Ŋutifafa Ŋutɔŋutɔ Kpɔkpɔ le Xaxanyigba Dzi

Nyatakaka aɖe gblɔ le keke ƒe 1969 me ke be: “Kɔmamawo ƒe ŋutasesẽ dziŋɔa le afiasiafi.” Ɣemaɣie Xaxa si nye tɔtɔɣi si me Northern Ireland le fifia la dze egɔme.

KƆMAMAWO ƒe ʋunyaʋunyawɔwɔ kple amewuwu va bɔ esi Protestant kple Katoliko tɔwo ƒe amewula, siwo nye “ame wɔadãwo le akpa eve” siwo nye dunyahehawo kple subɔsubɔhawo, siwo le hatsotso eve me le ʋiʋlim sesĩe be yewoakpɔ ŋusẽ le Ireland. The Irish Times ka nya ta be tso ɣemaɣi la, “wowu ame 3,600 kple edzivɔ eye wona ame akpe geɖe zu nuwɔametɔwo le ƒe 30 kloe ƒe ʋunyaʋunyawɔwɔ me.”

Gake menye ʋiʋli yeye esia nye o. Ele nu gblẽm le Ireland ƒe alafa geɖe. Wokpɔ eƒe nugblẽƒe vɔ̃ɖiwo le ƒe siwo va yi nyitsɔ laa me le Northern Ireland, gake vevesese kple masɔmasɔ si wòhe vɛ la gblẽ amewo ƒe agbe dome le Ireland katã.

Ƒe alafa ɖeka kple edzivɔ enye sia si Yehowa Ðasefo siwo le afisia le asi fiam kuxi siwo ɖe kpe na xaxanyigba sia gbɔ kpɔnu ŋutɔŋutɔ. Egbɔkpɔnu mae nye Mawu Fiaɖuƒe si le Yesu Kristo si me. (Mateo 6:9, 10) Esi Xaxa la dze egɔme le ƒe 1969 me la, Yehowa Ðasefo 876 ye nɔ Ireland. Fifia wosɔ gbɔ wu ame 4,500, eye wole hame siwo wu 100 me. Amesiwo dzudzɔ gomekpɔkpɔ le dunyahehe kple asrafohabɔbɔwo ƒe dɔwɔnawo me ƒe nuteƒekpɔkpɔ ʋɛ aɖewoe nye esiwo gbɔna.

“Ne Metsi la, Mava Nɔ IRA Me!”

Wonyi Michaela Katolikotɔe le Ireland Dukɔa me. Wofia nanee le Ireland ƒe ŋutinya kple aʋa si nɔ wo kple Britain dome ƒe alafa geɖe ŋu le suku. Esi wònye ɖevi la, fuléle kaɖikaɖi aɖe nɔ eme ɖe Englantɔwo ŋu, le esi wòkpɔe be wonye “Irelandtɔwo teɖeanyilawo” ta. Esime wòxɔ ƒe ewo la, egblɔ na mamaa be, “Ne metsi la, mava nɔ IRA (Ireland Dukɔa ƒe Asrafoha) me!” Egblɔ be: “Woƒo tome nam ɖe eta eye megaɖoa ŋku edzi vaseɖe egbe.” Emegbe eva se be ye tɔgbui nɔ Britain-srafowo dome le Xexemeʋa I wɔɣi. Gbeɖeka mamaa xe tɔgbuia ŋgɔ be IRA me tɔwo nagada tui o.

Ke hã esi Michael tsi la, edi be yeawɔ nane atsɔ akpe ɖe etɔ Katolikotɔwo ŋu le Northern Ireland. Egblɔ be: “Edze nam ɣemaɣi be IRA me tɔwo koe wɔa nu tsɔ kpena ɖe Katolikotɔwo ŋu le Northern Ireland.” Nukpɔsusu sia si wòbu be anye afɔɖeɖe nyui la ʋãe wòva zu IRA me tɔ eye wòxɔ hehe le aʋawɔnuwo zazã me. Protestant-srafoha siwo le Northern Ireland la da tu exɔlɔ̃ etɔ̃ woku.

