Amekawoe Woafɔ Ðe Tsitre?
“Esia megawɔ mo yaa na mi o; elabena gaƒoƒo gbɔna, le esi me amesiwo katã le yɔdowo me la, woase eƒe gbe; eye . . . woado go.”—YOHANES 5:28, 29.
1. Nya vevi kae Mose se le ŋuve si nɔ bibim la me, eye amekae gahe susu yi nya mawo dzi ake emegbe?
NU WƆNUKU aɖe dzɔ ƒe 3,500 kple edzivɔwoe nye esi va yi. Mose nɔ blemafofo Yetro ƒe alẽwo kplɔm. Yehowa ƒe dɔla ɖe eɖokui fia Mose le dzobibi me le ŋuve aɖe me le Xoreb-toa gbɔ. Mose ƒe Agbalẽ Evelia ƒe nuŋlɔɖia gblɔ be: “Esi wòlé ŋku ɖe eŋu la, ekpɔ bena, ŋuve la le bibim, gake mele fiafiãm o.” Tete gbe aɖe yɔe tso ŋuve la me. Gbea gblɔ be: “Nyee nye fofowò ƒe Mawu, Abraham ƒe Mawu, Isak ƒe Mawu kple Yakob ƒe Mawu.” (Mose II, 3:1-6) Emegbe, le ƒe alafa gbãtɔ M.Ŋ. me la, menye ame bubu aɖekee gahe susu yi nya siawo dzi ake tsɔ wu Mawu ŋutɔ ƒe Vi, Yesu, o.
2, 3. (a) Mɔkpɔkpɔ kae le Abraham, Isak, kple Yakob lalam? (b) Nyabiabia kawoe fɔ ɖe te?
2 Yesu nɔ nu me dzrom kple Zadukitɔwo, siwo mexɔ tsitretsitsia dzi se o la, dometɔ aɖewo. Yesu gblɔ be: “Bena ame kukuwo atsi tre la, Mose hã gblɔe fia le ŋuve la gbɔ, esi wòyɔ Aƒetɔ la bena: ‘Abraham ƒe Mawu kple Isak ƒe Mawu kple Yakob ƒe Mawu.’ Ke Mawu la, menye ame kukuwo ƒe Mawu wònye o, ke boŋ ame gbagbewo tɔe; elabena wo katã wole agbe nɛ.” (Luka 20:27, 37, 38) Yesu to nya siawo gbɔgblɔ dzi ɖo kpe edzi be le Mawu ƒe nuŋububu nu la, Abraham, Isak, kple Yakob siwo ku xoxoxo la gakpɔtɔ le agbe le Mawu ƒe susu me. Abe alesi wònɔ le Hiob gomee ene la, wole woƒe ‘aʋamenɔɣi,’ woƒe ku me nɔnɔ, ƒe nuwuwu lalam. (Hiob 14:14) Woafɔ wo ɖe tsitre le Mawu ƒe xexeme yeyea me.
3 Ke ame biliɔn gbogbo siwo ku le amegbetɔƒomea ƒe ŋutinya katã me ya ɖe? Ðe woafɔ woawo hã ɖe tsitrea? Hafi míate ŋu akpɔ ŋuɖoɖo dzeameŋu na biabia ma la, mina míadi afisi amewo yina ne woku la le Mawu ƒe Nya me.
Afikae Ame Kukuwo Le?
4. (a) Afikae amewo yina ne woku? (b) Nukae nye Sheol?
