒe Mawu la ƒe tadedeagu si le kɔkɔe, hele dzadzɛ, si wodo ɖe dzi la ŋu. Zion-to va zu “to kɔkɔe” le blema Yerusalem esime Fia Dawid tsɔ nubablaɖaka la yi afimae. (Psalmo 15:1; 43:3; Samuel II, 6:12, 17) Esi Salomo tu gbedoxɔ ɖe Moria-toa dzi megbe la, wova yɔa afisi gbedoxɔa nɔ kpena ɖe “Zion” ŋu; eyata Zion kpɔtɔ nye Mawu ƒe “to kɔkɔe.” (Psalmo 2:6; Yoel 3:17) Esi Mawu ƒe gbedoxɔa nɔ Yerusalem ta la, ɣeaɖewoɣi la, woyɔa du ma hã be Mawu ƒe “to kɔkɔe.”—Yesaya 66:20; Daniel 9:16, 20.

Ke egbea ya ɖe? Ðe Athos-to—alo to kɔkɔ bubu ɖesiaɖe—nye “to kɔkɔe” si dzi wòle be amewo nayi aɖasubɔ Mawu wòadze eŋua?

“To Kɔkɔe” si Nye Saɖagateƒe

Athos-toa le Chalcidice Ƒukɔme ƒe ɣedzeƒekpa dzi le anyigba lee aɖe si de nu Aegea Ƒua me le egbegbe Thessaloníki ƒe ɣedzeƒekpa dzi. Enye kpe sesẽ ƒe to si dzɔ kã si kɔkɔ wu atsiaƒua meta 2,032.

Tso keke gbaɖegbe kee wobua Athos-toa be enye teƒe kɔkɔe. Wogblɔ le Helatɔwo ƒe gliwo me be to sia dzie nye mawuwo ƒe aƒeme hafi Olympus-to va zu woƒe aƒeme. Ɣeaɖeɣi le Konstantino Gã (ƒe alafa enelia M.Ŋ.) megbe la, Athos-to va zu teƒe kɔkɔe na Kristo sɔlemehawo. Wogblɔ le xotutu aɖe me be esi Maria “ɖetugbi nɔaƒe” la kple Yohanes Nyanyuigblɔla la wozɔ mɔ yina Kipro be yewoaɖasrã Lazarus kpɔ la, ahom sesẽ aɖe tu kpoyi ale be wova dze ɖe Athos-toa dzi. Le alesi toa nya kpɔ na ɖetugbia ale gbegbe ta la, ebia Yesu be wòatsɔe ana ye. Eyata wogava yɔ Athos-toa be “Ðetugbi Nɔaƒe Kɔkɔea ƒe Abɔ.” Le Byzantium ɣiyiɣia ƒe domedome la, wova yɔ to bliboa be To Kɔkɔe. Fiagã Constantine IX Monomachos tsɔ ŋkɔ sia heda asi ɖe edzi le se nu le ƒe alafa 11 lia M.Ŋ. ƒe domedome.

Alesi Athos-toa dzi yiyi sesẽe eye wòɖe ɖe agae ta la, enye teƒe si sɔ na amesiwo nɔa nuteteameɖokuigbe. Esi ƒeawo va nɔ yiyim la, Orthodɔks subɔsubɔhaawo me tɔ dovevienuwo de edzi—Helatɔwo, Serbiatɔwo, Romaniatɔwo, Bulgariatɔwo, Russiatɔwo, kple ame bubuwo—eye wotu saɖagaxɔ geɖe, kple woƒe sɔlemexɔwo eye wotso nɔƒewo. Wo dometɔ 20 li fifia.

Athos-toa Egbea

Egbea la, Athos nye nuto si le eɖokui si eye dukplɔse si dzi woda asi ɖo le ƒe 1926 me le wo si. Ŋutsu saɖaganunɔla siwo nɔ afima la dzi ɖe kpɔtɔ le ƒe geɖe siwo va yi me gake fifia la, wodzi ɖe edzi wu 2,000.

Agblewo, gbedoxɔwo, kple aƒewo le saɖagaxɔ ɖesiaɖe si. Saɖagaxɔmenɔlaawo ƒe gbedoxɔ si le kɔkɔƒe wu la le Karoúlia kɔƒe me le Athos-toa tame ʋĩ le tsutsuẽƒeawo dome. Afɔmɔ manyatalenuwo, kpewo, kple ga kɔsɔkɔsɔwo dzi ko wote ŋu tona blewublewu hafi ɖoa agblexɔ siwo le afisia gbɔ. Le Athos-toa dzi la, saɖagaxɔmenɔlawo kpɔtɔ wɔa woƒe gbesiagbe subɔsubɔkɔnu siwo li tso blema, eye wozãa Byzantium gaƒoɖokui (si dzi ŋkeke dzea egɔme tso ɣeɖoto) kple Julian ɣletigbalẽ (si do megbe ŋkeke 13 na Gregory ƒe ɣletigbalẽ).