Michael megava kpɔa dzidzɔ ɖe asrafohaawo ƒe hoʋiʋlia ŋu o, le kpɔɖeŋu me, fuléle sesẽ si nɔ asrafoha vovovoawo dome la ɖe fu nɛ. Esime wodee gaxɔ me le vodada siwo wòwɔ le IRA dɔwo wɔwɔ me ta la, edo gbe ɖa na Mawu be wòakpe ɖe ye ŋu yeake ɖe mɔ vavãtɔ si ɖo ta ŋutifafa kple nudzɔdzɔewɔwɔ gbɔ la ŋu. Le ɣeyiɣi aɖe megbe la, Yehowa Ðasefowo va eƒe aƒeme. Gake nazãbubu si nɔ eme tso ɖevime la zu mɔxenu nɛ. Englantɔwoe Ðasefoawo nye. Fuléle si xɔ aƒe ɖe eme vevie la na wòsesẽ nɛ be wòaɖo to wo. Egblɔ be: “Menye ɣesiaɣie medoa vivi ɖe wo ŋu o, gake woyi edzi nɔ vavam va nɔ nu ƒom nam, eye meva kpɔe be Mawu ƒe Fiaɖuƒeae aɖe dunyahehe kple hadome numadzɔmadzɔwɔwɔ siwo menɔ agbagba dzem be maɖe ɖa la ɖa.”—Psalmo 37:10, 11; 72:12-14.

Nɔnɔme sesẽtɔ do mo ɖa le fiẽ aɖe me esime Michael do go eƒe IRA asrafomegã, amesi gblɔ nɛ be, “Míedi be nàwɔ dɔ aɖe na mí.” Michael gblɔ be: “Mekpɔe be ele be mawɔ tiatia le afima le ɣeyiɣi ma tututu me, eyata megbɔ fu hegblɔ be, ‘fifia mezu Yehowa Ðasefo,’ togbɔ be nyemexɔ nyɔnyrɔ ɣemaɣi o hã. Menya be medi be mazu Yehowa subɔla.” Nya si amegã la tsɔ ɖo eŋu nam enye be: “Ele be míana nàtsi tre ɖe gli ŋu woada tu wò.” Togbɔ be wodo ŋɔdzi na Michael hã la, edo le IRA me. Nusi do ŋusẽe wòwɔ esia enye be ena Yehowa ƒe nyawo kpɔ ŋusẽ ɖe eƒe susu kple dzi dzi. “Le ɣeyiɣi aɖe megbe la, srɔ̃nye kple vinyewo dometɔ aɖewo hã tsɔ woƒe agbe ɖe adzɔgbe na Yehowa. Fifia míekpɔ ŋutifafa vavã le míaƒe dzime. Eye míada akpe na Yehowa ɣesiaɣi le esi wòɖe mɔ na mí míesrɔ̃ nyateƒea eye míele gome kpɔm le ŋutifafagbedasia gbɔgblɔ na amewo le xaxanyigba dzi me ta.”—Psalmo 34:15; 119:165.

Akpaɖekedzimademade Nye Ametakpɔkpɔ Ŋutɔŋutɔ

Patrick gblɔ be: “Kɔƒe mee menɔ tsi le Derry Nutoa me le Northern Ireland. Nyemenya naneke le nye ɖevime tsɔ wu Xaxa la o. Edze ƒã be nɔnɔme ma me nɔnɔ kpɔ ŋusẽ ɖe nye nukpɔsusu kple tamebubu dzi.” Dulɔlɔ̃ ƒe fuléle kple nazãbubu ɖe Britaintɔwo ŋu vevie na nukpɔsusu siwo gbɔ eme su Patrick si. Ekpɔ alesi subɔsubɔhawo me tɔ siwo le akpa evea dzi le dunyahehe ƒe ʋiʋlia me dana le Kristotɔwo ƒe gɔmeɖose kple gɔmeɖose vevi siwo ɖea amegbetɔ ƒe ʋuɖɔɖɔ fiana dzii. Esia na wòtrɔ megbe de subɔsubɔhawo, eye wòva zu mawudzimaxɔsela kple Marxtɔ zazɛ̃nyahela aɖe.—Tsɔe sɔ kple Mateo 15:7-9; 23:27, 28.