4 Biblia gblɔ be ame kukuwo “menya naneke o.” Ne ame ku la, womewɔa fu aɖekee le dzomavɔ me o, mekpea fu aɖeke le Ŋutiklɔdzo me o, ke boŋ ɖeko wòtrɔna yia anyi gbɔ. Eyata Mawu ƒe Nya ɖo aɖaŋu na agbagbeawo be: “Nusianu, si wò asi ate ŋu awɔ la, wɔe kple wò ŋusẽ; elabena nuwɔwɔ alo tamebubu, sidzedze alo nunya mele tsieƒe, [alo Sheol], afisi yi ge nala o.” (Nyagblɔla 9:5, 10; Mose I, 3:19) “Sheol” nye nyagbe aɖe si ame geɖe mese kpɔ o. Enye Hebrigbe me nya aɖe si womenya afisi wòdzɔ tso la kaŋ o. Subɔsubɔha geɖe fia nu be ame kukuwo gale agbe, gake abe alesi Mawu ƒe Nya si tso gbɔgbɔ me ɖee fia ene la, ame kukuwoe amesiwo le Sheol la nye eye womeganya naneke o. Sheol enye yɔdo si ko me woɖia ame ɖo.
5, 6. Esi Yakob ku la, afikae wòyi, eye amekawo gbɔe wòyi le afima?
5 Nya “Sheol” dze zi gbãtɔ le Biblia me le Mose I, 37:35. Esi blemafofo Yakob bu be ye vi Yosef, si gbɔ melɔ̃a nu le o, ku la, egbe akɔfafa xɔxɔ henɔ gbɔgblɔm be: “Matsɔ konyifafa ayi vinye gbɔe le tsiẽƒe [alo Sheol].” Esi Yakob susui be ye via ku ta la, edzroe be yeaku ayi Sheol. Emegbe, Yakob ƒe vi tsitsiawo dometɔ asieke di be yewoakplɔ via suetɔ, Benyamin, ayi Egipte bene woakpɔ nuɖuɖu atsɔ ati dɔwuamea nui. Gake Yakob gbe hegblɔ be: “Vinye la mayi kple mi o, elabena nɔvia ku, eye eya ɖeka koe susɔ ɖi. Ne dzɔgbevɔ̃e aɖe adzɔ ɖe edzi le mɔa dzi la, ekema miawoe na nye amegã wɔtamee sia metsɔ konyifafa yi tsiẽƒee [alo Sheol].” (Mose I, 42:36, 38) Le nya eve siawo me la, woyɔ ku tɔ ɖe Sheol nu, ke menye ɖe agbenɔnɔ aɖe ƒomevi le ku megbe ŋu o.
6 Mose ƒe Agbalẽ Gbãtɔ me nuŋlɔɖia ɖee fia be Yosef va zu nuɖuɖu dzikpɔla le Egipte. Eyata, Yakob te ŋu yi afima ɖanɔ Yosef gbɔ le dzidzɔ me. Le ema megbe la, Yakob nɔ anyigba ma dzi vaseɖe esime wòtsi ŋutɔ xɔ ƒe 147 hafi ku. Le nusi wòbia be woawɔ na ye ne ye ku ta la, viawo tsɔ eƒe kukua yi ɖaɖi ɖe Kpeto, si le Maxpela me, le Kanaan-nyigba dzi. (Mose I, 47:28; 49:29-31; 50:12, 13) Eyata Yakob yi fofoa, Isak, kple tɔgbuia, Abraham, gbɔ le ku me.
‘Woyi Wo Tɔgbuiwo Gbɔ’
7, 8. (a) Afikae Abraham yi esime wòku? Ðe eme. (b) Nukae fia be ame bubuwo yi Sheol esime woku?
7 Esi Yehowa ɖo kpe eƒe nu si wòbla kple Abraham dzi do ŋgɔ hedo ŋugbe nɛ be eƒe dzidzime ava sɔ gbɔ la, egblɔ nusi adzɔ ɖe eya Abraham ŋutɔ dzi la nɛ. Yehowa gblɔ be: “Ke wò la, àyi ɖe tɔgbuiwòwo gbɔ le ŋutifafa me, eye àku amegã belibeli hafi àku.” (Mose I, 15:15) Eye nusia tututue dzɔ. Mose I, 25:8 gblɔ be: “Ke Abraham ku amegã ɖeɖi, eye agbenɔnɔ tii hafi wòku, eye wòyi ɖe tɔgbuiawo gbɔ.” Afikae tɔgbui siawo nɔ? Woyɔ tɔgbuitɔgbuiwo ŋkɔ tso keke Noa ƒe vi Sem dzi ke le Mose I, 11:10-26. Eyata amesiawo siwo dɔ alɔ̃ ɖe Sheol la gbɔe Abraham yi esime wòku.