Togbɔ be wogblɔ be tadeaguƒe sia ƒe “kɔkɔenyenye” tso nyɔnu gbɔ hã la, ƒe 1,000 sɔŋ la, eƒe ŋutsu saɖaganunɔlawo kple saɖagaxɔmenɔlawo meɖea mɔ be nyɔnu aɖeke naɖo afɔ teƒea o—eɖanye amegbetɔ alo lã o—ame tata alo ŋutsu maɖoge aɖeke hã mekpɔ mɔ ayi o. Nyitsɔ laa sia la, womegaléa se si ku ɖe ame maɖogewo kple lãnɔe aɖewo ŋu me ɖe asi sesĩe o, gake nyɔnuwo ya mekpɔ mɔ kura agogo Athos-toa ƒe ƒuta meta 500 gɔ̃ hã o.

“To Kɔkɔe” aɖe na Amesiame

Athos-to lae nye “to kɔkɔe” si dzi wòle be Kristotɔ mawuvɔ̃lawo nayi aɖade ta agua? Esi Yesu nɔ nu ƒom na Samaria-nyɔnu aɖe si xɔe se be Gerizim-to dzie wòle be woasubɔ Mawu le la, ena eme kɔ nɛ be womegale to ŋutɔŋutɔ aɖeke ɖo ge ɖi wòanye teƒe si woayi hafi ade ta agu na Mawu o. Yesu gblɔ be: “Gaƒoƒo gbɔna, esi menye [Gerizim] to sia dzi alo Yerusalem miado gbe ɖa na Fofo la le o.” Nukatae? “Mawue nye gbɔgbɔ, eye amesiwo le gbe dom ɖa nɛ la, ele be, woado gbe ɖa le gbɔgbɔ kple nyateƒe me.”—Yohanes 4:21, 24, míawoe te gbe ɖe edzi.

Esi nyagblɔɖila Yesaya nɔ nu ƒom tso míaƒe ŋkekea ŋu la, egblɔe ɖi be kpɔɖeŋu “Yehowa ƒe aƒe ƒe to” aɖe “akɔ ta agbɔ towo ŋu, eye wòaƒo togbɛwo ta” eye anyigba dzi dukɔwo katã aƒo zi ɖe eŋu le kpɔɖeŋu mɔ nu.—Yesaya 2:2, 3.

Wole ŋutsu kple nyɔnu siwo di be ƒomedodo nyui nanɔ yewo kple Mawu dome la kpem be woava subɔ Yehowa le “gbɔgbɔ kple nyateƒe” me. Ame miliɔn geɖe le xexeame godoo kpɔ mɔ si dzi woato ayi ‘Yehowa ƒe to’ la gbɔ. Wo kpakple ame bubuwo ƒe seselelãme sɔ kple Helatɔ senyala aɖe si gblɔ le Athos-toa ŋu be: “Nyemebui be xɔ aɖewo alo saɖagaƒewo mee woanɔ hafi anye gbɔgbɔmeme o” la tɔ.—Tsɔe sɔ kple Dɔwɔwɔwo 17:24.

[Aɖaka si le axa 31]

Nu Xɔasi Gbogbo Aɖewo Siwo Wodzra Ðo Ɣeyiɣi Didi Aɖe

Le ƒe alafa siwo va yi me la, ŋutsu saɖaganunɔla siwo le Athos-toa dzi la ƒo nu xɔasi gbogbo aɖewo, siwo ŋu asinuŋɔŋlɔgbalẽ siwo wobu be woade 15,000 kpe ɖo, eye ame aɖewo gblɔ be anye be woli tso ƒe alafa enelia me, si na be wova zu xexeame ƒe nu xɔasi vevitɔwo kekeake si woƒo ƒu ɖi. Agbalẽ xatsaxatsawo li, Nyanyuigbalẽ babla blibowo kple eƒe agbalẽ ɖeɖiwo li, psalmowo kple hadzigbalẽwo, hekpe ɖe blema nutata kple kpememewo, nukpakpɛwo, kple gakponuwo ŋu. Wobui be Hela asinuŋɔŋlɔgbalẽ siwo le xexeame katã ƒe memama ene ƒe akpa ɖeka le Athos-toa dzi, togbɔ be ehiã kokoko be woalé ŋku ɖe wo ŋu ade wo agbalẽ me hã. Ƒe 1997 ye nye zi gbãtɔ si ŋutsu saɖaganunɔlaawo ɖe mɔ be woaɖe yewoƒe nu xɔasiawo ɖe go woakpɔ le Thessaloníki.

[Nɔnɔmetata Tsoƒe si le axa 31]

Telis/Greek National Tourist Organization