Patrick gblɔ be: “Nusiwo dzi megaɖoa ŋkui le nye ɖevime enye alesi Republican dunyaheha me tɔ siwo nye gamenɔlawo gbea nuɖuɖu le Dziehe. Woƒe nuwɔna kpɔ ŋusẽ ɖe dzinye vevie. Meɖo ŋku edzi be medoa Ireland aflagawo ɖe dzi eye meŋlɔa nya siwo tsia tre ɖe Britaintɔwo ŋu ɖe afisiafi si makpɔ. Esi mexɔ ƒe 15 pɛ ko la, menye dzɔla le amesiwo gbe nuɖuɖu la dometɔ ɖeka si ku ɖe gaxɔ me la ƒe kunuwɔwɔ me.” Abe alesi ame bubu geɖe siwo kpɔa gome le ʋunyaʋunya kple tɔtɔ siwo nɔ anyi ɣemaɣi me wɔna ene la, Patrick hã kpɔa gome le hoowɔwɔ kple tsitretsiɖeŋu ƒe gbɔlɔlɔwo me be yeatsɔ adi nusi wòbu be enye hadomenudzɔdzɔewɔwɔ kple tasɔsɔ. Dulɔ̃la zazɛ̃nyahela siwo dometɔ geɖe Britain-dziɖuɖua de gaxɔ me la va zu exɔlɔ̃ veviwo.

Patrick gblɔ be: “Le ganyawo ta meva nɔ England vie. Esime menɔ afima la, Britain-kpovitɔwo lé xɔ̃nye aɖe si va afima koŋ be yeava da bɔmb.” Togbɔ be dulɔlɔ̃ ganɔ Patrick me vevie hã la, eƒe nɔnɔme te tɔtrɔ. Eva nɔ ekpɔm be yeƒe nazãbubu ɖe Englandtɔwo katã ŋu la mesɔ koŋ o. Egblɔ be: “Meva nɔ ekpɔm hã be asrafohawo ƒe nuwɔnawo makpɔ kuxiawo gbɔ ahaɖe numadzɔmadzɔwɔwɔ si ɖea fu nam la ɖa gbeɖe o. Asrafohaŋgɔnɔlawo wɔa nu fitifiti ale gbegbe eye vodada bubuwo hã nɔ wo ŋu.”—Nyagblɔla 4:1; Yeremya 10:23.

Patrick va trɔ yi Northern Ireland mlɔeba. “Esi metrɔ gbɔ la, xɔ̃nye aɖe ɖem fia Yehowa Ðasefowo.” Patrick va kpɔ amegbetɔ ƒe dzrewɔwɔ kple masɔmasɔwo gbɔ kpɔnu ŋutɔŋutɔ le eƒe Biblia sɔsrɔ̃ kple Ðasefowo me. Ewɔ gbɔgbɔmeŋgɔyiyi kabakaba esi Biblia me gɔmeɖosewo va kpɔ ŋusẽ ɖe eƒe susu kple dzi dzi. (Efesotɔwo 4:20-24) Egblɔ be: “Fifia le esi teƒe be manɔ ɖoɖo wɔm ɖe dunyahenuɖoanyi si li la ɖeɖeɖa ŋu la, mele gbeƒã ɖem ŋutifafagbedasi si le Biblia me le dziɖuɖudzidelawo ƒe nuto si me nyemate kpɔ be mayi tsã o gɔ̃ hã me. Le nyateƒe me le ɣeyiɣi aɖe si me wonɔ kɔmamawo me tɔwo wum fũ le Belfast la, Yehowa Ðasefowo koe nye amesiwo te ŋu yia dziɖuɖudzidelawo kple dulɔ̃lawo ƒe nutowo me faa aʋawɔʋuwo manɔmee.” Abe Ðasefo bubu siwo le Northern Ireland le ɣeyiɣi sia me ene la, ekpɔe be akpaɖekedzimademade si nye nɔnɔme si nɔ Kristotɔ gbãtɔwo si la nye ametakpɔkpɔ ŋutɔŋutɔ. (Yohanes 17:16; 18:36) Eƒo eta be: “Enaa dzidzeme ame ŋutɔ be woakpɔ be Yehowa ato Yesu Kristo dzi ana dzɔdzɔenyenye vavãtɔ naxɔ aƒe ɖi eye ameƒomea me tɔwo katã nakpɔ ablɔɖe tso ameteteɖeanyi me.”—Yesaya 32:1, 16-18.