8 Nyagbɔgblɔ si nye “yi tɔgbuiawo gbɔ” la dze enuenu le Hebri Ŋɔŋlɔawo me. Eyata susu le eme be míaƒo nya ta be Abraham ƒe vi Ismael kple Mose nɔvi, Aron, siaa hã yi Sheol esime woku, eye wole afima le tsitretsitsia lalam. (Mose I, 25:17; Mose IV, 20:23-29) Le esia ta, Mose hã yi Sheol, togbɔ be ame aɖeke menya afisi eƒe yɔdo le o hã. (Mose IV, 27:13; Mose V, 34:5, 6) Nenema kee Yosua, si va nye Israel kplɔla ɖe Mose yome, tsɔ kpe ɖe ame gbogbo aɖewo ŋu hã yi Sheol esime woku.—Ʋɔnudrɔ̃lawo 2:8-10.
9. (a) Aleke Biblia ɖee fia be Hebrigbe me nya “Sheol” kple Helagbe me nya “Hades” la fia teƒe ɖeka ma kee? (b) Mɔkpɔkpɔ kae li na amesiwo le Sheol, alo Hades, la?
9 Le ƒe alafa aɖewo megbe la, Dawid va zu fia ɖe Israel ƒe to 12-awo dzi. Esi wòku la, ‘emlɔ fofoawo gbɔ.’ (Fiawo I, 2:10) Ðe eya hã le Sheol mahã? Nukutɔe la, le ƒe 33 M.Ŋ. ƒe Pentekoste-ŋkekea dzi la, apostolo Petro ƒo nu tso Dawid ƒe ku ŋu heyɔ Psalmo 16:10 me nyawo gblɔ be: “Màgblẽ nye luʋɔ ɖe tsiẽƒe [alo Sheol] si me o.” Esi Petro gblɔ be Dawid gakpɔtɔ nɔ eƒe yɔdo me la, ezã nya mawo ke na Yesu heɖee fia be Dawid ‘kpɔe do ŋgɔ heƒo nu le Kristo ƒe tsitretsitsi la ŋuti bena, womegblẽe ɖe tsiẽƒe [alo Hades] o, eye eƒe ŋutilã hã mekpɔ nyunyɔ o. Nenem Yesu sia la Mawu fɔe ɖe tsitre, nusia ŋuti mí katã míenye ɖaseɖilawo le.’ (Dɔwɔwɔwo 2:29-32) Le afisia la, Petro zã “Hades,” si nye alesi woyɔa Hebrigbe me nya “Sheol” ɖe Helagbe mee. Eyata amesiwo ŋu wogblɔ le be wole Hades la le nɔnɔme si tututu me amesiwo wobe wole Sheol la ke me. Wole alɔ̃ dɔm, le tsitretsitsi lalam.
Ðe Ame Madzɔmadzɔwo le Sheol Mahã?
10, 11. Nukata míate ŋu agblɔ be ame madzɔmadzɔ aɖewo yi Sheol, alo Hades, esime woku?
10 Esi Mose kplɔ Israel-dukɔa dzoe le Egipte la, aglãdzedze aɖe va do mo ɖa le gbeadzi. Mose gblɔ na dukɔa be woaɖe wo ɖokui ɖa tso aglãdzelaawo ƒe amegãwo—Korax, Datan, kple Abiram—ŋu. Woaku ŋutasesẽtɔe. Mose ɖe eme be: “Ne ame siawo aku, abe alesi amewo katã kunae ene, eye woahe to na wo, abe alesi wohea to na amewo katãe ene la, ekema menye Yehowae dɔm o. Ke ne Yehowa awɔ nu masekpɔ aɖe, eye anyigba ake nu ami wo kple woƒe nuwo katã, eye woayi tsiẽ [alo Sheol] agbagbe la, ekema mianyae bena, ame siawoe do vlo Yehowa!” (Mose IV, 16:29, 30) Eyata eɖanye anyigba lae ke nu mi wo loo alo dzoe fiã wo abe alesi wòdzɔ ɖe Korax kple Lewi-vi 250 siwo nɔ megbe nɛ dzi ene o, aglãdzela siawo katã yi Sheol, alo Hades.—Mose IV, 26:10.