“Nye Tuwo Koe Nye Nye Ametakpɔnu”

William gblɔ be: “Dunyahehe kple subɔsubɔhawo ƒe mama la ƒe akpa kemɛa dzie menɔ tsi. Protestanttɔwo ƒe nazãbubuwo nɔ menye vevie eye meléa fu nusianu si ku ɖe Katoliko-ha ŋu kaɖikaɖi. Ne anya wɔ la, nyemegena ɖe Katolikotɔ ƒe fiase me gɔ̃ hã o, eye zi ɖeka koe meyi Ireland Dukɔa me kpɔ. Menɔ Protestanttɔwo ƒe ƒuƒoƒo kple habɔbɔ vovovo me, siwo ƒe ɖee nye Aŋutiɖiɖitɔwo ƒe Habɔbɔ—habɔbɔ si woɖo koŋ be wòakpɔ Protestant-ha la kple alesi emetɔwo nɔa agbee la ta.” Esime William xɔ ƒe 22 la, ege ɖe Ulster Asrafoha si nye Britain-srafowo ƒe akpa si me tɔwo nye wo detɔwo la me. Emetɔwo ƒe akpa gãtɔ nye Protestanttɔwo. Elɔ̃ faa be yeawu ame atsɔ aʋli yeƒe domenyinu ta. “Tu geɖe nɔ asinye eye ne ɖe wòvahiã la, nyemahe ɖe megbe le wo zazã ŋu o. Ðeka nɔa nye suɖui te le zãme.”

Gake tɔtrɔ aɖe va. “Esime mewɔ dɔ kple Yehowa Ðasefo aɖe le aƒe xoxo aɖe dzadzraɖo me la, meva nɔ ekpɔm be nu tɔxɛ aɖe le wo si. Nye hadɔwɔla sia ƒe nɔnɔme kpɔ ŋusẽ ɖe dzinye vevie. Esi míenɔ xɔa tum ɖekae la, mebiae nya geɖe siwo ɖea fu nam le Xaxa la, mawusubɔsubɔ, kple Mawu ŋu. Alesi wòɖo biabiawo ŋu kpuie eme kɔna la kpe ɖe ŋunye mekpɔ amesiwo tututu Yehowa Ðasefowo nye—wonye amewo ƒe ƒuƒoƒo si wɔ ɖeka, womewɔa ʋunyaʋunya o, womedea akpa aɖeke dzi le dunyahehe me o, eye lɔlɔ̃ na Mawu kple wo haviwo dzena le wo ŋu.”—Yohanes 13:34, 35.

Esi William dze Biblia sɔsrɔ̃ gɔme ɣleti ene ko la, ena woɖe eƒe ŋkɔ le subɔsubɔha kple dunyaheha siwo katã me wònɔ la me. Egblɔ be: “Esia nye afɔɖeɖe gã aɖe si mewɔ, elabena ehiã be maɖe asi le kɔnyinyi siwo ŋu medoa vivi ɖo tso ɖevime la ŋu.” Gake eƒe dodokpɔ sesẽtɔ nɔ ŋgɔ. “Le nɔnɔme siwo nɔ Northern Ireland ta la, mebu be nye tuwo koe nye nye ametakpɔnu. IRA asrafohawo bum ‘amesi dze na ku.’ Eyata esesẽ nam ŋutɔ be maɖe asi le aʋawɔnu siawo ŋu.” Gake vivivi la, Biblia me aɖaŋuɖoɖo, abe esi le Yesaya 2:2-4 ene, trɔ eƒe nukpɔsusu. Ekpɔe be Yehowae nye yeƒe ametakpɔla ŋutɔŋutɔ, abe alesi Wònɔ na ƒe alafa gbãtɔ me Kristotɔwo ene. William va ɖe asi le eƒe tuawo ŋu mlɔeba.