11 Salomo, amesi va ɖu fia ɖe Dawid yome la he to na Simei, amesi ƒo fi de Fia Dawid. Dawid de se be: “Megagbe tohehe nɛ o, elabena ame nyanu nènye, eye ànya nusi nàwɔe, be eƒe ta ɣi nayi tsĩe [alo Sheol] kple ʋu.” Salomo na Benaya kpɔ tohehe ma gbɔ. (Fiawo I, 2:8, 9, 44-46) Ame bubu si Benaya gawu ye nye Yoab, amesi nye Israel-srafomegã tsã. Eƒe ta ɣi ‘meyi tsĩe, alo Sheol, le ŋutifafa me o.’ (Fiawo I, 2:5, 6, 28-34) Kpɔɖeŋu siawo katã ɖo kpe Dawid ƒe ha si gbɔgbɔ ʋãe wòdzi ƒe nyateƒenyenye dzi be: “Ame vɔ̃ɖiwo kple dukɔ, siwo katã ŋlɔ Mawu be la, negbugbɔ yi tsiẽƒe [alo Sheol].”—Psalmo 9:18.
12. Amekae Axitofel nye, eye afikae wòyi esi wòku?
12 Axitofel ye nye Dawid ƒe aɖaŋuɖola. Wobua eƒe aɖaŋuɖoɖo abe Yehowa ŋutɔe ɖoe ene. Nublanuitɔe la, subɔla sia si dzi woka ɖo la va zu yomemɔfiala heyi ɖawɔ ɖeka kple aglãdzela ɖewo, si Dawid ƒe vi Absalom nɔ ŋgɔ na, siwo di be yewoamu fiaɖuƒea aƒu anyi la. Anye be ame tɔtrɔ tome sia ƒe nyae Dawid yɔ gblɔ esime wòŋlɔ bena: “Ðe wònye nye futɔe le vlo domem la, anye ne mado dzi atsɔe; ɖe wònye nye ketɔe le asi tɔm akɔ ɖe ŋunye la, anye ne masi abe le enu.” Dawid yi edzi be: “Saɖagatsi nedze wo dzi, woayi tsiẽ [alo Sheol] agbagbe, elabena vɔ̃ɖinyenye le wo nɔƒe, le woƒe dzi me.” (Psalmo 55:12-15) Esi Axitofel kple eƒe zɔhɛwo ku la, woyi Sheol.
Amekawoe le Gehenna?
13. Nukatae woyɔ Yuda be “tsɔtsrɔ̃vi” ɖo?
13 Tsɔ nusi me Dawid to la sɔ kple esi me Dawid Gãtɔ, Yesu, to. Kristo ƒe apostolo 12-awo dometɔ ɖeka, Yuda Iskariot, va zu yomemɔfiala abe Axitofel ene. Yuda ƒe amededeasi sia ya nye ŋkubiãnya wu Axitofel tɔ. Mawu ƒe Tenuvie Yuda de asi. Le gbe aɖe si Mawu ƒe Vi la do ɖa le eƒe anyigbadzisubɔsubɔdɔa ƒe nuwuwu me la, egblɔ le eyomedzelawo ŋu be: “Ŋkeke alesi meli kpli wo le xexeame la, nye la medzra wo ɖo ɖe wò ŋkɔ la me; amesiwo nètsɔ nam la, medzɔ wo ŋu, eye wo dometɔ aɖeke mebu o, negbe tsɔtsrɔ̃vi la koe, bena woawu ŋɔŋlɔ la nu.” (Yohanes 17:12) Le Yuda yɔyɔ be “tsɔtsrɔ̃vi” le afisia me la, Yesu fia be ne Yuda ku la, mɔkpɔkpɔ aɖeke megali nɛ be wòagbɔ agbe o. Metsi Mawu ƒe susu me o. Menye Sheol ye wòyi o, ke boŋ eyi Gehenna. Nukae nye Gehenna?