William gblɔ be: “Nusiwo doa dzidzɔ nam ŋutɔ la dometɔ ɖekae nye be fifia xɔlɔ̃wɔwɔ ƒe kadodo sesẽ aɖe va le mía kple amesiwo anye ne mabu tsã be wonye futɔ vɔ̃ɖiwo la dome. Azɔ hã edoa dzidzɔ nam ŋutɔ be mete ŋu tsɔa Biblia ƒe mɔkpɔkpɔgbedasia yina teƒe siwo ‘nyemeyina’ tsã o. Ŋugbledede le nusi nyateƒea wɔ na mía kple nye ƒomea ŋu na akpedada nɔa nye dzime na Yehowa kple eƒe habɔbɔa ɣesiaɣi.”

“Gɔmesese Aɖeke Menɔ Nɔnɔmeawo Ŋu O”

Nɔnɔme siwo to vovo na wo nɔewo kura mee wonyi Robert kple Teresa le. Robert gblɔ be: “Ƒome si me tɔwo nye Protestanttɔ akuakuawo mee metso. Ƒonyemetɔ aɖewo kpɔ gome le asrafohawo ƒe dɔwɔnawo me. Nye ŋutɔ mege ɖe Britain-srafowo ƒe Ulster Asrafoha me esime mexɔ ƒe 19. Nusi mewɔna ɣemaɣi koŋue nye be metsana le nuto si me Teresa nɔ me nɔa afima dzɔm. Le zã aɖe me la, wotrɔ tsaɖiɖidɔ si mewɔna ɣesiaɣi la hede dɔ bubuwo asi nam. Le zã ma me la, woda bɔmb ɖe Land-Rover si nye ʋu si me manɔ anɔ tsa ɖim hafi la me. Asrafo eve ku eye eve bubuwo xɔ abi.”

Robert va nɔ gɔmesese si le agbe ŋu la ŋuti bum. “Mexɔ Mawu dzi se, gake ne mekpɔ nusiwo le dzɔdzɔm le Northern Ireland la, edze nam be gɔmesese aɖeke menɔ nɔnɔmeawo ŋu o. Medze egɔme doa gbe ɖa ŋutɔŋutɔ na Mawu. Mebia Mawu nenye be eli ŋutɔŋutɔ, eye ne eli la, ne wòafia mɔ nyuitɔ si nu manɔ agbe ɖo lam. Meɖo ŋku edzi be megblɔ na Mawu be subɔsubɔha vavãtɔ ɖeka aɖe anɔ teƒe aɖe kokoko!” Le ŋkeke ʋɛ aɖewo megbe la, Yehowa Ðasefowo va Robert gbɔ eye wogblẽ agbalẽ aɖe ɖe egbɔ. Esi Robert gbɔ tso tsaɖiƒe le zã ma me la, edze exexlẽ gɔme hewu enu le fɔŋli ga atɔ̃ me. Egblɔ be: “Mede dzesii enumake be nyateƒea dze le eme, eye mekpɔe be nyaawo katã tso Biblia me tẽ.” (Timoteo II, 3:16) Edze Biblia sɔsrɔ̃ gɔme eye le ɣeyiɣi kpui aɖe megbe la, etsɔ eƒe agbe ɖe adzɔgbe na Mawu.

“Ðasefoawo Naa Ŋuɖoɖo Mí tso Biblia me Ɣesiaɣi”

Wonyi Teresa ya wòva zu Katolikotɔ eye dulɔlɔ̃ xɔ aƒe ɖe eme vevie. “Esi menye nyɔnuvi dzaa la, mege ɖe Sinn Féin habɔbɔ me.”b Teresa gblɔ be: “Esia na medo alɔ asrafohawo ƒe dɔwɔnawo. Menɔ eme míedi ga tsɔ do alɔ asrafowo ƒe avuwɔwɔwo. Menaa nyatakaka IRA me tɔwo le nusiwo yia edzi le míaƒe nutoa me ŋu. Mekpɔ gome le hoowɔwɔwo kple kpedada kpovitɔwo kple asrafo siwo nɔa tsa ɖim hã me.”

Esime Teresa ƒe ƒometɔ aɖewo te Biblia sɔsrɔ̃ kple Yehowa Ðasefowo la, eya hã di be yeanya nusi srɔ̃m wonɔ. Mawu ƒe Nya la kpɔ ŋusẽ ɖe edzi vevie. Egblɔ be: “Ðasefoawo naa ŋuɖoɖo mí tso Biblia me ɣesiaɣi. Ŋugbedodo si le Daniel 2:44 la ʋu ŋku na mí ŋutɔŋutɔ. Mekpɔe be Mawu ƒe Fiaɖuƒea dzie woato aɖe numadzɔmadzɔwɔwɔ siwo ŋu metsi tre ɖo vevie la katã ɖa.” Ŋutasẽnu siwo asrafohaawo wɔna la megava dzea eŋu kura o. Le kpɔɖeŋu me, Teresa mete ŋu se nusita ame ɖɔʋu si ƒe dɔme trɔna ɖe ame ŋu akpɔ dzidzɔ ne ese be ŋɔdzidonamelawo wu asrafowo alo ame bubuwo alo wɔ anyrã le wo ŋu eye wòzu nuxaxa kple dzodzodzoetsitsi na ƒomewo o. Eya hã xɔ Biblia me nyateƒea eye wòɖe mɔ Mawu ƒe gɔmeɖosewo trɔ eƒe tamebubu. Etsɔ eƒe agbe ɖe adzɔgbe na Mawu eye wòxɔ nyɔnyrɔ emegbe kpuie.—Lododowo 2:1-5, 10-14.

Teresa do go Robert esime wo ame evea woyi Yehowa Ðasefowo ƒe hame aɖe ƒe kpekpe le Northern Ireland. Teresa gblɔ be: “Esi medo go Robert gbã la, esesẽ nam be maxɔe ase be menɔ nu ƒom blewu le ŋutifafa me kple ame aɖe si mebu tsã be enye Britaintɔwo ƒe aʋawɔɖoɖowo dzidela. Mawu ƒe Nya kpe ɖe ŋunye nyateƒe be meɖe asi le fuléle kaɖikaɖi kple nazãbubuwo ŋu.” Le esi teƒe be mama nanɔ woa kple Robert dome le fuléle kple nazãbubu siwo tso kɔnyinyi kple nɔnɔme vovovo siwo me wonɔ tsi gbɔ la, wova kpɔe boŋ be yewoƒe nɔnɔme geɖe sɔ kple yewo nɔewo tɔ. Nɔnɔme siawo ƒe sesẽtɔ kekeake enye lɔlɔ̃ na Yehowa Mawu. Wova ɖe wo nɔewo. Fifia wole dɔ wɔm ɖekae le Mawu ƒe gbedasi si ku ɖe ŋutifafa vavãtɔ ŋu la gbɔgblɔ na amesiwo wonyi le nɔnɔme kple dzixɔse vovovowo me la me le xaxa ƒe anyigba sia dzi.

Nenema wòdzɔe le ame bubuwo hã gome le Ireland. Esi woɖo to Mawu ƒe Nya si tso gbɔgbɔ me ƒe nufiafiawo la, wosi tso amegbetɔwo ƒe “xexemenunya kple beble dzodzro” me. (Kolosetɔwo 2:8) Fifia woka ɖe Mawu ƒe ŋugbedodo siwo woŋlɔ ɖe Biblia me la dzi bliboe. Edzɔa dzi na wo be yewoaƒo nu tso etsɔme si me ŋutifafa anɔ—esi me kɔmamawo kple ame bubuwo ƒe ʋunyaʋunyawɔwɔ ƒomevi bubuwo manɔ kura o—ƒe mɔkpɔkpɔa ŋu na amesiame si asee.—Yesaya 11:6-9.

[Etenuŋɔŋlɔwo]

[Nɔnɔmetata siwo le axa 10]

Wotsɔ nutata ɖe gli ŋu kafu asrafohawo ƒe avuwɔwɔwo le Northern Ireland katã