14. Nukae Gehenna tsitre ɖi na?
14 Yesu ƒo nu tsitre ɖe subɔsubɔhakplɔla siwo nɔ anyi le eŋɔlime ŋu elabena wowɔa woƒe nusrɔ̃lawo dometɔ ɖesiaɖe ‘Gehenna vie.’ (Mateo 23:15) Keke ɣemaɣi ke la, amewo nya nu tso Hinom Bali, si wowɔ wònye aɖukpo si dzi wotsɔa nuvlowɔla kuku siwo womebu be wodze be woaɖi bubutɔe o la ƒua gbe ɖo la, ŋu nyuie. Do ŋgɔ la, Yesu ŋutɔ ƒo nu tso Gehenna ŋu le eƒe Todzimawunya me. (Mateo 5:29, 30) Kpɔɖeŋugɔmesese si nɔ eŋu la me kɔ na eƒe nyaselawo. Gehenna tsitre ɖi na tsɔtsrɔ̃ ɖikaa si ŋu tsitretsitsi ƒe mɔkpɔkpɔ aɖeke mele o. Le Yuda Iskariot si nɔ anyi le Yesu ŋɔli megbe la, ɖe ame bubu aɖewo yi Gehenna esime woku le esi teƒe be woayi Sheol, alo Hades, mahã?
15, 16. Amekawoe yi Gehenna esime woku, eye nukatae woyi afima ɖo?
15 Wowɔ amegbetɔ gbãtɔwo, Adam kple Xawa, wode blibo. Nuvɔ̃ si wowɔ la nye nuɖowɔ. Agbe mavɔ loo alo ku mavɔ ye woɖo wo ŋkume. Wogbe toɖoɖo Mawu hewɔ ɖeka kple Satana. Esi woku la, womenɔ mɔ aɖeke kpɔm be Kristo ƒe tafevɔsa aɖe yewo o. Ke boŋ woyi Gehenna.
16 Adam ƒe vi gbãtɔ, Kain, wu nɔvia Habel eye wòsi yi ɖatsi gbedadaƒo. Apostolo Yohanes ɖɔ Kain be amesi “tso vɔ̃ɖitɔ la me.” (Yohanes I, 3:12) Eyata susu le eme be míaƒo nya ta be esi wòku la, eyi Gehenna abe edzilawo ke ene. (Mateo 23:33, 35) Vovototo kae nye esi le woa kple ame dzɔdzɔe Habel tɔ dome! Paulo ɖe eme hegblɔ kpee be: “Le xɔse me Abel tsɔ numeme, si nyo wu Kain tɔ la, na Mawu, nusi me woto ɖi ɖase nɛ be, ame dzɔdzɔe wònye; elabena Mawu ɖi ɖase le eƒe nunanawo ŋuti, eye le eya me, esi wòku hã la, egale nu ƒom.” (Hebritɔwo 11:4) Ẽ, fifi laa la, Habel le Sheol hele tsitretsitsi lalam.
Tsitretsitsi “Gbãtɔ” Kple esi “Nyo Wu”
17. (a) Le “nuwuɣi” sia me la, amekawoe yia Sheol? (b) Mɔkpɔkpɔ kawoe li na amesiwo yi Sheol kple na amesiwo yi Gehenna?
17 Ame siwo axlẽ nu sia la dometɔ geɖe anɔ nya biam wo ɖokui ku ɖe alesi nɔnɔmea anɔ na amesiwo le kukum le “nuwuɣi” sia me ŋu. (Daniel 8:19) Nyaɖeɖefia ta 6 ƒo nu tso sɔdola ene ƒe sɔdodo le ɣemaɣi me ŋu. Nukutɔe la, woyɔ sɔdola siawo ƒe mamlɛtɔ be Ku, eye Hades le eyome. Eyata, amesiwo ku kukpo le sɔdola siwo do ŋgɔ ƒe nuwɔnawo ta la dometɔ geɖe yina ɖe Hades, eye wole afima le tsitretsitsi ava Mawu ƒe xexeme yeyea me lalam. (Nyaɖeɖefia 6:8) Ekema, mɔkpɔkpɔ kawoe li na amesiwo le Sheol (Hades) kple amesiwo le Gehenna? Kpuie ko la, tsitretsitsie li na Sheol yilawo; tsɔtsrɔ̃ ɖikaa—agbemanɔmanɔ—ye li na Gehenna yilawo.
18. Mɔkpɔkpɔ kae le “tsitretsitsi gbãtɔ la” me?
18 Apostolo Yohanes ŋlɔ bena; “Yayratɔ kple kɔkɔetɔ enye amesi kpɔ gome le tsitretsitsi gbãtɔ la me; amesiawo dzi ku evelia mekpɔ ŋusẽ aɖeke ɖo o, ke woanye Mawu kple Kristo ƒe nunɔlawo, eye woaɖu fia kplii ƒe akpe ɖeka.” Amesiwo aɖu dzi kple Kristo la kpɔ gome le “tsitretsitsi gbãtɔ la” me, gake mɔkpɔkpɔ kae li na ameƒomea me tɔ mamlɛawo?—Nyaɖeɖefia 20:6.
19. Aleke “tsitretsitsi, si nyo wu” aɖe vi na ame aɖewoe?
19 Tso Mawu subɔla Eliya kple Elisa ƒe ŋkekeawo me la, woto nukunu si tsitretsitsia nye dzi gbɔ agbe amewo. Paulo gblɔ be: “Nyɔnuwo xɔ woƒe ame kukuwo agbagbe le tsitretsitsi me. Ke wowɔ fu ame bubuwo, eye wogbe xɔxɔ, bene woakpɔ tsitretsitsi, si nyo wu.” Ẽ, nuteƒewɔla siawo kpɔ mɔ na tsitretsitsi, si menye ƒe ʋɛ aɖewo koe woaganɔ agbe ko aku o, ke boŋ esi ana woanɔ agbe tegbee la! Ðikeke mele eme o be ema anye “tsitretsitsi, si nyo wu.”—Hebritɔwo 11:35.
20. Nuka mee nyati si kplɔe ɖo la adzro?
20 Ne míewɔ nuteƒe yiɖase ku me hafi Yehowa he nuɖoanyi vɔ̃ɖi sia va nuwuwui la, míate ŋu atsɔ kakaɖedzi akpɔ mɔ na “tsitretsitsi, si nyo wu,” enyo wu le susua nu be enye esi ana míava nɔ agbe tegbee. Yesu do ŋugbe be: ‘Esia megawɔ mo yaa na mi o; elabena gaƒoƒo gbɔna, le esi me amesiwo katã le yɔdowo me la, woase eƒe gbe; eye woado go.’ (Yohanes 5:28, 29) Míaƒe nyati si kplɔe ɖo la dzro taɖodzinu si le tsitretsitsia ŋu me yi ŋgɔe. Aɖe alesi tsitretsitsi mɔkpɔkpɔa doa ŋusẽ mí be míanye nuteƒewɔlawo hekpena ɖe mía ŋu be míatu ɖokuitsɔtsɔsavɔ ɖo la afia.
Èɖo Ŋku Wo Dzia?
• Nukatae woyɔ Yehowa be “ame gbagbewo” ƒe Mawu ɖo?
• Nɔnɔme ka mee amesiwo le Sheol la le?
• Mɔkpɔkpɔ kawoe li na amesiwo le Gehenna?
• Aleke “tsitretsitsi, si nyo wu” aɖe vi na ame aɖewoe?
[Nɔnɔmetata si le axa 15]
Abe Abraham ene la, amesiwo yi Sheol la le tsitretsitsi lalam
[Nɔnɔmetata siwo le axa 16]
Nukatae Adam kple Xawa, Kain, kple Yuda Iskariot yi Gehenna ɖo?